1, 2. Yehova n’efura ata aha bantu?

YEHOVA n’efura, kandi buri kimwe eki twine nikiruga ahariwe. Ebintu byona eby’omuhendo ebiri omu nsi n’ebye, kandi naabikoresa kubaisaho ebiine amagara. (Zaaburi 104:13-15; Hagai 2:8) Kuruga omu Baibuli, nitwega oku Yehova obumwe yaabaire akoresa ebintu by’omuhendo ebyo omu muringo gw’eky’okutangaaza kubaisaho abantu be.

² Nk’eky’okureeberaho, Yehova akaha eihanga rya Israeli emaanu n’amaizi obu baabaire bari omu ihamba kumara emyaka 40. (Okuruga 16:35) N’ekyarugiremu, bakaba baine buri kimwe eki barikwenda. (Nehemia 9:20, 21) Bwanyima Yehova akaha nabi Elisa amaani g’okukanyisa buto y’efaakazi omwesigwa. Ekiconco eki kuruga ahari Ruhanga kikahwera omukazi ogwo kushashura amabanja ge, kandi yaaguma aine esente z’okwereeberera hamwe n’abatabani kuguma bahuriire. (2 Abagabe 4:1-7) Kandi Yesu arikuhwerwa Yehova omu  muringo gw’eky’okutangaaza akaba aha abantu eby’okurya nangwa n’esente kyaba nikyetengyesa.​—Matayo 15:35-38; 17:27.

3. Nituza kugaaniira ahari ki omu kicweka eki?

³ Yehova naabaasa kukoresa buri kimwe eki arikwenda kuhwera ebihangirwe bye. Kwonka nabwo, naahiga abaheereza be kuhayo eki barikubaasa kushagika omurimo gw’ekibiina kye. (Okuruga 36:3-7; shoma Enfumu 3:9.) Ahabw’enki Yehova naayenda ngu tuheyo ebintu byaitu eby’omuhendo kumugarurira? Abaheereza ba Yehova ira bakashagika bata omurimo gwe? Ekibiina kya Yehova nikikoresa kita esente ezirikuheebwayo obunaku obu? Ekicweka eki nikiija kugarukamu ebibuuzo ebi.

4. Twashagika omurimo gwa Yehova nituba nitworeka ki?

⁴ Nituha Yehova ahabw’okuba nitumukunda kandi nitusiima ebi arikutukorera. Twateekateeka ahari byona ebi Yehova atukoreire, buzima nitukwatwaho. Omugabe Daudi akeehurira ati obu yaashoboorora ekyabaire nikyetengyesa kubaasa kwombeka hekalu. Daudi akagira ngu buri kimwe eki turikutunga nikiruga ahari Yehova, kandi ngu buri kimwe eki turikumuha nikiruga aha bi arikuba atuhaire.​—Shoma 1 Obusingye 29:11-14.

5. Baibuli neeyegyesa eta ngu okuhayo twekundiire n’ekicweka kikuru eky’okuramya okw’amazima?

⁵ Nituha Yehova ahakuba ogu n’omuringo gumwe ogw’okumuramya. Entumwa Yohaana omu kworekwa, akahurira abaheereza ba Yehova omu iguru barikugira ngu Yehova “Ruhanga waitu, oshemereire kuhimbisibwa n’okuheebwa ekitiinisa n’obushoboorozi, ahabw’okuba niiwe waahangire byona; ahabw’okukunda kwawe bikahangwa kandi byabaho.” (Okushuuruurwa 4:11) Buzima, Yehova ashemereire kuheebwa ekitiinisa n’okuhimbisibwa, n’ahabw’ekyo twine kumuha ekirikukirayo oburungi. Yehova arikurabira omuri Musa akaragiira eihanga rya Israeli kugira enteerane ishatu buri mwaka. Okuhayo ahari Yehova kikaba kiri ekicweka ky’enteerane ezi. Abantu bakagambirwa ngu bakaba batashemereire kureebwa “omu maisho ga” Yehova engaro nsha. (Eky’Ebiragiro 16:16) N’obunaku obu, okuhayo twekundiire n’ekicweka kikuru omu kuramya kwaitu. Omu muringo ogu, nitworeka ngu nitutwara omurimo gw’ekibiina kya Yehova nka mukuru, kandi ngu nitugushagika.

6. Ahabw’enki ni kirungi ahariitwe kuhayo? (Reeba ekishushani aha kutandika.)

⁶ Ni kirungi kuba efura tukahayo omu mwanya gw’okuguma nituheebwa kwonka. (Shoma Ebyakozirwe 20:35.) Teekateeka aha mwana muto ou abazaire be barikuguma nibaha akasiimo kakye, reero akakoresa ekicweka ky’esente ezo kugurira abazaire be ekiconco. Ekiconco kye nikireetera abazaire be kwehurira bata? Nari teekateeka ahari payoniya muto okirikutuura n’abazaire be, reero akabaha sente z’okuhwera omu kupangisa enju nari kugura eby’okurya by’eka. Abazaire be nibaba batarikuteekateeka ngu  aine kubahwera, kwonka nibaikiriza ekiconco kye. Ahabw’enki? Naaba naayoreka ngu naasiima ebi barikumukorera. Omu muringo nigwo gumwe, Yehova naamanya ngu ni kirungi ahariitwe kuhayo aha bintu byaitu eby’omuhendo.

7, 8. Abantu ba Yehova ira bakataho ky’okureeberaho ki barikuhayo (a) haaba haine ekirikuza kukorwa? (b) kushagika omurimo gwe?

⁷ Omu Baibuli, nitwega ngu abantu ba Yehova bakaba nibahayo kushagika omurimo gwe. Obumwe bakaba bahayo haaba haine ekirikuza kukorwa. Nk’eky’okureeberaho, Musa akahiga Abaisraeli kuhayo ahabw’okwombeka eihema. Bwanyima, Omugabe Daudi akakora nikyo kimwe obu baabaire nibaza kwombeka hekalu. (Okuruga 35:5; 1 Obusingye 29:5-9) Omu butegyeki bw’Omugabe Yoasi, abanyamurwa bakahuunduuza hekalu barikukoresa esente ezi abantu baabaire bahaireyo. (2 Abagabe 12:4, 5) Omu kyasha ky’okubanza, Abakristaayo bakamanya ngu omuri Buyudaaya hakaba hariyo enjara, kandi ab’eishe-emwe bakaba baine kuhwerwa. N’ahabw’ekyo buri Mukristaayo akacwamu eki yaabaire naabaasa kutwekyera ab’eishe-emwe b’okwo.​—Ebyakozirwe 11:27-30.

⁸ Abantu ba Yehova bakaba bahayo esente kushagika abo abaabaire nibeebembera omurimo gwe. Nk’eky’okureeberaho, omu Biragiro bya Musa, Abaleevi bakaba bataine buhuunguzi nk’obw’ezindi nganda. N’ahabw’ekyo Abaisraeli abandi bakaba baha Abaleevi kimwe kya ikumi aha bintu ebi baabaire baine. Eki kikaba kibaasisa Abaleevi kuta omutima aha murimo gwabo aha ihema. (Okubara 18:21) Omu muringo nigwo gumwe, abakazi efura bakakoresa ebi baabaire baine kushagika Yesu n’entumwa ze.​—Luka 8:1-3.

9. Ira ebiheebwayo bikaba biruga nkahi?

⁹ Ebiheebwayo ebi bikaba biruga omu mihanda etari emwe n’emwe. Abaisraeli abaahaireyo eby’okwombeka eihema nibabaasa kuba baahaireyo ebintu by’omuhendo ebi baizire nabyo kuruga Misri. (Okuruga 3:21, 22; 35:22-24) Omu kyasha ky’okubanza, Abakristaayo abamwe bakaguza ebintu ebi baabaire baine, nk’ebibanja nari enju, reero esente baazireetera entumwa. Kandi entumwa bakakoresa esente ezo kuhwera ab’eishe-emwe abaabaire baine kuhwerwa. (Ebyakozirwe 4:34, 35) Abakristaayo abandi butoosha bakaba babiika esente kugira ngu baziheeyo kushagika omurimo. (1 Abakorinso 16:2) N’ahabw’ekyo omugaiga n’omworo, buri omwe akaba naabaasa kugira eki yaahayo.​—Luka 21:1-4.

10, 11. (a) Nitubaasa kutooreza tuta abaheereza ba Yehova ab’omu kyasha ky’okubanza? (b) Nootwara ota okushagika omurimo gw’Obukama?

¹⁰ Obunaku obu, naitwe nitubaasa kushabwa kuhayo ahabw’ekintu ekirikuza kukorwa. Obundi ekibiina kyanyu nikitebeekanisa kuhunduuza Ekyombeko ky’Obukama nari kwombeka ekisya. Nari obundi ofiisi  yaanyu y’eitaagi eine kuhunduuzibwa. Kandi nitubaasa kuhwera aha nshohoza y’oruteerane rwaitu oruhango. Nari obundi ab’eishe-emwe omu kicweka ekindi bahikirweho ekihikiirizi, kandi nibeetenga obuhwezi. Ebi turikuhayo nibihwera abamiisani, baapayoniya ab’omutaano, abarikutaayaayira ebibiina, n’abo abarikuheereza aha ofiisi enkuru na ofiisi z’amataagi omu nsi yoona. Ekibiina kyanyu nikibaasa kuba nikikira kuhayo kuhwera omu kwombeka Ebyombeko eby’Enteerane Empango n’Ebyombeko by’Obukama eby’ab’eishe-emwe omu bicweka ebindi omu nsi.

¹¹ Twena nitubaasa kugira eki twahayo kushagika omurimo ogurikukorwa ekibiina kya Yehova omu biro ebi eby’emperu. Abantu abarikuhayo, obwire obwingi tibarikumanywa. Ku turikuta esente omu kabokisi omu Kyombeko ky’Obukama nari tukahayo kurabira aha mukura gwaitu jw.org, titurikumanyisa abantu omuhendo gw’esente ezi twahayo. Kandi ku waakuba nooyehurira ngu eki orikuhayo ni kikye munonga tikiine mugasho? Amazima gari ngu ebirikuheebwayo ebi ekibiina kirikutunga nibiruga omu biconco bikye ebirikuheebwayo abantu baingi, omu mwanya gw’ebiconco bihango eby’abantu bakye. Nangwa n’ab’eishe-emwe abaine esente nkye nibatooreza Abakristaayo b’omuri Makedonia. Bakaba bari omu bworo “bwingi,” kwonka bakeeshengyereza ngu baikirizibwe kuhayo, kandi bakahayo bingi munonga.​—2 Abakorinso 8:1-4.

12. Ekibiina kyaitu nikiteeraho kita kukoresa gye ebirikuheebwayo?

¹² Abari aha Kakiiko Akareeberezi n’abeesigwa kandi abanyabwengye omu kukoresa ebirikuheebwayo. (Matayo 24:45) Nibashaba kandi bacwamu gye, kandi nibatebeekanisa gye oku baraakorese esente ezo. (Luka 14:28) Omu kuhandiikwa kwa Baibuli, abashaija abeesigwa abaabaire nibareeberera ebiheebwayo bakaba bahamya ngu byakoresibwa omu kuramya Yehova honka. Nk’eky’okureeberaho, Ezera akagaruka omuri Yerusaalemu aine ebiheebwayo eby’omuhendo kuruga aha mugabe wa Buperesi, ebyabaire nibitwariramu ezaabu, efeeza, n’ebindi by’omuhendo ebyabaire nibiingana esente ezirikurenga obukaikuru 100 omu doora za United State obunaku obu. Ezera akareeba ebiheebwayo ebi nk’ebiconco ebihairwe Yehova. N’ahabw’ekyo akaha obuhabuzi bw’okurinda ebintu ebi obu baabaire nibaraba omu mihanda y’akabi. (Ezera 8:24-34) Bwanyima y’emyaka mingi, entumwa Paulo akarundaana esente z’okuhwera ab’eishe-emwe abakyene omuri Buyudaaya. Akahamya ngu abo abaatwaire esente baakora “ebirikusiimwa, ti mu maisho ga Mukama kwonka, kureka n’omu maisho g’abantu.” (Shoma 2 Abakorinso 8:18-21.) Obunaku obu, ekibiina kyaitu nikitooreza Ezera na Paulo kikoresa n’obwegyendesereza ebirikuheebwayo.

13. Ahabw’enki obwire bukye enyima ekibiina kikozire empindahinduka ezimwe?

¹³ Ab’eka emwe nibabaasa kukora empinduka omu ku barikukoresa sente kugira ngu barekye kushohoza esente ezirikukira entaasya yaabo. Nari nibabaasa kworobya embeera zaabo kwongyera aha ku barikuheereza Yehova. Nikyo kimwe n’ekibiina kya Yehova. Obwire bukye enyima, habaire hariho eby’okwombeka bingi, kandi obumwe tubaire nitushohoza esente nyingi kukira  ezirikuheebwayo. Nk’eka eyaagambwaho, ekibiina nikitaho emiringo y’okutuubya aha sente ezirikushohozibwa, kandi kyorobya omurimo, kugira ngu kikorese gye ebi murikuhayo nk’oku kirikubaasika.

14-16. (a) Ebi murikuhayo nibikoresibwa kukora ki? (b) Ebintu ebi ebirikukorwa iwe nibikuhwera bita?

¹⁴ Bamwe abamazire emyaka mingi omu mazima nibagira ngu hati ekibiina nikituha ebiconco kukira enyima. Hati twine jw.org na JW Broadcasting. Twine Baibuli ya New World Translation of the Holy Scriptures omu ndimi nyingi. Omu 2014 abantu kuruga omu mahanga agandi bakaija aha ruteerane oruhango orwabaire rwine omutwe “Mubanze Musherure Obukama bwa Ruhanga!” orwabaire omu bishaayi bihango omu ndembo 14 omu nsi yoona. Buri omwe owaizire aha ruteerane oru akaba ashemereirwe!

¹⁵ Baingi nibooreka ngu nibasiima ebiconco ebi ekibiina kya Yehova kirikubaha. Nk’eky’okureeberaho omushaija n’omukazi we abarikuheereza omuri Asia bakahandiika bati: “Nituheereza omu rurembo rukye. N’ahabw’ekyo, obumwe nituhurira turi nk’abeetaaniise aha bandi, kandi niturahuka kwebwa obuhango bw’omurimo gwa Yehova. Kwonka ahonaaho ku turikuheza kureeba entebeekanisa zitari zimwe na zimwe eza JW Broadcasting, nitwijuka ngu turi bamwe aha b’eishe-emwe omu nsi yoona. Ab’eishe-emwe abakundwa ab’omu kicweka eki nibaba baine ekihika ky’okureeba JW Broadcasting. Nitukira kubahurira barikugira ngu ku barikureeba entebeekanisa ezi eza buri kwezi, nibahurira bari haihi n’ab’Akakiiko Akareeberezi. Hati nikibeesiimisa munonga kuba ekicweka ky’ebibiina kya Ruhanga.”

¹⁶ Omu nsi yoona, Ebyombeko by’Obukama 2,500 hati biriyo nibyombeka nari nibihunduuzibwa. Ab’omu kibiina kya Honduras bakagira ngu bakaba baine ekirooto  ky’okugira Ekyombeko ky’Obukama ekyabo, kwonka ekirooto ekyo buzima kikarugaho kyahikiirira. Bakahandiika bati: “Buzima tushemereirwe ahabw’okuba bamwe aha ka ya Yehova omu nsi yoona, n’okugira obumwe nk’ab’eishe-emwe.” Baingi nabo nibooreka enyehurira nk’ezo baaheza kutunga Baibuli n’ebitabo ebindi omu ndimi zaabo, ab’eishe-emwe abandi baaheza kubahwera bwanyima y’ekihikiirizi, nari baaheza kureeba ebirungi ebirikuruga omu kubuurira omu myanya erimu abantu baingi omu kicweka kyabo.

17. Nitumanya tuta ngu Yehova naashagika ekibiina kye obunaku obu?

¹⁷ Baingi abatari Bajurizi ba Yehova tibarikubaasa kwetegyereza oku turikukora ebintu ebi byona turikukoresa ebirikuheebwayo abeekundiire. Omukuru omwe kuruga omu kitongore kihango akarambura rimwe aha mateerero gaitu ag’ebitabo. Akatangaara kureeba ngu emirimo yoona neekorwa baanyekundiire, barikukoresa ebirikuheebwayo abantu abeekundiire, batakozire entebeekanisa z’okushorooza sente. Akagira ngu ebi turikukora tibishemereire kuba nibibaasika. Nitwikirizana nawe! Nitumanya ngu nibibaasika ahabw’okugira ngu Yehova niwe arikushagika omurimo ogu.​—Yobu 42:2.

18. (a) Nitutunga migisha ki twahayo kushagika omurimo gw’Obukama? (b) Nitubaasa kukora ki kuhiga abaana baitu n’abasya kuhayo?

¹⁸ Yehova naatuha ekitiinisa n’omugisha gw’okushagika omurimo mukuru gw’Obukama. Naatuhamiza ngu twakora tutyo, naija kutuha emigisha. (Malaki 3:10) Yehova naaturaganisa ngu twaba efura omu kuhayo, buri kimwe nikiija kutugyendera gye. (Shoma Enfumu 11:24, 25.) Kandi naatugambira ngu nitwija kushemererwa twahayo, ahakuba “okugaba” nikureeta okushemererwa “okukira okuheebwa.” (Ebyakozirwe 20:35) Kurabira omu bigambo n’ebikorwa byaitu, nitubaasa kwegyesa abaana baitu n’abasya oku barikubaasa kuhayo ahabw’omurimo ogu nabo bakatunga emigisha.

19. Ekicweka eki kyakuhwera kita?

¹⁹ Buri kimwe eki twine nikiruga ahari Yehova. Twamugarurira aha bi atuhaire, nitworeka ngu nitumukunda, kandi ngu nitutwara byona ebi arikutukorera nka bikuru. (1 Obusingye 29:17) Abaisraeli ku baahaireyo ahabw’okwombeka hekalu, ‘bakashemererwa, ahabw’okuba bakahayo’ ahari Yehova ‘n’omutima ogwekundiire batarikugyemwa.’ (1 Obusingye 29:9) Ka tugumizemu nitutunga okushemererwa n’okumarwa twaba nitugarurira Yehova aha bintu ebi atuhaire.