Twaherize kureeba ebirikukwata ahari Croesus owaahabisiibwe omurangi wa Delphi, ekyamurugiiremu okusingurwa omugabe wa Peresi. Kwonka Baibuli, erimu obunabi bwingi oburikukwata aha mugabe wa Peresi obwahikiriire omu bwijwire nk’oku buri kimwe kyagambirwe.

Nabi Isaaya akagira ngu Kuuro niwe yaabaire naija kusingura orurembo Babulooni orukuru, kandi akashoboorora n’oku yaabaire naija kurusingura nk’emyaka 200 omugabe Kuuro atakazairwe.

Isaaya 44:24, 27, 28: Yehova naagira ati: “Niinye ogambira amaizi maingi nti: Yoma, kandi ndyayomya emigyera yaawe; Orikugamba ahari Kuuro nti: N’omuriisa wangye; aryahikiriza ebi ndikwenda byona; n’ahari Yerusaalemu nti: Eryayombekwa; n’ahari hekalu nti: Omusingi gwawe guryatebwaho.”

Kurugiirira aha munyabyafaayo Omugriika Herodotus, amahe ga Kuuro gakahindura amaizi g’omugyera Furaati, ogwabaire niguraba omu rurembo Babulooni. Akakoryo ako kakabaasisa amahe ge kutaaha omu rurembo orwo garikuraba aha nkungu y’omugyera. Kuuro ku yaaherize kuhamba orurembo Babulooni, akarekura Abayudaaya abaabaire bari enkwatwa omuri Babulooni yaabaikiriza kutaaha kugaruka kwombeka Yerusaalemu, eyaabaire ekyecwekyereziibwe emyaka 70 enyima.

Isaaya 45:1: “Oku nikwo nyowe, Mukama, ndikugambira ou naashukireho amajuta, Kuuro, ou naakwatsire omukono gwa buryo, ngu mmugomoorere amahanga, nzirikuurure abagabe, Mmwigurire enyigi, amarembo garekye kukingwa.”

Abaperesi bakataaha omu rurembo barikuraba aha nyigi ibiri mpango ezaasigirwe ziigwirwe. Ku ogire ngu Ababulooni bakaba nibamanya eki Kuuro yaabaire naatebeekanisa, bakaba nibaija kukinga enyigi ezaabaire ziri haihi n’omugyera. Kwonka hati, orurembo rukaba rutaine burinzi.

Obunabi obu ni bumwe aha bunabi bwingi oburi omu Baibuli obwahikiriire gye hatarimu nshobe yoona. a Okutaana n’okuteebereza kw’abantu, obumwe okurikuba nikwegamira ahari baaruhanga ab’ebishuba, obunabi bwa Baibuli niburuga ahari Yehova owaagizire ati: “Okwiha aha kutandika nkaranga eby’emperu, naiha omu biro bya ira nindanga ebitakabaireho.”​—Isaaya 46:10.

Ruhanga ow’amazima ou eiziina rye riri Yehova niwe wenka orikubaasa kugamba ebitakabaireho  kandi bikahikiirira. Eiziina eryo Yehova nirimanyisa ngu “Naabaasisa Kuba.” Niryoreka ngu naabaasa kumanya eby’omumaisho kandi abibaasise kuhikiirira kurugiirira aha kigyendererwa kye. Nirituhamiza ngu naija kuhikiiriza byona ebi yaaraganiise.

Nooyenda kumanya eki obunabi bwa Baibuli burikugamba aha bunaku bwaitu? Emyaka nka 2,000 enyima, Baibuli ekagira ngu “ebiro by’akabi kaingi” bikaba nibiija kubaho ‘omu biro by’emperu.’ Ebiro by’emperu ebya ki? Ti mperu y’ensi erikutuurwamu nari emperu y’abantu abarungi, beitu n’emperu y’okuhiiganisibwa, okuhakanisibwa, n’okubonabona ebitwire nibiteganisa abantu kumara emyaka mingi. Ka tureebe bumwe aha bunabi oburikworeka ngu turi ‘omu biro by’emperu.’

2 Timoseo 3:1-5: ‘Omu biro by’emperu abantu nibaija kuba abarikwekunda, abakunzi b’empiiha, abanyamaryo, abarikwemanya, abarikujumiirana, abarikugomera abazaire baabo, entasiima, abatarikwera, abatarikukunda baabo, abatarikwenda kugarukana n’abandi, abarikubeihererana, abatarikweyangisa, enshaarizi, abarikwanga ebirungi, abarikureebyana, engangaazi, abarikwekuza, abarikukunda kweshemeza bonka okukira Ruhanga, abarikuhamya emigyenzo y’ediini, bakahakanisa obushoboorozi bwayo.’

Mbwenu shi torikwikiriza ngu emitwarize egi neeyongyera kureebeka omu bantu obunaku obu? Oyetegyereize ngu twetooroirwe abantu abarikwekunda, abarikukunda esente, nari abaine amaryo? Torikureeba ngu abantu abamwe bagumire kushemeza, kandi tibarikwenda kwikirizana n’abandi? Buzima nooreeba ngu okugomera abazaire kujanjaire munonga, kandi abantu okutwarira hamwe nibakunda eby’okweshemeza okukira oku barikukunda Ruhanga. Kandi embeera buri izooba nizeeyongyera kusiisikara.

Matayo 24:6, 7: “Kandi muryahurira engamba n’okurangaanwa kwazo. . . . Eihanga riryateera erindi ihanga, n’obugabe buryateera obundi bugabe.”

Okuteebereza okumwe nikworeka ngu omuhendo gw’abantu abaafeereire omu ntaro n’okurwanagana kuruga 1914, nigurenga omu bukaikuru 100, omuhendo ogurikukira ogw’abantu abari omu mahanga agamwe. Teekateeka aha kurira, amaganya, n’okubonabona ebireetsirweho entaro ezo. Mbwenu shi abeebembezi b’amahanga beegyeire aha nshobe zaabo reero baahezaho entaro?

Matayo 24:7: “Haryabaho enjara.”

Ekitongore kya World Food Programme kikagira kiti: “Omu nsi egi erimu eby’okurya by’okuriisa buri omwe, obukaikuru 815 obw’abantu, omwe ahari mwenda tarikurya kyakiro. Kandi omwe ahari bashatu naakuuhura ahabw’okurya kubi.” Nikiteeberezibwa ngu buri mwaka abaana obukaikuru bushatu nibaitwa enjara.

Luka 21:11: “Haryabaho emitsitsa y’amaani.”

Buri mwaka, emitsitsa nk’emitwaro 50,000 neeba eri ey’amaani kubaasa kuhurirwa abantu. Emitsitsa nka 100 neeshiisha ebyombeko, kandi nihabaho nk’omutsitsa gumwe gw’amaani munonga buri mwaka. Kurugiirira aha kuteebereza kumwe, ahagati y’omwaka 1975 na 2000, emitsitsa ekaita abantu emitwaro 471,000.

Matayo 24:14: “Engiri egi ey’Obukama eryagambwa omu nsi zoona okuba eky’okuhamya aha mahanga goona; obwo nibwo emperu erihika.”

Abajurizi ba Yehova abarikurenga omu bukaikuru munaana, batwire nibabuurira amakuru marungi g’Obukama bwa Ruhanga omu nsi yoona omu mahanga 240. Nibabuurira amakuru marungi abantu abari omu tauni, omu byaro, omu mahamba, n’omu nshozi. Obunabi nibworeka ngu omurimo ogu ku guraahendere nk’oku Ruhanga arikwenda, “obwo nibwo emperu” eraahikye. Eki nikiija kumanyisa ki? Nikiija kumanyisa emperu y’obutegyeki bw’abantu n’Obukama bwa Ruhanga kutandika kutegyeka. Obukama bwa Ruhanga nibuza kuhikiiriza biraganiso ki? Shoma ebirikukurataho kutunga eky’okugarukamu.