OMUTWE OGURI AHA MUNAARA | OMUKUNDWA KU ARIKUFA
Mbwenu shi Kigwire Kuganya?
Orarwaireho endwara erikurahuka kukira? Noobaasa kuba waarahukire kwebwa obusaasi obu waabaire oine. Kwonka okuganya tikwo kuri kutyo. Omushaho orikwetwa Alan Wolfelt omu kitabo kye Healing a Spouse’s Grieving Heart akagira ngu okusingurira kimwe okuganya tikirikubaasika. Kwonka akongyeraho ati: “Haahinguraho obwire kandi abandi bakakuhwera, okuganya kwawe nikwija kutuuba.”
Nk’eky’okureeberaho, yetegyereze oku Abrahamu yaatwarize obu omukazi we yaafa. Ebyahandiikirwe ebyabandize nibigira ngu “Abrahamu akatandika kuririra Saara n’okumucurira.” Ebigambo “akatandika kuririra” nibyoreka ngu kikatwara obwire buraingwa kugumisiriza obusaasi bw’okufeerwa omukazi we. * Ondiijo ni Yakobo, owaabeihirwe ngu omwana we Yosefu akaba aitsirwe enyamaishwa. Akaguma aine amaganya kumara “ebiro bingi,” kandi kikaba kitarikubaasika ab’omu ka ye kumuhuumuriza. Bwanyima y’emyaka mingi, akaba naakiteekateeka aha kufa kwa Yosefu.—Okutandika 23:2; 37:34, 35; 42:36; 45:28.
Nikyo kimwe na baingi obunaku obu abarikuganya ahabw’okufeerwa omuntu ou baine nawe omukago gw’aha mara. Yetegyereze babiri aharibo.
-
“Ibanyi Robert, akafa ebiro 9 by’Okwamushanju, 2008. Akasheeshe ako obu yaatunga butandu akafa, hakaba hatariho ntaniso n’agandi mazooba. Bwanyima ya kyansya, tukanywegyerana, yaangwa omu kifuba, kandi yangira ngu naankunda nk’oku twabaire tutwaza butoosha arikuza aha murimo. Bwanyima y’emyaka mukaaga nkaba nkiine obusaasi omu mutima. Tindikuteekateeka ngu ninyija kukira obusaasi bw’okufeerwa Rob wangye.”—Gail, ow’emyaka 60.
-
“N’obu ndaabe mmazire emyaka erikurenga 18 ntari n’omukazi wangye omukundwa, na hati nimpurira nyine ihamba n’amaganya ahabw’okufa kwe. Buri kureeba ekintu ekirikushemeza, nimuteekateekaho, kandi ninyebuuza oku yaakushemereirwe kureeba eki ndiyo nindeeba.”—Etienne, ow’emyaka 84.
Buzima, okugira obusaasi n’enyehurira nk’ezo n’ekya butoosha. Buri muntu naaganya omu muringo gwe, n’ahabw’ekyo nikiba kitari ky’obwengye kucwera omuntu orubanja ahabw’oku arikutwaza yaagwerwa akagwe. Kwonka nabwo, twine kwetantara kwecwera orubanja twaba tumazire obwire buraingwa turikuganya ahabw’okufeerwa. Nitubaasa kwemera tuta amaganya?
^ kacw. 4 Mutabani wa Abrahamu orikwetwa Isaaka nawe akaganya kumara obwire buraingwa. Nk’oku kiri omu kitabo “Imitate Their Faith”, Isaaka bwanyima y’emyaka eshatu akaba akiine obusaasi bw’okufeerwa nyina orikwetwa Saara.—Okutandika 24:67.
Noobaasa Kukunda n'Ebi
OMUNAARA GW'OMURINZI—OGW'OKWEGA
Okusingura Amaganya Gaawe
Baibuli neeha obuhabuzi burungi obubaasize kuhwera baingi.
AWAKE!
Okuganya—Ekirikubaasa Kubaho
Ni buremeezi ki na nyehurira ki ezi omuntu ofeereirwe arikubaasa kugira bwanyima y’okufeerwa omukundwa?
