EISHOMO 17
Yesu n’Owa Muringo Ki?
Twayega aha bi Yesu yaagambire n’ebi yaakozire omu nsi, nitumanya emitwarize ye erikutureetera kumwirira haihi n’okwirira haihi Ishe, Yehova. Emwe aha mitwarize egyo n’eha? Kandi nitubaasa kumutooreza tuta?
1. Yesu naashushana ata na Ishe?
Obu Yesu yaabaire ari omu iguru, akaba naareeba Ishe kandi akamwegyeraho kumara obuhumbi bw’emyaka. Eki kikamureetera kuteekateeka nkawe, kwehurira nkawe, n’okutwaza nkawe. (Shoma Yohaana 5:19.) Akaba aine emitwarize nk’eya Ishe yenyini kyamureetera kugira ati: “Ondeebire, biri areebire Isheboona.” (Yohaana 14:9) Waayega aha mitwarize ya Yesu, noomanya gye Yehova. N’eky’okureeberaho, embabazi ezi Yesu ainiire abantu nizooreka ngu Yehova atwiniire embabazi.
2. Yesu akooreka ata ngu naakunda Yehova?
Yesu akagira ati: ‘Nyowe ninkora nk’oku Tata yaandagiire, ngu ensi emanye ku ndikumukunda.’ (Yohaana 14:31) Obu Yesu yaabaire ari omu nsi, akooreka ngu naakunda munonga Ishe arikumworobera nangwa n’obu kyabaire kiba kigumire kukikora. Kandi Yesu akaba naakunda kwegyesa ebirikukwata ahari Ishe n’okuhwera abandi kumunywana.—Yohaana 14:23.
3. Yesu akooreka ata ngu naakunda abantu?
Baibuli neegira ngu Yesu okukira munonga akaba naakunda abantu. (Enfumu 8:31) Akooreka ngu naakunda abantu arikubagumya kandi arikwefeerereza kubahwera. Akakora eby’okutangaaza ebyayorekire ngu aine amaani n’embabazi. (Mako 1:40-42) Akaba naatwariza abantu omu muringo gw’embabazi, kandi akaba atarikushoroora. Ebigambo bye bikaba nibiha abantu abacureezi, obuhuumure n’amatsiko. Yesu akaba ayeteekateekire kubonabona n’okufeera abantu ahabw’okubakunda. Kwonka okukira munonga naakunda abarikugyendera aha bi yaayegyeise.—Shoma Yohaana 15:13, 14.
SHWIJUMA GYE
Yongyera kwega aha mitwarize ya Yesu. Kandi reeba oku orikubaasa kworeka ngu oine rukundo n’obufura nkawe.
4. Yesu naakunda Ishe
Nitubaasa kukunda Ruhanga turikwegyera aha ky’okureeberaho kya Yesu. Shoma Luka 6:12 na Yohaana 15:10; 17:26. Shoma buri kyahandiikirwe, kubaasa kugarukamu ekibuuzo eki:
-
Nitubaasa kutooreza tuta Yesu, kworeka ngu nitukunda Yehova?
Yesu akaba naakunda Ishe ow’omu iguru, kandi akaba naamushaba emirundi mingi
5. Yesu naasaasibwa abaine eki bakyenire
Yesu akaba naayebembeza ebyetengo eby’abandi okukira ebye. Nangwa n’obu yaabaire aba aruhire, akaba akoresa obwire bwe n’amaani ge kuhwera abantu. Shoma Mako 6:30-44, kubaasa kugarukamu ebibuuzo ebi:
-
Kurugiirira aha mishororongo egi, Yesu akooreka ata ngu naafayo aha bandi?—Reeba omushororongo 31, 34, 41, na 42.
-
Niki ekyahigire Yesu kuhwera abantu?—Reeba omushororongo 34.
-
Yesu okugira emitwarize nk’eya Yehova, nikikwegyesa ki ahari Yehova?
-
Nitubaasa kufayo tuta aha bandi turikutooreza Yesu?
6. Yesu n’efura
Yesu akaba ari efura n’obu araabe yaabaire ataine bintu bingi, kandi akatuhiga kuba efura. Shoma Ebyakozirwe 20:35, kubaasa kugarukamu ekibuuzo eki:
-
Kurugiirira ahari Yesu, nitubaasa kutunga tuta okushemererwa?
Zaana VIDIYO, kubaasa kugarukamu ebibuuzo ebirikukurataho.
-
Nitubaasa kuha tuta abandi, n’obu twakuba tutaine ebintu bingi?
Eki waaba nookimanya?
Baibuli neetwegyesa ngu twine kushaba Yehova kurabira omu iziina rya Yesu. (Shoma Yohaana 16:23, 24.) Twashaba omu muringo ogu, nitworeka ngu nitusiima eki Yesu yaakozire kutuhwera kuba banywani ba Yehova.
ABAMWE NIBAGIRA NGU: “Ruhanga tarikufayo aha kubonabona kwaitu.”
-
Obu Yesu aine emitwarize nk’eya Ishe, ebikorwa bye nibihamya bita ngu Yehova naatufaho?
OMU BUGUFU
Yesu naakunda Yehova n’abantu. Obu Yesu ari nka Ishe, waayongyera kumumanya, noija kwongyera kumanya Yehova.
Okweijutsya
-
Nitubaasa kworeka tuta ngu nitukunda Yehova, nk’oku Yesu yaakozire?
-
Nitubaasa kworeka tuta ngu nitukunda abantu, nk’oku Yesu yaakozire?
-
Niki ekirikukushemeza munonga aha mitwarize ya Yesu?
JUMBURA EBINDI
Yetegyereze emwe aha mitwarize ya Yesu ei turikubaasa kutooreza.
“Tooreza Yesu, Obe . . .” (Yesu Niwe Muhanda, Amazima, n’Amagara, orupapura 317)
Shwijuma omanye ahabw’enki twine kushaba turikurabira omuri Yesu.
“Ahabw’enki Twine Kushaba Turikuraba omu Iziina rya Yesu?” (Omunaara gw’Omurinzi, Febwari 1, 2008)
Haine eki Baibuli erikugamba aha ku Yesu yaabaire naashusha?
Nitwegyera ki aha ku Yesu yaabaire naatwariza abakazi?
“Ekitiinisa Ahansi y’Obureeberezi bwa Ruhanga” (Omunaara gw’Omurinzi, Seputemba 1, 2012)
Noobaasa Kukunda n'Ebi
EBIBUUZO EBIRIKUKIRA KUBUUZIBWA
Omushomo gw’Okwegyesa Baibuli ogw’Abajurizi ba Yehova Niki?
Omu ntebeekanisa ya busha ey’okuhikaanisa ebiteekateeko ey’Abajurizi ba Yehova, noobaasa kukoresa envunuura ya Baibuli yoona. Noobaasa kwega n’eka yaawe yoona nari kweta banywani baawe.
