Abantu baingi omu nsi yoona nibaikiriza ngu Noiri n’eizooba ry’okwijuka okuzaarwa kwa Yesu Kristo. Kwonka shi, orateekateekire yaaba Abakristaayo omu kyasha ky’okubanza baabaire nibakuza Noiri? Noomanya eki Baibuli erikwegyesa aha kukuza amazaarwa? Okusherura eby’okugarukamu eby’ebibuuzo ebi nikibaasa kutuhwera kumanya yaaba Abakristaayo bashemereire kukuza Noiri.

Eky’okubanza, Baibuli terikugamba aha kukuza okuzaarwa kwa Yesu nari ondiijo muheereza weena wa Ruhanga. Ebyahandiikirwe nibigamba aha bantu babiri bonka abaakurize okuzaarwa kwabo. Bombi bakaba batari baheereza ba Yehova Ruhanga orikugambwaho omu Baibuli, kandi aha kukuza amazaarwa gaabo hakabaho ebintu bibi. (Okutandika 40:20; Mako 6:21) Kurugiirira aha Encyclopædia Britannica, Abakristaayo aba ira bakahakanisa “emigyenzo y’ekikaafiire ey’okukuza amazaarwa.”

Baibuli terikugamba butunu obu Yesu yaazaarwa. Ekitabo McClintock and Strong’s Cyclopedia nikigira ngu “Eizooba ry’okuzaarwa kwa Kristo tirikubaasa kushangwa omu Ndagaano Ensya nari ahandi hoona.” Buzima, kuri Yesu yaabaire naayenda ngu abakuratsi be bakuze okuzaarwa kwe, akaba kutumanyisa eizooba eri yaazaariirwemu.

Ekyakabiri, Baibuli terikworeka ngu Yesu nari omwe aha beegi be bakakuza Noiri. Kurugiirira aha New Catholic Encyclopedia, okukuza Noiri kikabanza kugambwaho omu kihandiiko kya buri mwaka ekirikwetwa “Chronograph ekya Philocalus, omushaija kuruga Rooma ekyahandiikirwe omu gwa 336 [Y.A.K.].” Obwo Baibuli ekaba yaaherize kuhandiikwa kandi Yesu akaba amazire emyaka mingi atari omu nsi. N’ahabw’ekyo, McClintock and Strong nikyoreka ngu “Okukuza Noiri Ruhanga tiwe yaakutandikireho, kandi omu Ndagaano Ensya ti kurimu.” *

Yesu Omwegyesa Mukuru, akaha abakuratsi be obuhabuzi oburikwetegyerezibwa aha bi yaabaire naayenda ngu bakore, kandi obuhabuzi obwo buhandiikire omu Baibuli. Okukuza Noiri, ti kimwe ahari byo. Nk’oku omwegyesa aha ishomero arikuba atarikwenda ngu abeegi bakore ekirengire aha buhabuzi obu arikuba abahaire, Yesu nawe tarikwenda ngu abakuratsi be “bakore ekirengire aha bihandiikirwe” omu Baibuli.​—1 Abakorinso 4:6.

Kwonka kandi, hariho omukoro gumwe omukuru ogu abakristaayo aba ira baabaire nibakuza​—Okwijuka okufa kwa Yesu. Yesu wenyine akagambira abeegi be kuguma nibaijuka omukoro ogwo kandi yaabooreka oku bashemereire kukikora. Ekiro kyenyine n’obu baine kwijuka okufa kwe, biri omu Baibuli.​—Luka 22:19; 1 Abakorinso 11:25.

Nk’oku twareeba, Noiri n’okukuza okuzaarwa, kandi Abakristaayo aba ira tibarakuratiire omugyenzo ogwo ogw’ekikaafiire. Okwongyera ahari ekyo, Baibuli terikugira ngu Yesu nari omuntu ondiijo weena bakakuza Noiri. Ahabw’okwetegyereza amazima aga, obukaikuru bw’Abakristaayo omu nsi yoona nibamanya ngu Noiri tibashemereire kugikuza.