1, 2. (a) Rukundo n’okwikiriza biine kakwate ki? (b) Nituza kushwijuma bibuuzo ki?

NITUKUNDA Yehova “ahakuba We akabanza kutukunda.” (1 Yoh. 4:19) Omuringo gumwe ogu Yehova ayorekiremu ngu naatukunda, n’okuba niwe yaabanza kuturaganisa kutuha emigisha twamuhamiraho. Oku turikweyongyera kukunda Ruhanga waitu, nikwo turikweyongyera kwikiriza ngu ariho, kandi ngu naaha ebihembo abu arikukunda.​—Shoma Abaheburaayo 11:6.

² Yehova okuha abantu ebihembo nikyoreka eki ari n’eki arikukora. Okwikiriza kwaitu nikuba kutaijwire twaba tutarikuhamya ngu Yehova naija kuha ebihembo abo abarikufayo kumusherura, ahakuba “okwikiriza nikwo kuhamiza kimwe ebi twineho amatsiko.” (Heb. 11:1) Eego, okwikiriza nikutwariramu okugira amatsiko aha migisha ei Ruhanga arikuturaganisa. Kwonka shi, okugira amatsiko aha ki turikwija kutunga nikitugasira kita? Ni mu muringo ki ogu Yehova ahaire ebihembo abaheereza be, omu bwire bwa ira n’obunaku obu? Ka tureebe.

3. Ni kuraganisa ki okuri omu Malaki 3:10?

³ Yehova Ruhanga naaraganisa kuha ebihembo abaheereza be  abeesigwa, n’ahabw’ekyo naatushaba kukorerera emigisha ei arikwija kutuha. Yehova naagira ati: ‘Mungyeze, haza mureebe ku ntaabaigurira madarisa g’omu iguru, nkabashukaho omugisha, mukabura n’ah’okuguta.’ (Mal. 3:10) Nitworeka okusiima kwaitu twaikiriza okuraganisa kwa Yehova oku.

4. Ahabw’enki nitubaasa kugira obuhame omu bigambo bya Yesu ebiri omu Matayo 6:33?

⁴ Yesu akahamiza abakuratsi be ngu baayebembeza Obukama, Ruhanga naija kubaha ebirikwetengyesa. (Shoma Matayo 6:33.) Yesu akabaasa kugamba ekyo ahakuba akaba naamanya ngu Ruhanga naahikiiriza ebi arikuraganisa. (Isa. 55:11) Naitwe, nitubaasa kuhamya ngu twayoreka ngu nitwikiririza omuri Yehova twihire aha mutima, naija kuhikiiriza eki yaaraganiise eki: “Tindikutsigaho, kandi tindikuhemukaho na kakye.” (Heb. 13:5) Nitureeba ngu okuraganisa kwa Yehova oku kwine akakwate n’ebigambo bya Yesu ebiri omu Matayo 6:33.

5. Ahabw’enki oku Yesu yaagarukiremu Petero nikuhamya okwikiriza kwaitu?

⁵ Entumwa Petero akabuuza Yesu ati: “Itwe tukatsigaho byona, twakukuratira. Mbwenu turyatunga ki?” (Mat. 19:27) Yesu omu mwanya gw’okugambira kubi Petero ahabw’okubuuza ekibuuzo ekyo, akagambira abakuratsi be ngu nibaija kutunga ebihembo ahabw’okwefeerereza. Entumwa abeesigwa n’abandi nibaija kutegyeka na Yesu omu iguru. Kwonka na hati hariho ebihembo. Yesu akagira ati: “Omuntu weena owaatsigireho amaju, beene ishe, banyaanya, ishe, nyina, abaana nari ebibanja ahabw’eiziina ryangye, aryaheebwa nk’ebyo emirundi igana, kandi ahungure amagara agatahwaho.” (Mat. 19:29) Abeegi be bakaba nibaija kutunga emigisha mingi erikukira  ebintu byona ebi bayefeerereize. Mbwenu shi Abakristaayo bagyenzi baitu abari nka batataitwe, baamaawiitwe, beene tataitwe, banyaanyazi-itwe, n’abaana baitu, t’ab’omugasho okukira ekintu kyona eki twafeereirwe ahabw’Obukama?

6. Ahabw’enki Yehova naaraganisa kuha abaheereza be ekihembo?

⁶ Yehova omu kuraganisa abaheereza be ekihembo, naabahwera kugumisiriza baahikwaho embeera erikugyeza obwesigwa bwabo. Oyihireho emigisha y’eby’omwoyo ei turikutunga obunaku obu, abaheereza ba Yehova Ruhanga abeesigwa baine ekihika ky’okutunga emigisha erikukiraho omu biri by’omumaisho. (1 Tim. 4:8) Eego, itwe okugira obuhame ngu Yehova niwe “aha ebihembo abamusherura” nikiija kutuhwera kuguma tuhami omu kwikiriza.​—Heb. 11:6.

7. Ni mu muringo ogu amatsiko gari nk’ekitsibo?

⁷ Yesu, omu kwegyesa kwe okw’aha rushozi akagira ati: “Mushemererwe, mwesiime munonga; ahabw’okuba ebihembo byanyu biryaba bingi omu iguru; kandi nikwo baahiigire batyo baanabi abaabandize imwe.” (Mat. 5:12) Oyihireho abo abarikwija kutunga ekiconco ky’okuza omu iguru, amatsiko g’okutunga amagara agatahwaho omu nsi ebiro byona buzima n’enshonga erikutureetera ‘kushemererwa, n’okwesiima munonga.’ (Zab. 37:11; Luk. 18:30) Yaaba nituza kutuura omu iguru nari omu nsi, amatsiko agu twine ni “nk’ekitsibo ky’amagara, n’amatsiko agahamire kandi agatarikunyiganyigibwa.” (Heb. 6:17-20) Nk’oku ekitsibo kirikurinda emeeri kuguma ehami omu bwire bw’omuyaga, okugira amatsiko aha kihembo nikibaasa kutuhwera kuguma tuhami omu nyehurira, ebiteekateeko n’omu by’omwoyo. Amatsiko nigabaasa n’okutuhwera kugira amaani g’okugumisiriza oburemeezi.

8. Ni mu muringo ki ogu amatsiko gaine amaani g’okutuubya aha kwerarikirira?

⁸ Amatsiko g’omutaano agu twine gaine amaani g’okutuubya aha kwerarikirira obunaku obu. Nk’oku amajuta garikworwobya emibiri yaitu, ebiraganiso bya Ruhanga nibibaasa kwikaikanisa emitima yaitu. Ka nikituhuumuriza kwegyekyerera Yehova omutwaro gwaitu, turikumanya ngu ‘naaguma naatukwatirira’! (Zab. 55:22) Nitubaasa kugira obuhame ngu Ruhanga naabaasa kukora “ebirikukirira kimwe ebi tushaba nari ebi tuteekateeka.” (Efe. 3:20) Teekateeka ahari eki, titurikwija kutunga bingi nari bingi munonga kureka ebirikukirira kimwe!

9. Nitubaasa kugira tuta obuhame bw’okutunga emigisha ya Yehova?

⁹ Kubaasa kutunga ebihembo, twine kwikiririza kimwe omuri Yehova kandi tukoorobera obuhabuzi obu arikutuha. Musa akagambira eihanga rwa Israeli ati: “Ku orihurira eiraka rya Mukama Ruhanga waawe, waataho omutima kworobera ebiragiro ebyo byona ebi ndikukuragiira eri izooba, tiharibaho booro omuriimwe; ahakuba Mukama taribura kukuha omugisha omu nsi ei Mukama arikukuha kukubuura kuba obuhunguzi; ahabw’okuba Mukama Ruhanga waawe aryakuha omugisha, nk’oku yaakuraganiise.” (Bir. 15:4-6) Mbwenu shi oine obuhame ngu Yehova naija kukuha emigisha waagumizamu n’omuheereza omu bwesigwa? Buzima oine enshonga nungi kugira obuhame obwo.

10, 11. Yehova akaha ata Yosefu ebihembo?

¹⁰ Baibuli ekahandiikwa kutugasira. Erimu bingi ebirikworeka oku Ruhanga yaahaire emigisha abaheereza be abeesigwa. (Rom. 15:4) Yosefu akaba ari eky’okureeberaho kirungi. Omu kubanza, beene ishe bakamuguza nk’omuhuuku. Bwanyima, muka  mukama we yaamubeiherera kandi yaatwarwa omu kihome Misri. Kwonka shi akataanisibwa ahari Ruhanga we? Ngaaha buzima! Yehova ‘akaguma hamwe na Yosefu, yaamugirira embabazi. Akaba ari hamwe nawe, kandi ebi yaabaire akora byona, akaba abiha omugisha.’ (Kut. 39:21-23) Omu bureemezi obwo bwona, Yosefu akategyereza Ruhanga we.

¹¹ Ku haahingwireho emyaka, Faraho akaiha Yosefu omu kihome yaamuha obushoboorozi bw’okutegyeka omuri Misri. (Kut. 41:1, 37-43) Muka Yosefu ku yaazaire aboojo babiri, “ow’omujigaijo yaamweta Manaase, naagira ati: Ahakuba Ruhanga akanyebesa okufa kubi kwangye kwona n’eka ya tata yoona. Owa kabiri yaamweta Efuraimu, naagira ati: Ahakuba Ruhanga ampeereire oruzaaro omu nsi ei naareebeiremu enaku.” (Kut. 41:51, 52) Ahabw’okugira ngu Yosefu akahamira ahari Ruhanga, akatunga omugisha ogwarugiiremu Abaisraeli n’Abamisri kukiza amagara gaabo. Enshonga eri ngu, Yosefu akeetegyereza ngu Yehova niwe yaamuhaire ebihembo n’emigisha.​—Kut. 45:5-9.

12. Yesu akaguma ata ari omwesigwa obu yaabaire naagyezibwa?

¹² Yesu Kristo nawe akaguma naayorobera Ruhanga arikuraba omu bigyezo bingi, kandi akatunga ebihembo. Niki ekyamuhweraire? Ekigambo kya Ruhanga nikishoboorora ngu akeemera omuti gw’okubonaboneraho “ahabw’okushemererwa okwatairwe omu maisho ge, akagaya enshoni.” (Heb. 12:2) Yesu buzima akashemererwa ahabw’okweza eiziina rya Ruhanga. Okwongyera ahari ekyo, akasiimwa Ishe kandi yaatunga n’obujunaanizibwa bwingi. Baibuli neeyoreka ngu “hati ashutami aha rubaju rwa buryo rw’ekitebe ky’obukama bwa Ruhanga.” Kandi neegaruka eyoreka ngu ‘Ruhanga akaamukuza munonga, yaamuha eiziina eririkukira amaziina goona.’​—Fil. 2:9.

13, 14. Yehova naareeba ata ebi turikukora ahabwe?

¹³ Buzima nitubaasa kuhamya ngu Yehova naasiima okwehayo kwaitu kumuheereza. Naayetegyereza oburemeezi bwaitu n’okuteeyesiga kwona oku turikubaasa kuba twine. Naatugirira embabazi twaba twerarikirire ahabw’emirimo nari aha by’amagara gaitu nari twaba twine enyehurira ezirikuturemesa kuheereza gye. Nitubaasa kugira obuhame ngu Yehova naasiima ebi abaheereza be abeesigwa barikukora.​—Shoma Abaheburaayo 6:10, 11.

¹⁴ Ijuka ngu, nitubaasa kushaba ogwo “ohurira okushaba,” twine obuhame ngu naija kuta omutima aha birikutwerarikiriza. (Zab. 65:2) “Tataitwe ow’okusaasira, kandi Ruhanga ow’okuhuumuza kwona” naija kutuhwera kutebeekana omu biteekateeko n’omu by’omwoyo, obundi arikukoresa ab’eishe-emwe bagyenzi baitu. (2 Kor. 1:3) Yehova naashemererwa twagirira abandi embabazi. “Ogirira abooro embabazi, aba naaguza Mukama; aryamuzimuurira ebi yaakozire.” (Enf. 19:17; Mat. 6:3, 4) N’ahabw’ekyo, twahwera abaine oburemeezi tutarikweyendeza, Yehova naareeba ebikorwa byaitu birungi nk’eibanja eri aine kushashura. Kandi naaraganisa kutuha emigisha ahabw’ebikorwa byaitu eby’embabazi.

15. Ni migisha ki ei oyiniire ekihika? (Reeba ekishushani aha kutandika.)

¹⁵ Abakristaayo abashukirweho omwoyo gurikwera baine amatsiko g’okutunga ‘ekirunga ky’okuhikiirira, eki Mukama omucwi w’emanja ohikiriire ariha aha kiro ekyo.’ (2 Tim. 4:7, 8) Kwonka, tikirikumanyisa ngu toine mugasho ahari Ruhanga waaba otaine  matsiko g’okutuura omu iguru. Obukaikuru ‘bw’ab’entaama ezindi’ eza Yesu baine ekihika ky’okutunga ekiconco ky’amagara agatahwaho omu nsi ensya. Nibaija ‘kwesiima ahabw’okugira obusingye bwingi.’​—Yoh. 10:16; Zab. 37:11.

16. Ni kuhuumurizibwa ki okuri omu 1 Yohaana 3:19, 20?

¹⁶ Obumwe, nitubaasa kwehurira nk’abarikukora bikye, nari nitubaasa kwebuuza yaaba Yehova naasiima ebi turikukora. Nitubaasa n’okubanganisa yaaba tushemereire kutunga omugisha gwona. Ka tugume nitwijuka ngu “Ruhanga ni mukuru okukira emitima yaitu, kandi naamanya byona.” (Shoma 1 Yohaana 3:19, 20.) Twaheereza Yehova ahabw’okwikiriza n’ahabw’okumukunda, nitubaasa kugira obuhame ngu naija kutuha emigisha, n’obu twakuba nitureeba ngu ebi turikukora ni bikye.​—Mak. 12:41-44.

17. Ni migisha ki ei turikutunga hati?

¹⁷ Nangwa n’omu biro ebi eby’emperu eby’ensi ya Sitaane, Yehova naaha emigisha abaheereza be. Naahamya ngu abaheereza be baatunga embeera nungi y’eby’omwoyo, erimu eby’okurya by’omwoyo bingi. (Isa. 54:13) Nk’oku Yesu yaaraganiise, Yehova naatuha emigisha hati arikutuha eka ey’ab’eishe-emwe omu nsi yoona abaine rukundo. (Mak. 10:29, 30) Okwongyera ahari ekyo, abo abarikusherura Ruhanga nibatunga emigisha erikukirayo bagira obusingye, okumarwa n’okushemererwa.​—Fil. 4:4-7.

18, 19. Abajurizi ba Yehova nibatwara bata emigisha ei barikutunga?

¹⁸ Abajurizi ba Yehova omu nsi yoona buzima batungire ebirungi bingi kuruga ahari Yehova. Nk’eky’okureeberaho, Bianca kuruga Germany naagira ati: “Tindikubaasa kusiima Yehova ekirikumara ahabw’okumpwera n’okunguma aha rubaju buri izooba. Ensi erimu obutabanguko kandi ni mbi. Kwonka ku ndikuba ninkora hamwe na Yehova, nimpurira nyine oburinzi omu mikono ye. Buri kugira eki naayefeerereza ahabwe, naampa emigisha emirundi igana.”

¹⁹ Nari teekateeka ahari Paula kuruga Canada oine emyaka 70 y’obukuru orwaire orukizi. Naagira ngu n’obu embeera ei arimu eraabe neemuremesa kugyenda gye, ekyo tirikumanyisa ngu tarikubaasa kubuurira. Naagira ati: “Ninkoresa buri kagisha koona kubuurira, nk’okubuurira ndikukoresa esimu n’okubuurira kitaraariire. Kubaasa kugarurwamu amaani, nyine akatabo aku ndikuhandiikamu ebyahandiikirwe n’ebiteekateeko kuruga omu bitabo byaitu ebi ndikuguma ninshoma haahinguraho obwire. Ninkeeta ‘Akatabo Kangye Akarikumbaisaho.’ Twata omutima aha biraganiso bya Yehova, okuhwamu amaani nikuba okw’akaire kakye. Yehova ariho kutuhwera butoosha, n’obu twakuba turi mu mbeera ki.” Embeera ei orimu neebaasa kuba neetaana n’eya Bianca nari Paula. Kwonka, noobaasa kuteekateeka aha miringo ei Yehova akuhairemu emigisha na bagyenzi baawe. Ka ni kirungi kuteekateeka aha miringo ei Yehova arikukuha emigisha obunaku obu kandi n’oku araije kukuha ebihembo omu biro by’omumaisho!

20. Niki eki twiniire ekihika twagumizamu nituheereza Yehova twihire aha mutima?

²⁰ Ijuka ngu waashaba oyihire aha mutima kandi otarikwekyengyera, Ruhanga naija kukuha emigisha mingi. Noobaasa kuhamya ngu “ku muriheza kukora ebi Ruhanga akunda, [muryaheebwa] ebyaraganisiibwe.” (Heb. 10:35, 36) N’ahabw’ekyo gumizamu noohamya okwikiriza kwawe kandi okorere Yehova n’omutima gwawe gwona. Nitubaasa kukora eki, turikumanya ngu Yehova niwe arikuraganisa kutuha emigisha.​—Shoma Abakolosai 3:23, 24.