Ekitebyo 16

Isaaka Okutunga Omukazi Murungi

NOOMANYA omukazi ogwo ori omu kishushani? Eiziina rye ni Rebeka. Kandi omushaija ou arikwija kubugana ni Isaaka. Ariyo naaza kuba omukazi we. Eki kikabaho kita?

Mbwenu, Ishe wa Isaaka Abrahamu akaba naayendeza omutabani omukazi murungi. Akaba atarikwenda Isaaka kushwera omwe aha bakazi ba Kanaani, ahabw’okuba abantu aba bakaba nibaramya baaruhanga b’ebishuba. N’ahabw’ekyo Abrahamu akeeta omwiru we yaamugira ati: ‘Niinyenda ngu ogarukye oze ei abanyabuzaare bangye batwire omuri Harani kandi oyihireyo mutabani wangye Isaaka omukazi.’

Ahonaaho omwiru wa Abrahamu yaatwara engamira ikumi yaaza omu rugyendo ruraingwa. Ku yaahikire haihi n’omwanya ogu abanyabuzaare ba Abrahamu baabaire nibatuuramu, yaayemereraho aha iziba. Bukaba buri omu ihangwe, ahu abaishiki b’omu rurembo orwo baiziramu kutaha amaizi aha iziba. N’ahabw’ekyo, omwiru wa Abrahamu yaashaba ati Yehova omu shaara: ‘Reka omwishiki orampe amaizi akaha n’engamira abe ou otooraine kuba omukazi wa Isaaka.’

Ahonaaho Rebeka yaija kutaha amaizi. Omwiru wa Abrahamu ku yaamushabire amaizi kunywaho, yaikiriza yaagamuha. Kandi yaagarukayo yaataha n’agandi maingi yaagareetera engamira zoona ezaabaire ziine eiriho. Ogwo gukaba guri omurimo muhango ahabw’okuba engamira nizinywa amaizi maingi munonga.

Rebeka ku yaaherize kukora eki, omuheereza wa Abrahamu yaamubuuza eiziina ry’ishe. Yaagaruka yaabuuza yaaba naabaasa kutunga oburaaro omu ka yaabo. Rebeka yaagira ati: ‘Tata ni Besueli, kandi n’oburaaro buriyo.’ Omwiru wa Abrahamu akaba naamanya ngu Besueli akaba ari mutabani wa murumuna wa Abrahamu Nahori. Atyo yaatsimba amaju ahansi kandi yaasiima Yehova okumuhitsya omu banyabuzaare ba Abrahamu.

Ekyo kiro omuheereza wa Abrahamu akagambira Besueli na munyaanya wa Rebeka Labaani ekimureetsire. Bombi bakaikiriza ngu Rebeka naabaasa kugyenda nawe ashwerwe Isaaka. Rebeka we akagamba ki ku baamubuurize? Akagira ngu, ‘Eego,’ akaba naayenda kugyenda. N’ahabw’ekyo ku bwaseesire, baatemba engamira batyo baatandika orugyendo kugaruka Kanaani.

Obu baahikayo, bukaba buri omu mwabazyo. Rebeka akareeba omushaija naagyendagyenda omu musiri. Akaba ari Isaaka. Akashemererwa kureeba Rebeka. Nyina, Saara, akaba aherize emyaka eshatu afiire, n’ahabw’ekyo Isaaka akaba akiri omu naku y’okufeerwa nyina. Kwonka hati Isaaka yaakunda Rebeka munonga, yaagaruka yaashemererwa.

Okutandika 24:1-67.