Eshuura ya Ikumi na Mukaaga

Hamira aha Kuramya okw’Amazima

Baibuli neegamba ki aha kukoresa ebishushani?

Abakristaayo nibatwara bata ebiro bikuru eby’Amadiini?

Noobaasa kushobororera ota abandi enyikiriza yaawe otababiihiize?

1, 2. Ni kibuuzo ki eki oshemereire kwebuuza bwanyima y’okuruga omu diini y’ebishuba, kandi ahabw’enki eki nikyetengyesa kukikora?

KATUGIRE ngu waayetegyereza ngu ekicweka ki orikutuuramu kyona kisiisirwe. Omu mubonano, omuntu atwire naanaga ekumbwe erimu obutwa omu mwanya ogwo, kandi hati embeera neeyerarikiriza amagara. Okaakora ki? Hatariho kubangaanisa, waaba noobaasa noofuruka oruge omu mwanya ogwo. Kwonka na waaheza kukora ekyo, noosigara orikwebuuza ekibuuzo kikuru eki: ‘Obutwa obu tibukaaba butaire amagara gangye omukabi?’

² Okwo nikwo kiri n’aha diini ez’ebishuba. Baibuli neeyegyesa ngu ediini ez’ebishuba ziijwire enyegyesa n’ebikorwa ebitahikire. (2 Abakorinso 6:17) Egyo niyo nshonga ahabw’enki nikikuru iwe okuruga omuri ‘Babulooni orurembo Orukuru,’ nari shi ediini z’ebishuba zoona ez’omu nsi. (Okushuuruurwa 18:2, 4) Eki iwe waakikozire? Ku oraabe waakikozire, noosiimwa. Kwonka okwetaanisa aha diini y’ebishuba tikyo kyonka ekirikwetengwa okubaasa kugirugamu. Bwanyima oshemereire kwebuuza oti: ‘Haine amabara g’ediini y’ebishuba goona agakintsigairemu?’ Teekateeka aha by’okureeberaho ebimwe.

 EBISHUSHANI HAMWE N’OKURAMYA ABAFIIRE

3. (a) Baibuli neegamba ki aha kukoresa ebishushani, kandi ahabw’enki kirikubaasa kugumira abamwe okwikiriza oku Ruhanga arikutwara ebishushani? (b) N’enki eki oshemereire kukorera ebintu ebi oine ebiine akakwate n’okuramya okutahikire?

³ Abantu abamwe batwire baine ebishushani nari obuju bw’emandwa omu maka gaabo okumara emyaka mingi. Naiwe oine ebishushani n’obuju bw’emandwa omu ka yaawe? Ku kiraabe nikwo kiri, noobaasa kuteekateeka ngu tikya buriijo nari ngu ti kihikire kushaba Ruhanga otarikwebemberwa ebintu nk’ebi ebirikureebwa. Noobaasa kuba nookunda munonga bimwe aha bintu ebi. Kwonka Ruhanga niwe arikutugambira oku ashemereire kuramibwa, kandi Baibuli neeyegyesa ngu Ruhanga tarikwenda ngu tukorese ebishushani omu kumuramya. (Okuruga 20:4, 5; Zaaburi 115:4-8; Isaaya 42:8; 1 Yohaana 5:21) N’ahabw’ekyo noobaasa kuhamira aha kuramya okw’amazima orikweihaho ekintu kyona ekiine akakwate n’okuramya okutahikire. Omu muringo gwona, byange nk’oku Yehova arikubyanga—obireebe ‘nk’ebirikunugwa.’—Eky’Ebiragiro 27:15.

4. (a) Nitumanya tuta ngu okuramya abafiire tikwine mugasho, n’okweruhiza busha? (b) Ahabw’enki Yehova yaaragiire abantu be okutejumba omu bikorwa by’obufumu eby’emiringo yoona?

⁴ Okuramya abafiire nakwo kukanyire omu diini nyingi  ez’ebishuba. Batakeegire amazima agari omuri Baibuli, abamwe bakaba nibaikiriza ngu abafu bahuriire, ngu bari ahatareebwa kandi ngu nibabaasa kuhwera nari kusaasa abahuriire. Shana obundi okaba ogyezaho munonga kushemeza abakundwa baawe abaafiire. Kwonka nk’oku waayegire omu Shuura ya 6 ey’ekitabo eki, abaafiire tibaine ahu bari; tibahuriire. N’ahabw’ekyo, okugyezaho kugamba nabo tikwine mugasho, buzima n’okweruhiza busha. Obutumwa bwona oburikureebeka nk’oburikuruga omu bakundwa baawe abaafiire buzima nibuba niburuga ahari baadaimoni. Nikyo Yehova yaaragiiriire Abaisraeli okutagyezaho kwebuuza aha bafu nari okwejumba omu bikorwa by’obufumu eby’emiringo yoona.—Eky’Ebiragiro 18:10-12.

5. Okaakora ki okukoresa ebishushani nari okuramya abafiire ku biraabe bibaire nibikorwa omu diini eyi obaire orimu?

⁵ Okukoresa ebishushani nari okuramya abafu ku biraabe bibaire biri ekicweka ky’okuramya kwawe, n’enki eki oshemereire kukora? Shoma kandi oyecumitirize aha butumwa oburi omu Baibuli oburikukworeka oku Ruhanga arikutwara okuramya abafiire. Shaba Yehova obutoosha omugambire ekyetengo kyawe eky’okwenda kuza omu kuramya okw’amazima, kandi mushabe akuhwere ogire emiteekateekyere erikwikirizana n’eye.—Isaaya 55:9.

NOIRI—TERAKUZIIBWE BAKRISTAAYO ABA IRA

6, 7. (a) Nikigambwa ngu Noiri neekuzibwa kwijuka ki, kwonka shi abakuratsi ba Yesu ab’omu kyasha ky’okubanza bakaba bagikuza? (b) Omu bwire obu abeegi ba Yesu abaira baabaire bariho, okukuza amazaarwa kukaba kwine akakwate naki?

⁶ Okuramya kw’omuntu nikubaasa kushiishwa okukuza ebiro bikuru. Nk’eky’okureeberaho, teekateeka ahari Noiri. Nikigambwa ngu Noiri neekuzibwa okwijuka okuzaarwa kwa Yesu Kristo, kandi haihi buri omwe aha bari omu madiini agarikweyeta Amakristaayo naagikuza. Kwonka, tihariho buhame oburikworeka ngu entumwa za Yesu ez’omu kyasha ky’okubanza zikakuza ebiro bikuru nk’ebyo. Ekitabo ekirikwetwa Sacred Origins of Profound Things nikigira kiti: “Omu myaka magana abiri bwanyima y’okuzaarwa kwa Kristo, tihariho n’omwe owaabaire naamanya obu Yesu yaazaarwa, kandi bakye bonka nibo baabaire nibafayo kumanya obwire bwenyine obu yaazaariirwemu.”

 ⁷ N’obu abeegi ba Yesu baakubaire baamanyire ekiro ky’okuzaarwa kwa Yesu kyenyine, bakaba batarikwija kukikuza. Ahabw’enki? Ahabw’okuba, nk’oku ekitabo ekirikwetwa The World Book Encyclopedia kirikugira, Abakristaayo aba ira “bakaba nibamanya ngu okukuza okuzaarwa kw’omuntu weena gukaba guri omucwe gw’abakaafiire.” Okukuza okuzaarwa kwonka okurikugambwaho omuri Baibuli n’okw’abategyeki babiri abaabaire batarikuramya Yehova. (Okutandika 40:20; Mako 6:21) Okukuza amazaarwa kukaba nikukorwa kuhaisa baaruhanga abandi ekitiinisa. Nk’eky’okureeberaho, aha biro 24 by’Okwakataano, Abarooma bakaba bakuza amazaarwa ga ruhanga waabo omukazi orikwetwa Diana. Ekiro ekyabaire kikurataho, bakaba bakuza amazaarwa ga ruhanga waabo w’eizooba orikwetwa Apollo. N’ahabw’ekyo, okukuza amazaarwa kukaba kwine akakwate n’obukaafiire beitu butari Bukristaayo.

8. Shoborora akakwate akari ahagati y’okukuza amazaarwa hamwe n’emigyenzo etahikire.

⁸ Hariho n’enshonga endiijo ahabw’enki Abakristaayo ab’omu kyasha ky’okubanza baabaire batarikubaasa kukuza amazaarwa ga Yesu. Entumwa za Yesu zikaba nizimanya ngu okukuza amazaarwa kukaba kwine akakwate n’emigyenzo etahikire. Nk’eky’okureeberaho, Abagriika n’Abarooma aba ira abaingi bakaba baikiriza ngu hakaba hariho omwoyo ogwabaire guhwera buri muntu aha izooba ry’okuzaarwa kwe kandi ngu gumurinda omu magara ge goona. Ekitabo ekirikwetwa The Lore of Birthdays nikigira kiti: “Omwoyo ogu gukaba nigushushanisa amaani na ruhanga ou eizooba rye ry’okuzaarwa ryabaire nirishushana n’ery’omuntu ogwo yaazaariirweho.” Yehova buzima tarikushemerererwa okukuza amazaarwa kwona okurikugaita Yesu n’emigyenzo etahikire. (Isaaya 65:11, 12) Kandi shi ahabw’enki abantu baingi nibakuza Noiri?

OBUKOMOOKO BWA NOIRI

9. Ahabw’enki abantu baatooraine ebiro 25 by’okw’Ikumi n’Ebiri kuba ekiro ky’okukuza amazaarwa ga Yesu?

⁹ Bwanyima y’emyaka mingi kuhinguraho Yesu aherize kuruga omu nsi, abantu bakatandika kukuza amazaarwa ge aha biro 25 by’okwezi kw’Ikumi n’Ebiri. Kwonka ekyo tikyo kiro eki Yesu yaazaariirweho, ahakuba nikireebeka okuzaarwa kwa Yesu kubaho  omu okw’Ikumi. * Kandi shi ahabw’enki abantu baatooraine ebiro 25 by’okw’Ikumi n’Ebiri? Bamwe abaayegambireho nk’Abakristaayo bwanyima, nibabaasa kuba “baasiimire kukwatanisa ekiro ekyo n’obugyenyi bw’Abarooma abakaafiire ‘obw’okukuza amazaarwa g’eizooba eritasingurwa.’” (The New Encyclopædia Britannica) Omu bwire bw’obutiti, obu eizooba ryabaire rireebeka nk’eritaine maani, abakaafiire bakaba bakora obugyenyi okubaasa kugarura eizooba kuruga omu rugyendo rwaryo ngu ribaase kureeta obutagatsi hamwe n’ekyererezi. Ebiro 25 by’okw’Ikumi n’Ebiri nikyo kiro obu eizooba ryabaire ritandika kugaruka. Abeebembezi b’ediini okubaasa kuhindura abakaafiire, bakatandika kukuza omugyenzo ogu kandi bagyezaho kugureebekyesa “nk’ogw’Ekikristaayo.” *

10. Ahabw’enki abantu abamwe ira baabaire batarikukuza Noiri?

¹⁰ Obukomooko bwa Noiri obw’ekikaafiire butwire nibumanywa okumara emyaka mingi ehingwire. Ahabw’okugira ngu obukomooko bwa Noiri ti bw’omu Byahandiikirwe, omu kyasha kya 17, okukuza Noiri kukazibirwa omuri Bungyereza hamwe n’omu bicweka ebi Amerika yaabaire neetegyeka. N’omuntu weena owaabaire atakora aha kiro kya Noiri akaba afubirwa. Omu bwire bukye, emigyenzo egyo ekatandika kukuzibwa, kandi n’endiijo emisya yaayongyerwaho. Etyo Noiri yaagaruka yaaba ekiro kikuru,  kandi n’okuhitsya hati ekiri ekiro kikuru omu mahanga maingi. Ahabw’okugira ngu Noiri eine akakwate n’ediini ez’ebishuba, abo abarikwenda kushemeza Ruhanga tibarikugikuza nari okukuza ekiro kikuru ekindi kyona ekirikukomooka omu kuramya kw’ekikaafiire. *

OKUMANYA OBUKOMOOKO BW’EBIRO BIKURU NIKIKURU?

11. Ahabw’enki abantu abamwe nibakuza ebiro bikuru, kwonka n’enki ekikuru eki tushemereire kutaho omutima?

¹¹ Abamwe nibakimanya ngu ebiro bikuru nka Noiri nibikomooka aha bakaafiire kwonka kandi bagira ngu ti kibi okubikuza. Nangwa abaingi tibarikuteekateeka ngu okukuza ebiro bikuru kwine akakwate n’okuramya okutahikire. Emikoro egi kandi neehikaanisa ab’omu maka. Iwe oku nikwo orikukireeba? Ku kiraabe kiri kityo, nikireebeka ni rukundo y’ab’omu ka beitu etari rukundo y’ediini ey’ebishuba, erikukureetera okutanguhirwa kuhamira aha kuramya okuhikire. Kihamye ngu Yehova owaatandikireho amaka naayenda ngu ogire omukago murungi n’abanyabuzaare baawe. (Abaefeso 3:14, 15) Noobaasa kugumya omukago ogwo omu miringo ei Ruhanga arikusiima. Aha bikwatiraine n’ebi tushemereire kutaho omutima munonga, Entumwa Paulo akahandika ati: “Kandi mwetegyereze ebirikusiimwa Mukama.”—Abaefeso 5:10.

12. Yoreka ahabw’enki tushemereire kwetantara emigyenzo hamwe n’emikoro ebiine obukomooko bubi.

¹² Shana nooteekateeka ngu obukomooko bw’ebiro bikuru tibwine kakwate n’oku birikukuzibwa hati. Obukomooko bw’ebiro bikuru shi nikikuru? Buzima nikikuru! Eky’okureeberaho: Ka tugire ngu waareeba akacweka kaaswiti kari omu mufuregye. Okaatorotoora kaaswiti ako okarya? Buzima ngaaha! Kaaswiti ako nikaba kariho oburofa. Nka kaaswiti ako, ebiro bikuru nibibaasa kureebeka nk’ebirikushemeza, kwonka nibiruga omu migyenzo etahikire. Okubaasa kuhamira aha kuramya okuhikire, tushemereire kugira emiteekateekyere nk’ey’omurangi Isaaya, owaagambiire  abaramya ab’amazima ati: “Mutakora aha kintu kyona ekitashemeire.”—Isaaya 52:11.

KORESA OBWENGYE OMU KUKORENGANA N’ABANDI

13. Ni kuhakanisibwa kwa muringo ki okurikubaasa kubaho waaheza kucwamu okutejumba omu biro bikuru?

¹³ Nihabaasa kubaho okuhakanisibwa waacwamu kutejumba omu kukuza ebiro bikuru. Nk’eky’okureeberaho, abakozi bataahi baawe nibabaasa kwebuuza ahabw’enki otarikwejumba omu bikorwa bimwe eby’okukuza ebiro bikuru. Okaakora ki ku wakuheebwa ekiconco ahari Noiri? Noogira ngu kikaaba kihikire okukyakiira? Kandi shi omukazi waawe nari omushaija waawe ku yaakuba atari mu nyikiriza yaawe? Okaahamya ota ngu abaana baawe tibahurira kubi ahabw’okutakuza biro bikuru?

14, 15. N’enki eki waakubaasa kukora waaheebwa endamutsyo y’ebiro bikuru nari omuntu yaaba naayenda kukuha ekiconco?

¹⁴ Okucwamu gye nikwetengwa okubaasa kumanya oku oraatwaze omuri buri mbeera. Endamutsyo y’aha biro bikuru yaakuheebwa nka buriijo, noobaasa kwebaza owaagikuha. Kwonka ka tugire ngu noogamba n’omuntu ou orikukira kureeba nari ou orikukora nawe buriijo. Obwo, noobaasa kucwamu kumushobororera ebirikukiraho. Omu miringo yoona, koresa obwengye. Baibuli neehabura eti: “Ebigambo byanyu bigume biri eby’embabazi, nk’ebirimu omwonyo, mubone kumanya oku mushemereire kugarukamu omuntu weena.” (Abakolosai 4:6) Gyezaho munonga kworeka ngu nooha abandi ekitiinisa. Omu bwengye, shoborora aha nyikiriza yaawe. Yoreka gye ku otarikwanga okugaba ebiconco nari okuteeranira hamwe n’abandi kwonka ngu nookunda kushemererwa n’abandi omu bundi bwire.

¹⁵ Kandi shi omuntu ku yaakuba naayenda kukuha ekiconco? Okukyakiira nari okutakyakiira nikirugiirira. Orikukuha ekiconco naabaasa kugira ati: “Nimmanya ngu torikukuza biro bikuru. Kwonka nabwe, niinyenda ngu otungye ekintu eki.” Noobaasa kureeba ngu okwikiriza ekiconco omu mbeera nk’ezo tikirikushushana n’okwejumba omu kukuza ebiro ebyo. Kwonka, orikukuha ekiconco yaaba atarikumanya enyikiriza yaawe, noobaasa kumumanyisa ku otarikukuza ekiro kikuru ekyo. Eki nikihwera omu kushoborora ahabw’enki nooyakiira ekiconco kwonka ku otarikubaasa  kuha ekiconco aha eizooba eryo. Aha rubaju orundi, nikiba kiri eky’obwengye okutaikiriza ekiconco kyakuheebwa n’ekigyendererwa kureeba yaaba oraahamire aha nyikiriza yaawe nari yaaba orikukunda ebintu eby’omubiri okukira eby’omwoyo.

NOOBAASA KUTWARIZA OTA AB’OMU KA YAAWE ABATARIKWIKIRIZA?

16. Noobaasa kukoresa ota obwengye omu nshonga eziine akakwate n’ebiro bikuru?

¹⁶ Kandi shi ab’omu ka yaawe ku baakuba batarikushushanisa naiwe enyikiriza? Nabwo, koresa obwengye. Tikirikwetengyesa kuhakanisa buri mugyenzo gwona nari ekiro kikuru kyona eki abanyabuzaare baawe barikucwamu kukuza. Omu mwanya gw’okukora ekyo, barekyere obugabe bwabo nk’oku naiwe orikwenda ngu bakurekye n’enyikiriza yaawe. (Matayo 7:12) Yetantare ekikorwa kyona ekirikubaasa kukuhitsya aha kwejumba omu mikoro y’okukuza ebiro bikuru. Nabwe, ba ow’oburyo kyahika n’aha nshonga ezitaine kakwate n’okukuza ebiro bikuru. Oshemereire obutoosha kutwaza omu muringo ogurakurekye oine omutima ogutarikweshinja.—1 Timoseo 1:18, 19.

17. Noobaasa kuhwera ota abaana baawe kutahurira kubi ahabw’okureeba abandi nibakuza ebiro bikuru?

¹⁷ N’enki eki orikubaasa kukora kugira ngu abaana baawe tibahurira kubi ahabw’okutakuza biro bikuru ebitarikwikirizibwa mu byahandiikirwe? Eki nikirugiirira aha bi orikukora omu bundi bwire omu mwaka. Abazaire abamwe nibatebeekanisa obwire bw’okuheeramu abaana baabo ebiconco. Ekiconco ekirikukirayo oburungi eki orikubaasa kuha abaana baawe n’obwire bwawe kandi okabafaho na rukundo.

KURATIRA OKURAMYA OKW’AMAZIMA

18. Okuza omu nteerane z’Ekikristaayo nikibaasa kukuhwera kita kuhamira aha kuramya okw’amazima?

¹⁸ Okubaasa kushemeza Ruhanga, nooragiirwa kwanga okuramya okw’ebishuba kandi okahamira aha kuramya okw’amazima. Eki nikitwariramu ki? Baibuli neegira eti: “Kandi ka tuteekateekye oku twakwezirikisana kukundana n’okukora ebirungi, tutarikureka kuteeranira hamwe nk’oku abamwe bagira, kureka  tugumyane, kandi nk’oku murikureeba ngu ekiro ekyo kiri haihi n’okuhika, mweyongyere kutwaza mutyo.” (Abaheburaayo 10:24, 25) Okwejumba omu nteerane z’Ekikristaayo nikukuha omugisha gw’okuramya Ruhanga omu muringo ogu arikusiima. (Zaaburi 22:22; 122:1) Omu nteerane nk’ezo, nihabamu ‘okugumyana’ omu Bakristaayo abeesigwa.—Abarooma 1:12.

19. Ahabw’enki nikikuru iwe okushobororera abandi ebintu ebi oyegire omu Baibuli?

¹⁹ Omuringo ogundi ogu orikubaasa kuhamira aha kuramya okw’amazima n’okugamba n’abandi aha bintu ebi oyegire omu Baibuli n’Abajurizi ba Yehova. Abantu baingi buzima “nibaganya kandi nibatsinda” ahabw’obubi oburikukorwa omu nsi ebiro ebi. (Ezekieli 9:4) Obundi hariho abantu bamwe abu orikumanya abarikuganya kandi abarikutsinda. Ahabw’enki otarikubagambira ebirikukwata aha matsiko gaawe agu oine omu Baibuli aha biro by’omu maisho? Ku oragumizemu kuteeranira hamwe n’Abakristaayo ab’amazima kandi orikugambira abandi amazima g’omutaano agu oyegire omu Baibuli, noija kwetegyereza ngu ekyetengo ky’okukuza emigyenzo y’ediini z’ebishuba ekyakubaasa kuba kyagumire omu mutima gwawe, mporampora nikiija kukuhwamu. Gira obwesigye ngu noija kushemererwa munonga kandi otungye n’emigisha mingi waaheza kuza omu kuramya okw’amazima.—Malaki 3:10.

[Obugambo obw’Ahansi]

EBI BAIBULI ERIKWEGYESA

▪ Ebishushani n’obu kwakuba okuramya abafiire tibishemereire kuba omu kuramya okw’amazima.—Okuruga 20:4, 5; Eky’Ebiragiro 18:10-12.

▪ Tikihikire okwejumba omu mikoro y’okukuza ebiro bikuru ebirikukomooka omu bukaafiire.—Abaefeso 5:10.

▪ Abakristaayo ab’amazima bashemereire kukoresa obwengye baaba nibashobororera abandi enyikiriza yaabo.—Abakolosai 4:6.

[Ebibuuzo by’Obucweka]

[Ekishushani ekiri aha rupapura 158]

Okaarya kaaswiti akatorotoirwe omu mufuregye?

 [Ekishushani ekiri aha rupapura 163]

Okukuratira okuramya okw’amazima nikireeta okushemererwa okwa buzima