Obugomi omu Butuuro bw’Emyoyo

Ebihangirwe eby’omwoyo byona ebi Yehova yaahangire bikaba biri birungi. Bwanyima Maraika omwe akahinduka yaaba mubi. Niwe Sitaane Omuregi. Sitaane akaba naayenda ngu abantu omu nsi bamuramye omu mwanya gw’okuramya Yehova. Eki nikyo kyabaireho:

Omu musiri gw’omuri Edeni, hakaba harimu emiti mingi eyaabaire neeyana ebijuma binuzire. Yehova akagambira Adamu n’omukazi we Haawa ngu bakaba nibaikirizibwa kurya aha miti egi yoona. Kwonka hakaba harimu omuti gumwe ogu Ruhanga yaagizire ngu bakaba batashemereire kuryaho. Akagira ngu ku bariguryaho, ngu buzimazima baryafa.—Okutandika 2:9, 16, 17.

Eizooba rimwe Haawa ku yaabaire ari wenka, enjoka yaagamba nawe. N’eky’amazima, ekaba etari njoka eyaabaire neegamba; akaba ari Sitaane Omuregi owaareebekyeise enjoka nk’erikugamba. Sitaane akagambira Haawa ngu kuri naarya aha kijuma eki baazibiirwe kuryaho, ngu akaba naaza kugira obwengye nka Ruhanga. Sitaane kandi akagira ngu Haawa akaba atarikuza kufa. Ebyagambirwe ebi byombi bikaba biri ebishuba. Beitu nabwe, Haawa akaikiriza ebya Sitaane atyo yaarya aha kijuma. Bwanyima, yaahaho Adamu, nawe yaarya.—Okutandika 3:1-6.

Kurugiirira aha byabaireho ebi, nitwega ngu Sitaane n’omugomi kandi omubeihi. Akagambira Haawa ngu kuri naagomera Ruhanga, ngu akaba atarikuza kufa. Ekyo kikaba kiri ekishuba. Haawa akafa na Adamu nikyo kimwe. Sitaane we tarafiire, n’obu araije kufa bwanyima ahabw’okushiisha. Kwonka ekyo kitakabaireho, akiriho ahuriire kandi akyagumizamu  n’okubuzabuza abantu. N’omubeihi, kandi naagyezaho kureetera abantu kugomera ebiragiro bya Ruhanga.—Yohaana 8:44.

Okugoma kw’Abandi Baamaraika

Bwanyima, abandi baamaraika bakahinduka baaba babi. Baamaraika aba bakareeba abakazi barungi omu nsi kandi bayetenga kushambana nabo. N’ahabw’ekyo, baija omu nsi, baajwara emibiri y’abashaija. Baashwera abakazi abu baabaire batooranamu. Eki kikaba kitarikwikirizana n’ekigyendererwa kya Ruhanga.—Okutandika 6:1, 2; Yuda 6.

Eki kandi kikareetera abantu oburemeezi bwingi. Abakazi ba baamaraika aba bakazaara abaana, kwonka abaana abo bakaba batari ba buriijo. Bakakura baaba ebihanda kandi ebikaaka ebirahurazi. Ekyarugiremu, ensi ekaijura obubi kyareetera Yehova kumariirira kucwekyereza abantu ababi n’omwegyemure rugambwa. Abantu bonka abaahonire Omwegyemure bakaba bari Noa n’eka ye abaabaire bahikiriire.—Okutandika 6:4, 11; 7:23.

Kwonka baamaraika aba ababi bo bakagaruka omu butuuro bw’emyoyo; tibarafiire. Kwonka bakafubirwa. Tibaraikiriziibwe kugaruka omu ka ya Ruhanga eya baamaraika abahikiriire. Kandi ekindi, Yehova taragarukire kubaikiriza kujwara emibiri y’abantu. Kandi aha muheru, nibaija  kucwekyererezibwa omu kiro kikuru eky’orubanja rwa Ruhanga.—2 Petero 2:4; Yuda 6.

Sitaane Okubingwa omu Iguru

Omu myaka y’okubanza ey’ekyasha ekihweire, hakabaho orugamba omu iguru. Ekitabo kya Baibuli eky’Okushuuruurwa nikishoboorora ebyabaireho: “Hakabaho orugamba omu iguru, Mikaeli [Yesu Kristo owaazokire] na baamaraika be [abarungi] nibarwanisa ekijoka; kandi ekijoka na baamaraika baakyo [ababi] baabarwanisa; baabingwa, kandi okuruga obwo tibaratungire mwanya omu iguru obundi. Ekijoka ekyo ekihango ekya ira, ekirikwetwa Omuregi kandi Sitaane, orikugobeza ensi yoona, yaanagwa ahansi hamwe na baamaraika be [ababi].”

N’enki ekyarugiremu? Ebyahandiikirwe nibyongyera kushoborora: “N’ahabw’ekyo, iwe eiguru naimwe abarituuramu, mushemererwe!” Baamaraika abarungi bakaba nibabaasa kushemererwa ahabw’okuba Sitaane na baamaraika be ababi, nari emyoyo emibi, bakaba batakiri mu iguru. Kwonka shi kandi ensi? Baibuli neegira eti: “Kwonka iwe ensi, naiwe enyanja, muryareeba enaku ahabw’okuba omuregi yaabaizira n’ekiniga kingi, ahakuba naamanya ku aine omwanya mukye.”—Okushuuruurwa 12:7-9, 12.

Eego, Sitaane na baamaraika be ababi nibahabisa kandi bareetera abantu omu nsi enaku. Baamaraika aba ababi nibeetwa baadaimoni. N’abazigu ba Ruhanga. Boona ni babi.

[Ekishushani ekiri aha rupapura 8]

Sitaane ku yaayejuniise enjoka kugamba na Haawa, Haawa yaamwegaitaho omu bugomi ahari Ruhanga

[Ekishushani ekiri aha rupapura 9]

Baamaraika ababi bakaija omu nsi kushambana n’abakazi

[Ekishushani ekiri aha rupapura 10]

Sitaane na baamaraika be ababi bakabingwa omu iguru