EISHOMO 2
Rebeka Akaba Naayenda Kushemeza Yehova
Rebeka n’omukazi owaabaire naakunda Yehova. Omushaija we akaba naayetwa Isaaka. Kandi nawe akaba naakunda Yehova. Rebeka na Isaaka bakamanyana bata? Rebeka akooreka ata ngu akaba naayenda kushemeza Yehova? Ka tubanze twegye ebirikukwata ahari Isaaka, iba wa Rebeka.
Abazaire ba Isaaka ni Abrahamu na Saara. Bakaba nibatuura omuri Kanaani, kandi abantu baayo bakaba batarikuramya Yehova. Kwonka Abrahamu akaba naayenda ngu omutabani ashwere omukazi orikuramya Yehova. Naabaasa kuba yaayohereize omuheereza we, Eliezeeri, kusherurira Isaaka omukazi omuri Harani, ei abanyabuzaare ba Abrahamu baabaire nibatuura.
Rebeka akakora n’amaani kutahira engamira amaizi
Eliezeeri akagyenda n’abandi baheereza ba Abrahamu kandi bakagyenda orugyendo ruraingwa. Bakagyenda n’engamira ikumi zeekoreire eby’okurya n’ebihembo. Eliezeeri akaba naaza kumanya ata omukazi ou araatoranire Isaaka? Eliezeeri n’abaheereza abandi ku baahikire Harani, baakemerera aha iziba ahabw’okuba Eliezeeri akaba naamanya ngu abakazi bari haihi kwija kutaha amaizi. Akashaba Yehova naagira ati: ‘Omwishiki, ou ndaagire nti, tuura orunywero rwawe, nnyweho, naakweshengyereza, nawe akagarukamu ati, nywaho, kandi naaza kweshera n’engamira zaawe; aho niho ndaamanyire ngu ogu niwe omukazi ou waatoorana.’
Bwanyima, Rebeka akaija aha iziba. Baibuli neegira ngu akaba ari murungi munonga. Eliezeeri akamushaba amaizi g’okunywa, reero Rebeka yaagira ati: ‘Nywaho, Mukama wangye, kandi naaza kweshera n’engamira zaawe.’ Ijuka ngu engamira eziine eiriho nizinywa amaizi maingi, n’ahabw’ekyo Rebeka akaba aine kutaha amaizi emirundi mingi. Noomureeba omu kishushani oku ariyo naakora n’amaani?— Eliezeeri akatangaarira oku Yehova yaagarukiremu okushaba kwe.
Eliezeeri akaha Rebeka ebihembo bingi kandi birungi. Rebeka akashaba Eliezeeri n’abaheereza abu yaabaire aine kwija omu ka yaabo. Eliezeeri akabagambira eki Abrahamu yaabaire amutumire n’oku Yehova yaagarukamu okushaba kwe. Ab’omu ka ei Rebeka yaabaire naarugamu baakamwikiriza kushwerwa Isaaka.
Rebeka akagyenda Kanaani na Eliezeeri kandi yaashwerwa Isaaka
Noogira ngu Rebeka akaba naayenda ngu ashwerwe Isaaka?— Rebeka akamanya ngu Yehova niwe yaabaire atumire Eliezeeri. Ab’omu ka ei Rebeka yaabaire naarugamu ku baamubuurize yaaba naayenda kuza Kanaani kushwerwa Isaaka, akagira ati: ‘Niinyikiriza.’ Ahonaaho, yaagyenda na Eliezeeri. Ku baahikire omuri Kanaani, yaashwerwa Isaaka.
Yehova akaha Rebeka omugisha ahabw’okugira ngu akakora eki yaabaire naayenda. Ku haahingwireho emyaka mingi, Yesu akaija yaazaarwa omu b’omu ka ya Rebeka. Waashemeza Yehova nka Rebeka, naiwe naija kukuha emigisha.
