N’obu Baibuli kitari kitabo ky’eby’obujanjabi, erimu obuhabuzi oburikukora kandi obw’omugasho. Obuhabuzi obu erikuha nibubaasa kuhwera omuntu orikuteganisibwa endwara z’omutwe. Teekateeka aha byahandiikirwe ebi.

‘Abahuriire tibarikwetenga [mushaho], kureka abarwaire.’—MATAYO 9:12.

Baibuli neeyoreka ngu hariho obu kirikwetengyesa kusherura obujanjabi. Baingi abaine endwara y’omutwe bagasirwe ahabw’okusherura obuhwezi bw’abashaho.

“Ni kirungi kumanyiiza omubiri gwawe.”​—1 TIMOSEO 4:8, Contemporary English Version.

Waakoresa obwire n’amaani gaawe ebintu ebirikugasira omubiri nikibaasa kukuhwera kugira amagara marungi. Eki nikitwariramu okuhamira aha ntebeekanisa yaawe y’okumanyiiza omubiri, okurya eby’okurya by’ekiriisa n’okugwejegyera ekirikumara.

“Omutima ogushemereirwe n’omubazi murungi, kwonka omutima ogucuramiriirwe gureetera omuntu kuhwa aha magufa.”—ENFUMU 17:22.

Okushoma Baibuli n’okutaho ebigyendererwa ebiringaniire kandi ebi orikubaasa kuhikiiriza nikibaasa  kukuhwera kuguma oshemereirwe. Okugira emiteekateekyere mirungi n’amatsiko nikikuhwera kuterarikirira ekirenga n’okwemera endwara z’omutwe.

“Obwengye bugirwa abacureezi.” —ENFUMU 11:2.

Noobaasa kutakora byona ebi orikwenda kukora, n’ahabw’ekyo ikiriza obuhwezi bw’abandi. Banywani baawe n’ab’eka yaawe nibabaasa kuba nibenda kukuhwera kwonka batarikumanya oku bashemereire kukikora. Bamanyise eki orikwenda ngu bakukorere. Otabashaba kukora ebi batarikubaasa kandi butoosha basiime ahabw’okukuhwera.

“Nkaba ntarikwehurira gye, n’ahabw’ekyo nkaza ow’omushaho. Akancebera naamanya endwara ei naabaire nyine n’obujanjabi obu nyine kutunga.”—Nicole, a orikuteganisibwa endwara y’okurahuka kuhinduka omu nyehurira n’ebiteekateeko.

“Nyetegyereize ngu okushoma Baibuli n’omukazi wangye butoosha nikimpwera kutandika buri izooba n’ebiteekateeko birungi. Kandi obu ndikuba nyine amaganya, nintunga omushororongo ogurikungumya.”—Peter, oine endwara y’amaganya.

“Nkaba ningumirwa kugambira abandi endwara ei nyine ahakuba nkaba ninshwara. Kwonka munywani wangye w’aha mara akaba naanyetegyereza kandi ampurikiza. Buzima akaba naampwera kwehurira gye kandi mpurira ntari nyenka.”—Ji-yoo, oine endwara y’okutarya.

“Baibuli empwereire kugira emiteekateekyere eringaniire erikukwata aha kuhuumuraho n’okukora. Obuhabuzi bw’obwengye oburi omu Baibuli bumpweraire kutegyeka enyehurira zangye.”—Timothy, oine endwara y’okuguma naakora ekintu obutaheza.