EISHOMO 09
Yirira Haihi Ruhanga Kurabira omu Kushaba
Haine obu orikuba nooyenda kutunga obuhabuzi? Oine ebibuuzo bikuru ebi orikwenda kutunga eby’okugarukamu byabyo? Nooyenda kutunga obuhuumure nari obuhame? Nooyenda kuhurira ori haihi na Yehova? Ebi byona nibibaasika ahabw’okushaba. Kwonka omuringo gw’okushaba oguhikire ni guuha? Ruhanga shi naahurira buri kushaba kwona? Noobaasa kukora ki okushaba kwawe kubaasa kugarukwamu? Ka tureebe.
1. Twine kushaba oha, kandi turikugamba ahari bintu ki?
Yesu akeegyesa ngu twine kushaba Tataitwe ow’omu iguru wenka. Yesu nawe akaba naashaba Yehova. Akagira ati: “Mushabe muti: Tataitwe ow’omu iguru . . . ” (Matayo 6:9) Twashaba Yehova, nituhamya omukago gwaitu nawe.
Omu kushaba nitubaasa kugamba buri nshonga yoona. Kwonka, Ruhanga kubaasa kugarukamu okushaba kwaitu, kwine kuba nikuhikaana n’ebi arikukunda. ‘Twashaba ekintu kyona nk’oku [Ruhanga] arikukunda, naatuhurira.’ (1 Yohaana 5:14) Yesu akooreka ebihikire kugambwaho omu kushaba. (Shoma Matayo 6:9-13.) Oyihireho okugamba ebirikutwerarikiriza, titwine kwebwa kusiima Ruhanga ahabw’ebi atukoreire, n’okushabira abandi.
2. Tushemereire kushaba tuta?
Baibuli neetuhiga eti: ‘Mugambire Ruhanga byona,’ ebiri omu mutima. (Zaaburi 62:8) N’ahabw’ekyo okushaba kwaitu kwine kuba kuri okw’amazima kandi kurikuruga aha mutima. Nitubaasa kushaba turikugamba nari tuhunami, kandi nitubaasa kwecureeza omu muringo gwona ogurikuhaisa ekitiinisa. Nitubaasa kushaba obwire bwona n’omu mwanya gwona.
3. Ruhanga naagarukamu ata okushaba kwaitu?
Naakikora omu miringo mingi. Atuhaire Ekigambo kye Baibuli, ahu turikukira kushanga eby’okugarukamu by’ebibuuzo byaitu. Okushoma Ekigambo kya Ruhanga nikibaasa ‘kuha obwengye’ otarikumanya bingi. (Zaaburi 19:7; shoma Yakobo 1:5.) Naatuha obuhuumure omu biteekateeko twaba twine emirabanamu. Kandi naabaasa kuhiga abaheereza be kutuha obuhwezi obu turikwenda.
SHWIJUMA GYE
Manya oku orikubaasa kushaba kuruga aha mutima omu muringo ogurikushemeza Ruhanga, n’oku orikubaasa kugasirwa.
4. Ruhanga naayenda ngu tumushabe nk’oku arikukunda
Ahabw’enki Ruhanga arikubaasa kusiima okushaba kwaitu nari kutakusiima? Zaana VIDIYO.
Yehova naayenda ngu tumushabe. Shoma Zaaburi 65:2, kubaasa kugarukamu ekibuuzo eki:
-
Noogira ngu ogwo ‘orikuhurira okushaba’ naayenda ngu omushabe, nari tarikwenda?
Twine kuteeraho kutwaza omu muringo ogurikuhikaana n’emitindo ya Ruhanga twaba nitwenda ngu ahurire okushaba kwaitu. Shoma Miika 3:4 na 1 Petero 3:12, kubaasa kugarukamu ekibuuzo eki:
-
Yehova kubaasa kuhurira okushaba kwaitu, twine kukora ki?
Omu rutaro, embaju zombi nizibaasa kushaba kusingura. N’eky’oburyo shi kuteekateeka ngu Ruhanga naagarukamu okushaba okwo?
5. Twine kushaba kuruga aha mutima
Abamwe nibeegyesibwa ngu baine kugarukamu ebigambo ebimwe baaba nibashaba. Ruhanga shi nikwo arikwenda ngu tumushabe tutyo? Shoma Matayo 6:7, kubaasa kugarukamu ekibuuzo eki:
-
Noobaasa kwetantara ota ‘okugarukagaruka omu bigambo’ waaba nooshaba?
Buri izooba, noobaasa kuteekateeka aha mugisha gumwe ogu Yehova yaakuha reero omusiime. Waakora eki buri izooba kumara saabiiti emwe, noija kuba ogambire aha bintu mushanju omu kushaba otaine eki ogarukiremu.
Omuzaire murungi naaba naayenda ngu omwana we amugambire oku arikwehurira aihire aha mutima. Na Yehova naayenda ngu tumushabe twihire aha mutima
6. Okushaba n’ekiconco kuruga ahari Ruhanga
Nitubaasa kugasirwa tuta omu kushaba, omu bwire burungi n’obugumire? Zaana VIDIYO.
Baibuli neegira ngu okushaba nikutuhwera kwikaikana omu biteekateeko. Shoma Abafilipi 4:6, 7, kubaasa kugarukamu ebibuuzo ebi:
-
Okushaba nikuhwera kuta, n’obu obumwe kuraabe kutarikwihaho oburemeezi bwaitu?
-
Ni bintu ki ebimwe ebi orikwenda kugambaho omu kushaba kwawe?
Eki waaba nookimanya?
Ekigambo “amiina” nikimanyisa ngu “kibe kityo” nari “eego buzima.” Kuruga ira, abantu batwire nibagira ngu “amiina” aha muheru gw’okushaba.—1 Obusingye 16:36.
7. Tunga obwire bw’okushaba
Obumwe nitubaasa kugira bingi by’okukora twebwe kushaba. Yesu akaba naatwara ata okushaba? Shoma Matayo 14:23 na Mako 1:35, kubaasa kugarukamu ebibuuzo ebi:
-
Yesu akaba naatunga ata obwire bw’okushaba?
-
Noobaasa kutunga ryari obwire bw’okushaba?
ABAMWE NIBAGIRA NGU: “Okushaba nikureetera omuntu kwehurira gye kyonka.”
-
Iwe nooteekateeka ki?
OMU BUGUFU
Okushaba nikutwiriza haihi na Ruhanga, kutuhwera kwikaikana omu biteekateeko, kandi kutuha n’amaani g’okushemeza Yehova.
Okweijutsya
-
Twine kushaba oha?
-
Twine kushaba tuta?
-
Noogasirwa mu miringo ki emwe waashaba?
JUMBURA EBINDI
Tunga eby’okugarukamu by’ebibuuzo ebirikukira kubuuzibwa aha kushaba.
“Ebintu Mushanju Ebi Oine Kumanya aha Kushaba” (Omunaara gw’Omurinzi, Okitoba 1, 2010)
Manya enshonga enkuru ahabw’enki oine kushaba n’oku orikubaasa kwongyera kukuboneza.
Yetegyereze oku Baibuli erikutuhwera kumanya ou twine kushaba.
Omu vidiyo y’ekyeshongoro egi, yetegyereze yaaba ni kikuru ahu turikushabira, nari obu turikushaba.
Noobaasa Kukunda n'Ebi
EBIBUUZO EBIRIKUKIRA KUBUUZIBWA
Omushomo gw’Okwegyesa Baibuli ogw’Abajurizi ba Yehova Niki?
Omu ntebeekanisa ya busha ey’okuhikaanisa ebiteekateeko ey’Abajurizi ba Yehova, noobaasa kukoresa envunuura ya Baibuli yoona. Noobaasa kwega n’eka yaawe yoona nari kweta banywani baawe.
