KA TUGIRE ngu ori Omukristaayo omu kyasha ky’okubanza. Kandi ekibiina kyawe kyaheza kutunga ebaruha kuruga aha ntumwa Paulo. Ku baagishoma, waayetegyereza ngu Paulo yaaba naajuriza “ebyahandiikirwe ebirikwera,” eby’Oruheburaayo. (2 Timoseo 3:15) Noobaasa kugira oti: ‘Buzima nkaayenzire kureeba ekyahandiikirwe eki yaihamu ebigambo ebi.’ Kwonka ekyo tikyorobi. Ahabw’enki?

Teekateeka aha ku ebihandiiko ‘by’ebyahandiikirwe ebirikwera’ eby’omu bwire bwa Paulo byabaire biri. Kimwe aharibyo n’ekicweka ky’ekitabo kya Isaaya ekyabaire kiri aha muzingo. Kikaba nikishusha kita? Kikaba kiri ekihandiiko kimwe, kitabaganisiibwemu. Kandi kikaba kitaine shuura nari emishororongo nk’eri omu Baibuli obunaku obu.

Abaahandiikire Baibuli, obutumwa bwabo tibarabubaganiisemu eshuura n’emishororongo. Bakahandiika obutumwa bwona obu Ruhanga yaabahaire kugira ngu abantu bashome obutumwa bwa Ruhanga bwona, beitu kutari kubushoma omu bucwekacweka. Mbwenu shi naiwe ekyo tikyo orikuba nooyenda kushanga omu baruha erikuruga aha muntu ou orikukunda? Noogishoma yoona kutari kugishoma omu bucwekacweka.

Kwonka ebihandiiko ebyo okutabamu shuura n’emishororongo, kikareetaho oburemeezi. Ekyabaire kihwera Paulo kujuriza omu byahandiikirwe, n’ebigambo nk’ebi “nk’oku kyahandiikirwe” nari “nk’oku Isaaya yaagambire.” (Abarooma 3:10; 9:29) Kandi kikaba kitoorobi kusherura ebyahandiikirwe kureka waaba noomanya gye “ebyahandiikirwe ebirikwera” byona.

Kandi “ebyahandiikirwe ebirikwera” ebyo bikaba birimu obutumwa bwingi kuruga ahari Ruhanga. Ekyasha ky’okubanza kirikuza kuhendera, bikaba birimu ebitabo 66. Niyo nshonga ahabw’enki baingi abarikushoma Baibuli obunaku obu, nikibashemeza kugishoma erimu eshuura n’emishororongo ebirikubahwera kutunga byenyine ebi barikuba nibasherura, nk’ebyo ebiri omu baruha ezi Paulo yaahandiikire.

‘N’ahabw’ekyo, noobaasa kwebuuza oti: ‘N’oha owaataire eshuura n’emishororongo omu Baibuli?’

Omushaija orikwetwa cleric Stephen Langton, owaabaire Akibishopu wa Canterbury, naateekwateekwaho ngu niwe yaataire eshuura omu Baibuli. Akakora eki aha kutandika kw’ekyasha kya 13, Yesu aherize kuzaarwa obu yaabaire ari omushomesa omu yunivasite ya Paris omuri France.

Langton atakakozire ekyo, abacondooza bakaba baataireho emiringo mingi y’okutaanisa ebiri omu Baibuli barikutamu obucweka nari eshuura ahabw’okwenda kubahwera omu kujuriza. Teekateeka oku kyabaire nikiija kuboorobera kusherura ebi barikwenda omu shuura emwe, omu mwanya gw’okubisherura omu kitabo kyona, nk’omu kitabo kya Isaaya ekiine eshuura 66.

Kwonka nabwo, ebyo byona bikareetaho oburemeezi. Abacondooza bakakoresa emiringo mingi etarikushushana. Gumwe ahariyo, n’okuta eshuura 50 omu kitabo kya Mako omu mwanya gwa 16 ezirimu hati. Omu bwire bwa Langton, omuri Paris hakaba hariho abeegi kuruga omu mahanga maingi kandi bakaija na  Baibuli kuruga omu mahanga g’owaabo. Kwonka abashomesa n’abeegi, kikaba kitarikuboorobera kushoboororera abandi ebihandiiko ebi baabaire nibajurizamu. Ahabw’enki? Ahabw’okuba oku baabaire babaganiise eshuura omu bihandiiko byabo kukaba kutarikushushana.

N’ahabw’ekyo, Langton akareetaho omuringo musya gw’okubagaanisa eshuura. Ekitabo A History of the Bible, nikigira ngu omuringo gwe ogu “gukashemeza abashomi n’abahandiiki,” kandi ngu “gukajanjaara munonga omuri Europe.” Akatandikaho omuringo gw’okuta eshuura omu Baibuli ogu envunuura nyingi za Baibuli zirikukoresa obunaku obu.

Bwanyima y’emyaka 300, omu kyasha kya 16, omucondooza Omufaransa orikwetwa Robert Estienne akongyera kworobya ebintu. Akaba aine ekigyendererwa ky’okuhwera baingi kwega Baibuli. Akeetegyereza ngu okutaho omuringo gumwe gw’okuhandiikamu eshuura n’emishororongo, kikaba nikiza kuhwera munonga.

Estienne tiwe yaatandikireho okuta emishororongo omu Baibuli. Haine abandi abaabaire baakikozire. Omu byasha by’enyima, abahandiiki b’Abayudaaya, bakata emishororongo omu Byahandiikirwe byona eby’Oruheburaayo, ebirikumanywa nk’Endagaano Eya Ira kwonka tibaratairemu eshuura. Kwonka nk’oku baabaire baakozire aha bikwatiraine n’eshuura, bakaba batarikukoresa omuringo gurikushushana.

Estienne akata emishororongo omu Byahandiikirwe by’Orugriika ebirikumanywa nk’Endagaano Ensya, yaagigaita ahari egyo eyaabaire eri omu Byahandiikirwe eby’Oruheburaayo. Omu gwa 1553, akateera Baibuli yoona ey’okubanza (ey’Orufaransa) eine eshuura n’emishororongo nka Baibuli enyingi eziriho hati. Abantu abamwe tikirabashemeize, baatandika kugira ngu okuta emishororongo omu Baibuli kikagibaganisamu omu bucwekacweka kyareetera Baibuli kureebeka nk’erimu obucweka butaataine. Kwonka abantu abandi bakakunda omuringo ogu, baatandika kugukoresa omu kuteera Baibuli ezindi.

Okuta eshuura n’emishororongo omu Baibuli nikibaasa kureebeka nk’ekitarikuhwera. Kwonka eki nikihwera kubaasa kutunga emishororongo eri omu Baibuli. N’amazima, Ruhanga tiwe yaahwereire abaataire eshuura n’emishororongo omu Baibuli, kandi obumwe bakaba bagita omu myanya ahu etashemereire kuza. Kwonka eki nikituhwera kusherura emishororongo ei turikuba nitwenda kukoresa nari ei turikwenda kwijuka, nk’oku turikusherura ebigambo ebi turikwenda omu kitabo nari ekihandiiko.

N’obu okuta eshuura n’emishororongo omu Baibuli kyahwereire, ekikuru munonga twine kuta omutima aha kwetegyereza obutumwa bwona oburimu oburikuruga ahari Ruhanga. Teeraho kuguma nooshoma kandi nooyetegyereza obutumwa bwona oburimu, beitu kutari kutooranamu emishororongo mikye. Waakora otyo noija kwetegyereza gye “ebyahandiikirwe ebirikwera ebirikubaasa kukuhaisa obwengye bw’okukuhabura omuhanda gw’okujunwa.”​—2 Timoseo 3:15.