Kuruga omu Jenwari 2018, aha rupapura rw’okubanza orw’Obuheereza Bwaitu n’Oku Turikutwaza Akatabo k’Okukoresa hatwire hariho ebi turikubaasa kugaaniiraho. Nituhigwa kuta omutima aha kugaaniira n’abantu omu mwanya gw’okubaha ebitabo. Kubaasa kuhwera ababuurizi kuhindahindura omu nyanjura zaabo, tutwire nitureeba vidiyo ez’ebi turikubaasa kugaaniiraho ezirikworeka oku turikubaasa kutandika kugaaniira n’omuntu turikukoresa Baibuli yonka. Mbwenu shi eki nikimanyisa ngu titwine kukoresa ebitabo twaba nitubuurira enju aha nju? Ngaaha! Nk’eky’okureeberaho, turakiti nizituhwera kubaasa kutandika kugaaniira n’omuntu. Nitubaasa kukoresa turakiti omu muringo ogu:

1. Buuza ekibuuzo ekiri aha mutwe gwa turakiti ekiine eby’okugarukamu bishatu.

2. Yoreka oku ekyahandiikirwe ekiri aha rupapura 2 kirikugarukamu ekibuuzo eki. Obwire bwakubaasisa, noobaasa kushoma kandi muhikaanise ebiteekateeko aha bindi ebiri omu turakiti.

3. Ha ou orikubuurira turakiti, kandi omuhige kushoma ebindi ebiri omu turakiti omu bwire bwe.

4. Otakagyenzire, mworekye ekibuuzo “Ky’okuteekateekaho” reero okore entebeekanisa y’okugaruka mukigaaniireho.

Waagaruka, mugaaniire aha kibuuzo eki waamutsigiire kandi otsigeho ekibuuzo ekindi eki muraagaaniireho obundi. Noobaasa kutoorana kimwe aha bibuuzo ebiri aha mukura nari ekiri omu katabo akarikworekwa aha rupapura rw’aha muheru. Omu bwire obushemereire, yanjura akatabo Amakuru Marungi Kuruga Ahari Ruhanga! nari akatabo akandi kuruga omu Ebi Turikukoresa omu Kwegyesa Abantu Baibuli.