EKI ABANTU BARIKUGAMBA Abantu baingi nibareeba okuzaana zaara nk’ekitari ky’akabi, na munonga kyakorwa omu muringo ogurikwikirizibwa omu biragiro. Emiringo emwe ey’okuzaana zaara erikwikirizibwa gavumenti, neeshashura emishoro erikugasira abantu.

EKI BAIBULI ERIKUGAMBA Tihaine ahu Baibuli erikugamba aha kuteera zaara. Kwonka, neeha emisingye mingi erikworeka oku Ruhanga arikureeba okuteera zaara.

Zaara neetwariramu okusingura esente ezi abandi baafeerwa, kandi eki nikihakanisa okurabura kwa Baibuli okurikugira ngu “mwerinde okwetenga kwona [nari omururu].” (Luka 12:15) Okuzaana zaara, nikwenegyeza, omururu. Ebibiina by’okuzaana zaara nibirangirira obusinguzi bw’amaani, kwonka birikubeiha, ahakuba okuteera zaara eki nikibeihabeiha abantu baingi kwejumbamu omu bwingi. Omu mwanya gw’okuhwera omuntu kwetantara omururu, zaara neeyenegyeza ekyetengo ky’okutunga esente omu muringo gworobi.

Okuzaana zaara nikureetaho okweyendeza: okusingura esente ezi bandi baafeerwa. Kwonka, Baibuli neehiga omuntu ‘kureka kwesherurira ebye ahabwe,’ beitu ayete n’aha by’abandi. (1 Abakorinso 10:24) Kandi kimwe aha Biragiro Ikumi nikigira kiti: “Otaryetenga. . . ekintu kyona ekya mutaahi waawe.” (Okuruga 20:17) Omuteezi wa zaara yaata omutima aha kusingura, naaba naayenda ngu atungye amagoba g’esente ezi abandi baafeerwa.

Kandi Baibuli neerabura aha bikwatiraine n’okureeba obusinguzi obwo nk’omugisha. Omuri Israeli eya ira, hariho abaarekyeire aho kwikiririza omuri Ruhanga bakatandika ‘kuteekyera obugyenyi’ ruhanga w’engisha. Mbwenu shi okuheereza ruhanga w’engisha kikabareetera kusiimwa Ruhanga? Ngaaha, akabagira ati: “Kureka mukakora ebi ntarikusiima, mwatoorana ebi ntarikushemerererwa.”—Isaaya 65:11, 12.

Buzima, omu bicweka ebimwe eby’ensi, esente ezirikushoroozibwa omu barikuteera zaara nizikoresibwa omu by’obwegyese, okutunguura eby’obushuubuzi n’ebindi bintu ebirikugasira abantu. Kwonka eki tikirikuhindura emyanya ahu zirikwihwa, nibyo bikorwa ebirikushagika omururu, okweyendeza, nari emiteekateekyere y’okutunga ekintu kya busha.

“Otaryetenga . . . ekintu kyona ekya mutaahi waawe.”—Okuruga 20:17.

EKI BAIBULI ERIKUGAMBA Baibuli neerabura ngu ‘abarikwetenga kuba abatungi nibagwa omu kwohibwa n’omu mutego n’omu kwetenga kwingi kw’obushema okurikushiisha, kukaroha abantu omu kuconcoboza n’okuhwerekyerera.’ (1 Timoseo 6:9) Okuteera zaara nikureeta omururu, kandi omururu n’ogw’akabi ahakuba Baibuli neegubarira omu micwe mibi endiijo eine kwetantarwa.​—Abaefeso 5:3.

Ahabw’okugira ngu okuteera zaara nikwebembeza okugaigahara juba, nikureeta okukunda sente, kandi Baibuli neegira ngu okukunda sente “n’omuzi gw’ebibi byona.” Okwetenga esente nikubaasa kuba okw’amaani aha muntu, kumureetere kwerarikirira munonga, okwikiriza kwe omuri Ruhanga kutuube. Omu muringo gw’akamanyiso, Baibuli neegamba ahari abo abarikugwa omu mutego gw’okukunda sente ‘nk’abarikwecumitira kimwe n’enaku nyingi.’—1 Timoseo 6:​10.

Omururu niguzaara okutamarwa, gureetera abantu kuguma batamazirwe n’entaatsya yaabo gubaremesa n’okushemererwa. ‘Orikukunda efeeza tahaaga feeza, kandi n’okunda obutungi tahaaga magoba.’—Omubuurizi 5:​10.

Abantu baingi abarikugwa omu mutego gw’okuteera zaara nibagira omuze ogugumire eicwa. Oburemeezi obu bujanjaire munonga, abantu obukaikuru abaine omuze ogu bari omuri United States honka, kurugiirira aha kuteebereza.

Enfumu emwe neegira eti: “Obuhunguzi obutungirwe ahonaaho omu kutandika, omuheru gwabwo tigurigira mugisha.” (Enfumu 20:21) Oburemeezi buri ngu abaine omuze gw’okuteera zaara bagizire amabanja nari baaba abooro rucebe, kandi abandi bafeereirwe emirimo yaabo, obushwere, n’abanywani. Okugyendera aha buhabuzi bw’emisingye ya Baibuli nikibaasa kuhwera omuntu kwetantara ebibi ebirikuruga omu kuteera zaara n’okutagira kushemererwa.

‘Abarikwetenga kuba abatungi nibagwa omu kwohibwa n’omu mutego n’omu kwetenga kwingi kw’obushema okurikushiisha, kukaroha abantu omu kuconcoboza n’okuhwerekyerera.’​—1 Timoseo 6:9.