Waahikwaho oburemeezi, okaayenzire kuba omwesigwa nka Danieli? Danieli akeega ebiri omu Kigambo kya Ruhanga, otwariremu n’obunabi obugumire. (Dan 9:2) Okwega ebiri omu Baibuli nikibaasa kukuhwera kuguma ori omwesigwa. Kita shi? Nikibaasa kwongyera aha kwikiriza kwawe ngu ebi Yehova arikuraganisa nibiija kuhikiirira. (Yos 23:14) Nikibaasa n’okukuhwera kwongyera kukunda Ruhanga, kandi kikuhigye kukora ekirungi. (Zab 97:10) Kwonka shi oine kutandikiire nkahi? Yetegyereze obuhabuzi obu.

• Nyine kwega ahari ki? Entebeekanisa nungi y’okwega neetwariramu okutebeekanisiza enteerane. Ebicweka by’okushoma omu Baibuli buri saabiiti nibaija kukugasira munonga waataho obwire okacondooza aha nshonga ezi otarikwetegyereza gye. Kandi nabwo, abamwe bacwiremu kwega bingi ebirikukwata aha bunabi bw’omu Baibuli, aha mitwarize etari emwe ei turikutunga ahabw’omwoyo gwa Ruhanga, aha ngyendo za Paulo ez’obumiisani, nari aha bihangirwe bya Yehova ebirikureebwa. Waateekateeka aha kibuuzo kuruga omu Baibuli omu izooba, kihandiike kandi obe nikyo waayegaho omu kwega kwawe okurakurateho.

• Nimbaasa kwiha nkahi ebi ndayegeho? Reeba vidiyo Ebirikutuhwera Kucondooza aha by’Omuhendo eby’Omwoyo kubaasa kutunga ahu oraihe ebi oraayegyeho. Kubaasa kwegyezamu, condooza aha mahanga kirimaani agarikujwekyerwa enyamaishwa omuri Danieli eshuura 7.

• Nshemereire kumara bwire burikwingana ki aha kwega? Okweyegyesa butoosha nikyo kikuru kubaasa kuba gye omu by’omwoyo. Noobaasa kutandika orikwega kumara obwire bukye, reero mporampora ogume nooyongyera aha bwire bw’okwega kyaba nikyetengyesa. Okwega Ekigambo kya Ruhanga nikishushana n’okutimba okuzimu orikusherura eky’eitungo ekisherekirwe; oku orikweyongyera kutunga eby’eitungo bingi, nikwo orikweyongyera kugumizamu nootimba! (Enf 2:3-6) Noija kweyongyera kukunda Ekigambo kya Ruhanga, kandi butoosha noija kugumizamu nookunda kwega Baibuli.​—1Pet 2:2.

• Dan 7:4

• Dan 7:5

• Dan 7:6

• Dan 7:7

EKIBUUZO EKINDI:

Ebiri omu Danieli 7:8, 24 bikahikiirizibwa bita?

EKINDI EKI ORAYEGYEHO:

Enyamaishwa ezirikugambwaho omu Okushuuruurwa eshuura 13 nizijwekyera ki?