EBYONGYEIRWEHO
Okusingura Omuze gw’Okwemarisa
Omuze mubi ogu ogw’okwemarisa, ogurikugwisa kubi Ruhanga, nigureetera omuntu kugira ekiteekateeko kibi eky’okwemara ekyetengo ky’okuteerana. * Omuntu orikuba naakora ekyo naabaasa kuhika n’aha kureeba abantu nk’ab’okukoresa kwonka kuhikiiriza ekyetengo ky’okuteerana. Naatandika kureeba okuteerana nk’ekitari kikorwa ekirikworeka rukundo ahagati y’abantu babiri abashweraine, beitu nk’ekirikureeta okushemererwa kw’akiire kakye n’okwemara ekyetengo ky’okuteerana. Kwonka okwemara ekyetengo ekyo omu muringo nk’ogwo n’okw’akaanya kakye. Buzima omu mwanya gw’okwita eby’omu ngingo z’omubiri ‘nk’obushambani, ebihagaro, okurigira okubi,’ okwemarisa nikureetera omuntu kwaka.—Abakolosai 3:5.
Entumwa Paulo akahandiika ati: “Abarikukundwa, tweyozyeho oburofa bwona obw’aha mubiri n’obw’omu mwoyo, nituhikiiriza okwera omu kutiina Ruhanga.” (2 Abakorinso 7:1) Waaba nooteeraho kugyendera aha buhabuzi oburi omu bigambo ebyo, otakaahwa amaani. Yehova butoosha naaba ‘ayeteekateekire kukusaasira’ n’okukuhwera. (Zaaburi 86:5; Luka 11:9-13) Buzima, omutima gwawe okukushinja n’okuteeraho kwawe okureka omuze ogwo n’obu obumwe waakuba noogaruka okakikora, nikyoreka emiteekateekyere mirungi. Kandi guma noijuka, ngu “Ruhanga ni mukuru okukira emitima yaitu, kandi naamanya byona.” (1 Yohaana 3:20) Ruhanga tarikureeba ebibi byaitu byonka, naareeba oku omutima gw’omuntu guri. Obu arikumanya buri kimwe ekirikutukwataho, n’embabazi naabaasa kuhurira okushaba kwaitu atugirire embabazi. N’ahabw’ekyo toshemereire kuruha kushaba Ruhanga omu bucureezi oyihire aha mutima, nk’omwana orikwija ahari Ishe yaaba ari omu buremeezi. Yehova naija kukuhwera kugira omuntu w’omunda omurungi. (Zaaburi 51:1-12, 17; Isaaya 1:18) Kwonka oine kukora ebirikuhikaana n’okushaba kwawe. Nk’eky’okureeberaho, oine kuteeraho kwetantara abanywani ababi n’okureeba ebirikwitsa enshoni byona. *
Waateeraho kucwa omuze gw’okwemarisa bikanga, nyabura ‘we, gambira omuzaire Omukristaayo nari munywani waawe Omukristaayo okuzire omu by’omwoyo kandi orikukufaho. *—Enfumu 1:8, 9; 1 Abatesalonika 5:14; Tito 2:3-5.
^ kacw. 1 Okwemarisa nikwo kukwatakwata nari kusiitirira ebicweka eby’enshoni, ekirikurugamu okumara.
^ kacw. 2 Kubaasa kwetantara kureeba ebirikwitsa enshoni aha kompyuta, baingi nibagita omu mwanya oguteekiikire. Okwongyera ahari ekyo, baanyineka abamwe nibagura puroguraamu ya kompyuta erikubaasa kukingira ebintu ebibi. Kwonka tihariho puroguraamu ya kompyuta nk’egyo erikubaasa kwesigirwa kimwe.
^ kacw. 1 Okutunga obuhwezi oburikukora oburikukwata aha kucwa omuze gw’okwemarisa, reeba ekicweka ekiine omutwe “Eminyeeto Neebuuza . . . Nimbaasa Kucwa Nta Omuze Ogu?” omu Awake! ey’Okwaikumi-na-kumwe 2006, n’aha rupapura 178-182 omu katabo Questions Young People Ask—Answers That Work, ak’Okubanza.
