OBU Saulo yaakora ebintu bibi, n’oha owaashemereirwe?— Ni Sitaane Omuregi. Kwonka n’abeebembezi b’ediini y’Ekiyudaaya nabo bakashemererwa. Kwonka Saulo ku yaahindukire omwegi w’Omwegyesa Mukuru kandi akeetwa Paulo, abeebembezi b’ediini abo bakatandika kumwanga. Mbwenu, nooreeba ahabw’enki kitoorobi abeegi ba Yesu kukora ekirungi?—

Omunyamurwa omukuru owaabaire naayetwa Anania eizooba rimwe akaragiira abantu kuteera Paulo entomi aha maisho. Kandi Anania akateeraho kuta Paulo omu kihome. Paulo ku yaahindukire omwegi wa Yesu akabonabona munonga. Nk’eky’okureeberaho, abantu babi bakateera Paulo kandi baateeraho kumwitisa amabaare.​—Ebyakozirwe 23:1, 2; 2 Abakorinso 11:24, 25.

Abantu baingi nibaija kuteeraho  kutureetera kukora ebitarikushemeza Ruhanga. N’ahabw’ekyo teekateeka aha bibuuzo ebi: Nookunda kukora ebirungi kirikwingana ki? Nookunda kukora ebirungi nangwa n’obu abandi baakukikwangira? Okubaasa kukora ekyo nikyetengyesa obumanzi, tikwo?—

Noobaasa kwebuuza, ‘ahabw’enki abantu nibabaasa kutwanga ahabw’okukora ebirungi? Ekyo tikikaabaire nikibashemeza?’ Nikwo kyakubaire. Butoosha abantu bakaba bakunda Yesu ahabw’ebirungi ebi yaabaire akora. Eizooba rimwe abantu b’omu rurembo bakerundaana aha muryango gw’enju ei yaabaire naatuuramu. Bakaija ahabw’okuba Yesu akaba atwire naatambira abarwaire.​—Mako 1:33.

 Kwonka obumwe abantu bakaba batakunda ebi Yesu yaabaire naayegyesa. N’obu araabe yaabaire naayegyesa ebihikire butoosha, abamwe bakamwanga ahabw’okuba akaba agamba amazima. Eki kikabaho eizooba rimwe omuri Nazareesi, orurembo oru Yesu yaakuriiremu. Akaza omuri sinagogi, ahu Abayudaaya baabaire bateeranira kuramya Ruhanga.

Okwo Yesu akaha orubazo rurungi kuruga omu Byahandiikirwe. Omu kubanza abantu bakakunda ebi yaabeegyeise. Bakatangaarira ebigambo bye birungi. Tikiraboorobeire kwikiriza ngu akaba ari omutsigazi owaakuriire omu rurembo rwabo.

Kwonka hariho ekintu ekindi eki Yesu yaagambire. Akagamba aha bwire obu Ruhanga yaagiriiremu embabazi z’omutaano abantu abaabaire batari Bayudaaya. Yesu ku yaagambire ekyo, abaabaire bari omuri sinagogi baagira ekiniga. Noomanya ahabw’enki baagizire ekiniga?— Bakaba nibateekateeka ngu nibo bonka abarikusiimwa Ruhanga. Bakaba nibateekateeka ngu nibakira abandi. N’ahabw’ekyo bakanga Yesu ahabw’eki yaagambire. Mbwenu noomanya eki baateireho kumukora?—

Baibuli neegira eti: ‘Bakakwata Yesu baamutwara aheeru y’orurembo, baamuhitsya aha neengo y’ekibungo, ngu bamurengyezeho, abanzeyo omutwe afe. Kwonka Yesu akaboogamu, yaagyenda.’​—Luka 4:16-30.

Ku ogire ngu ekyo kikahika ahariiwe, okaagarukireyo kugambira abantu abo ebirikukwata ahari Ruhanga?— Ekyo nikyetengyesa ngu obe oine obumanzi, tikwo?— Kwonka, ku haahingwireho nk’omwaka gumwe, Yesu akagaruka yaaza Nazareesi. Baibuli neegira eti: “Akatandika kubeegyeseza omuri sinagogi yaabo.” Yesu tararekire kugamba amazima ahabw’okutiina abantu abaabaire batarikukunda Ruhanga.—Matayo 13:54.

Eizooba erindi ahari sabato, Yesu akaba ari omu mwanya ogwabaire gurimu omushaija owaabaire akookootsire omukono. Yesu akaba aine amaani agu yaahairwe Ruhanga kubaasa kutambira omushaija ogwo. Kwonka abashaija abamwe abaabaire bariyo bakaba nibateeraho kuremesa Yesu. Omwegyesa Mukuru akakora ki?— Akabanza yaabuuza ati:  ‘Ku waakuba oine entaama yaawe emwe, ekagwa omu kiina aha izooba rya Sabato, okaagiihamu?’

Buzima, baakaihire entaama egyo omu kiina nangwa n’aha izooba rya Sabato obu baabaire baine kuhuumura. N’ahabw’ekyo Yesu akagira ngu: ‘Ni kirungi n’okukiraho okuhwera omuntu ahari Sabato, obu omuntu ari ow’omugasho munonga okukira entaama.’ Buzima ka kyabaire kihikire Yesu kuhwera omushaija ogwo arikumutambira!

Yesu akagambira omushaija ogwo kugorora omukono gwe. Ahonaaho omukono gwe gukakira. Omushaija ogwo ka aine kuba yaashemereirwe! Kandi shi abashaija abo abandi? Mbwenu shi nabo bakashemererwa?— Ngaaha. Bakeyongyera kwangira kimwe Yesu. Bakashohora kandi baaza omu naama y’okumwita.​—Matayo 12:9-14.

Embeera nikwo ziri n’omu bunaku obu. Nangwa n’obu twakukora ki, titurikubaasa kushemeza buri omwe. N’ahabw’ekyo twine kucwamu ou buzima turikwenda kushemeza. Ku turaabe nitwenda kushemeza Yehova Ruhanga n’Omwana we Yesu Kristo, butoosha twine kukora ebi barikwegyesa. Kwonka shi twakora ekyo, n’oha oraatwangye? N’oha orikwija kuteeraho kuturemesa kukora ebirungi?—

Ni Sitaane Omuregi. Kandi shi abandi ni baahi?— N’abo abu Omuregi arikubeiha bakaikiriza ebitahikire. Yesu akagambira abeebembezi b’ediini ab’omu bunaku bwe ati: “Muri aba shoimwe Sitaane, kandi mukunda kukora ebi shoimwe ayetenga.”​—Yohaana 8:44.

Hariho abantu baingi abu Omuregi arikukunda. Yesu akabeeta “ensi.” Nooteekateeka ngu “ensi” ei Yesu yaagambireho niki?— Ka tureebe eki Yohaana eshuura 15, orunyiriri 19 rurikugamba. Nitushoma ebigambo bya Yesu ebi: “Kuri muri ab’ensi, ensi ekaabakunzire, ahabw’okuba abaayo; kwonka ahabw’okuba timuri b’ensi, kandi nkabatoorana kubaiha omu b’ensi, nikyo ensi erikubangira.”

N’ahabw’ekyo ensi erikwanga abeegi ba Yesu neetwariramu abantu boona abatari bakuratsi be. Ahabw’enki ensi neeyanga abeegi ba  Yesu?— Kiteekateekeho. Omutegyeki w’ensi n’oha?— Baibuli neegira eti: ‘Ensi yoona eri omu butegyeki bw’Omubi ogwo.’ Omubi ogwo ni Sitaane Omuregi.​—1 Yohaana 5:19.

Hati waayetegyereza ahabw’enki kitoorobi okukora ebirungi?— Sitaane n’ensi ye nibo barikukigumisa. Kwonka hariho enshonga endiijo. Nogiijuka?— Omu Shuura 23 ey’ekitabo eki, tukeega ngu twena tukazaarwa n’ekibi. Mbwenu tiburikwija kuba obwire burungi obu ekibi, Omuregi n’ensi ye biraabe bitakiriho?—

Baibuli neeraganisa eti: “Ensi egi neehwaho.” Eki nikimanyisa ngu abo boona abatari bakuratsi b’Omwegyesa Mukuru nibaija kuba batakiriho. Tibarikwija kwikirizibwa kugumaho ebiro byona. Noomanya abaraagumeho ebiro byona?— Baibuli neeyongyera egira eti: “Okora ebi Ruhanga akunda, agumaho ebiro byona.” (1 Yohaana 2:17) Buzima, abo bonka abarikukora ebirungi, abarikukora “ebi Ruhanga akunda,” nibaija kugumaho ebiro byona omu nsi ya Ruhanga ensya. N’ahabw’ekyo n’obu kiraabe kigumire okukora ebirungi, nitwenda kuteeraho kubikora, tikwo?—