Ekitebyo 61

Daudi Okuhindurwa Omugabe

SAULO kandi agaruka agyezaho kukwata Daudi. Atwara abaserikare 3,000 amamanzi atyo aza kuronda Daudi. Daudi ku akimanya, ayohereza entatsi okuza kutata ei Saulo n’abashaija be basiisiire omu kiro. Reero Daudi abuuza abashaija be babiri ati: ‘N’oha omuriimwe oraagyende naanye omu rusiisira rwa Saulo?’

Abishai amugarukamu ati: ‘Niinye.’ Abishai niwe mutabani wa munyaanya wa Daudi orikwetwa Zeruiya. Saulo n’abashaija be ku baabaire babyami, Daudi na Abishai baashobooka baahika omu rusiisira. Baihamu eicumu rya Saulo hamwe n’orunywero rwe rw’amaizi, ebyabaire biri aha mushego haihi n’omutwe gwa Saulo. Tihaine n’omwe owaabareebire nari owaabahuriire ahakuba bakaba bagwejegyeire obutasisiimuka.

Hati reeba Daudi na Abishai. Baarugireyo, kandi baahika kurungi aha mutwe gw’ekibungo. Daudi omu iraka rihango agambira omukuru w’eihe ati: ‘Abuneeri, ahabw’enki otarikurinda mukama waawe, omugabe? Mbwenu reeba! Eicumu ry’omugabe n’orunywero rwe rw’amaizi birahi?’

Saulo aimuka. Amanya eiraka rya Daudi, kandi amubuuza ati: ‘Niiwe Daudi?’ Nooreeba Saulo na Abuneeri ahansi aho?

Daudi agarukamu Saulo ati: ‘Eego, niinye mukama wangye.’ Kandi Daudi amubuuza ati: ‘Ahabw’enki noogyezaho kunkwata? Ni kibi ki eki nkozire? Eicumu ryawe ndiri, Ai omugabe. Reka hagire owaija aryakiire.’

Saulo aikiriza ati: ‘Nkashiisha, nkozire eky’obushema.’ Aho Daudi ayegyendera na Saulo agaruka owe omuka. Kwonka Daudi agira ati omu mutima gwe: ‘Saulo eizooba rimwe naija kunyita. Nshemereire kuhunga nkaza omu nsi y’Abafilistia.’ Kandi ekyo nikyo yaakozire. Daudi hati abaasa kubeihabeiha Abafilistia kubaikirizisa ngu ari aha rubaju rwabo.

Bwanyima, Abafilistia baza kurwanisa Abaisraeli. Omu rutaro, bombi Saulo na Yonasaani baitwa. Eki kigwisa kubi munonga Daudi, kandi ahandiika ekyeshongoro kirungi omu yaayeshongoire ati: ‘Nyine amaganya maingi ahabwawe iwe murumuna wangye Yonasaani. Ku obaire ori ow’omuhendo ahariinye!

Bwanyima Daudi agaruka Israeli omu rurembo rwa Heburooni. Hariyo orutaro rwagati y’abashaija abatooraine mutabani wa Saulo Isheboshesi okuba omugabe hamwe na bari abandi abarikwenda Daudi kuba omugabe. Kwonka aha muheru abashaija ba Daudi basingura. Daudi akaba aine emyaka 30 obu yaahindurwa omugabe. Okumara emyaka mushanju n’ekicweka ategyeka omuri Heburooni. Bamwe aha batabani abu yaazaariire okwo ni Amunooni, Abusolomu na Adoniya.

Obwire buhika Daudi n’abashaija be baza kukwata ekibuga kirungi ekirikwetwa Yerusaalemu. Yoabu, ondiijo mutabani wa munyaanya wa Daudi Zeruiya ayebembera omu kurwana. N’ahabw’ekyo Daudi amurongoora arikumuhindura omukuru w’eihe rye. Hati Daudi atandika kutegyeka omu rurembo Yerusaalemu.

1 Samueli 26:1-25; 27:1-7; 31:1-6; 2 Samueli 1:26; 3:1-21; 5:1-10; 1 Obusingye 11:1-9.