KA TUGIRE ngu oriyo noogyenda omu muhanda nyekiro hariho omwirima. N’obu buraabe buri nyekiro, toyerarikiriire ngu nooza kubura ahakuba oine tooci y’amaani. Ku orikugireebesa ahansi, nooreeba gye ebiri haihi omu maisho gaawe. Kandi ku orikugireebesa omu maisho, neekumurika hare.

Omu muringo nigwo gumwe, Baibuli eri nka tooci egyo. Nk’oku kirikworekwa omu bicweka eby’enyima, Ekigambo kya Ruhanga nikibaasa kutuhwera kushoboorora oburemeezi oburiho ebiro ebi omu nsi. Kwonka neekora ekirikukira ahari ekyo. Neetuhwera kureeba n’eby’omumaisho, reero etuhwera kugyendera omu muhanda ogurikuhitsya omu kushemererwa n’okumarwa. (Zaaburi 119:105) Mu muringo ki?

Ka tureebe emiringo ebiri oku Baibuli erikutuhwera kugira amatsiko aha by’omumaisho: 1 Neetuhwera kugira ekigyendererwa, kandi 2 neetwegyesa oku turikubaasa kunywana Omuhangi ebiro byona.

Baibuli neeha obuhabuzi oburikwesigwa omu kushoboorora oburemeezi, kwonka neekora ekirikukira ahari ekyo. Baibuli omu mwanya gw’okutuhiga kuta omutima aha buremeezi bwaitu, neetwegyesa kureeba enshonga ezirikukira obukuru. Twakora tutyo, obwo nibwo turikugira ekigyendererwa.

Teekateeka aha musingye ogurikugira ngu “okugaba” nikureeta okushemererwa “okukira okuheebwa.” (Ebyakozirwe 20:35) Noijuka obu waahwera omuntu owaabaire aine eki akyenire? Nari noijuka obu waahayo obwire bwawe kuhurikiza omuntu arikukugambira oburemeezi bwe? Mbwenu shi torashemereirwe ahabw’okugumya mugyenzi waawe?

Nitutunga okumarwa okurikukirayo twagira eki twaha omuntu tutarikuteekateeka ngu nawe naija kutuha. Omuhandiiki omwe akagira ati: ‘Buzima  tikirikubaasika kuhayo reero okabura kutunga ebirikukira aha bi ohaireyo, na munonga waahayo otarikuteekateeka kutunga ekihembo.’ Kwonka, ku turikwehayo kuhwera, na munonga abo abatarikubaasa kutugarurira, nitutunga ekihembo. Naitwe nituba twayejumba omu kuhwera. Buzima, nituba nitukora hamwe n’Omuhangi waitu, orikutwara ebikorwa byaitu eby’embabazi nk’eibanja eri aine kushashura. (Enfumu 19:17) Naasiima munonga ebi turikukorera abarikwetenga obuhwezi, kandi naaraganisa kutuzimurira arikutuha amagara agatahwaho omuri Paradiso. Aga ka n’amatsiko agarikushemeza!​—Zaaburi 37:29; Luka 14:12-14. *

Okukira byona, Baibuli neetwegyesa ngu nitubaasa kugira ekigyendererwa twaramya Yehova, Ruhanga. Ekigambo kye nikituhiga kumuhimbisa, okumuha ekitiinisa n’okumworobera. (Omubuurizi 12:13; Okushuuruurwa 4:11) Twakora ekyo, nituba twakora ekintu kikuru munonga, okureetera Omuhangi waitu kushemererwa. Kandi, naatuhiga ati: “Gira obwengye oshemeze omutima gwangye.” (Enfumu 27:11) Kiteekateekyeho! Ku turikucwamu gye turikwihirira aha misingye eri omu Baibuli, eki nikireetera Tataitwe ow’omu iguru kushemererwa. Ahabw’enki? Ahakuba naatufaho kandi naatwendeza ebirungi ebirikuruga omu kukuratira obuhabuzi bwe. (Isaaya 48:17, 18) Buzima, tihaine ekigyendererwa ekirikukira okuramya Omutegyeki wa byona, kandi tukakora ebirikushemeza omutima gwe.

Kandi Baibuli neetwegyesa oku turikubaasa kunywana Omuhangi. “Mwirire haihi Ruhanga,” Ekyahandiikirwe nikwo kirikugira, “nawe abone kubairira haihi.” (Yakobo 4:8) Obumwe nitubaasa kubangaanisa yaaba buzima nikibaasika kunywana Omuhangi ow’obushoboorozi bwona. Kwonka Baibuli neetuhamiza ngu ‘twasherura Ruhanga,’ buzima nitwija kumubona, ahakuba ‘tari hare n’omuntu weena omuriitwe.’ (Ebyakozirwe 17:27) Obuhabuzi bwa Baibuli oburikukwata aha kuba munywani wa Ruhanga nibukwata n’aha biro byaitu eby’omumaisho. Mu muringo ki?

Teekateeka ahari eki: N’obu twakuteeraho tuta, tihaine n’omwe omuriitwe orikubaasa kwetantara omuzigu waitu rufu. (1 Abakorinso 15:26) Kwonka, Ruhanga naagumaho ebiro byona. Tarikwija kufa, kandi naayenda ngu na banywani be bagumeho ebiro byona. Baibuli erikukoresa ebigambo byorobi kwonka birungi, neeyoreka eki Yehova arikwendeza abo abarikumusherura. Neegira eti: “Emitima yaanyu emereere ebiro byona.”​—Zaaburi 22:26.

Noobaasa kuba ota munywani wa Ruhanga ow’obutwire? Gumizamu nooyega ebirikumukwataho kurabira omu Kigambo kye Baibuli. (Yohaana 17:3; 2 Timoseo 3:16) Mushabe kukuhwera kwetegyereza Ebyahandiikirwe. Baibuli neetuhamiza ngu twagumizamu ‘nitushaba Ruhanga’ kutuha obwengye, naija kubutuha. * (Yakobo 1:5) Eky’aha muheru, teeraho kugyendera aha bi orikwega, oikirize Ekigambo kya Ruhanga kibe ‘nk’etabaaza erikumurikira ebigyere byawe n’omushana ogurikujwera omuhanda gwawe’ hati n’ebiro byona.​—Zaaburi 119:105.