1. Yehova akahanga abantu baine kubaasa ki?

YEHOVA akahanga abantu baine okubaasa kw’omutaano. Akatuha okubaasa kw’okuteekateeka, ekirikutuhwera kushoboorora oburemeezi n’okweteebekaniisiza ebiro by’omumaisho. (Enfumu 2:11) Akatuha obushoboorozi bw’okukora ebi tutebeekaniise, kandi tukahikiiriza ebigyendererwa byaitu. (Abafilipi 2:13) Akatuha n’omuntu w’omunda, niyo nyehurira erikutuhwera kumanya ekirungi n’ekibi. Omuntu waitu w’omunda naatuhwera kwetantara kushiisha n’okushoboorora enshobe zaitu.—Abarooma 2:15.

2. Yehova naayenda ngu tukorese tuta okubaasa kwaitu?

² Yehova naayenda ngu tukorese okubaasa kwaitu omu muringo murungi. Ahabw’enki? Ahakuba naatukunda kandi naamanya ngu nitwija kushemererwa twakoresa ebiconco ebi atuhaire omu muringo murungi. Nk’eky’okureeberaho, omu Byahandiikirwe by’Oruheburaayo, nitushoma tuti: “Ebi omweziriki ateekateeka kukora tibibura kureeta mweru,” kandi “kyona eki orikwenda kukora n’emikono yaawe, kikore n’amaani.”  (Enfumu 21:5; Omubuurizi 9:10) Omu Byahandiikirwe eby’Orugriika, nitushoma tuti: “N’ahabw’ekyo obu tukiine omwanya tukore gye abantu boona,” kandi “nk’oku omuntu weena yaahairwe ekiconco, mube nikwo mwabihweresana.” (Abagalatia 6:10; 1 Petero 4:10) Buzima, Yehova naayenda ngu tukore eki turikubaasa kugira ngu twegasire kandi tuhwere n’abandi.

3. Abantu baine bugarukiro ki?

³ Yehova naayenda ngu tukorese okubaasa kwaitu, kwonka naamanya ngu twine obugarukiro. Nk’eky’okureeberaho, titurikubaasa kwihaho okutahikiirira, ekibi, na rufu. (1 Abagabe 8:46) Ekindi, titurikubaasa kuragiira abandi eky’okukora, ahakuba buri omwe aine obugabe bw’okwecweramu. N’obu twakuba twine okumanya nari turabire omu bintu bingi, titurikubaasa kwingana na Yehova.—Isaaya 55:9.

4. Nituza kureeba ki omu kicweka eki?

⁴ Butoosha tushemereire kwikiriza Yehova kutwebembera, turikumwesiga ngu naija kutuhwera kandi atukorere ebi tutarikubaasa kwekorera. Yehova naayenda ngu tuteekateekye aha ki turikubaasa kukora kushoboorora oburemeezi kandi tukahwera n’abandi. (Shoma Zaaburi 37:3.) Twine kwesiga Yehova kandi tukakora ebirungi. Eki nitubaasa kukikora tuta? Ka tureebe oku Noa, Daudi, n’abandi baheereza ba Ruhanga abeesigwa bayesigire Yehova. Nituza kwetegyereza ngu hariho ebintu ebi baabaire batarikubaasa kukora, kwonka bakata omutima aha bintu ebi baabaire nibabaasa kukora.

5. Shoboorora embeera ei Noa yaabaire arimu.

⁵ Noa akaba naatuura omu nsi eyaabaire ‘eijwire eiraro’ n’obushambani. (Okutandika 6:4, 9-13) N’obu Noa yaabaire naamanya ngu Yehova naija kucwekyereza ensi egyo embi, aine kuba yaayehuriire kubi ahabw’ebi abantu baabaire nibakora. Omu mbeera egyo, Noa akeetegyereza ngu hariho ebintu ebi yaabaire atarikubaasa kukora, kwonka hariho n’ebi yaayetegyereize ngu naabaasa kukora.

6, 7. (a) Noa akaba atarikubaasa kukora ki? (b) Embeera ei turimu obwire obu neeshushana eta n’ey’omu bwire bwa Noa?

⁶ Ebi Noa yaabaire atarikubaasa kukora: Omu bwesigwa Noa akarabura abantu arikubagambira obutumwa obu Yehova yaabaire amuhaire, kwonka akaba atarikubaasa kubagyema kubwikiriza. Kandi akaba atarikubaasa kurahutsya Omwegyemure kwija juba. Noa akeesiga Yehova ngu naija kuhikiiriza ekigyendererwa kye eky’okumaraho obubi, akaba naikiriza ngu Ruhanga naija kukikora omu bwire obuhikire.—Okutandika 6:17.

⁷ Naitwe turi omu nsi eijwire abantu ababi, kandi nitumanya ngu Yehova araganiise kugicwekyereza. (1 Yohaana 2:17) Hati, titurikubaasa kugyema abantu kwikiriza “amakuru marungi g’Obukama.” Kandi tihaine eki turikubaasa kukora kurahutsya “okubonabona kwingi.” (Matayo 24:14, 21) Nka Noa, twine kugira okwikiriza kuhami, kandi tukeesiga ngu Ruhanga naija kumaraho obubi bwona juba. (Zaaburi 37:10, 11) Nituhamya  ngu Yehova tarikubaasa kwikiriza ensi egi embi kugumaho n’obu kwakuba okurenzyaho ekiro kimwe.—Habakuuki 2:3.

8. Noa akata omutima ahari ki? (Reeba ekishushani aha kutandika.)

⁸ Eki Noa yaabaire naabaasa kukora: Noa omu mwanya gw’okuhwamu amaani ahabw’ebi yaabaire atarikubaasa kukora, akata omutima aha bi yaabaire naabaasa kukora. Omu bwesigwa Noa akarabura abantu arikubagambira obutumwa obu Yehova yaabaire amuhaire. (2 Petero 2:5) Omurimo ogu nigubaasa kuba gwamuhwereire kuhamya okwikiriza kwe. Okwongyera aha kubuurira, akakuratira obuhabuzi bwa Yehova oburikukwata aha kwombeka obwato.—Shoma Abaheburaayo 11:7.

9. Nitubaasa kutooreza tuta Noa?

⁹ Nka Noa, butoosha nitweyongyera “kukora omurimo gwa Mukama.” (1 Abakorinso 15:58) Nk’eky’okureeberaho, nitubaasa kuhwera omu kwombeka n’okuhunduuza Ebyombeko by’Obukama, n’Ebyombeko eby’Enteerane Empango, kuhwera aha nteerane empango z’ekiro kimwe n’ez’ebiro bishatu, nari kuhwera aha ofiisi y’eitaagi nari ofiisi y’abavunuuzi. Ekikuru munonga, nitweyongyera kwejumba omu murimo gw’okubuurira, ogurikuhamiza kimwe amatsiko gaitu agu twine aha biro by’omumaisho. Munyaanyazi-itwe omwe omwesigwa akagira ngu yaagaaniira n’abandi aha migisha y’Obukama bwa Ruhanga, naayetegyereza ngu abantu tibaine matsiko goona, kandi ngu nibareeba oburemeezi bwabo nk’obw’ebiro n’ebiro. Nk’oku munyaanyazi-itwe ogwo yaagambire, twine amatsiko, kandi nitweyongyera kugahamya twaba nitugagambira abandi. Amatsiko aga nigatuhwera kuguma omu mpaka z’okuhakanira amagara!—1 Abakorinso 9:24.

10. Shoboorora embeera ei Daudi yaabaire arimu.

¹⁰ Omugabe Daudi akaba ari omwesigwa, kandi Yehova akaba naamukunda munonga. (Ebyakozirwe 13:22) N’obu kiraabe kiri kityo, Daudi akashambana na Batisheba, ekyabaire kiri kibi. Ekibi munonga, akateeraho kushereka ekibi kye arikucuma enaama mbi y’okwita Uriya, iba Batisheba omu rugamba. Daudi akatweka Uriya ebaruha eyaabaire neeyoreka oku araitwe! (2 Samueli 11:1-21) Bwanyima, ebibi bya Daudi bikamanywa. (Mako 4:22) Ekyo ku kyabaireho, Daudi akatwaza ata?

11, 12. (a) Bwanyima ya Daudi kushiisha, niki eki yaabaire atarikubaasa kukora? (b) Yehova naija kutukorera ki twayeteisa?

¹¹ Eki Daudi yaabaire atarikubaasa kukora: Daudi akaba atarikubaasa kugarura enyima ebi yaabaire akozire. Kandi ebyarugire omu kushiisha kwe bikaba nibiija kumukwataho ebiro by’amagara ge byona. (2 Samueli 12:10-12, 14) N’ahabw’ekyo akaba aine kugira okwikiriza. Akaba aine kugira obwesigye ngu yaayeteisa, Yehova naija kumusaasira kandi amuhwere kugumisiriza ebirugire omu bikorwa bye.

 ¹² Ahabw’okugira ngu tituhikiriire, twena nitushiisha. Kwonka enshobe ezimwe niziba ziri ez’amaani okukira ezindi, kandi obumwe nituba tutarikubaasa kuzigarura enyima. Naitwe nitubaasa kukwatwaho munonga ahabw’ebikorwa byaitu. (Abagalatia 6:7) Kwonka nitwesiga okuraganisa kwa Yehova ngu twayeteisa, naija kutuhwera omu mbeera ezigumire, nangwa n’obu zaakuba ziretsirweho enshobe zaitu.—Shoma Isaaya 1:18, 19; Ebyakozirwe 3:19.

13. Daudi akagaruraho ata omukago gwe na Yehova?

¹³ Eki Daudi yaabaire naabaasa kukora: Daudi akaba naayenda kugaruraho omukago gwe na Yehova. Ekyo akakikora ata? Daudi akaikiriza Yehova kumuhwera. Nk’eky’okureeberaho, akaikiriza obuhabuzi bwa nabi wa Yehova Nasani. (2 Samueli 12:13) Daudi akashaba Yehova kumuhwera kandi yaayeteisa ebibi bye, arikworeka ngu buzima akaba naayenda ngu Yehova amugirire embabazi omurundi ogundi. (Zaaburi 51:1-17) Daudi omu mwanya gw’okuhwa amaani ahabw’okweshiinja, akeegyera aha nshobe ze. Taragarukire kukora enshobe ezo ez’amaani omurundi ogundi. Bwanyima y’emyaka mingi, akafa ari omushaija omwesigwa, kandi Yehova naamwijuka nk’omwesigwa.—Abaheburaayo 11:32-34.

14. Nitubaasa kwegyera ki ahari Daudi?

¹⁴ Nitubaasa kwegyera ki ahari Daudi? Twakora ekibi ky’amaani, twine kweteisiza kimwe, tugambire Yehova ekibi kyaitu, kandi tumushabe kutusaasira. (1 Yohaana 1:9) Kandi twine n’okugambira abareeberezi, ahakuba nibabaasa kutuhwera kugaruraho omukago gwaitu na Yehova. (Shoma Yakobo 5:14-16.) Twikiriza obuhwezi bwa Yehova, nituba nitworeka ngu nitwesiga ekiraganiso kya Yehova eky’okutusaasira. Okwongyera ahari ekyo, twine kwegyera aha nshobe zaitu, kandi tukaguma nituheereza Yehova twine obumanzi.—Abaheburaayo 12:12, 13.

15. Nitwegyera ki ahari Hanna?

¹⁵ Noobaasa kuteekateeka aha baheereza ba Ruhanga abandi abeesigwa abarikugambwaho omu Baibuli, abaabaire nibeesiga Yehova barikukora kyona eki barikubaasa omu mbeera ezigumire. Nk’eky’okureeberaho, hariho obwire obu Hanna yaabaire atarikubaasa kuzaara abaana. Akaba atarikubaasa kuhindura embeera egyo. Kwonka akaba naayesiga Yehova ngu naaza kumuhuumuriza. N’ahabw’ekyo akagumizamu naaza omu hekalu kuramya Yehova, kandi naashaba Yehova kumuhwera, arikumugambira oku yaabaire naayehurira. (1 Samueli 1:9-11) Ekyo ka n’eky’okureeberaho kirungi ahariitwe! Twaba twine amagara mabi nari oburemeezi obundi obu tutarikubaasa kuhindura, nituba twine kwegyekyerera Yehova okushoberwa kwaitu, kandi tugira obwesigye ngu naatufaho. (1 Petero 5:6, 7) Kandi nitumanya eki turikubaasa kukora  kugasirwa omu nteerane nari entebeekanisa zoona ezi ekibiina kya Yehova kirikutuha.—Abaheburaayo 10:24, 25.

16. Abazaire nibabaasa kwegyera ki ahari Samueli?

¹⁶ Kandi shi abazaire abeesigwa abu abaana baabo barekyeire aho kuheereza Yehova? Nabi Samueli akaba atarikubaasa kugyema batabani be abakuzire kuguma bahamiire ahari Ruhanga. (1 Samueli 8:1-3) Enshonga akazireka omu mikono ya Yehova. Kwonka, Samueli akakora kyona eki arikubaasa kuguma ahamiire ahari Ruhanga kandi akamushemeza. (Enfumu 27:11) Obunaku obu, abazaire Abakristaayo baingi nibabaasa kuba bari omu mbeera nk’egyo. Nibeesigira kimwe ngu nk’omuzaire orikugambwaho omu ky’okureeberaho kya Yesu eky’omwana ekirare, Yehova naaba ayeteekateekire kwakiira abasiisi abarikweteisa. (Luka 15:20) Hati, abazaire nibabaasa kuta omutima aha kuguma bahamiire ahari Yehova, baine amatsiko ngu eky’okureeberaho kyabo nikiija kuhiga abaana baabo kugarukira Yehova.

17. Ahabw’enki eky’okureeberaho eky’omukazi efaakazi nikigaruramu amaani?

¹⁷ Ondiijo ou turikubaasa kwegyeraho n’omukazi efaakazi owaabaire ariho omu bwire bwa Yesu. (Shoma Luka 21:1-4.) Akaba ataine eki arikubaasa kukora aha bushomankuzi bw’omuri hekalu, kandi akaba atarikubaasa kuhindura embeera ye y’okuba omworo. (Matayo 21:12, 13) Kwonka okwesiga Yehova kikamuhiga kushagika okuramya okw’amazima. Akaba aine omutima gw’okugaba kandi akahayo “obusente bubiri,” obu yaabaire aine heza. Omukazi ogwo omwesigwa akooreka ngu naayesiga Yehova. Akaba naamanya ngu yaayebembeza okuheereza Yehova, naija kumuha kyona ekirikwetengyesa. Omu muringo nigwo gumwe, nitwesiga ngu twabanza kusherura Obukama bwa Ruhanga, naija kutuha byona ebirikwetengyesa.—Matayo 6:33.

18. Gamba eky’okureeberaho ky’ow’eishe-emwe owaabaire aine emiteekateekyere mirungi.

¹⁸ Ab’eishe-emwe na banyaanyazi-itwe baingi obunaku obu nabo nibeesiga Yehova barikuta omutima aha bi barikubaasa kukora beitu bitari ebi batarikubaasa kukora. Teekateeka aha w’eishe-emwe Malcolm, owaagumire ari omwesigwa okuhitsya obu yaafa omu 2015. Emyaka mingi ei we n’omukazi we baamazire nibaheereza Yehova, bakaba bahikwaho ebirungi n’ebibi. Akagira ati: “Obumwe torikubaasa kumanya ekiraahikye aha magara gaawe, nari kuteebereza, kandi gagumire kureeberera. Kwonka Yehova naaha omugisha abo abarikumwesiga.” Obuhabuzi bwa Malcolm bwine makuru ki? “Shaba Yehova kutunga ebirungi n’okugira obweziriki omu kuheereza Yehova. Ta omutima aha bi orikubaasa kukora, bitari ebi otarikubaasa kukora.” *—Reeba obugambo obw’ahansi.

19. (a) Ahabw’enki Ekyahandiikirwe kyaitu eky’omwaka 2017 ni kirungi? (b) Noija kugyendera ota aha kyahandiikirwe kyaitu eky’omwaka 2017?

¹⁹ Ensi egi embi ‘neeyeyongyera kuba mbi,’ n’ahabw’ekyo embeera niziija kweyongyera kuba mbi. (2 Timoseo 3:1, 13) Ni kikuru kandi n’eky’obwengye okuteerarikirira ekirenga ahabw’oburemeezi obu twine. Omu mwanya gw’ekyo, twine kwesigira kimwe Yehova kandi tukata omutima aha bi turikubaasa kukora. Niyo nshonga ahabw’enki ekyahandiikirwe ky’omwaka 2017 eki tutooraine ni kirungi Yesigye Yehova “okore ebirungi”!—Zaaburi 37:3.