1. Ni baahi abaahweraire omu kutandikaho ekibiina omuri Filipi?

OBU entumwa Paulo, Siila, Luka, na Timoseo baahika omuri Rooma eyaabaire neetegyeka Filipi, bakashangayo abantu baingi abaabaire nibakunda obutumwa bw’Obukama. Ab’eishe-emwe aba abeeziriki bakahwera omu kutandikaho ekibiina, kandi abeegi baatandika kuteeranira hamwe, obundi omu ka y’Omukristaayo efura orikwetwa Ludia.​—Byak. 16:40.

2. Obu ekibiina kya Filipi kyabaire kiherize kutandikwaho kikahikwaho embeera ki egumire?

² Ekibiina ekyo ekyabaire kiherize kutandika ahonaaho kikahikwaho embeera egumire. Sitaane akareetera abazigu b’amazima kuhakanisa omurimo gw’okubuurira ogw’ab’eishe-emwe abo abeesigwa. Paulo na Siila bakakwatwa, baateerwa enkoni, kandi baakomwa. Bwanyima y’okurekurwa kuruga omu kihome, bakataayaayira abeegi basya baabagumya. Reero Paulo, Siila, na Timoseo bakaruga omu rurembo orwo, haagumayo Luka. Mbwenu shi ekibiina kisya eki kikaba kiine kutwaza kita? Yehova akabahwera arikukoresa omwoyo gwe gurikwera, reero baagumizamu nibamuheereza omu bwesigwa. (Fil. 2:12) Paulo ka yaabaire aine enshonga nungi eyaamureeteire kubeesiimisa!

3. Nk’oku kiri omu Abafilipi 1:9-11, ni nshonga ki ezi Paulo yaagambireho omu kushaba?

³ Bwanyima y’emyaka nka ikumi, Paulo akahandiikira ekibiina kya Filipi ebaruha. Waaba nooshoma ebaruha egyo, noobaasa kurahuka kureeba rukundo ei Paulo yaabaire ainiire ab’eishe-emwe bagyenzi be. Akahandiika ati: “Mbainiire orushusho mwena omu mbabazi za Kristo Yesu.” (Fil. 1:8) Akabahandiikira  ngu akaba naabashabira. Akashaba Yehova kubahwera ngu rukundo yaabo eyeyongyere kukanya, kumanya ebirikukira obukuru, kutagira kamogo, kwetantara kuteeza abandi entsibo, n’okugumizamu nibaana ebyana by’okuhikiirira. Hatariho kubangaanisa noikiriza ngu hati nitubaasa kugasirwa omu bigambo bya Paulo ebirikuruga aha mutima. Ka tuteereho kushoma ebi Paulo yaahandiikiire Abafilipi. (Shoma Abafilipi 1:9-11.) Bwanyima nituza kushwijuma enshonga ezi yaagambire, kandi tureebe oku turikubaasa kugyendera ahari buri emwe aharizo.

4. (a) Kurugiirira ahari 1 Yohaana 4:9, 10, Yehova akooreka ata ngu naatukunda munonga? (b) Twine kukunda Ruhanga kirikwingana ki?

⁴ Yehova akooreka rukundo mpango ei atwiniire arikwohereza Omwana we omu nsi kufa ahabw’ebibi byaitu. (Shoma 1 Yohaana 4:9, 10.) Rukundo egyo neetuhiga kumukunda. (Rom. 5:8) Twine kukunda Ruhanga kirikwingana ki? Yesu akagarukamu ekibuuzo ekyo obu yaagambira Abafarisaayo ati: “Kunda [Yehova] Ruhanga waawe n’omutima gwawe gwona, n’amagara gaawe goona, n’obwengye bwawe bwona.” (Mat. 22:36, 37) Titurikwenda kukunda Ruhanga n’omutima ogwebaganiisemu. Omu mwanya gw’ekyo, nituba nitwenda ngu rukundo ei tumwiniire eyeyongyere kuhama buri izooba. Paulo akagambira Abafilipi ngu rukundo yaabo eine ‘kuguma neeyongyera kukanya.’ Nitubaasa kukora ki kwongyera kuhamya rukundo ei twiniire Ruhanga?

5. Rukundo yaitu neebaasa kwongyera eta kukanya?

⁵ Nituba twine kumanya Ruhanga kubaasa kumukunda. Baibuli neegira eti: “Otagira rukundo tamanya Ruhanga; ahakuba Ruhanga aba rukundo.” (1 Yoh. 4:8) Entumwa Paulo akooreka ngu rukundo ei twiniire Ruhanga neeyongyera kuhama, twayongyera kumanya Ruhanga n’okumwetegyereza. (Fil. 1:9) Obu twabanza kwega Baibuli, tukakunda Yehova n’obu turaabe twabaire tutarikumanya bingi aha mitwarize mirungi ye. Reero oku twayongyeire kwega ebirikumukwataho, rukundo ei tumwiniire nayo yaayeyongyera. Niyo nshonga ahabw’enki nitutwara okweyegyesa Baibuli n’okugiteekateekaho nk’ekintu kikuru munonga.​—Fil. 2:16.

6. Kurugiirira ahari 1 Yohaana 4:11, 20, 21, rukundo yaitu neebaasa kwongyera eta kukanya?

⁶ Rukundo mpango ei twiniire Ruhanga neetuhiga kukunda ab’eishe-emwe bagyenzi baitu. (Shoma 1 Yohaana 4:11, 20, 21.) Nitubaasa kuteekateeka ngu kyorobi kukunda ab’eishe-emwe, ahabw’okugira ngu nituramya Yehova kandi nituteeraho kugira emitwarize nk’eye. Nitukuratira eky’okureeberaho kya Yesu owaabaire aine rukundo mpango, kandi owaahaireyo amagara ge ahabwaitu. Kwonka obumwe nitubaasa kushanga kigumire kworobera ekiragiro ky’okukunda ab’eishe-emwe bagyenzi baitu. Yetegyereze eky’okureeberaho ky’ekibiina kya Filipi.

7. Niki eki turikwegyera aha buhabuzi obu Paulo yaahaire Eodia, na Suntuke?

⁷ Banyaanyazi-itwe Eodia na Suntuke bakaba bari abeeziriki abaabaire ‘nibakwatanisa’ n’entumwa Paulo omu buheereza. Kwonka shana obutaikirizana bwabo bukabareetera kwebaganisamu. Omu baruha ei Paulo yaahandiikiire ekibiina eki banyaanyazi-itwe abo baabaire nibaheerezamu, akatamu eiziina rya Eodia, na Suntuke kandi yaabaha obuhabuzi ngu “baikirizane.” (Fil. 4:2, 3) Paulo akareeba ngu aine kuhana ekibiina kyona ati: “Mukore byona mutarikwetomboita, [kandi] mutaine mpaka.” (Fil. 2:14) Hatariho kubangaanisa, obuhabuzi bwa Paulo obu obwa butunu  tiburahweraire banyaanyazi-itwe aba bonka, beitu bukahwera n’ekibiina kyona kwongyera kukundana.

8. Enshonga nkuru erikubaasa kuturemesa kukunda ab’eishe-emwe bagyenzi baitu neeha, kandi nitubaasa kugisingura tuta?

⁸ Nka Eodia, na Suntuke, nitubaasa kuremwa kugira omukago murungi n’abandi, ahabw’okugira ngu nituta omutima aha bweremwa bwabo. Twena nitukora enshobe buri izooba. Twaguma tutaire omutima aha bweremwa bw’abandi, rukundo ei tubainiire neija kutuuba. Nk’eky’okureeberaho, ow’eishe-emwe yaayebwa kuhwera omu kuboneza Ekyombeko ky’Obukama, nitubaasa kuguubwa kubi. Reero twatandika kwijuka enshobe zoona ezi ow’eishe-emwe ogwo akozire, ekiniga nikibaasa kweyongyera, kandi rukundo ei tumwiniire etuubire kimwe. Waayeshanga omu mbeera nk’egyo, nikiba kiri kirungi kuteekateeka aha mazima aga: Yehova naareeba obweremwa bwaitu n’obw’ab’eishe-emwe bagyenzi baitu. Kwonka oyihireho obweremwa obwo, naaba naakikunda ow’eishe-emwe ogwo, kandi naitwe naakitukunda. Ahabw’enshonga egyo, twine kugira rukundo nk’eya Yehova, tugume twine emiteekateekyere mirungi aha b’eishe-emwe bagyenzi baitu. Twateeraho kukunda ab’eishe-emwe bagyenzi baitu, nituhamya omukago ogu twine nabo.​—Fil. 2:1, 2.

9. Bimwe aha bintu “ebirikukira” obukuru ebi Paulo yaagambireho omu baruha ei yaahandiikiire Abafilipi ni biiha?

⁹ Ruhanga akakoresa omwoyo gurikwera kuhwera Paulo kugambira Abafilipi n’Abakristaayo boona kumanya ‘ebirikukira obukuru.’ (Fil. 1:10) Ebirikukira obukuru ebi nibitwariramu okweza eiziina rya Ruhanga Yehova, okuhikiiriza ebi arikuraganisa, obusingye n’obumwe bw’ekibiina. (Mat. 6:9, 10; Yoh. 13:35) Twaba nitutwara ebintu ebi nka bikuru, nitworeka ngu buzima nitukunda Yehova.

10. Twine kukora ki kubaasa kureebwa nk’abataine kamogo?

¹⁰ Kandi Paulo akagira ngu twine kuguma ‘tutaine kamogo.’ Eki tikirikumanyisa ngu twine kuba abahikiriire. Titurikubaasa kuba abataine kamogo kuhika aha rurengo orwa Yehova. Kwonka Yehova naatureeba nk’abataine kamogo twateeraho kuhamya rukundo yaitu n’okumanya ebirikukira obukuru. Omuringo gumwe ogu turikworeka ngu twiniire abandi rukundo n’okukora kyona ekirikubaasika kwetantara kubateeza entsibo.

11. Ahabw’enki twine kwetantara kuteeza abandi entsibo?

¹¹ Obuhabuzi bw’okwetantara kuteeza abandi entsibo buzima n’okurabura. Nitubaasa kuteeza tuta omuntu entsibo? Nitubaasa kukikora kurabira omu by’okweshemeza ebi turikutoorana, oku turikujwara, n’emirimo ei turikukora. Ebi turikukora nibibaasa kuba bitagwire ahabwabyo. Kwonka ebi turikutoorana byaba nibiteganisa omuntu w’omunda ow’abandi bakahika n’aha kuteerwa entsibo, egyo ti nshonga y’okwehuzya. Yesu akagira ngu kikaabaire kirungi kwekoma eibaare rihango omu maraka okeenaga omu nyanja kukira okuteeza entsibo omwe aha ntaama ze!​—Mat. 18:6.

12. Niki eki turikwegyera aha omushaija n’omukazi we baapayoniya?

¹² Yetegyereze oku omushaija n’omukazi we baapayoniya baakuratiire ebigambo bya Yesu. Bakaba nibaheereza omu kibiina kimwe hamwe n’omushaija n’omukazi we, abaabaire baherize kubatizibwa, abaakuriire omu ka eine amaremesa maingi. Bo bakaba nibateekateeka ngu Abakristaayo tibaine kuza kureeba vidiyo n’obu zaakuba zitari mbi. Bakaguubwa kubi ku baakimanyire ngu baapayoniya abo bakaba  bareebire vidiyo y’ensi. Kuruga obwo, baapayoniya abo bakarekyera aho kuza kureeba vidiyo kuhitsya obu omushaija n’omukazi abo baatendeka omuntu waabo w’omunda kutagwera rubaju. (Heb. 5:14) Baapayoniya aba ahabw’ebikorwa byabo ebitari by’okweyendeza, bakooreka ngu nibakunda ab’eishe-emwe bagyenzi baabo abasya ti mu bigambo byonka beitu n’omu bikorwa.​—Rom. 14:19-21; 1 Yoh. 3:18.

13. Nitubaasa kureetera tuta omuntu kukora ekibi?

¹³ Omuringo ogundi ogu turikubaasa kuteeza ondiijo entsibo n’okumureetera kukora ekibi. Eki nikibaasa kubaho kita? Teekateeka aha mbeera egi. Omwegi wa Baibuli bwanyima y’okuteeraho munonga, akarugaho yaacwa omuze gw’obusinzi. Hati naareeba ngu aine kurugira kimwe aha maarwa. Akora empindahinduka ahonaaho, reero abatizibwa. Bwanyima, ow’eishe-emwe otaayaayiise abagyenyi nawe amweta, reero amuha amaarwa, arikumugira ati: “Hati ori Omukristaayo, oine omwoyo gurikwera ogwa Yehova. Gumwe aha mitwarize y’omwoyo gurikwera n’okwerinda. Waaba oine okwerinda, noija kubaasa kunywa amaarwa makye.” Nitubaasa kuteebereza ebirikubaasa kurugamu ow’eishe-emwe ogwo omusya yaahurikiza obuhabuzi butahikire obwo akanywa amaarwa!

14. Enteerane zaitu ez’Ekikristaayo nizituhwera zita kugyendera aha buhabuzi oburi omu Abafilipi 1:10?

¹⁴ Enteerane zaitu nizituhwera kugyendera aha buhabuzi oburi omu Abafilipi 1:10 omu miringo mingi. Ogw’okubanza, entebeekanisa yaitu y’eby’okurya birungi eby’omwoyo, neetwijutsya eki Yehova arikutwara nk’ekirikukira  obukuru. Ogwa kabiri, nitwega oku twine kugyendera aha bi turikwega kugira ngu tube abataine kamogo. Kandi ogwa kashatu, nituhigwa “kukundana n’okukora ebirungi.” (Heb. 10:24, 25) Oku ab’eishe-emwe barikwongyera kutuhiga, nikwo turikwongyera ahari rukundo ei twiniire Ruhanga waitu n’ab’eishe-emwe bagyenzi baitu. Emitima yaitu yaijuramu okukunda kw’emiringo ebiri oku, nitwija kuteeraho kwetantara kuteeza ab’eishe-emwe entsibo.

15. Nikimanyisa ki okwijura “ebyana by’okuhikiirira”?

¹⁵ Paulo akashabira Abafilipi ngu ‘baijure ebyana by’okuhikiirira.’ (Fil. 1:11) Hatariho kubangaanisa “ebyana by’okuhikiirira” ebi bikaba nibitwariramu rukundo ei baabaire bainiire Yehova n’abantu be. Ekyo kikaba nikiija kutwariramu okugambira abandi ngu nibaikiririza omuri Yesu, n’amatsiko gaabo g’omuhendo. Abafilipi 2:15 nihakoresa eky’okureeberaho ekindi, eky’okwaka “nk’etabaaza omu nsi.” Eky’okureeberaho eki kihikire ahakuba Yesu abeegi be naabeeta “omushana gw’ensi.” (Mat. 5:14-16) Akagambira n’abakuratsi be kuhindura “abantu abeegi,” kandi akagira ngu bakaba nibaija kuba “baakareebi be” n’okuhika omu bicweka by’ensi ebya hare. (Mat. 28:18-20; Byak. 1:8) Nitwijura “ebyana by’okuhikiirira” twayejumba omu bwijwire omu murimo mukuru ogu.

16. Abafilipi 1:12-14 nihooreka hata ngu nitubaasa kwaka nk’etabaaza n’obu twakuba turi omu mbeera zigumire? (Reeba ekishushani ekiri aha mutwe.)

¹⁶ Embeera zoona ezi turikuba turimu, nitubaasa kwaka nk’etabaaza. Obumwe, embeera ezirikuba nizireebeka nk’ezirikuturemesa kubuurira amakuru marungi, nizibaasa kurugamu omugisha gw’okubuurira. Nk’eky’okureeberaho, entumwa Paulo akaba akomiirwe omu nju omuri Rooma obu yaahandiikira  Abafilipi ebaruha. Kwonka enjegyere tiziramuremeise kubuurira abaabaire bamurinzire n’abagyenyi. Paulo akabuurira aine obweziriki omu mbeera ezi, kandi eki kikagumya ab’eishe-emwe nabo baagira “obumanzi bw’okugamba ekigambo kya Ruhanga bataine bwoba.”​—Shoma Abafilipi 1:12-14; 4:22.

17. Ha eky’okureeberaho eky’ab’eishe-emwe ab’obunaku obu abarikugumizamu nibaana ebyana n’omu mbeera zigumire.

¹⁷ Baingi aha b’eishe-emwe na banyaanyazi-itwe nibooreka obumanzi nk’obwa Paulo. Nibatuura omu mahanga ahu batarikubaasa kubuurira butunu, nari enju aha nju, n’ahabw’ekyo nibasherura oburyo obundi obw’okujanjaaza amakuru marungi. (Mat. 10:16-20) Omu ihanga rimwe nk’eryo, omureeberezi orikutaayaayira ebibiina akagira ngu buri mubuurizi aheze ekicweka kye ky’okubuuriramu ekirimu abanyabuzaare, abataahi, abu arikwega nabo, abu arikukora nabo, na boona abu arikumanya. Omu myaka ebiri, ebibiina omu kicweka ekyo bikeeyongyera kukanya munonga. Nitubaasa kuba nitutuura omu ihanga ahu tutarikubaasa kubuurira butunu. Kwonka nitubaasa kwegyera aha b’eishe-emwe na banyaanyazi-itwe abaine oburyo bw’okubuurira. Naiwe butoosha oine kusherura oburyo bw’okwejumba omu buheereza omu bwijwire, orikuhamya ngu Yehova naija kukuha amaani agu orikwetenga kusingura ebirikukuremesa.​—Fil. 2:13.

18. Tushemereire kumariirira kukora ki?

¹⁸ Omu bwire bugumire obu, ka tuteereho kugyendera aha buhabuzi obu Ruhanga yaahweraire Paulo kuhandiika omu baruha ye ei yaahandiikiire Abafilipi. Ka tuteereho kumanya ebirikukira obukuru, tube abataine kamogo, twetantare okuteeza abandi entsibo, kandi tugume nitwijura ebyana by’okuhikiirira. Reero obwo rukundo yaitu neija kukanya, kandi tuhaise Tataitwe Yehova ekitiinisa.