Blessing * akahika omuri Europe ei yaabaire agiire kukora amashokye g’abantu. Kwonka bwanyima y’ebiro ikumi obwo barikumuteera, n’okumutiinatiinisa ngu nibaija kukora kubi ab’owaabo ahu yaarugire, akagyemeserezibwa kukora obwamaraaya.

Omukazi mukama w’enju ei baabaire nibakoreramu obwamaraaya, akaba naayenda ngu buri kiro Blessing agume naareeta 200 nari 300 omu sente za Europe, kuhitsya obu yaakuhikize 40,000 omu sente za Europe ezi yaakoreise kuzayo. * Blessing naashoboorora ati: “Nkaba nkira kuteekateeka aha kutoroka, kwonka nkaba nintiina eki baraakore eka yangye. Nkaba ndi omu mutego.” Ebyamuhikireho nibihika aha bukaikuru buna bw’abantu omu nsi yoona abarikuguzibwa kuza kukora obwamaraaya.

Emyaka nka 4,000 ehingwire, omutsigazi orikwetwa Yosefu, beene ishe bakamuguza. Akeeshanga ari omuhuuku omu ka y’Omunyamisri rurangaanwa. Obutashushana na Blessing, Yosefu omu kubanza mukama we akaba atarikumutwariza kubi. Kwonka ku yaayangire kukora eki muka mukama we yaabaire naayenda, bakatandika kumutwariza kubi barikumutaho omushango gw’okuteeraho kuhamba. Bakamuta omu kihome baamubohesa enjegyere z’ebyoma.—Okutandika 39:1-20; Zaaburi 105:17, 18.

Yosefu akaba ari omuhuuku owa ira, Blessing n’omuhuuku w’omu kyasha kya 21. Kwonka bombi bakatwarizibwa kubi abantu abarikushuubura bagyenzi baabo nk’ebintu by’obushuubuzi, obwo barikwenda esente.

Entaro zikaba zihwera amahanga kurahuka kutunga abahuuku. Omugabe wa Misri Thutmose III nikigambwa ngu bwanyima y’okurwana orutaro rumwe omuri Kanaani, akagaruka aine enkwatwa 90,000. Abanyamisri bakabakoresa nk’abahuuku omu kutiimba eby’obutungi  omu itaka, kwombeka amaramizo, n’okutiimba emifuregye y’amaizi.

Omu butegyeki bwa Rooma, abahuuku bakeyongyera ahabw’entaro, kandi okwetenga abahuuku nakwo kukaba kurugamu entaro. Nikiteeberezibwa ngu omu kyasha ky’okubanza, abahuuku omuri Rooma bakaba nibahika haihi kimwe kya kabiri ky’abantu abaabaire batwireyo. Abahuuku ba Misri na Rooma bakaba nibatwarizibwa kubi munonga. Abahuuku abaabaire nibatiimba eby’obutungi omu itaka, bakaba batuuraho kumara emyaka nka 30 yonka.

Ku haahingwireho obwire, obuhuuku bukeeyongyerera kimwe. Kuruga omu kyasha kya 16 kuhika omu kyasha kya 19, amahanga ga America okushuubura abahuuku garikubaiha omuri Africa nikyo ky’obushuubuzi ekyabaire nikikirayo kureeta esente nyingi. Ripoota kuruga omu kitongore kya UNESCO neegira ngu ‘nikiteeberezibwa ngu abashaija, abakazi, n’abaana abarikwingana obukaikuru 25 kuhika aha bukaikuru 30, nibo baakwatsirwe bakaguzibwa.’ Nikigambwa ngu abantu baingi bakafeera omu nyanja obwo barikwambuka. Olaudah Equiano omuhuuku owaahonokireho akagira ati: “Okucura kw’abakazi n’okutsinda kw’abantu abarikufa kikaba kiri ekintu ekirikutiinisa munonga.”

Eky’obusaasi, okushuubura abantu na hati kukiriho. Kurugiirira aha kitongore International Labour Organization abantu abarikuhika obukaikuru 21 abashaija, abakazi, n’abaana na hati nibaheereza nk’abahuuku, barikushashurwa kakye nari n’okutashashurwa. Abahuuku b’obunaku obu nibakora omu kutiimba eby’eitungo omu itaka, omu maduuka, omu kuteera amatafaari, omu myanya ya bamaraaya, n’omu maka g’abantu. N’obu kiraabe nikihenda ebiragiro, obuhuuku obw’omuringo ogu nibweyongyera.

Ahabw’abahuuku kubonabonesibwa kibareetaire kurwanirira obugabe bwabo. Omu kyasha ky’okubanza Yesu atakazairwe, omurwani rugambwa Spartacus n’abandi bahuuku 100,000 bakesharinga barwanisa amahe ga Rooma. Omu kyasha 18, abahuuku abaabaire bari aha kizinga kya Caribbean omuri Hispaniola bakarwanisa bakama baabo. Ahabw’abahuuku kutwarizibwa kubi omu mashamba g’ebikaijo hakaimukaho orutaro orwamazire emyaka 13 kandi orutaro oru rukarugamu okutandikaho kw’eihanga eryetongoire erya Haiti omuri 1804.

Kwonka Abaisraeli kuruga Misri, nibwo businguzi bw’okuruga omu buhuuku oburikukirayo omu byafaayo. Abantu obukaikuru bushatu, eihanga ryona erya Israeli bakaruga omu buhuuku Misri. Buzima bakaba bashemereire kutunga obugabe bwabo. Baibuli  neegamba aha ku baabaire nibatwarizibwa omuri Misri ngu bakaba ‘babakoresa n’amaani.’ (Okuruga 1:11-14) Omwe ahari Baafaraho akataho n’omuhiigo gw’okwita abaana bato kutuubya aha bwingi bw’Abaisraeli.—Okuruga 1:8-22.

Okurekurwa kw’Abaisraeli kuruga omu bukwatwa Misri kukaba kuri okw’omutaano, ahakuba Ruhanga wenyine akataaha omu nshonga. Ruhanga akagambira Musa ati: ‘Ahabw’okuba nimmanya obusaasi bwabo. Ninyija kushuuma kubajuna.’ (Okuruga 3:7, 8) Okuhitsya obunaku obu, Abayudaaya nibakuza Okuhingurwaho buri mwaka kwijuka okurekurwa kw’Abaisraeli.—Okuruga 12:14.

Baibuli neegira ngu Yehova “Ruhanga waitu taita manja,” kandi neetuhamiza ngu tahindukire. (2 Obusingye 19:7; Malaki 3:6) Ruhanga akoohereza Yesu “kumanyisa enkwatwa eby’okurekurwa . . . , n’okurekura abarikwitwa kubi.” (Luka 4:18) Mbwenu shi eki nikimanyisa obugabe bw’abahuuku obw’emiringo yoona? Nikibaasa kutamanyisa ekyo. Yesu akooherezibwa omu nsi kwiha abantu omu buhuuku bw’ekibi n’okufa. Bwanyima akagira ati: ‘Amazima garyabahindura ab’obusingye.’ (Yohaana 8:32) N’obunaku obu, amazima agu Yesu yaayegyeise nigacungura abantu omu miringo mingi.—Reeba akabokisi “ Okuruga omu Buhuuku obw’Omutaano.”

Buzima, Ruhanga akahwera Yosefu na Blessing kuruga omu buhuuku omu miringo etarikushushana. Noobaasa kushoma ebirikukwata ahari Yosefu omu Okutandika eshuura 39 n’eya 41. Okuteeraho kwa Blessing kuruga omu buhuuku buzima kukaba kuri okw’omutaano.

Bwanyima ya Blessing kubingwa omu ihanga rimwe erya Buraaya, akaza Spain. Okwo niyo yaabugaine Abajurizi ba Yehova bakatandika kumwegyesa Baibuli. Akamariirira kukora kushemeza emitwarize ye, yaatunga omurimo kandi yaagambira omukazi mukama we kutuubya aha sente ezi yaabaire aine kumushashura buri kwezi. Eizooba rimwe, owaabaire ari mukama wa Blessing akamuteerera esimu. Akaba naayenda kugambira Blessing ngu yaamusaasira eibanja rye n’okumushaba okusaasirwa. Hakaba habaireho ki? Omukazi ogwo nawe, Abajurizi ba Yehova bakaba batandikire kumwegyesa Baibuli! Blessing naagira ati: “Amazima nigakuhindura ow’obusingye omu miringo erikutangaaza.”

Yehova akagira obusaasi obu Abaisraeli baabaire nibatwarizibwa kubi omu buhuuku Misri, na hati aine kuba nikwo arikwehurira atyo yaareeba obutari buringaniza obunaku obu. Amazima gari ngu, kubaasa kumaraho obuhuuku obw’emiringo yoona, abantu baine kukora empindahinduka y’amaani. Kwonka Ruhanga naaraganisa kureetaho empindahinduka egyo. “Nitutegyereza eiguru erisya n’ensi ensya ebituurwamu okuhikiirira nk’oku yaaraganiise.”—2 Petero 3:13.