Teekateeka ahari eki: David ariyo naaraba omu kyaro nyekiro hariho omwirima. Kandi ahabw’okugira ngu hariho omwirima, tarikumanya ahu ari. Hati David amanya ngu yaabura. Naabaasa kuba yaaraba omu muhanda gugwire.

Ku ogire ngu naiwe David, okaakozire ki?

Oine emiringo mingi:

1. Noobaasa kubuuza omuhanda.

2. Noobaasa kukoresa tooci.

3. Noobaasa kugumizamu noogyenda, orikuteekateeka ngu noija kubona omuhanda.

Nikireebwa butunu, Omuringo C ti gw’obwengye.

Omuringo B niguhita ogw’okubanza. Ahabw’okuba, noija kuguma na tooci omu rugyendo rwawe rwona, erikukumurikira omu muhanda gwawe

Baibuli neebaasa kukuhwera omu muringo nigwo gumwe!

Ekitabo eki ekirikukirayo kugira akatare nikibaasa

• kukwebembera kuraba omu buremeezi

• kukuhwera kwemanya kandi okaba omuntu murungi

• kukworeka oku orikubaasa kuba gye ebiro byona

Kuruga twatandika kugamba, nitubuuza ebibuuzo.

• Eiguru rikozirwe omuri ki?

• Ahabw’enki enyonyoozi nizaaka nyekiro?

Twakura nitutandika kubuuza aha bintu ebirikubaho omu nsi.

• Ahabw’enki ebintu bibi nibibaho?

• Ahabw’enki abantu nibafa?

Noobaasa kushanga eby’okugarukamu by’ebibuuzo ebyo bitwire omu Baibuli?

Abantu baingi nibagira ngu Baibuli erimu emigane n’ebitebyo, kandi ekahwa aha murembe nari ngu egumire kwetegyereza. Kwonka shi Baibuli niyo eine oburemeezi, nari ebi abantu bahuriire nibyo birimu oburemeezi? Tibarikubaasa kuba bagambiirwe ebitahikire?

Nk’eky’okureeberaho, abantu nibateekateeka ngu Baibuli neegira ngu Ruhanga niwe arikutegyeka ensi. Kwonka shi ekyo nikibaasika kita? Ensi esiisikaire munonga! Eyijwire obusaasi n’okubonabona, endwara n’okufa, obworo n’ebihikiirizi. Ruhanga oine rukundo naabaasa ata kuba niwe arikureetaho ebi byona?

Nooyenda kumanya eky’okugarukamu? Noobaasa kutangaara waamanya eky’okugarukamu kya Baibuli aha bikwatiraine n’omutegyeki w’ensi!

Noobaasa kuba oyetegyereize ngu obuhabuzi oburi omu katabo aka niburuga omu Baibuli. Abajurizi ba Yehova nibahamiza kimwe ngu Baibuli erimu obuhabuzi oburikwesigwa. Eki kiri kityo ahabw’okugira ngu ‘ekahandiikisibwa Ruhanga, eine omugasho gw’okwegyesa omuntu, n’okumuhana, n’okumuhabura.’ (2 Timoseo 3:16, 17) Oine obujunaanizibwa bw’okushwijuma ekitabo kya ira eki kwonka ekirimu obuhabuzi oburikukora hati!