1, 2. (a) Abajurizi ba Yehova nibatwara bata Baibuli? (b) Ni kitabo ki kya Baibuli eki orikukunda?

ABAJURIZI BA YEHOVA nibakunda Baibuli. Neetuha obuhabuzi oburikwesigwa, etuhuumuriza, kandi etuha n’amatsiko. (Rom. 15:4) Titurikureeba Baibuli nk’erimu ebiteekateeko by’abantu, “kureka nk’ekigambo kya Ruhanga.”—1 Tes. 2:13.

² Hatariho kubanganisa twena twine Ebyahandiikirwe ebi turikuba nitukunda. Abamwe nibakunda ebitabo by’Engiri, ebirikushoboorora aha mitwarize ya Yehova ei omwana we yaayorekire. (Yoh. 14:9) Abandi nibakunda ebitabo bya Baibuli ebirimu obunabi nk’ekitabo ky’Okushuuruurwa, ekirimu ‘ebirikwenda kubaho juba.’ (Kush. 1:1) N’oha omuriitwe otarikuhuumurizibwa ebiri omu kitabo kya Zaaburi nari otarikuhwerwa ebiri omu kitabo ky’Enfumu? Buzima Baibuli n’ekitabo kya buri omwe.

3, 4. (a) Nitutwara tuta ebitabo byaitu? (b) Ni bitabo ki ebi turikutunga kuhwera abantu abamwe?

³ Ahabw’okugira ngu nitukunda Baibuli, nikimanyisa ngu nitukunda n’ebitabo by’ekibiina ebirikwegamira aha Baibuli. Nk’eky’okureeberaho, nitusiima eby’okurya by’omwoyo ebirikwizira omu bitabo, burocuwa, magaziini, n’ebindi. Nitumanya ngu ebi byona ebirikuruga ahari Yehova nibituhwera kuguma nitureeba omu by’omwoyo, kumanya bingi, n’okuba “abahikire omu kwikiriza.”—Tit. 2:2.

 ⁴ Oyihireho ebitabo ebirikuhandiikirwa Abajurizi ba Yehova boona hamwe, hariho ebirikuhandiikwa kuhwera abantu abamwe. Ebimwe bihandiikirwe kuhwera eminyeeto nari abazaire, kandi ebindi nibihwera abazaire baabo. Kandi bingi ebirikuba biri omu bitabo byaitu n’aha mukura gwaitu nibiba bitebeekanisiibwe kuhwera abatari Bajurizi ba Yehova. Eby’okurya bingi ebi eby’omwoyo nibitwijutsya ngu Yehova ahikiriize ekiraganiso kye eky’okuteekyera “amahanga goona obugyenyi bw’ebishaju.”—Isa. 25:6.

5. Nitubaasa kuhamya ngu Yehova naasiima ki?

⁵ Noobaasa kushanga obumwe nituba nitwenda kutunga obwire burikumara obw’okushoma Baibuli n’ebitabo ebirikwegamira aha Baibuli. Nitubaasa kuhamya ngu Yehova naasiima okuteeraho kwaitu kukoresa gye obwire bwaitu turikwejumba omu kushoma Baibuli buri izooba kandi tukeeyegyesa. (Efe. 5:15, 16) Okuba ab’amazima, obumwe nitubaasa kutamara obwire burikwingana turikushoma ebitabo ebi turikutunga. Kwonka tushemereire kwetantara akabi aka. Ni kabi ki ako akatarikurahuka kureebwa?

6. Niki ekirikubaasa kuturemesa kugasirwa omu bi Yehova arikutuha?

⁶ Hariho akabi k’okufeerwa bimwe aha birungi ahabw’okuteekateeka ngu eby’okurya by’omwoyo ebimwe tibirikutukwataho. Nk’eky’okureeberaho, mbwenu shi ebiri omu bitabo bimwe bya Baibuli ku byakuba nibireebeka nk’ebitarikutukwataho? Nari ku twakuba tutari bamwe aha bu ekitabo nanka kigyendereire kuhwera? Mbwenu shi nitushoma ebitabo nk’ebyo turikurahukiiriza nari nitwanga kubishoma? Kyaba nikwo kiri, nitwija kufeerwa ebintu ebirikubaasa kutugasira. Nitubaasa kwerinda tuta kugwa omu mutego ogwo? Ekikuru munonga, omwe ahariitwe ashemereire kumanya ngu Ruhanga niwe arikutuha eby’okurya by’omwoyo. Kurabira omuri nabi Isaaya, Yehova akagira ati: “Niinye Mukama Ruhanga waawe orikukwegyesa eby’okukugasira.” (Isa. 48:17) Nitwija kugasirwa twashwijuma obuhabuzi bw’emiringo eshatu oburikutuhwera kugasirwa omu bitabo bya Baibuli byona, n’ebitabo bitari bimwe na bimwe ebi twine.

7. Ahabw’enki twine kushoma Baibuli twine emiteekateekyere mirungi?

⁷ Shoma oine emiteekateekyere mirungi. Baibuli neegira ngu ‘Ebyahandiikirwe byona, ebihandiikisiibwe omwoyo gwa Ruhanga, biine omugasho.’ (2 Tim. 3:16) N’amazima, ebitabo bimwe bya Baibuli bikaba bihandiikirwe kuhwera omuntu omwe nari abantu abamwe. Egi niyo nshonga ahabw’enki tushemereire kushoma Baibuli twine emiteekateekyere mirungi. Ow’eishe-emwe omwe akagira ati: “Ku ndikushoma Baibuli, niinteeraho kumanya ngu ebi naashoma bishemereire kuba birimu eby’okwega bingi.” Naayongyeraho ati: “Okwijuka eki nikimpiga kwega ebintu ebitarikureebwa butunu.” Tutakatandikire kushoma Ekigambo kya Ruhanga, nituba twine kushaba kubaasa kugira emiteekateekyere mirungi n’obwengye bw’okwetegyereza ebi Yehova arikwenda ngu twegyemu.—Ezr. 7:10; shoma Yakobo 1:5.

8, 9. (a) Twaba nitushoma Baibuli nitubaasa kwebuuza bibuuzo ki? (b) Ebi abareeberezi baine kuhikiiriza nibitumanyisa ki ahari Yehova?

⁸ Buuza ebibuuzo. Waaba nooshoma Baibuli, yemereramu oyebuuze ebibuuzo nk’ebi: ‘Eki nikinyegyesa ki ahari Yehova? Ebi naashoma nimbaasa kubigyenderaho nta? Nimbaasa kubikoresa nta kuhwera abandi?’ Twateekateeka aha bibuuzo nk’ebi, buzima nitwija kugasirwa omu kushoma Baibuli. Nk’eky’okureeberaho, teekateeka aha bi ab’eishe-emwe baine kuhikiiriza  kubaasa kuba abareeberezi. (Shoma 1 Timoseo 3:2-7.) Obu baingi ahariitwe tutari bareeberezi, omu kubanza nitubaasa kuteekateeka ngu emishororongo egi terikutukwataho. Kwonka, twateekateeka ahari bimwe aha by’okugarukamu by’ebibuuzo ebiri ahaifo, nitwija kureeba ngu ebiri omu mishororongo egi nibitugasira omu miringo mingi.

⁹ Eki nikinyegyesa ki ahari Yehova? Yehova okuhandiikisa ebi abareeberezi baine kuhikiiriza, nikyoreka ngu naayenda ngu abo abarikutooranwa kuba abareeberezi babe bari aha mutindo gw’ahaiguru. Naayenda ngu babe eky’okureeberaho kirungi, kandi nibajunaanwa oku barikutwariza ekibiina, eki yaayeguriire n’eshagama y’Omwana we. (Byak. 20:28) Yehova naayenda ngu tuhurire twine oburinzi ahabw’okugira abareeberezi omu kibiina. (Isa. 32:1, 2) N’ahabw’enshonga egyo, ebi abareeberezi baine kuhikiiriza nibitwijutsya ngu Yehova naatufaho.

10, 11. (a) Twashoma ebi abareeberezi baine kuhikiiriza, nitubaasa kubigyenderaho tuta? (b) Nitubaasa kubikoresa tuta kuhwera abandi?

¹⁰ Ebi naashoma nimbaasa kubigyenderaho nta? Ku oraabe ori omureeberezi, obumwe n’obumwe oshemereire kushwijuma ebi oine kuhikiiriza, reero oreebe ahu oine kukora empindahinduka. Ow’eishe-emwe orikwenda kuba ‘omureeberezi’ ashemereire kushwijuma ebi aine kuhikiiriza, kandi akateeraho kubihikiiriza nk’oku arikubaasa. (1 Tim. 3:1) Kwonka, buri Mukristaayo naabaasa kugira eki yaayegyera aha biri omu mishororongo egi, obu bingi aharibyo birimu ebi Yehova arikwenda ngu Abakristaayo bakore. Nk’eky’okureeberaho, Abakristaayo boona bashemereire kworoberana kandi bakagira emiteekateekyere mirungi. (Fil. 4:5; 1 Pet. 4:7) Abareeberezi baaba “eky’okureeberaho” aha ntaama, nitubaasa kubeegyeraho kandi ‘tutooreze okwikiriza kwabo.’—1 Pet. 5:3; Heb. 13:7.

¹¹ Nimbaasa kubikoresa nta kuhwera abandi? Nitubaasa n’okukoresa ebi abareeberezi baine kuhikiiriza, kuhwera abu turikubuurira nari abeegi ba Baibuli kureeba oku abareeberezi omu bibiina by’Abajurizi ba Yehova barikutaana n’abeebembezi b’amadiini agarikweyeta Amakristaayo. Kandi, ku turikushoma aha bujunaanizibwa bw’abareeberezi, nitubaasa kwijuka oku barikukora munonga omu kibiina kutuhwera.  Twateekateeka oku barikukora n’obweziriki, nikituhwera kwongyera kubaha ekitiinisa. (1 Tes. 5:12) Kandi twayeyongyera kuha ekitiinisa abareeberezi abarikukora n’amaani, nabo nibeeyongyera kugira okushemererwa.—Heb. 13:17.

12, 13. (a) Twakoresa eby’okucondooza ebituhairwe, nitubaasa kucondooza aha bintu nka biiha? (b) Ha eky’okureeberaho kworeka oku okucondooza kurikubaasa kutuhwera kumanya ebintu ebitarikureebwa butunu.

¹² Kora okucondooza. Twakoresa eby’okucondooza ebituhairwe, nitubaasa kumanya ebintu nk’ebi:

• N’oha owaahandiikire ekitabo kya Baibuli eki?

• Kikahandiikirwa nkahi kandi ryari?

• Hakaba hariho ki obu ekitabo kya Baibuli nanka kyahandiikwa?

Okucondooza omu muringo nk’ogu nikubaasa kutuhwera kwega ebintu ebitarikureebwa butunu.

¹³ Nk’eky’okureeberaho, teekateeka aha biri omu Ezekieli 14:13, 14, aharikugira hati: “Mwana w’omuntu, ensi ku erincumuraho, yaakora ebitari by’obwesigwa, naanye naagibangira omukono, naahenda eki erikwehimbagiririzaho, nibyo by’okurya byayo, naagiteeza enjara, naagimaramu abantu n’amatungo, n’obu abantu aba bashatu, Noa, Danieli na Yobu baakuba barimu, bakaakiza amagara gaabo bonka ahabw’okuhikiirira kwabo; nikwo Mukama Ruhanga arikugamba.” Twacondooza, nitubaasa kwega ngu ebigambo bya Ezekieli ebi bikahandiikwa nk’omuri 612 Y.A. Omu bwire obwo, Noa na Yobu bakaba bamazire emyaka mingi bafiire, kandi Ruhanga akaba naakiijuka obwesigwa bwabo. Kwonka Danieli akaba atakafiire. Naabaasa kuba yaabaire ari omushogoyo nari aine emyaka nka 20, obu Yehova yaagira ngu akaba ahikiriire nka Noa na Yobu. Nitwega ki? Yehova naareeba kandi naamanya obwesigwa bw’abaheereza be, otwariiremu n’abakiri bato.—Zab. 148:12-14.

14. Ebitabo ebitebeekanisiibwe ahabw’abato nibibahwera bita, kandi nibibaasa kugasira bita n’abandi? (Reeba ekishushani aha kutandika.)

¹⁴ Nk’oku turikugasirwa twayega ebiri omu Baibuli yoona, nitubaasa n’okugasirwa twakoresa eby’okucondooza byona ebituhairwe. Yetegyereze bimwe aha by’okureeberaho. Ebitebeekanisiibwe kuhwera abato. Omu myaka egi, tushohoize ebitabo bingi eby’abato. ^[1] Ebimwe bitebeekanisiibwe kubahwera kwemera okugyemeserezibwa aha ishomero nari oburemeezi obu barikutunga omu bushogoyo. Twena nitubaasa kugasirwa tuta twashoma ebitabo ebyo? Nikituhwera kumanya ebi abato barikurabamu. N’ekirikurugamu nitubaasa kubahwera kandi tubagaruremu amaani.

15. Ahabw’enki Abakristaayo abakuru baine kufayo kumanya ebiri omu bitabo by’abato?

¹⁵ Oburemeezi bwingi oburikugambwaho omu bitabo tiburikuhika aha bato bonka. Twena twine kurinda okwikiriza kwaitu, enyehurira zaitu, tukangira okugyemeserezibwa kw’ab’orwingano rwaitu, kandi tukeetantara emikago mibi n’eby’okweshemeza ebibi. Enshonga ezi n’ezindi nyingi nizigambwaho omu bitabo by’abato. Mbwenu shi Abakristaayo abakuru bashemereire kuteekateeka ngu okushoma ebitabo eby’abato nikibagarura ahansi? Ngaaha buzima! N’obu ebitabo ebi biraabe nibishohozibwa kuhwera eminyeeto, ebirimu nibyegamira aha misingye ya Baibuli, kandi twena nitubaasa kugasirwa omu by’okurya by’omwoyo ebi.

16. Ebitabo byaitu nibihwera abato kukora ki ekindi?

¹⁶ Ebitabo byaitu oyihireho okuhwera abato kusingura oburemeezi, nibibahwera n’okutunguuka omu by’omwoyo, kandi bakairira  haihi Yehova. (Shoma Omubuurizi 12:1, 13.) Eki nakyo nikigasira Abakristaayo abakuru. Nk’eky’okureeberaho, Awake! eya Apuri 2009 ekaba erimu ekicweka “Eminyeeto Neebuuza . . . Nimbaasa Kukunda Nta Kushoma Baibuli?” Ekicweka ekyo kirimu obuhabuzi bwingi n’akabokisi aku orikubaasa kwihamu okakabiika omu Baibuli yaawe kuguma nookakoresa. Mbwenu shi abakuru nabo bagasiirwe omu kicweka eki? Omukazi w’emyaka 24 oshwairwe kandi omuzaire, akahandiika ati: “Ntwire ningumirwa okushoma Baibuli. Nkagyendera aha buhabuzi oburi omu kicweka eki kandi ninkoresa gye akabokisi akarimu. Hati, nimba nyine ekihika ky’okushoma Baibuli. Nindeeba oku ebitabo bya Baibuli birikuhikaana n’oku birikworeka gye ekyabaireho. Nkaba ntakakundaga kushoma Baibuli nk’oku ndikugikunda hati.”

17, 18. Nitubaasa kugasirwa tuta twashoma ebitabo ebihandiikirwe kukoresibwa omu kubuurira? Ha eky’okureeberaho.

¹⁷ Eby’okukoresa omu kubuurira. Kuruga 2008 tutwire nitusiima ebiri omu Omunaara gw’Omurinzi ogw’okwega omu kibiina, okukira munonga ebirikuba bihandiikirwe kuhwera Abajurizi ba Yehova. Kandi shi magaziini zaitu ez’okukoresa omu kubuurira? Nazo nizibaasa kutugasira twazishoma? Teekateeka aha ky’okureeberaho eki. Ka tugire ngu eizooba rimwe, orubazo rutakatandikire, waareeba omuntu ou waayetsire kwija aha Kyombeko ky’Obukama. Hatariho kubanganisa nooshemererwa. Omugambi yaaba naaha orubazo rwe, noobaasa kuguma nooteekateeka aha mugyenyi ogwo. Noobaasa kuteekateeka oku omuntu ogwo ariyo naagasirwa omu bi yaahurira, n’oku birikubaasa kumuhwera kuhindura omu mitwarize ye. N’ekirikurugamu, naiwe orubazo orwo nirukuhika aha mutima, kandi oyeyongyera kurusiima.

¹⁸ Nitubaasa kugasirwa omu muringo nigwo gumwe twaba nitushoma ebitabo eby’okukoresa omu kubuurira. Nk’eky’okureeberaho, Omunaara gw’Omurinzi ogw’okukoresa omu kubuurira nigushoboorora Ebyahandiikirwe omu muringo ogu abatari Bajurizi ba Yehova barikubaasa kwetegyereza. Nikyo kimwe n’ebirikuba biri ahari jw.org, nk’ebyo ebiri aha nsi y’omutwe “Ebibuuzo Ebi Baibuli Erikugarukamu” hamwe “n’Ebibuuzo Ebirikukira Kubuuzibwa.” Ku turikushoma ebi byona nitwongyera kusiima amazima agu tutwire nitumanya. Kandi nitubaasa n’okwega emiringo misya omu kushoboorora ebi turikwikiriza twaba nitubuurira. Nikyo kimwe, Awake! neetuhwera kwongyera kugira obuhame ngu Ruhanga ariho, n’okumanya kushoboororera abandi ebi turikwikiriza.—Shoma 1 Petero 3:15.

19. Nitubaasa kworeka tuta ngu nitusiima ebi Yehova arikutuha?

¹⁹ Hatariho kubanganisa, Yehova atuhaire bingi ebirikutuhwera kwigutsya ekyetengo kyaitu eky’eby’omwoyo. (Mat. 5:3) Ka tuteereho kuguma nitukoresa eby’okurya by’omwoyo ebituhairwe. Obwo nituba nitworeka ngu nitusiima ogwo orikutwegyesa eby’okutugasira.—Isa. 48:17.