1, 2. (a) Shoboorora ahabw’enki okubatizibwa riri eidaara rikuru. (b) Omuntu ashemereire kuba naahamya ki atakabatiziibwe, kandi ahabw’enki?

ORI omuto, oine ekigyendererwa ky’okubatizibwa? Ku kiraabe nikwo kiri, ekyo n’ekigyendererwa kirungi munonga. Kwonka nk’oku ekicweka ekihweire kyorekire, okubatizibwa n’eidaara rikuru. Waabatizibwa nooba nooyoreka ngu oyehaireyo ahari Yehova kandi omuraganiise kumuheereza ebiro byona, orikwebembeza ebi arikukunda okukira ekindi kintu kyona. Niyo nshonga ahabw’enki oshemereire kubatizibwa waaba noohamiza kimwe ngu waahikire kwecweramu, waaba oine ekyetengo ky’okubatizibwa, kandi orikwetegyereza eki kirikumanyisa okwehayo.

² Kandi shi ku waakuba otarikuhamya ngu oyeteekateekire kubatizibwa? Nari ku waakuba nooyenda kubatizibwa kwonka abazaire baawe barikuteekateeka ngu oine kutegyerezaho okabanza waakura okatunga okumanya? Omu mbeera ezi zoona, otakaahwa amaani. Omu mwanya gw’ekyo, koresa omugisha ogwo kwongyera kutunguuka, kugira ngu haahinguraho obwire bukye  obaase kubatizibwa. Waaba nooteekateeka ahari ekyo, taho ekigyendererwa (1) ky’okuhamiza kimwe ebi orikwikiriza, (2) okugira ebikorwa birungi, (3) n’okusiima ekitambo.

3, 4. Abato nibabaasa kwegyera ki ahari Timoseo?

³ Teekateeka oku orikubaasa kugarukamu ebibuuzo ebi: Ahabw’enki niinyikiriza ngu Ruhanga ariho? Niki ekirikumpamiza ngu Baibuli n’Ekigambo kya Ruhanga? Ahabw’enki ninteekateeka ngu okukuratira emitindo ya Ruhanga nikikira okukuratira emitwarize y’ensi egi? Ebibuuzo ebyo tibitebeekanisiibwe kureeta okubanganisa omu biteekateeko. Omu mwanya gw’ekyo, nibibaasa kukuhwera kukuratira obuhabuzi bw’entumwa Paulo obu: ‘Mubone kumanya gye ebi Ruhanga akunda, oku biri birungi, ebirikusiimwa, kandi ebihikire buzima.’ (Rom. 12:2) Kwonka shi ahabw’enki Abakristaayo b’omuri Rooma baabaire baine kuhamiza kimwe ebi baabaire baikiriize?

⁴ Teekateeka aha ky’okureeberaho ky’omu Baibuli. Timoseo akaba naamanya gye Ebyahandiikirwe. Nyina na nyinenkuru bakaba bamwegyeise “okuruga omu buto.” Kwonka nabwo, Paulo akahiga Timoseo ati: ‘Ogumizemu omu bi waayegire okamanyira kimwe.’ (2 Tim. 3:14, 15) N’ahabw’ekyo Timoseo akaba naahamiza kimwe ngu aine amazima. Akagaikiriza, ti ahabw’okugira ngu nyina na nyinenkuru bakamugambira, kureka akashwijuma ebi yaabaire ayegire kandi yaikiriza ngu n’amazima.​—Shoma Abaheburaayo 5:14.

5, 6. Ahabw’enki ni kikuru kwega “kutaanisa ekirungi n’ekibi” waaba okiri muto?

⁵ Kandi shi iwe? Noobaasa kuba otwire noomanya amazima g’omu Baibuli kumara obwire buraingwa. Ku kiraabe nikwo kiri, taho ekigyendererwa ky’okwongyera kuhamya ngu oine amazima. Ekyo nikiija kuhamya okwikiriza kwawe kikuhwere n’okwetantara kucwamu ebigwire ahabw’okugyemeserezibwa ab’orwingano rwawe, emiteekateekyere y’ensi, nari enyehurira zaawe.

⁶ Waayega “kutaanisa ekirungi n’ekibi” okiri muto, nikiija kukutebeekanisa kugarukamu ab’orwingano rwawe baakubuuza ebibuuzo nk’ebi: ‘Noomanya ota ngu buzima hariho Ruhanga? Ahabw’enki Ruhanga oine rukundo naareka obubi kubaho? Nikibaasika kita ngu Ruhanga butoosha atwireho?’ Waaba oyetebeekaniise, ebibuuzo nk’ebyo tibirikwija kutuubya okwikiriza kwawe, kureka nibiija kukuha omuhimbo gw’okwongyera kucondooza.

7-9. Shoboorora oku ekicweka “What Does the Bible Really Teach?,” ekiri aha mukura kirikubaasa kukuhwera kuhamya okwikiriza kwawe.

⁷ Waataho omutima okeeshomesa nikiija kukuhwera kugarukamu ebibuuzo, kweihamu okubanganisa, n’okuhamya ebi orikwikiriza. (Byak. 17:11) Tuhairwe eby’okukoresa bingi ebirikubaasa kutuhwera kukora ekyo. Baingi bagasiirwe munonga barikushwijuma akatabo The Origin of Life​—Five Questions Worth Asking n’akatabo Is There a Creator Who Cares About You? Kandi, baingi aha minyeeto nibagasirwa omu kicweka ekiri aha mukura gwaitu ekiine omutwe “What Does the Bible Really Teach?” Ekicweka eki ekirikuba kirimu emitwe etari emwe n’emwe kiri aha jw.org. Za aha BIBLE TEACHINGS. Buri mutwe oguri ahansi y’ekicweka eki gutebeekanisiibwe kukuhwera kuhamiza kimwe ebi orikwikiriza ebirikukwata ahari Baibuli.

⁸ Obu orikumanya gye Baibuli, noobaasa kugarukamu ahonaaho ebibuuzo ebimwe ebiri omu kicweka ekyo. Kwonka shi ahabw’enki noohamya ngu eby’okugarukamu byawe bihikire? Ekicweka ekyo nikikuhwera  kuteekateeka aha byahandiikirwe bingi kandi kikuhiga n’okuhandiika enshonga ahabw’enki noikiriza ebintu ebimwe. Nibibaasa kukuhwera kutebeekanisa kushoboororera abandi ebi orikwikiriza ebirikuruga omu Baibuli. Ekicweka “What Does the Bible Really Teach?” ekiri aha mukura nikihwera abato baingi kwongyera kugira obuhame aha bi barikwikiriza. Ku oraabe noobaasa kukitunga, teeraho kukoresa ebirimu omu kweyegyesa kwawe.

⁹ Waayongyera kutunga obuhame aha bi orikwikiriza, nooba oriyo nooyetebeekanisiza okubatizibwa. Munyaanyazi-itwe omwe omunyeeto akagira ati: “Ntakacwiremu kubatizibwa, nkeega Baibuli kandi naareeba ngu egi niyo diini ehikire. Kandi buri izooba, obuhame obwo nibweyongyera.”

10. Ahabw’enki Omukristaayo obatiziibwe ebikorwa bye bishemereire kuhikaana n’okwikiriza kwe?

¹⁰ Baibuli neegira eti: ‘Okwikiriza kwaba kutaine bikorwa, nikuba kufiire.’ (Yak. 2:17) Waaba noohamiza kimwe ebi orikwikiriza, noija kukyoreka omu bikorwa byawe. Bikorwa ki? Baibuli neegamba aha “kuba abarikwera kandi abarikutiina Ruhanga omu mitwarize.”​—Shoma 2 Petero 3:11.

11. Shoboorora amakuru g’ebigambo okuba “orikwera omu mitwarize.”

¹¹ Kubaasa kworeka ngu ori ‘orikwera omu mitwarize,’ oshemereire kuba nootwaza gye. Oine mitwarize ki? Nk’eky’okureeberaho, teekateeka aha meezi mukaaga agahingwire. Omu meezi ago oyorekire ngu okubaasa kwawe kw’okwetegyereza kutendekirwe kutaanisa ekirungi n’ekibi? (Heb. 5:14) Noobaasa kwijuka obu waasingura okugyezibwa nari okugyemeserezibwa? Oku orikutwaza aha ishomero nikureetera abandi kugamba gye aha nyikiriza yaawe? Noohamira aha kwikiriza kwawe omu mwanya gw’okuteeraho kushushana n’abu orikushoma nabo ahabw’okutiina ngu batakujuma? (1 Pet. 4:3, 4) Buzima, tihariho ohikiriire. Nangwa n’abaheereza ba Yehova abamazire obwire buraingwa barikumuheereza, obumwe nibagira enshoni nari batiina kubuurira. Kwonka, omuntu orikuba ayehaireyo ahari Yehova nikiba nikimwesiimisa kwetererwa eiziina rya Ruhanga, kandi eki naakyoreka omu mitwarize ye.

12. Ni bintu ki ebirikutwarirwa omu kuba “abarikutiina Ruhanga,” kandi oshemereire kubitwara ota?

¹² Kandi shi okuba “abarikutiina Ruhanga”? Eki nikitwariramu ebirikukorwa omu kibiina, nk’okuza omu nteerane, n’okwejumba omu kubuurira. Nikitwariramu n’ebikorwa ebi abandi batarikureeba, nk’okweshomesa, n’okushaba waaba ori wenka. Omuntu oyehaireyo ahari Yehova tarikutwara ebikorwa ebi nk’emirimo egumire. Omu mwanya gw’ekyo, naagira emiteekateekyere nk’ey’Omugabe Daudi owaagizire ati: “Ninshemererwa okukora ebi okunda, ai Ruhanga wangye; ebiragiro byawe biri omu mutima gwangye.”​—Zab. 40:8.

13, 14. Twine ki ekirikubaasa kukuhwera kuba ‘orikutiina Ruhanga,’ kandi abato kibagasiire kita?

¹³ Kubaasa kukuhwera kutaho ebigyendererwa, omu katabo Questions Young People Ask​—Answers That Work, aka 2 aha rupapura 308 na 309, hariho ahu orikubaasa kugira ebi waahandiika. Aha mpapura ezo noobaasa kuhandiikaho eby’okugarukamu by’ebibuuzo nk’ebi: “Omu kushaba noogamba kyenyine eki orikuba nooyenda, kandi okushaba kwawe nikworeka ngu nookunda Yehova?” “Ni bintu ki ebimwe ebi orikugambaho omu kushaba kwawe?” “Nooyejumba omu kubuurira n’obu abazaire baawe barikuba batarikukwejumbamu?” Aha mpapura ezo hariho n’ahu orikubaasa kuhandiika ebigyendererwa byawe ebirikukwata aha kushaba, okweshomesa, n’okubuurira.

 ¹⁴ Abato baingi abarikwenda kubatizibwa bashangire ngu ebiri aha mpapura ezo n’eby’omugasho munonga. Munyaanyazi-itwe muto orikwetwa Tilda akagira ati: “Nkakoresa ebiri aha mpapura ezo kutaho ebigyendererwa. Nkahikiiriza ebigyendererwa byangye kimwe ahari kimwe, kandi nkaba nyeteekateekire kubatizibwa bwanyima y’omwaka gumwe.” Ow’eishe-emwe muto orikwetwa Patrick nawe akagasirwa omu muringo nigwo gumwe. Akagira ati: “Nkaba nimmanya ebigyendererwa byangye, kwonka okubihandiika kikambaasisa kukora munonga kubihikiiriza.”

15. Shoboorora ahabw’enki omuntu niwe ashemereire kwecweramu kwehayo.

¹⁵ Kimwe aha bibuuzo ebiriho n’eki: “Noija kugumizamu nooheereza Yehova n’obu abazaire baawe na banywani baawe baakurekyera aho?” Nk’Omukristaayo oyehaireyo kandi obatiziibwe, oine kukora omukago na Yehova ahabwawe. N’ahabw’ekyo, toshemereire kwegamira aha bazaire baawe nari aha muntu ondiijo weena omu kuheereza Yehova. Okuba orikwera omu mitwarize n’okutiina Ruhanga, n’obuhame ngu oine amazima kandi ngu nooyenda kworobera emitindo ya Ruhanga. Haahinguraho obwire bukye noija kuba ohikire kubatizibwa.

16, 17. (a) Niki ekishemereire kuhiga omuntu kuba Omukristaayo? (b) Noobaasa kukoresa ky’okureeberaho ki kworeka oku twine kusiima ekitambo?

¹⁶ Omushaija owaabaire naamanya gye Ebiragiro akabuuza Yesu ati: “Ekiragiro ekikuru omu biragiro ni kiiha?” Yesu akamugarukamu ati: “Kunda Mukama Ruhanga waawe n’omutima gwawe gwona, n’amagara gaawe goona, n’obwengye bwawe bwona.” (Mat. 22:35-37) Aho Yesu akooreka ngu okukunda Yehova nikwo kushemereire kuhiga Abakristaayo kukora buri kimwe, otwariiremu n’okubatizibwa. Omuringo gumwe ogu orikubaasa kukura omu kukunda Yehova n’okuteekateeka aha kitambo ky’omwana we, ekiconco ekirikukirayo kuba eky’omuhendo. (Shoma 2 Abakorinso 5:14, 15; 1 Yohaana 4:9, 19.) Waateekateeka aha kitambo n’oku kiri kikuru ahariiwe, nikiija kukuhiga kworeka okusiima kwawe.

¹⁷ Oku oine kusiima ekitambo nikubaasa kushoboororwaho kuti: Teekateeka omuntu yaakucungura orikuza kutobera omu maizi. Mbwenu shi nootaaha omuka oyeragaza amaizi, reero oyebwa eki yaakukorera? Ngaaha! Buzima noohurira oine eibanja aha muntu owaakucungura. Omu muringo  nigwo gumwe, tushemereire kusiima Yehova na Yesu ahabw’ekitambo. Twine eibanja aharibo ahabw’amagara agu twine! Bakatucungura omu kibi n’okufa. Ahabw’okutukunda, hati twine amatsiko g’okutuura omu Paradiso omu nsi ebiro byona!

18, 19. (a) Ahabw’enki otashemereire kutiina kwehayo ahari Yehova? (b) Okwehayo ahari Yehova nikikureetera kita kuba gye?

¹⁸ Noosiima Yehova ahabw’eki akukoreire? Ku oraabe noomusiima, kihikire kwehayo ahariwe kandi okabatizibwa. Ijuka ngu ku orikwehayo nooba waaraganisa Yehova ngu nooza kukora ebi arikukunda ebiro byona, n’obu haakubaho ki. Mbwenu shi oshemereire kutiina kumariirira kukora ekyo? Ngaaha buzima! Guma noijuka ngu Yehova akwiniire ebigyendererwa birungi, kandi niwe “aha ebihembo abamusherura.” (Heb. 11:6) Waayehayo ahari Yehova kandi okabatizibwa t’orikuba kubi, kureka nooba gye. Ow’eishe-emwe w’emyaka 24 owaabatiziibwe akiri muto naagira ati: “Nkaba nimbaasa kuba ninyetegyereza munonga ku ogire ngu nkategyereza naakura, kwonka okucwamu kwehayo ahari Yehova kikampwera kutasherura ebintu by’ensi.”

¹⁹ Yehova naakwendeza ebirungi. Kwonka Sitaane naayeyendeza kandi tarikukufaho. Tihaine kirungi eki arikubaasa kukuha waamukuratira. Naabaasa kukuha ata ekintu eki ataine? Taine makuru marungi, kandi taine matsiko goona. Kureka naabaasa kukuha ebiro bibi by’omumaisho, ahakuba nawe nibyo arikwija kutunga!​—Kush. 20:10.

20. Omunyeeto naabaasa kukora ki kuhika aha kwehayo n’okubatizibwa? (Reeba n’akabokisi “ Obuhwezi bw’Okukura omu by’Omwoyo.”)

²⁰ Buzima, okwehayo ahari Yehova n’ekintu kihikire eki oshemereire kukora. Oyeteekateekire kukikora? Ku kiraabe nikwo kiri, otatiina. Kwonka, ku oraabe otakeeteekateekire, gyendera aha buhabuzi oburi omu kicweka eki bukuhwere kugumizamu nootunguuka. Paulo akahandiikira Abafilipi ati: “Amazima agu tuhikiremu, tube nigo twagyenderamu.” (Fil. 3:16) Ku oraakuratire obuhabuzi obu, obwire butari bwa hare noija kugira ekyetengo ky’okwehayo ahari Yehova kandi obatizibwe.