1-2. Kurugiirira ahari Zaaburi 34:8, nitubaasa kumanya tuta oburungi bwa Yehova?

KA TUGIRE ngu baakuha ekintu eki otakaryahoga. Noobaasa kubanza kukyetegyereza, kukinukaho, kumanya ebirungo ebi kirimu, nari kubuuza abandi abarikukimanya. Kwonka, omuringo gwonka gw’okuhamya yaaba kinuzire n’okukirozaho okeerebera.

² Nitubaasa kumanya ebirikukwata aha burungi bwa Yehova turikushoma Baibuli, ebitabo byaitu, n’okuhurira ebi abandi barikugamba aha migisha ei Yehova abahaire. Kwonka nitwija kwemanyira gye oku Yehova ari murungi ‘twaroza’ aha burungi bwe. (Shoma Zaaburi 34:8.) Ka tuteekateekye aha ky’okureeberaho eki. Ka tugire ngu nooyenda kwejumba omu buheereza obw’obutwire, kwonka kubaasa kuhika aha kigyendererwa ekyo, nikibaasa kutwetengyesa kworobya embeera zaawe. Obundi nitubaasa kuba tushomire emirundi mingi aha kuragaanisa kwa Yehova ngu twayebembeza eby’Obukama, naija kutuha ebikuru eby’okutubaisaho, beitu nitubaasa kuba tutakareebire ekiragaaniso ekyo nikihikiirira. (Mat. 6:33) N’ahabw’ekyo, twaba nitwikiririza omu kuragaanisa kwa Yesu, nitutuubya aha nshohoza yaitu, obwire obu turikumara aha murimo gw’okwebaisaho, kandi tute omutima aha buheereza bwaitu. Twatwaza tutyo, buzima nitwija kwereebera oku Yehova arikutuha eby’okutubaisaho. Obwo nituba ‘twaroza’ aha burungi bwa Yehova.

3. Kurugiirira ahari Zaaburi 31:19, ni baahi barikugasirwa omu burungi bwa Yehova?

³ Yehova “ni murungi ahari boona,” otwariiremu n’abatarikumumanya. (Zab. 145:9; Mat. 5:45) Kwonka okukira munonga abarikukunda Yehova kandi abarikumuheereza n’amagara gaabo goona, naabaha emigisha mingi. (Shoma Zaaburi 31: 19.) Yetegyereze bimwe aha bintu birungi ebi Yehova atukoreire.

4. Yehova naayoreka ata oburungi bwe abarikutandika kumwirira haihi?

⁴ Buri murundi ogu turikugyendera aha bi twegire ahari Yehova, nitureeba oku turikugasirwa. Ku twayegire ebirikumukwataho kandi tukamukunda, akatuhwera kusingura emiteekateekyere n’ebikorwa ebitarikumushemeza. (Kol. 1:21) Kandi ku twayehaireyo ahari Yehova tukabatizibwa, tukoongyera kureeba oburungi bwe turikugira omuntu murungi w’omunda n’okuba banywani be.​—1 Pet. 3:21.

5. Yehova naatworeka ata oburungi bwe omu buheereza bwaitu?

⁵ Nitugumizamu kureeba oburungi bwa Yehova twaba nitwejumba omu buheereza. Ori omuntu w’enshoni? Baingi aha Bajurizi ba Yehova nikwo bari. Obundi otakabaire omuheereza wa Yehova, okaba otarikuteekateeka ngu noija kwiguza aha nju y’omuntu ou otarikumanya, reero omugambire obutumwa obutarikumanywa baingi. Kwonka hati ekyo nookikora butoosha. Kandi, Yehova akuhweraire kukunda omurimo gw’okubuurira! Oreebire oku Yehova arikukushagika omu miringo mingi. Akuhweraire kuguma otuurize waaba noobuurira abarikutwaza kubi. Kandi akuhweraire kwijuka n’ekyahandiikirwe kyenyini eki orikubaasa kukoresa kugaaniira na nyineeka orikwenda kumanya. Kandi Yehova akuhaire amaani kugumizamu noobuurira waaba nookora omu kicweka ekirimu abantu abatarikwefeerayo.​—Yer. 20:7-9.

6. Okutendekwa oku Yehova arikutuha nikworeka kuta oburungi bwe?

⁶ Kandi Yehova naatworeka oburungi bwe arikututendeka omu buheereza. (Yoh. 6:45) Omu ruteerane rw’aha gati ya saabiiti, nituhurikiza eby’okugaaniiraho omu kubuurira, kandi nituhigwa kubikoresa omu buheereza. Omu kubanza, nitubaasa kutiina kukoresa omuringo musya gw’okubuurira, kwonka twateeraho kugukoresa noobaasa kushanga gurikukora omu kicweka kyaitu. Kandi nituhigwa omu nteerane z’ekibiina n’empango kwejumba omu miringo endiijo y’okubuurira ei tutakoresahoga. Kandi eki nikibaasa kukwetengyesa kutsigaho embeera nungi ezi tumanyiriire, kwonka twakikora nituha Yehova eky’okwihiriraho kutuha emigisha. Ka tushwijume emwe aha migisha erikuruga omu kujumbura emiringo misya y’okuhamu Yehova ekirikukirayo oburungi, n’obu twakuba turi mu mbeera ki. Reero bwanyima nituza kureeba oku turikubaasa kwongyera aha buheereza bwaitu.

7. Ni migisha ki ei turikutunga twateeraho kwongyera aha buheereza bwaitu?

⁷ Nitwongyera kwirira haihi Yehova. Teekateeka aha ky’okureeberaho ky’omureeberezi omwe orikwetwa Samuel, * orikuheereza n’omukazi we omuri Colombia. Bakaba bari baapayoniya omu kibiina kyabo, kwonka bakaba nibenda kwongyera aha buheereza bwabo barikuhwera omu kicweka ahu ababuurizi barikwendwa munonga. Kubaasa kuhika aha kigyendererwa ekyo, bakaba baine kugira ebi baayefeerereza. “Tukagyendera aha biri omu Matayo 6:33, kandi twarekyera aho kugura ebintu ebitarikwetengyesa,” nikwo Samuel arikugira. “Kwonka ekyatugumiire munonga kucwamu n’okutsigaho enju yaitu. Ekaba eyombekirwe nk’oku turikwenda, kandi ekaba etariho eibanja.” Omu buheereza bwabo obusya, bashangire ngu nibabaasa kubaisibwaho kimwe kya mukaaga eky’esente ezi baabaire nibatunga omu kubanza. “Tureebire oku Yehova arikutwebembera n’oku arikugarukamu  okushaba kwaitu,” nikwo Samuel arikugira. “Nitumanya ngu Yehova naatwesiimisa kandi atworekire ngu naatukunda omu muringo gw’omutaano.” Noobaasa kwongyera aha buheereza bwawe? Kyaba nikwo kiri, noobaasa kugira obwesigye ngu noija kwirira haihi Yehova, kandi ngu naija kukureeberera.​—Zab. 18:25.

8. Niki eki orikwegyera aha bi Ivan na Viktoria baagambire?

⁸ Nitutunga okushemererwa omu kubuurira. Yetegyereze eki Ivan na Viktoria baapayoniya omuri Kyrgyzstan, barikugamba. Bakaguma niboorobya embeera zaabo kugira ngu babaase kuhwera omu buheereza butari bumwe, otwariiremu n’okwombeka. Ivan naagira ati: “Tukaba nitwejumbira kimwe omuri buri kwombeka kwona. N’obu turaabe twabaire nituba turuhire aha muheru gw’eizooba, tukaba nitumanya ngu tukoreise amaani gaitu kushagika omurimo gw’Obukama. Kandi abanywani abu twatungire n’embeera ezi twarabiremu bikatureetera okushemererwa.”​—Mak. 10:29, 30.

9. Munyaanyazi-itwe oine embeera zigumire abaasize kukora ki kwongyera aha buheereza bwe, kandi atungire birungi ki?

⁹ Nitutunga okushemererwa omu buheereza n’obu twakuba twine emirabanamu. Nk’eky’okureeberaho, Mirreh, omukaikuru efaakazi omu burengyerwa izooba bwa Africa, akahuumura emirimo y’obushaho yaaba payoniya. Mirreh aine endwara y’obuhurizi bw’omu magufa, kandi naabaasa kumara eshaaha nk’emwe arikubuurira enju aha nju. Kwonka naamara obwire bwingi arikubuurira omu myanya y’orweteeraine. Aine baingi b’okugarukira n’abeegi ba Baibuli, kandi abamwe naabegyesezesa aha simu. Niki ekyahigire Mirreh kwongyera aha buheereza bwe? “Omutima gwangye gwijwire rukundo ei nyiniire Yehova na Yesu Kristo. Kandi ninkira kushaba Yehova kumpwera kukora nk’oku ndikubaasa omu buheereza.”​—Mat. 22:36, 37.

10. Nk’oku kiri omuri Yohaana 6:45, abarikuteeraho kwongyera aha buheereza bwabo Yehova naabahwera ata?

¹⁰ Yehova naayongyera kututendeka. Kenny, payoniya orikuheereza omuri Mauritius, ashangire ngu eki kihikire. Ku yaayegire amazima, akaruga aha yunivasite, yaabatizibwa yaaza omu buheereza obw’obutwire. Naagira ati: “Niinteeraho kugyendera aha bigambo bya nabi Isaaya, owaagizire ati: ‘Ndi aha, ba niinye waatuma.’” (Isa. 6:8) Kenny ahweraire omu kwombeka ebyombeko by’Obukama n’omu kuvunuura ebitabo by’ekibiina omu rurimi rwe orw’enzaarwa. “Nkeega omwoga ogwabaire nigwetengyesa omu kuhikiiriza gye obujunaanizibwa bwangye,” nikwo Kenny arikugira. Kwonka nkeega ekirikukira aha kukora gye omurimo ogwo. Naayongyeraho ati: “Nkamanya obweremwa bwangye n’emitwarize ei naabaire nyine kugira, kubaasa kuba omuheereza murungi wa Yehova.” (Shoma Yohaana 6:45.) Ahabw’enki otarikushwijuma embeera zaawe okareeba yaaba noobaasa kwongyera kutendekwa nari kwegyesibwa Yehova?

11. Banyaanyazi-itwe omuri South Korea bakateeraho kukora ki kubaasa kwejumba omu buheereza, kandi harugiremu ki? (Reeba ekishushani ekiri aha kipampagare.)

¹¹ Nangwa n’Abajurizi ba Yehova abaheereize obwire buraingwa nibagasirwa omu kutendekwa, baateeraho kuza omu buheereza busya. Omu bwire bw’ekigwererezi kya COVID-19, abareeberezi ab’ekibiina omuri South Korea bakahandiika bati: “Bamwe abaabaire nibateekateeka ngu tibarikubaasa kwejumba omu kubuurira ahabw’amagara mabi, hati nibahurizana n’abandi aha vidiyo. Banyaanyazi-itwe bashatu abari omu myaka ya 80, bakeega omuringo musya ogu, baatandika kwejumba omu buheereza haihi buri izooba.” (Zab. 92:14, 15) Nooyenda kwongyera aha buheereza bwawe  kubaasa kuroza aha burungi bwa Yehova? Teekateeka aha ki orikubaasa kukora ekiraakuhwere kuhikiiriza ekigyendererwa ekyo.

12. Yehova naaraganisa ki abo abarikumwesiga?

¹² Yega kwesiga Yehova. Naaturaganisa kutuha emigisha twamwesiga kandi tukamuha erikukirayo oburungi. (Mal. 3:10) Munyaanyazi-itwe kuruga Colombia orikwetwa Fabiola akareeba oku Yehova arikuhikiiriza okuragaanisa oku omu mbeera ze. Akaba naayenda kuba payoniya ahonaaho aherize kubatizibwa. Kwonka, iba n’abaana baabo bashatu bakaba nibabaisibwaho entaatsya ye. N’ahabw’ekyo obwire bw’okuhuumura omurimo gwe ku bwahikire, akashaba munonga Yehova kumuhwera. Naagira ati: “Ku orikuhuumura aha murimo nikikira kutwara obwire kukora aha bihandiiko by’okushashurwa akasiimo, kwonka ebyangye bikarabamu omu kwezi kumwe kwonka. Ka kyabaire nikitangaaza!” Bwanyima y’ameezi abiri nkaba payoniya. Hati ari omu myaka ya 70, kandi atwire ari payoniya emyaka erengire 20. Omu myaka egyo yoona, abaasize kuhwera abantu munaana kuhika aha kubatizibwa. Naagira ati: “N’obu ndaabe obumwe niimpurira nyine amaani makye, Yehova naampwera buri izooba kuguma niimuheereza.”

13-14. Ni by’okureeberaho ki ebirikubaasa kutuhwera kwesiga Yehova n’okwongyera aha buheereza?

¹³ Yegyera ahari abo abaayesigire Yehova. Baibuli erimu eby’okureeberaho bingi eby’abantu abaayejumbiire kimwe omu kuheereza Yehova. Obwire bwingi, abaheereza ba  Yehova abo nibo baabaire baine kubanza kugira eki baakora batakatungire emigisha kuruga ahari Yehova. Nk’eky’okureeberaho, Abrahamu ku yaarugire owe “atarikumanya ei arikuza” Yehova nibwo yaamuha omugisha. (Heb. 11:8) Bwanyima ya Yakobo kufukaana na maraika nibwo yaahairwe omugisha gw’omutaano. (Kut. 32:24-30) Obu eihanga rya Israeli ryabaire riri hakye kutaaha omu Nsi Eyaaraganisiibwe, abanyamurwa ku baaribatsire omu Mugyera Yorudani abantu nibwo baabaasa kwambuka.​—Yos. 3:14-16.

¹⁴ Kandi noobaasa kwegyera aha by’okureeberaho by’Abajurizi ba Yehova ab’obunaku obu abarikumwesiga kubahwera kwongyera aha buheereza bwabo. Nk’eky’okureeberaho, ow’eishe-emwe orikwetwa Payton n’omukazi we, Diana, nibakunda kushoma ebirikukwata aha b’eishe-emwe na banyaanyazi-itwe aboongyeire aha buheereza bwabo, nk’abarikugambwaho omu bicweka ebikurataine “Bakeehayo Beekundiire.” * Payton naagira ati: “Ku turikuba nitushoma ebirikubakwataho, nitwehurira nk’abarikureeba omuntu orikurya ekiihuro kinuzire. Obwire obu turikumara nitureeba nikwo turikwongyera kugira ekihika ‘ky’okuroza kureeba oburungi bwa Yehova.’” Aha muheru, Payton na Diana bakaza kuheereza ahu barikwenda munonga ababuurizi. Waashomire ekicweka eki? Kandi shi waareebire vidiyo Witnessing in Isolated Territory​—Australia na Witnessing in Isolated Territory​—Ireland eziri aha jw.org? Vidiyo ezi nizibaasa kukuhwera kusherura oburyo bw’okwongyera aha buheereza bwawe.

15. Abanywani barungi nibabaasa kutuhwera mu muringo ki?

¹⁵ Toorana abanywani barungi. Nikibaasa kutworobera kurya eby’okurya bisya twamara obwire n’abantu abarikubikunda. Nikyo kimwe, twakwatanisa n’abarikwebembeza okuheereza Yehova, nitubaasa kuteeraho kwongyera aha buheereza bwaitu. Kent na Veronica bareebire eki kirikubaho. “Banywani baitu n’ab’eka yaitu bakatuhiga kuteeraho kuza omu buheereza busya,” nikwo Kent arikugira. “Tukeetegyereza ngu twanywana abarikuta eby’Obukama omu mwanya gw’okubanza, nitutunga obumanzi bw’okutandika obuheereza busya.” Kent na Veronica ni baapayoniya omuri Serbia.

16. Nk’oku eky’okureeberaho kya Yesu omuri Luka 12:16-21 kirikworeka, ahabw’enki twine kuba tweteekateekire kugira ebi twayefeerereza?

¹⁶ Gira ebi waayefeerereza kubaasa kuheereza Yehova. Titwine kutsigaho buri kimwe eki turikukunda kubaasa kushemeza Yehova. (Mub. 5:19, 20) Kwonka, twaba tutongyeire aha buheereza bwaitu ahabw’okutenda kwefeerereza ebi turikukunda, nitubaasa kukora enshobe nk’ey’omushaija omu ky’okureeberaho kya Yesu owaakozire n’amaani kwekanyisiza eby’obugaiga kwonka akeehuzya Ruhanga. (Shoma Luka 12:16-21.) Ow’eishe-emwe orikwetwa Christian, orikutuura omuri France, naagira ati: “Nkaba ntarikukoresa gye obwire bwangye kuheereza Yehova n’okureeberera ab’eka yangye.” We n’omukazi we bakacwamu kuba baapayoniya. Kwonka kubaasa kuhikiiriza ekigyendererwa ekyo, bakaba baine kutsigaho emirimo yaabo. Kubaasa kwebaisaho, bakatandika kukora omurimo gw’okuboneza, kandi baayega kumarwa na bikye. Mbwenu shi okwefeerereza okwo kukarugamu ebirungi? Christian naagira ati: “Hati nitukunda obuheereza bwaitu, kandi nitushemererwa kureeba abeegi ba Baibuli n’abu turikugarukira barikwega ahari Yehova.”

17. Niki ekirikubaasa kuturemesa kwejumba omu buheereza busya?

 ¹⁷ Ba oyeteekateekire kuza omu buheereza busya. (Byak. 17:16, 17; 20:20, 21) Shirley, payoniya kuruga United States, akabaasa kukora empinduka omu buheereza bwe omu bwire bw’ekigwererezi kya COVID-19. Omu kubanza, akeeziringa kuteeraho kubuurira arikukoresa esimu. Omu saabiiti y’okutaayaaya kw’omureeberezi orikutaayaayira ebibiina akatendekwa omuringo musya gw’okubuurira, reero yaaguma naagukoresa butoosha. Naagira ati: “Omu kubanza, nkaba ntiinire, kwonka hati ningukundira kimwe. Nituhika aha bantu baingi okukira obu twabaire nitubuurira enju aha nju!”

18. Niki ekirikubaasa kutuhwera kusingura emirabanamu twaba nituteeraho kwongyera aha buheereza bwaitu?

¹⁸ Taho ekigyendererwa kandi okihikiirize. Twaba twine oburemeezi, nitushaba Yehova kutuhwera kuteekateeka gye aha ki twine kukora kubaasa kusingura oburemeezi obwo. (Enf. 3:21) Sonia, payoniya orikuheereza omu guruupu erikukoresa orurimi rwa Romany omuri Europe, naagira ati: “Ninkunda kuhandiika ebigyendererwa bingi aha rupapura, reero nduhanika ahu kyorobi kurureeba. Aha kabada yangye nyineho ekishushani ky’enguuto ibiri zirikutaanuukana. Ku ndikuba niinyenda kucwamu, nnindeeba aha kishushani ekyo, kuhamya yaaba eki ndikuza kucwamu nikimpwera kuhikiiriza ekigyendererwa kyangye.” Sonia naateeraho kuguma aine emiteekateekyere mirungi aha buremeezi bwe. “Buri mbeera nsya neebaasa kugyeragyeranisibwa n’ekisiika ekirikundemesa nari nk’orutiindo orurikumpwera kuhika ei ndikuza, kwonka nikirugiirira aha miteekateekyere yangye.”

19. Tushemereire kumariirira kukora ki?

¹⁹ Yehova naatuha emigisha omu miringo mingi. Nitubaasa kworeka ngu nitusiima emigisha egyo turikukora kyona eki turikubaasa kumuhimbisa. (Heb. 13:15) Ekyo nikibaasa kutwariramu okusherura emiringo misya ey’okwongyera aha buheereza bwaitu, reero kitubaasise kwija kutunga emigisha endiijo. Buri izooba, ka tuteereho kusherura emiringo ‘y’okuroza, kureeba [Yehova] ku ari murungi.’ Reero nitwija kuba nka Yesu, owaagizire ati: ‘Eby’okurya byangye nikwo kukora eki owaantumire arikukunda n’okuhikiiriza omurimo gwe.’​—Yoh. 4:34.