1, 2. (a) Yehova akooreka ngu niki ekyabaire nikiija kubaho omu bunaku bwaitu? (b) Ni bibuuzo ki ebirikuza kugarukwamu omu kicweka eki? (Reeba ekishushani aha kutandika.)

YEHOVA arikugamba aha bunaku obu turimu akagira ati: “Omuri ebyo biro abantu ikumi, abarikuruga omu mahanga aga buri rurimi, baryakwata omukugiro gw’ekanzu y’Omuyudaaya bamugire bati: Ka tugyende naimwe; ahabw’okuba tuhuriire ku Ruhanga ari naimwe.” (Zek. 8:23) Abantu ikumi ab’akamanyiso, nari shi abaine amatsiko g’okutuura omu nsi nibakwata “omukugiro gw’ekanzu y’Omuyudaaya.” Nibamanya ngu Yehova naaha emigisha Israeli y’omwoyo nari abashukirweho omwoyo gurikwera, n’ahabw’ekyo nibashemererwa kukwatanisa nabo.​—Gal. 6:16.

² Nka nabi Zekaria, Yesu nawe akagamba aha bumwe obu abaheereza ba Ruhanga baine. Akagamba aha bakuratsi be ngu bari omu guruupu ibiri, “obusyo obukye” hamwe ‘n’ab’entaama ezindi.’ Kwonka akagira ngu ‘n’obusyo bumwe’ obwine ‘omuriisa omwe.’ (Luk. 12:32; Yoh. 10:16) Kwonka, omukago oguri ahagati ya guruupu ezi ibiri nigureetaho ebibuuzo: (1) Mbwenu shi ab’entaama ezindi nibamanya amaziina goona ag’abashukirweho amajuta obunaku obu? (2) Abashukirweho amajuta baine kweteekateekaho bata? (3) Oshemereire kutwaza ota omwe omu kibiina kyanyu yaarya kandi akanywa aha bumanyiso  bw’Ekiijutsyo? (4) Mbwenu shi oshemereire kutiina ahabw’okweyongyera kw’omubaro gw’abarikugira ngu beetsirwe kuza omu iguru? Ka tutungye eby’okugarukamu by’ebibuuzo ebi.

3. Ahabw’enki tutarikubaasa kumanya gye abarikwija kuba bamwe aha 144,000?

³ Mbwenu shi ab’entaama ezindi baine kumanya amaziina goona ag’abashukirweho amajuta obunaku obu? Ngaaha buzima. Ahabw’enki? Ahakuba omuntu n’obu yaakuba ayetsirwe kuza omu iguru, naaba atungire okwetwa, beitu nibuba butari buhame ngu naija kutunga ekiconco ekyo. Niyo nshonga ahabw’enki Sitaane naareetaho “baanabi b’ebishuba . . . kuhabisa n’entoore, kyaba nikibaasika.” (Mat. 24:24) Omukristaayo oshukirweho amajuta tarikubaasa kuhamya ngu naija kutunga ekiconco kye eky’okuza omu iguru, okuhitsya Yehova yaareeba ngu ahikire kukitunga. Yaaguma ari omwesigwa, Yehova niwe arikucwamu, reero akamutaho akamanyiso ak’ahamuheru atakafiire nari harikuburayo obwire bukye ‘okubonabona kwingi’ kukatandika. (Kush. 2:10; 7:3, 14) N’ahabw’ekyo tikiine mugasho omuntu orikutuura omu nsi hati kuteeraho kumanya n’oha aha baheereza ba Ruhanga oraabe omwe aha 144,000. ^[1]

4. Ku kiraabe kitarikubaasika kumanya gye amaziina g’abashukirweho amajuta boona hati, nitubaasa ‘kugyenda’ tuta nabo?

⁴ Ku kiraabe kitarikubaasika kumanya gye amaziina g’abashukirweho amajuta boona hati, ab’entaama ezindi nibabaasa ‘kugyenda’ bata nabo? Yetegyereze oku obunabi oburi omuri Zekaria burikugamba aha bashaija ikumi ab’akamanyiso. Aba bakaba nibaija kukwata ‘omukugiro gw’ekanzu y’Omuyudaaya, bamugire bati: Ka tugyende naimwe; ahabw’okuba tuhuriire ku Ruhanga ari naimwe.’ N’obu Ekyahandiikirwe eki kiraabe nikigamba aha Muyudaaya omwe, ekigambo “naimwe” ekirimu emirundi ebiri, nikyoreka ngu nibarenga aha muntu omwe. Eki nikimanyisa ngu Omuyudaaya orikugambwaho ti muntu omwe kureka ni guruupu y’abashukirweho amajuta boona! N’ahabw’ekyo tikirikwetengyesa kumanya buri Muyudaaya ow’omwoyo reero tukabona kugyenda nawe. Omu mwanya gw’ekyo, twine kubamanya nka guruupu reero tukabashagika. Ebyahandiikirwe tibirikutuhiga kukuratira ondiijo muntu, kureka Yesu niwe Mwebembezi waitu.​—Mat. 23:10.

5. Ni kurabura ki oku abashukirweho amajuta baine kuteekateekaho munonga, kandi n’ahabw’enki?

⁵ Abo abarikurya aha bumanyiso bw’Ekiijutsyo baine kwetegyereza gye okurabura okuri omu 1 Abakorinso 11:27-29. (Kishome.) Entumwa Paulo naatworeka nshonga ki enkuru aha? Omukristaayo oshukirweho amajuta yaaba atagumire aine omukago murungi na Yehova, yaarya aha bumanyiso naaba atashemeire. (Heb. 6:4-6; 10:26-29) Okurabura nk’oku nikuhwera Abakristaayo abashukirweho amajuta kuguma nibaijuka ngu tibakatungire kiconco kyabo. Baine kugumizamu ‘kuhika aharikuhakanirwa ngu baheebwe ekihembo eky’okweta kwa Ruhanga omuri Kristo Yesu okw’okuza omu iguru.’​—Fil. 3:13-16.

6. Abakristaayo abashukirweho amajuta baine kweteekateekaho bata?

⁶ Paulo arikuhwerwa Ruhanga akeeshengyereza abashukirweho amajuta ati: “Mugyende omu buryo obushemeire okwetwa oku mwayetsirwe.” Eki bashemereire kukikora bata? Paulo akongyeraho ati: “Mwebundaarize n’obucureezi bwona, nimwetwara, nimugumisiririzana omuri rukundo, nimwezirika kurinda obumwe bw’omwoyo, muteerainwe omurunga gw’obusingye.” (Efe. 4:1-3) Omwoyo gwa Yehova ogurikwera nigubareetera kuba abacureezi, beitu kutari kugira amaryo. (Kol. 3:12) Omu muringo gw’obucureezi, abashukirweho amajuta nibamanya  ngu tibaine omwoyo mwingi gurikwera okukira abandi abaine amatsiko g’okutuura omu nsi. Tibarikuteekateeka ngu baine okumanya kw’omutaano nari okushuuruurwa, nari kuteeraho kworeka ngu haine oku barikukira abandi. Kandi tibarikugambira abandi ngu nabo bashukirweho omwoyo gurikwera kandi ngu baine kutandika kurya aha mugaati n’okunywa ahari viinyo, kureka omu bucureezi nibamanya ngu Yehova niwe arikutoorana abu araashukyeho omwoyo gurikwera.

7, 8. Abakristaayo abashukirweho amajuta baine kwetantara ki, kandi n’ahabw’enki?

⁷ N’obu Abakristaayo abashukirweho amajuta baraabe baine omugisha gw’omuhendo ogw’okutooranwa kuza omu iguru, tibarikuteekateeka ngu abandi baine kubaha ekitiinisa ky’omutaano. (Efe. 1:18, 19; shoma Abafilipi 2:2, 3.) Omuntu ku arikutooranwa kuba omwe aha baraaze omu iguru, omwoyo gwa Yehova ogurikwera nigumuhamiza wenka. Tihariho kirango ekirikurangwa kugira ngu abantu boona bakimanye. N’ahabw’ekyo, tibashemereire kutangaara abamwe baabanganisa ngu nibabaasa kuba batashukirweho omwoyo gurikwera. Buzima, nibamanya ngu Ebyahandiikirwe nibituhabura kutarahuka kwikiriza omuntu orikugira ngu atoorainwe Ruhanga omu muringo gw’omutaano. (Kush. 2:2) Omu muringo gwona, tibashemereire kugyenda nibeeyanjurira abandi ngu bo bashukirweho omwoyo gurikwera. Tibashemereire kugambira abandi, ahabw’okutenda ngu abandi babateho omutima munonga, kandi tibaine n’okwehimbisa ahabw’ekiconco eki barikwija kutunga omu biro by’omumaisho.​—1 Kor. 1:28, 29; shoma 1 Abakorinso 4:6-8.

⁸ Kandi, Abakristaayo abashukirweho amajuta tibarikwetwara nk’ab’omutaano reero bakataho ekibiina kyabo bonka. Tibarikusherura bagyenzi baabo abarikugira ngu bashukirweho omwoyo gurikwera, barikuteekateeka kugira omukago nabo nari kugira guruupu yaabo ey’okwega Baibuli. (Gal. 1:15-17) Baakora ebintu nk’ebyo nibabaasa kubaganisamu ekibiina kandi nibaba nibahakanisa omwoyo gurikwera, ogurikureetaho obusingye n’obumwe.​—Shoma Abarooma 16:17, 18.

9. Ahabw’enki twine kwegyendesereza oku turikutwariza abarikurya kandi bakanywa aha bumanyiso bw’Ekiijutsyo? (Reeba akabokisi “ Rukundo Terikutwaza Kubi.”)

⁹ Oshemereire kutwariza ota ogwo orikurya kandi akanywa aha bumanyiso bw’Ekiijutsyo? Yesu akagambira abeegi be ati: “Mwena muri eishe-emwe.” Akoongyeraho ati: “Orikwetunguura aryagarurwa ahansi; kandi orikwegarura ahansi, aryatunguurwa.” (Mat. 23:8-12) N’ahabw’ekyo, nikiba kigwire kuhimbisa abantu, n’obu baakuba beene-ishe Kristo abashukirweho omwoyo gurikwera. Baibuli neetuhiga kutooreza okwikiriza kw’abarikureeberera ekibiina nari abareeberezi, kwonka terikutuhiga kutunguura omuntu weena nk’omutegyeki. (Heb. 13:7) N’amazima, Ebyahandiikirwe nibigamba ahari bamwe “abashemereire kuheebwa ekitiinisa kingi.” Kwonka abo nibaba bashemereire kuheebwa ekitiinisa, ti ahabw’okugira ngu bashukirweho amajuta, beitu ahabw’okugira ngu nibareeberera ekibiina omu muringo murungi, kandi ‘nibakora omurimo gw’okubuurira n’okwegyesa.’ (1 Tim. 5:17) N’ahabw’ekyo nikiba nikimaramu amaani, ab’eishe-emwe abandi baahimbisiriza nari bakatunguura abo abeetsirwe kuza omu iguru. Ekibi munonga, abashukirweho amajuta baatwarwa omu muringo gw’omutaano, nikibagumira kuguma bari abacureezi. (Rom. 12:3) Omuriitwe tiharimu orikwenda kuteeza entsibo omwe aha beene-ishe Kristo!​—Luk. 17:2.

10. Noobaasa kworeka ota ngu nooha ekitiinisa Abakristaayo abashukirweho amajuta?

¹⁰ Abu Yehova arikushukaho omwoyo gurikwera tushemereire kubaha tuta ekitiinisa ekihikire? Titushemereire kubabuuza ebibuuzo ebirikukwata aha kushukwaho omwoyo gurikwera. N’ahabw’ekyo  nitwetantara kwetaasya omu nshonga ezitarikutukwataho. (1 Tes. 4:11; 2 Tes. 3:11) Titushemereire kuteekateeka ngu abazaire, abanyabuzaare, nari abashaija n’abakazi b’abashukirweho amajuta nabo bashemereire kuba bashukirweho amajuta. Okushukwaho amajuta ti kw’empungurano. (1 Tes. 2:12) Kandi tushemereire kwetantara omuze gw’okubuuza abashaija nari abakazi b’abashukirweho amajuta oku barikwehurira, ahabw’okugira ngu nibaija kuba batari n’abakundwa baabo omu Paradiso omu nsi. Omu mwanya gw’okubuuza ebibuuzo ebirikubasaasa, twena twine kugira obuhame ngu Yehova naija kushashaanura engaro ze ‘ahaazye ekintu kyona ekihuriire ebi kirikwetenga.’​—Zab. 145:16.

11. Okwetantara kuha “abantu ekitiinisa” omu muringo gutahikire nikiturinda kita?

¹¹ Abo abarikutwariza gye Abakristaayo abashukirweho amajuta nibeerinda akabi akatarikurahuka kureebwa. Ebyahandiikirwe nibitugira ngu omu kibiina nihabaasa kubamu “ab’eishe-emwe ab’ebishuba.” (Gal. 2:4, 5; 1 Yoh. 2:19) Ab’eishe-emwe abo nibabaasa kwetwara nk’abashukirweho amajuta. Ekindi, Abakristaayo abashukirweho omwoyo gurikwera nibabaasa kugwa barugye omu kwikiriza. (Mat. 25:10-12; 2 Pet. 2:20, 21) Twayetantara omutego gw’okuha “abantu ekitiinisa” omu muringo ogutahikire, titurikwija kukuratira abantu nk’abo, nangwa n’Omukristaayo orikumanywa nari oheereize obwire buraingwa yaaremwa kuguma ari omwesigwa, okwikiriza kwaitu nikwija kuguma kuhami.​—Yud. 16.

12, 13. Ahabw’enki otashemereire kutiina ahabw’okweyongyera kw’abarikurya kandi bakanywa aha bumanyiso bw’Ekiijutsyo?

¹² Omu myaka egi, nitureeba omubaro gw’abarikurya kandi bakanywa aha bumanyiso bw’Ekiijutsyo kya Kristo nigweyongyera. Eki nikitaana n’eki twabaire nitureeba omu myaka y’enyima, ahakuba omubaro gw’abaabaire nibarya aha mugaati kandi bakanywa n’ahari viinyo gukaba guri mukye. Mbwenu shi eki kishemereire kututiinisa? Ngaaha. Ka tureebe zimwe aha nshonga ezi twine kuguma nitwijuka.

¹³ Yehova “naamanya abe.” (2 Tim. 2:19) Abarikubara abantu abaija aha Kiijutsyo tibo bashemereire kucwamu n’oha buzima oine amatsiko g’okuza omu iguru. Omuhendo gw’abarikurya kandi bakanywa aha bumanyiso nigutwariramu abarikukora enshobe kuteekateeka ngu bashukirweho omwoyo gurikwera. Bamwe abaabaire nibarya kandi bakanywa aha bumanyiso, bwanyima bakarekyera aho. Abamwe emitwe yaabo neebaasa  kuba etarikukora gye nari baine enyehurira ezitahikire ezirikubareetera kuteekateeka ngu nibaija kutegyeka na Kristo omu iguru. N’ahabw’ekyo, omubaro gw’abarikurya kandi bakanywa aha bumanyiso bw’Ekiijutsyo, buzima tigwo mubaro gwenyine ogw’abashukirweho amajuta abatsigaireho omu nsi.

14. Baibuli neegamba ki aha mubaro gw’abashukirweho amajuta abaraabe bari omu nsi okubonabona kwingi kwaza kutandika?

¹⁴ Yesu ku araije kutwara abashukirweho amajuta omu iguru, nibaija kuba bari omu bicweka bingi by’ensi. Aha bikwatiraine n’obwire obwo, Baibuli neegamba ahari Yesu eti: “Aryatuma baamaraika be n’eiraka rihango ry’enzamba, bateerane entoore ze nibazitaaruura omu mbaju ina okuruga aha muheru gw’eiguru okuhika ha gundi.” (Mat. 24:31) Ebyahandiikirwe nibyoreka ngu omu biro by’emperu, omu nsi hakaabaire hatsigairemu bakye aha bashukirweho amajuta. (Kush. 12:17) Kwonka Baibuli terikworeka omubaro gw’abaraabe bariho okubonabona kwingi kwaza kutandika.

15, 16. Niki eki twine kumanya aha bikwatiraine n’abantu 144,000?

¹⁵ Yehova niwe arikucwamu obu araatoorane abu araashukyeho omwoyo gurikwera. (Rom. 8:28-30) Yehova akatandika kushuka omwoyo gurikwera aha bantu, bwanyima ya Yesu kufa kandi akazooka, kandi nikireebeka ngu Abakristaayo boona abaabaire bariho omu kyasha ky’okubanza bakaba bashukirweho omwoyo gurikwera. Kuruga omu kyasha ky’okubanza kuhika omu kutandika kw’ebiro by’emperu, baingi abaabaire nibeeyeta abakuratsi ba Kristo bakaba bari ab’ebishuba, kandi akabagyeragyeranisa ‘n’enkyenzi.’ N’obu kiraabe kiri kityo, Yehova akagumizamu naashuka omwoyo gwe gurikwera aha baheereza be abeesigwa omu bwire obwo bwona, kandi Yesu akagira ngu bari ‘nk’oburo.’ (Mat. 13:24-30) Omu biro by’emperu, Yehova agumiizemu naatoorana abaraahitsye 144,000. ^[2] Yaacwamu kutoorana omuntu emperu eri haihi kuhika, tihaine n’omwe ahariitwe oshemereire kubanganisa obwengye bwe. (Isa. 45:9; Dan. 4:35; shoma Abarooma 9:11, 16.) ^[3] Twine kwegyendesereza kutatwaza nk’abakozi abaayetomboitiire mukama waabo ahabw’oku yaatwariize abakozi abaizire aha shaaha ya 11.​—Shoma Matayo 20:8-15.

¹⁶ Ti boona abeetsirwe kuza omu iguru ngu nibabarirwa aha ‘mwambari omwesigwa kandi ow’obwengye.’ (Mat. 24:45-47) Nk’oku kyabaire kiri omu kyasha ky’okubanza, Yehova na Yesu hati nibariisa baingi kurabira omu bakye. Bakye aha Bakristaayo omu kyasha ky’okubanza nibo baakoresiibwe kuhandiika Ebyahandiikirwe eby’Orugriika. Nikyo kimwe n’obunaku obu, Abakristaayo bakye abashukirweho amajuta batoorainwe kutuha eby’okurya eby’omwoyo omu bunaku obuhikire.

17. Waayega ki omu kicweka eki?

¹⁷ Twayega ki omu kicweka eki? Yehova acwiremu kutuha emigabo ebiri, ogw’okuza omu iguru oguhairwe Abaisraeli ab’omwoyo, n’ogw’okutuura omu nsi oguhairwe abantu ikumi ab’akamanyiso. Kwonka, Yehova naayenda ngu abeetsirwe kuza omu iguru n’abarikuza kutuura omu nsi boorobere emitindo emwe. Abari omu guruupu ezi zombi baine kuguma bari abacureezi. Guruupu zombi zishemereire kuba ziine obumwe. Guruupu zombi ziine kureeta obusingye omu kibiina. Obu ebiro by’emperu birikweyongyera kwirira haihi, twena ka tumariirire kuheereza nk’obusyo bumwe oburikwebemberwa Kristo.