Felisa: Nkakurira omu ka erikukunda ediini. Nangwa n’abanyabuzaare bangye 13 bakaba bari abeebembezi b’ediini y’Abakaturiki. Nangwa na Paapa John Paul II akaikiriza ngu mutabani wa nyinento maawe owaabaire naayegyesa omu ishomero ry’Abakaturiki, atwarwe nk’orikwera. Eka yaitu ekaba etari ngaiga. Tata akaba ari omuheesi, maawe ari omuhingi. Niinye naabaire ndi mukuru aha baana munaana.

Obu naabaire nyine emyaka 12, hakabaho orutaro rw’enganda omuri Spain. Bwanyima y’orutaro orwo, tata akatwarwa omu kihome. Ahabw’okugira ngu akaba atarikushagikira kimwe gavumenti eyaabaire neyebemberwa baangambanyeenka, ekyo kikabakora kubi. Maawe kikamugumira kureeberera eka yaitu, n’ahabw’ekyo munywani we akamuha obwengye ngu ayohereze barumuna bangye bashatu, Araceli, Lauri, na Ramoni omu kigo kya Bilbao, Spain. Ahakuba okwo bakaba batarikubaasa kwitwa enjara.

Araceli: Nyowe nkaba nyine emyaka 14, Lauri akaba aine emyaka 12, kandi Ramoni akaba aine emyaka 10 obwire obwo, kandi kikaba kigumire munonga kututaanisa n’eka yaitu. Omuri Bilbao tukaba nitukora omurimo gw’okuboneza. Bwanyima y’emyaka ebiri, abasisita bakatuhindura baatutwara omu kigo kihango eky’omuri Zaragoza ekyabaire nikireeberera abantu abakuzire munonga omu myaka. Tukaba nituboneza ekiyungu, omurimo ogwaibaire gugumire aha minyeeto.

Felisa: Barumuna bangye ku baagiire omuri Zaragoza, maawe n’omwebembezi w’ediini owaabaire ari maarimi, bakacwamu ngu naanye nze kukora aha kigo nikyo kimwe. Bakaba nibateekateeka ngu naafuruka ninyija kuba ntakireeba omwojo owaabaire naayoreka ngu naankunda.  Ahabw’okugira ngu nkaba ndi omwishiki orikukunda ediini, nkaba ninkunda kutuura omu kigo. Nkaba ninkira kuza omuri Misa buri izooba, kandi nkaba naateekateekireho kuba omumiisani nka munyaanyazi wa maawento owaabaire ari omuri Africa.

Abasisita bakaba batarikumpiga kuheereza Ruhanga omu mahanga agandi, kandi omu kigo nkaba nimpurira ndi nk’ori omu kihome. N’ahabw’ekyo, bwanyima y’omwaka gumwe, nkacwamu kugaruka omu ka kureeberera maarimi. Oyihireho okukora emirimo y’aha ka, nkaba nguma ningarukagarukamu Esapuri ndi nawe buri mwabazyo. Kandi nkaba ninteereza ebimuri omu kelezia ndikuhuunda n’ebishushani by’abarikwetwa abarikwera hamwe n’ekya Mariamu.

Araceli: Bwanyima y’obwire bukye, embeera zaitu omu kigo zikahinduka. Ku twaherize kuteera ebiragaano by’okubanza, abasisita bakatutaanisa. Ramoni akatwarwa Zaragoza, Lauri baamutwara Valencia, kandi nyowe baatwara Madrid, ahu naateereire ebiragaano omurundi gwa kabiri. Omu kigo ekya Madrid bakaba nibaraazamu abeegi, abakaikwire, n’abandi bagyenyi, n’ahabw’ekyo hakaba hariyo emirimo mingi. Nkaba ninkora omu irwariro ry’ekigo.

Okuba ow’amazima, nkaba ninteekateeka ngu okuba omusisita nikirugamu ebirungi. Nkaba nyine ekihika ky’okushoma Baibuli nkagyetegyereza. Kwonka tihaine n’omwe owaabaire naagamba ahari Ruhanga nari Yesu, kandi tukaba tutarikukoresa Baibuli. Nkeega Oluratini, naayega ebirikukwata aha barikwera, n’okuramya Mariamu. Buri kimwe kikaba kigumire turikukoresa amaani maingi.

Nkatandika kwerarikirira, kandi nkagamba n’omusisita owaabaire naatukurira. Nkamugira ngu tikirikukora makuru nyowe kukora munonga ngu abandi batungye sente, kandi obwo abazaire bangye barikwetenga obuhwezi bwangye. Akankingirana omu kashengye, arikuteekateeka ngu eki nikiija kumpwera kuhindura aha miteekateekyere yangye, kandi kindemese kuruga omu kigo.

Abasisita abandi bakanyiha omu kashengye ako emirundi eshatu, barikwenda kureeba ku ndaabe mmaririire kugyenda. Ahabw’okureeba mmaririire kugyenda, bakanshaba ngu mpandiikye nti: “Ndiyo ningyenda ahakuba ninkunda okuheereza Sitaane omu mwanya gw’okuheereza Ruhanga.” Ekyo kikantangaaza, kandi n’obu ndaabe naabaire niinyenda kugyenda kuruga omu kigo, nkaba ntarikubaasa kuhandiika ebigambo ebyo. Nkacwamu kushaba ngu ncucuke ebibi byangye, kandi owaabaire naancucukisa nkamugambira ekyabaireho. Akakora entebeekanisa ngu baanfurure baantware omu kigo ekya Zaragoza. Ku naamazireyo ameezi makye, bakanyikiriza kugyenda. Bwanyima y’obwire bukye, Lauri na Ramoni nabo bakaruga omu kigo.

Felisa: Ku haahingwireho obwire, nkashwerwa naaza Cantabria. Nabwo nkaba ninkiza omuri Misa butoosha,  kandi aha Sande emwe nkahurira barikuranga ekirango aha kituuti. Omwegyesa aine ekiniga akagira ati: “Mureebe akatabo aka!” obwo arikworekyereza aha katabo The Truth That Leads to Eternal Life. Akagumizamu yaagira ati: “Ku baraabe baakuhaire akatabo aka, kampe nari okanagye!”

Nkaba ntaine katabo ako, nkaba ninkenda ahonaaho. Bwanyima y’ebiro bikye, Abajurizi ba Yehova babiri bakaiguza aha rwigi rwangye reero baampa akatabo “akatarikwikirizibwa.” Omu kiro ekyo kyenyine, nkakashoma, kandi abakazi abo ku baagarukire, nkaikiriza ngu baanyegyese Baibuli.

Ahonaaho amazima gakampika aha mutima. Okukunda munonga ediini kukarugamu okukunda munonga Yehova, n’okugira omujinya gw’okubuurira. Nkabatizibwa 1973. N’obu ndaabe naabaire ntaine migisha mingi y’okugambira ab’omu ka yaitu amazima, nkaba ninteeraho kukikora nk’oku ndikubaasa. Nk’oku naaba naashobooroire aha kutandika, bakaba nibahakanisa munonga enyikiriza zangye, okukira munonga murumuna wangye Araceli.

Araceli: Ebintu bibi ebyampikireho omu kigo bikandeetera kugira ekiniga kingi. Kwonka, nkagumizamu ninza omuri Misa aha Sande, kandi nkaba nguma ningaragaruka omu Sapuri. Nkaba nkiine ekyetengo ky’amaani eky’okwetegyereza Baibuli, kandi nkashaba Ruhanga kumpwera. Kwonka mukuru wangye Felisa akangambira aha nyikiriza ye nsya, akangambira ari nk’orikumbeihabeiha naateekateeka ngu naazaana. Nkangira kimwe kwikirizana nawe.

Bwanyima y’emyaka mikye, nkagaruka omuri Madrid kukora kandi naashwerwa. Ku haahingwireho obwire, nkatandika kugira okubanganisa. Nketegyereza ngu abantu abaabaire nibakira kuza omuri Misa, bakaba batarikugyendera aha biri omu bitabo by’Engiri. N’ahabw’ekyo nkarekyera aho kuza omu kelezia. Nkarekyera aho kwikiririza omu barikwera, okucucuka ebibi, n’omuriro ogutaraara. Kandi nkeyihaho ebishushani byona. Nkaba ntarikumanya yaaba ndiyo ninkora ekintu ekihikire. Nkahwamu amaani, kwonka nkaguma ninshaba Ruhanga nti: “Niinyenda kukumanya. Mpwera!” Nkaijuka ngu Abajurizi ba Yehova bakaba nibaija aha rwingi rwangye emirundi mingi, kwonka ndikwanga kubaigurira. Nkaba ntarikwesiga diini yoona.

Omu myaka ya 1980, murumuna wangye Lauri akaba naatuura France kandi Ramoni arikutuura omuri Spain, kandi Abajurizi ba Yehova bakatandika kubeegyesa  Baibuli. Nkaba ninteekateeka ngu bahabire nk’oku Felisa yaabaire ahabire. Bwanyima, omukazi orikwetwa Angelines owaabaire ari mutaahi wangye, akahinduka munywani wangye. Nawe akaba ari Omujurizi wa Yehova. Emirundi mingi, Angelines na iba bakaba banshaba ngu baanyegyese Baibuli. Bakeetegyereza ngu n’obu ndaabe naabaire nimbanganisa, kwonka nkaba niinyenda kumanya ebirikukwata ahari Baibuli. Nkarugaho naabagira nti: “Kare. Kwonka ninyija kwikiriza kwega naimwe ku ndaabe ninza kukoresa Baibuli yangye yonka,” arikumanyisa envunuura ya Nácar-Colunga.

Felisa: Obu naabatizibwa omuri 1973, omuri Santander orurembo rukuru rwa Spain, hakaba harimu Abajurizi ba Yehova nka 70. Tukaba twine ekicweka kihango eky’okubuuriramu, n’ahabw’ekyo tukaba tugyenda omu baasi, kandi bwanyima tukatandika kukoresa emotoka enkye kubaasa kubuurira omu kicweka ekyo kyona. Tukaba tuza ekyaro aha kyaro okuhitsya obu twabuuriire ebyaro bingi omu kicweka ekyo.

Kumara emyaka mingi, ntungire omugisha gw’okwegyesa abantu baingi Baibuli, kandi 11 aharibo bakabatizibwa. Baingi ahari abo bakaba bari Abakaturiki. Ahabw’okugira ngu naanye enyima nkaba ninkunda munonga ediini y’Abakaturiki, nkamanya ngu nyine kuba omugumisiriza kandi orikwetegyereza. Nkamanya ngu nibeetenga obwire kubaasa kureka enyikiriza zaabo ezigumire, kandi Baibuli n’omwoyo gwa Yehova ogurikwera gukabahika aha mutima gukabahwera kureeba ngu n’amazima. (Heb. 4:12) Ibanyi orikwetwa Bienvenido, owaabaire ari omuporiisi, nawe akabatizibwa omuri 1979, kandi maawe akatandika kwega Baibuli atakafiire.

Araceli: Abajurizi ba Yehova obu baatandika kunyegyesa Baibuli nkaba ntarikubeesiga. Kwonka obwire ku bwagumire nibuhinguraho, ekiniga kyangye kikatandika kutuuba. Ekyanshemeize aha Bajurizi ba Yehova n’okugira ngu bakaba nibakora ebirikuhikaana n’ebi barikwegyesa. Omu mwanya gw’okuguma nyine okubanganisa nkagira okwikiriza, kandi eki kikanshemeza munonga. Kandi n’abataahi bakaba bangira bati: “Araceli, gumizamu nootwaza otyo!”

Niinyijuka ndikushaba nti: “Yebare Yehova, ahabw’okutandeka n’okumpa emigisha mingi y’okutunga eki naabaire ninsherura, okumanya Baibuli.” Nkashaba mukuru wangye Felisa kunsaasira ahabw’ebigambo birikusaasa ebi naabaire naamugambiire. Omu mwanya gw’okutongana, tukatandika kugaaniira ahari Baibuli. Nkabatizibwa omuri 1989 nyine emyaka 61.

Felisa: Hati nyine emyaka 91, ndi efaakazi kandi tinyine maani nk’agu naabaire nyine. Kwonka ninshoma Baibuli buri izooba, ninza omu nteerane naaba nyine amaani, kandi ninkunda kwejumba omu kubuurira nk’oku ndikubaasa.

Araceli: Ahabw’okugira ngu nkaba ndi omusisita, ninkunda kubuurira abeegyesa b’ediini n’abasisita abu ndikubugana omu kubuurira. Mbaasize kubatsigira ebitabo bingi, kandi ningaaniira nabo omu muringo ogurikushemeza. Niinyijuka omwebembezi omwe w’ediini ou naagaaniire nawe emirundi mingi reero akangira ati: “Araceli, buzima ninyikirizana naiwe, kwonka shi nimbaasa kuza nkahi aha myaka yangye egi? Obu ndikwebembera n’ab’omu ka yangye ninza kubagambira ki?” Nkamugarukamu nti: “Kandi Ruhanga naija kugamba ki?” Akazongoza omutwe aine enaku, kwonka obunaku obwo akaba ataine bumanzi bw’okugumizamu naasherura amazima.

Ninyijuka ekintu ekyakizireyo kunshemeza. N’obu ibanyi yaangira ngu naayenda kugyenda naanye omu nteerane. N’obu araabe yaabaire aine emyaka erengire 80, akaba atarikwosha nteerane. Akagumizamu naayega Baibuli kandi yaaba omubuurizi otakabatiziibwe. Ninyijuka ebintu birungi obu naabaire nimbuurira hamwe nawe. Akafa harikuburayo ameezi abiri akabatizibwa.

Felisa: Ekintu ekikizireyo kundeetera okumarwa, n’okureeba barumuna bangye bashatu, abaabaire nibaampiiganisa omu kubanza, barikuhinduka barumuna bangye omu by’omwoyo. Ka tushemereirwe munonga kuba hamwe, kugamba hamwe ahari Ruhanga waitu, Yehova, n’Ekigambo kye! Nyowe na murumuna wangye, tukarugaho twaza omu kuramya kumwe. *