Okwerarikirira nikubaasa kureeta oburemeezi bw’amaani omu mutima. (Enf. 12:25) Oreerarikiriireho ekirenga? Haine obu oragizireho enyehurira ezi otarikubaasa kwemera? Ku kiraabe nikwo kiri, tori wenka. Baingi ahariitwe turareebereireho omurwaire, turafeereirweho omukundwa, turahikirweho ekihikiirizi, nari turahikirweho endiijo mbeera ekaturusya omu mubiri, ebiteekateeko, n’enyehurira. Kwonka shi niki ekirikubaasa kutuhwera kusingura okwerarikirira? a

Nitubaasa kwegyera bingi aha Mugabe Daudi aha bikwatiraine n’okwemera okwerarikirira. Akahikwaho embeera nyingi zigumire, kandi obumwe amagara ge gakaba gaba gari omu kabi. (1 Sam. 17:34, 35; 18:10, 11) Niki ekyahweraire Daudi kwemera okwerarikirira? Nitubaasa kumutooreza tuta?

Daudi akahikwaho embeera zigumire ezikurataine. Nk’eky’okureeberaho, noobaasa kuteekateeka aha kyamuhikireho obu yaabaire ahungire Omugabe Saulo omwinazi. Daudi n’abashaija be ku baabaire nibaruga omu hururu y’okurwana, bakatangaara kushanga abazigu batwaire buri kimwe eki baabaire baine, bookize amaju gaabo, kandi batwaire n’ab’amaka gaabo nk’enkwatwa. Daudi akakora ki? ‘Daudi n’abu yaabaire aine, bakaimutsya amaraka gaabo, baaborooga, okuhitsya obu baahikire ahu batakibaasiza kuborooga.’ Abashaija abu Daudi yaabaire naayesiga bakaba baarwongyerera maganya, baagira ngu “bamuteere amabaare.” (1 Sam. 30:1-6) Daudi hati akaba aine oburemeezi bw’emiringo eshatu: Eka ye ekaba eri omu kabi, akaba atiinire ngu abashaija be nibaija kumwita, kandi Omugabe Saulo akaba naakimusheerura. Teebereza okwerarikirira oku ashemereire kuba yaabaire aine!

Daudi akakuratsaho ki? Ahonaaho ‘Daudi akeehamiza omuri [Yehova] Ruhanga we.’ Eki shi akakikora ata? Akaba naakira kushaba Yehova kumuhwera, kandi ateekateeka n’aha bi amurabizemu enyima. (1 Sam. 17:37; Zab. 18:2, 6) Akareeba ngu nikyetengyesa kushaba Yehova obuhabuzi, n’ahabw’ekyo akamwebuuzaho eki araakore. Yehova ku yaamumanyiise eky’okukura, akakikora ahonaaho. Ekyarugiremu, Yehova akaha omugisha Daudi n’abashaija be baacungura ab’amaka gaabo n’ebintu byabo. (1 Sam. 30:7-9, 18, 19) Waayetegyereza ebintu bishatu ebi Daudi yaakozire? Akashaba Yehova kumuhwera, akateekateeka aha bi Yehova amurabizemu, kandi akata omu nkora obuhabuzi bwa Yehova. Nitubaasa kutooreza tuta Daudi? Yetegyereze emiringo egi eshatu.

1. Shaba. Waatandika kugira amaganya shaba Yehova obuhwezi n’obwengye. Noobaasa kutuubya aha kwerarikirira kwawe waamara obwire omu kushaba orikumugambira byona kuruga aha mutima. Nari noobaasa kushabira aha mutima omu bugufu, waaba nikyo orikubaasa kukora omu kaire ako. Buri kushaba Yehova obuhwezi, nooyoreka ngu noomwesiga nka Daudi owaagizire ngu Yehova “n’orukiri rwangye, orugo rwangye orugumire, kandi Omujuni wangye, Ruhanga wangye, orukiri rwangye rugumire oru mpungiramu.” (Zab. 18:2) Buzima okushaba nikukora? Munyaanyazi-itwe Kahlia ori payoniya naagira ati: “Naaheza kushaba, ningira obusingye. Okushaba nikumpwera kugira emiteekateekyere nk’eya Yehova, kandi  nyongyera kumwesiga.” Buzima, okushaba n’ekiconco eki Yehova atuhaire kutuhwera kwemera okwerarikirira.

2. Ijuka. Waijuka ebi Yehova akurabizemu, noobaasa kuteekateeka aha kugyezibwa oku waabaasize kwemera ahabw’obuhwezi bwa Yehova? Waijuka oku Yehova atwire naahwera abaheereza be, noohurira waahama, kandi nooyongyera kumugiramu obwesigye. (Zab. 18:17-19) “Nyine ahu ndikuhandiika eby’okugarukamu by’okushaba kwangye,” nikwo omureeberezi orikwetwa Joshua arikugira. “Eki nikimpwera kwijuka kyenyini eki naashabire Yehova, kandi akampa kyenyini eki naamushabire.” Eego, twateekateeka aha bi Yehova atukoreire enyima, nitugira amaani gw’okwemera okwerarikirira.

3. Ta omu nkora. Tutakacwiremu eky’okukora omu mbeera yoona, twine kushwijuma Ekigambo kya Ruhanga ekirimu obuhabuzi oburikwesigwa. (Zab. 19:7, 11) Baingi bashangire ngu baacondooza aha kyahandiikirwe nanka, nikibahwera kumanya oku kirikubakwataho. Omureeberezi orikwetwa Jarrod naashoboorora ati: “Okucondooza nikumpwera kwetegyereza obushonshorekye bw’ekyahandiikirwe n’okumanya eki Yehova ariyo naangambira. Obwo ebi ndikwega nibimpika aha mutima, reero ngyendera aha buhabuzi bwe.” Twasherura obuhabuzi bwa Yehova omu Byahandiikirwe kandi tukabuta omu nkora, nituba tweteekateekire gye kwemera okwerarikirira.

Daudi akaba naamanya ngu kubaasa kwemera okwerarikirira, Yehova aine kumuhwera. Akaba naasiima obushagiki bwa Yehova ekyamuhigire kugira ati: “Ahabw’okuhwerwa Ruhanga wangye nimbaasa kuguruka orugo. Niwe Ruhanga onzirika amaani.” (Zab. 18:29, 32) Nitubaasa kuteekateeka ngu oburemeezi obu twine buri nk’ebisiika ebi tutarikubaasa kuharamba. Kwonka Yehova yaatuhwera, nitubaasa kuharamba ebigyezo ebiri nk’ekisiika! Eego, twashaba Yehova kutuhwera, tukaijuka byona ebi atukoreire, kandi tukata omu nkora obuhabuzi bwe, nitubaasa kuhamya ngu naija kutuha amaani n’obwengye kubaasa kusingura okwerarikirira!