OBUNAKU obu embeera tiziri nk’oku Ruhanga yaabaire naayenda. Ensi ekaabaire erimu abantu abarikworobera obutegyeki bw’Omuhangi waitu, abarikukuratira obuhabuzi bwe, kandi abarikutooreza emitwarize ye. Ruhanga akaba naayenda ngu abantu bakorere hamwe baine okushemererwa omu ka, barikwega ebintu bisya, kandi bahindure n’ensi paradiso.

• ‘Naija kumaraho [entaro] okuhika aha muheru gw’ensi.’​—Zaaburi 46:9.

• ‘Obunaku bwahika . . . obw’okucwekyereza [abarikushiisha ensi.]’​—Okushuuruurwa 11:18.

• ‘Tihaine mutuuzi waayo orikwija kugira ati: Ndwaire.’​—Isaaya 33:24.

• ‘Abatoorainwe bangye nibaija kumara omwanya muhango nibashemerererwa ebi emikono yaabo ekozire.’​—Isaaya 65:22.

Obunabi obwo nibuza kuhikiirira buta? Ruhanga atooraine Omwana we, Yesu okuba Omugabe omu gavumenti ye, ey’omu iguru ehikiriire eraategyekye ensi. Omu Baibuli obutegyeki obwo nibwetwa Obukama bwa Ruhanga. (Danieli 2:44) Baibuli neegamba ahari Yesu eti: ‘Ruhanga naija kumuta aha kiteebe ky’obugabe ategyekye.’​—Luka 1:32, 33.

Obu Yesu yaabaire ari omu nsi, akakora eby’okutangaaza by’amaani kworeka ngu nk’Omutegyeki, naija kuhindura embeera omu nsi zibe nungi.

• Akakiza abantu endwara, kworeka oku arikwija kumariraho kimwe endwara zoona.​—Matayo 9:35.

• Akacureeza eihunga, yaayoreka oku arikwija kurinda abantu arikucureeza amaani g’obuhangwa.​—Mako 4:36-39.

• Akariisa abantu baingi, yaayoreka oku arikwija kuha abantu ebirikwetengyesa.​—Mako 6:41-44.

• Amaizi akagahindura viinyo aha bugyenyi, ekirikuhamya ngu naija kuhwera abantu kugira okushemererwa.​—Yohaana 2:7-11.

Noobaasa kukora ki kugasirwa omu bi Ruhanga arikutebeekanisiza abarikumukunda? Hariho omuhanda ogu oshemereire kutoora. Baibuli neegweta omuhanda ogurikutaatsya “omu magara,” kandi ngu ‘n’abarikuguzoora ni bakye.’​—Matayo 7:14.

Omuhanda gw’amagara niki? Ruhanga naagira ngu niinye Yehova “Ruhanga waawe orikukwegyesa eby’okukugasira, nkakwebembera omu muhanda ogu oshemereire kutoora.” (Isaaya 48:17) Waagyendera omu muhanda ogu noija kutunga nyentsya nungi.

Yesu akagira ati: “Niinye muhanda, n’amazima, n’amagara.” (Yohaana 14:6) Twayorobera amazima  agu Yesu yaayegyeise, tukatooreza n’eky’okureeberaho kye, nitwija kwirira haihi Ruhanga kandi tugasirwe.

Noobaasa kuzoora ota omuhanda gw’amagara? Hariho ediini nyingi, kwonka Yesu akarabura ngu ‘omuntu weena orikugira ati: Mukama wangye, Mukama wangye, tiwe arikwija kutaaha omu bukama bw’omu iguru, kureka orikukora ebi Tata ow’omu iguru arikukunda.’ (Matayo 7:21) Kandi akagira ati: ‘Nimwija kubamanyira aha byana byabo.’ (Matayo 7:16) Baibuli neebaasa kukuhwera kumanya entaaniso eri aha gati y’okuramya okw’amazima n’okw’ebishuba.​—Yohaana 17:17.

Noobaasa kugyendera ota omu muhanda gw’amagara? Eki nikitwariramu okumanya Obukomooko bw’amagara. N’oha ogwo? Eiziina rye ni riiha? Aine mitwarize ki? Naakora ki hati? Naayenda ngu tukore ki? *

Yehova naayenda ngu abantu batungye ekirikukira aha kukora, okurya, okuzaana, n’okugira eka. Nitubaasa kumanya Omuhangi kandi tube banywani be. Nitubaasa kworeka ngu nitumukunda turikukora ebi arikukunda. Yesu akagira ati: “Aga nigo magara agatahwaho, okumanya iwe Ruhanga omwe ow’amazima.”​—Yohaana 17:3.

Twine kugira empindahinduka ezi twakora kubaasa kushemeza Ruhanga omwe ow’amazima. Ekyo nikireebeka nk’ekigumire. Kwonka twakikora nikiija kurugamu ebirungi twatandika orugyendo oru orw’amagara. Abajurizi ba Yehova nibabaasa kukwegyesa Baibuli otashashwire omu bwire n’omwanya ebirikukubaasikira kukuhwera kumanya eby’okugarukamu by’ebibuuzo ebirikukwata ahari Ruhanga. Noobaasa kutumanyisa orikukoresa omukura gwaitu www.jw.org/nyn.