EISHOMO 16
Yesu Akakora ki Obu Yaabaire Ari omu Nsi?
Abantu baingi nibateekateeka ngu Yesu n’omwereere otaine kihwera, nabi omunyabwengye, nari omushaija oriyo naafa. Kwonka shi, nitubaasa kumwegaho bingi turikushwijuma ebi yaakozire obu yaabaire ari omu nsi? Omu ishomo eri, nituza kureeba bimwe aha bintu bikuru ebi Yesu yaakozire n’oku birikukukwataho.
1. Yesu akaba naakora murimo ki omukuru?
Omurimo gwa Yesu omukuru gukaba guri ‘okubuurira ebigambo birungi eby’Obukama bwa Ruhanga.’ (Shoma Luka 4:43.) Akaba naabuurira amakuru marungi ngu Ruhanga naija kutaho Obukama bwe, nari gavumenti eraiheho oburemeezi bw’abantu. a Yesu akabuurira aha Bukama obutaruha, kumara emyaka eshatu n’ekicweka.—Matayo 9:35.
2. Ahabw’enki Yesu yaakozire eby’okutangaaza?
Baibuli neegira ngu Ruhanga akakora ‘emirimo mikuru n’eby’okutangaaza n’obumanyiso [kurabira omuri Yesu].’ (Ebyakozirwe 2:22) Amaani ga Ruhanga gakabaasisa Yesu kutereeza embeera y’obwire, kuha abantu nyamwingi eby’okurya, kukiza abarwaire, n’okuzoora abafu. (Matayo 8:23-27; 14:15-21; Mako 6:56; Luka 7:11-17) Eby’okutangaaza ebi Yesu yaakozire bikooreka butunu ngu Ruhanga niwe yaamutumire. Kandi bikooreka ngu Yehova aine amaani g’okwihaho oburemeezi.
3. Nitubaasa kwegyera ki aha ntwaza ya Yesu?
Yesu akoorobera Yehova omu mbeera zoona. (Shoma Yohaana 8:29.) N’obu Yesu araabe yaabaire naahiiganisibwa, akaguma ari omwesigwa arikukora ebi Ishe arikwenda kuhika n’aha kufa. Akooreka ngu abantu nibabaasa kuheereza Ruhanga, n’omu mbeera zigumire. N’ahabw’ekyo, Yesu akatutsigira “eky’okureeberaho,” ngu tugyendere haihi n’ebiribatiro bye.—1 Petero 2:21.
SHWIJUMA GYE
Yetegyereze oku Yesu yaabuuriire abandi amakuru marungi kandi akakora n’eby’okutangaaza.
4. Yesu akabuurira abandi amakuru marungi
Yesu akagyenda engyendo ndaingwa omu nguuto z’omucuucu, arikubuurira abantu baingi amakuru marungi nk’oku kirikubaasika. Shoma Luka 8:1, kubaasa kugarukamu ebibuuzo ebi:
-
Mbwenu shi Yesu akaba naabuurira abaija kumuhurikiza bonka?
-
Yesu akaba naateeraho ata kusherura abantu?
Ruhanga akaha obunabi ngu Mesia naija kubuurira abandi amakuru marungi. Shoma Isaaya 61:1, 2, kubaasa kugarukamu ebibuuzo ebi:
-
Yesu akahikiiriza ata obunabi obu?
-
Mbwenu shi hati abantu baine kuhurira amakuru marungi aga?
5. Yesu akeegyesa abantu amazima g’omuhendo
Yesu akaba naayegyesa ebintu by’omugasho oyihireho okubuurira amakuru marungi g’Obukama bwa Ruhanga. Yetegyereze eby’okureeberaho bikye eby’omu Rubazo rwe orw’aha Rushozi. Shoma Matayo 6:14, 34 na 7:12, kubaasa kugarukamu ebibuuzo ebi:
-
Yesu akaha buhabuzi ki bw’obwengye omu mishororongo egi?
-
Nooteekateeka ngu obuhabuzi obu nibukikora na hati?
6. Yesu akakora eby’okutangaaza
Yehova akaha Yesu amaani g’okukora eby’okutangaaza bingi. Okureeba eky’okureeberaho kimwe, shoma Mako 5:25-34 nari zaana VIDIYO, kubaasa kugarukamu ebibuuzo ebirikukurataho.
-
Omu vidiyo, omukazi owaabaire arwaire akaba aine buhame ki?
-
Niki ekirikukushemeza aha ky’okutangaaza eki?
Shoma Yohaana 5:36, kubaasa kugarukamu ekibuuzo eki:
-
Eby’okutangaaza bya Yesu bikaba ‘nibihamya’ ki?
Eki waaba nookimanya?
Bingi ebi turikumanya ahari Yesu biri omu bitabo bya Baibuli bina eby’Engiri, ekya Matayo, Mako, Luka, na Yohaana. Abahandiiki b’Engiri bakahandiika obushonshorekye oburikukwata ahari Yesu oburikutaana. Obushonshorekye obu bwona nibuha ekishushani ekihikire ahari Yesu.
-
MATAYO
niwe yaahandiikire ekitabo ky’Engiri eky’okubanza. Kirimu enyegyesa za Yesu nyingi, na munonga ezirikukwata aha Bukama bwa Ruhanga.
-
MAKO
akahandiika ekitabo kigufu eky’Engiri. Kirimu ebirikushemeza ebi Yesu yaakozire.
-
LUKA
akata omutima aha kushaba n’oku Yesu yaabaire naatwariza abakazi.
-
YOHAANA
akagamba bingi ebirikukwata aha mitwarize ya Yesu n’ebigaaniiro bya Yesu na banywani be ab’aha mara n’abandi.
ABAMWE NIBAGIRA NGU: “Yesu akaba ari omushaija murungi kyonka, nikwo kuheza.”
-
Iwe nooteekateeka ki?
OMU BUGUFU
Yesu akabuurira aha Bukama bwa Ruhanga, yaakora eby’okutangaaza, kandi yaayorobera Yehova omu mbeera zoona.
Okweijutsya
-
Yesu akakora murimo ki omukuru omu nsi?
-
Eby’okutangaaza bya Yesu nibihamya ki?
-
Yesu akeegyesa mashomo ki ag’omugasho?
JUMBURA EBINDI
Yesu akaba naakira kubuurira ahari ki?
“Obukama Bwa Ruhanga—Ni Bukuru Ahari Yesu” (Omunaara gw’Omurinzi, Okitoba 1, 2014)
Yetegyereze ahabw’enki turikubaasa kuhamya ngu buzima Yesu akakora eby’okutangaaza.
“Eby’okutangaaza bya Yesu, Noobaasa Kubyegyeraho Ki?” (Omunaara gw’Omurinzi, Gyuraayi 15, 2004)
Reeba oku eky’okureeberaho kya Yesu eky’okwefeerereza kyakwatsire aha mushaija omwe.
“Nkaba Ninyeteekateekaho Nyenka” (Omunaara gw’Omurinzi, Okitoba 1, 2014)
Reeba ebikuru ebikuratanisiibwe gye ebi Yesu yaakozire omu buheereza bwe.
a Obukama bwa Ruhanga nibuza kugambwaho omu bwijwire omu mashomo 31-33.
Noobaasa Kukunda n'Ebi
EBIBUUZO EBIRIKUKIRA KUBUUZIBWA
Omushomo gw’Okwegyesa Baibuli ogw’Abajurizi ba Yehova Niki?
Omu ntebeekanisa ya busha ey’okuhikaanisa ebiteekateeko ey’Abajurizi ba Yehova, noobaasa kukoresa envunuura ya Baibuli yoona. Noobaasa kwega n’eka yaawe yoona nari kweta banywani baawe.
