Ekitebyo 4

Enshonga Ahabwaki Baafeereirwe Amaka Gaabo

REEBA ekirikubaho hati. Adamu na Haawa bariyo nibabingwa omu musiri murungi gwa Edeni. Noomanya ahabw’enki?

N’ahabw’okuba bakakora ekintu kibi munonga. N’ahabw’ekyo Yehova ariyo naabafubira. Noomanya ekibi eki Adamu na Haawa baakozire?

Bakakora ekintu eki Ruhanga yaabazibiire kukora. Ruhanga akabagambira ngu bakaba nibabaasa kurya ebijuma by’emiti y’omu kibanja. Kwonka hariho omuti gumwe ogu Ruhanga yaagizire ngu batariguryaho, kubaakuguriireho bakaba nibaija kufa. Omuti ogwo akagwesigariza kuba ogwe wenka. Kandi nitumanya ku kitahikire okutwara ekintu ky’omuntu ondiijo, tikwe? Mbwenu shi, n’enki ekyabaireho?

Eizooba rimwe Haawa ku yaabaire ari wenka omu musiri, enjoka yaagamba nawe. Teekateeka ahari ekyo! Ekagambira Haawa kurya aha kijuma ky’omuti ogu Ruhanga yaabazibiire kuryaho. Obu Yehova yaahanga enjoka tarazihangire kubaasa kugamba. N’ahabw’ekyo eki nikimanyisa ngu omuntu ondiijo akaba naagambisa enjoka. Akaba ari oha?

Akaba atari Adamu. N’ahabw’ekyo aine kuba yaabaire ari omwe aha bantu abu Yehova yaahangire iranaira atakahangire nsi. Abantu abo ni baamaraika, kandi titurikubaasa kubareeba. Maraika omwe ogu akagira amaryo maingi. Akatandika kuteekateeka ngu nawe ashemereire kuba omutegyeki nka Ruhanga. Kandi akenda ngu abantu bamworobere omu mwanya gw’okworobera Yehova. Niwe maraika owaagambiise enjoka.

Maraika ogu akabaasa kubeihabeiha Haawa. Ku yaamugambiire ngu naija kuba nka Ruhanga yaarya aha kijuma, Haawa yakiikiriza. Atyo yaarya, na Adamu nikyo kimwe yaaryaho. Adamu na Haawa bakagomera Ruhanga, kandi niyo nshonga ahabw’enki baafeereirwe amaka gaabo amarungi munonga ag’omu kibanja.

Kwonka obwire buryahika, Ruhanga aryahamya ngu ensi yoona yaabonezibwa nk’omusiri gwa Edeni. Bwanyima niitwija kwega oku naiwe orikubaasa kubagana omu kuhindura ensi omwanya omurungi. Kwonka hati, ka tureebe ekyahikire ahari Adamu na Haawa.

Okutandika 2:16, 17; 3:1-13, 24; Okushuuruurwa 12:9.