Ekiro kimwe, Nebukadeneeza akaroota ekirooto ekirikutiinisa. Akeeta abahi b’obwengye be kumugambira amakuru g’ekirooto ekyo. Kwonka tihariho n’omwe omuribo owaabaasize kukishoboorora. Bwanyima, omugabe akagamba na Danieli.

Nebukadeneeza akagambira Danieli ati: ‘Omu kirooto kyangye, ndeebire omuti. Gwakura, gwaba muraingwa gwahika ahaiguru munonga. Gwareebwa ab’aha muheru gw’ensi yoona. Amababi gaagwo gaabengyeya, n’ebijuma byago byaba bingi kandi birungi. Enyamaishwa z’omu ishwa zaabona ekicuucu ahansi yaagwo, amahungu g’omu mwanya gaatuura omu mataagi gaagwo. Bwanyima maraika akaija naaruga omu iguru. Yaaragiira n’eiraka rihango naagira ati: ‘Tema ekyo kiti, okikonkoboreho amataagi. Kwonka ekitsintsi okirekye kiri aha mizi yaakyo omu itaka, kandi okibohese ebyoma n’emiringa. Omutima gwakyo nigwija kuhinduka gurekye kuba omutima gw’omuntu kureka gube ogw’enyamaishwa, kandi nigwija kuguma gutyo kumara omwanya nk’ogw’emyaka mushanju. Abantu boona nibaija kumanya ngu Ruhanga n’omutegyeki kandi ngu naaha Obukama bwe weena ou arikwenda.’

Yehova akashuuruurira Danieli amakuru g’ekirooto ekyo. Danieli ku yaayetegyereize amakuru gaakyo, akatiina. Akagambira omugabe ati: ‘Nyakusinga omugabe, kikaabaire kirungi ekirooto ku kyaba nikigamba aha bazigu baawe, kwonka nikikwata ahariiwe. Omuti muhango ogwatemirwe niiwe. Noija kufeerwa obugabe bwawe, kandi noija kurya obunyaatsi bw’omu ishwa nk’ente. Kwonka nk’oku maraika aragiire kureka ekitsintsi n’emizi y’ogwo muti, noija kugaruka obe omugabe.’

Bwanyima y’omwaka gumwe, Nebukadeneeza akaba naagyendagyenda aha mutwe gw’enju ye, arikwetegyereza orurembo Babulooni. Akagira ati: ‘Reeba orurembo rugambwa oru nyombekire. Reeba obukuru bwangye.’ Ku yaabaire naakigamba, eiraka kuruga omu iguru rikagira riti: ‘Nebukadeneeza! Hati waihwaho obugabe bwawe.’

Omu kaanya ako, Nebukadeneeza akaburwa obwengye yaaba nk’enyamaishwa. Akagyemwa kuruga omu kikaari kye yaaza kutuura n’enyamaishwa z’omu ishwa. Eishokye rya Nebukadeneeza rikakura  ryaba riraingwa nk’amooya g’eishamba, kandi ebyara bye bikakura nk’eby’ekinyonyi.

Emyaka mushanju ku yaahweire, Nebukadeneeza akagaruka yaagira obwengye kandi Yehova akamukora omugabe wa Babulooni. Bwanyima Nebukadeneeza akagira ati: ‘Ninsiima Yehova, Omugabe w’eiguru. Hati nimmanya ngu Yehova n’omutegyeki. Naacureeza abaine amaryo, kandi naabaasa kuha obugabe weena ou arikwenda.’