Oyo onthiki yahulilila Sesusi ankho ekahi mondyuo ya Huku iya utualako okuhololola okuti ovahoneki vovitumino nova Faliseu velikembesa, evepopila povanthu okuti vena omaandambeyo. Apopi onthengele-popia, ati: “Onwe mukahi ngokopo nelonga liasukulwa kondye, mahi mokati muasila. Onwe mokati mueyula elungavi, nokuhanda okulihambukiswa onwe muene. Onwe va Faliseu ovamphoki, tete sukulei, okopo nelonga mokati, opo no kondye kukale tyasukuka.” (Mateusi 23:25, 26) Namphila ankho ova Faliseu valinga ononkhono mbokulandula ovitumino viokulisukukisa, nokulihiwiswa, mahi ankho kavesuku nokukala ovanthu ovawa nokusukula momitima viavo.

Ankho valekesa okuti vena omaandambeyo mokusukula omalangalo ovauli nokuetunga nokuehiwiswa. Mahi ngetyi Sesusi apopia, ankho “ovatekula va vana vaipaele ovauli.” (Mateusi 23:31) Otyo vetyilekesa mononkhono ankho vekahi nokulinga mbokuhanda okuipaa Sesusi. — Suau 5:18; 7:1, 25.

Sesusi apopi etyi ankho ononkhalamutwe mbonongeleya maveya okulingwa inkha kavelivele, ati: “Nonyoka, vana vonombuta, oñgeni mamuhupu kokukoyeswa, amuhayumbwa mo Gehena?” (Mateusi 23:33) Mevota lyo Hinom ankho likala popepi no Selusalei, muyokelwa osilo, otyo tyilekesa okuti ovahoneki vovitumino nova Faliseu onondingavivi ankho mavahanyuako avahakala-kalako vali.

Ovalongwa va Sesusi ankho mavakala pomphangu yae, avakala “ovauli, novanthu ovanongo, novalongesi vounyingi.” Ankho oñgeni mavalingwa? Sesusi apopila ononkhalamutwe mbonongeleya ati: “Vamwe [povalongwa vange] mamuveipaa iya vamwe amuvepapela momiti. Iya ovakuavo mamuvevetela monondyuo mbenyi mbokufendela, nokuvemonesa ononkhumbi mepunda-umbo na punda-umbo, ngotyo mamupulwa ohonde yovaviuki aveho vaipawa kombanda yohi, okutunda kohonde ya Ambele alo ohonde ya Sakaliya . . . una muaipaa.” Sesusi evelondola ati: “Tyotyili, ovipuka ovio aviho mavipulwa ovanthu ava vokuna omuenyo omuvo uno.” (Mateusi 23:34-36) Otyo tyamoneka menima 70 P.K. pu etyi omafualali ova Loma ahanya-po o Selusalei iya ova Sundeu ovanyingi avankhi.

Otyipuka otyo ankho tyanumanesa unene Sesusi. Apopi nokueihamenwa ati: “Vanthu vomo Selusalei, vaipai vovauli, onwe vokutyopa nomamanya vana vatumwa ku onwe. Tuñgapi nahandele okuongiya ovana venyi, ngotyuufwa tyiundika ovipiyona viatyo momapapatelo! Mahi onwe amuhetavela. Talei! Ondyuo yenyi yokufendela Huku meiyeke-po emusila-yo.” (Mateusi 23:37, 38) Ovanthu etyi veiva onondaka “ondyuo yenyi” tyafuile velipulile ondyuo patyi apopia. Okuti ankho upopia ondyuo ya Huku onene, ikala mo Selusalei, ina ankho ngoti iyakulilwa na Huku?

Sesusi ayawisako okuti: “Ame ndyimupopila okuti: Okutuka hono, onwe nalumwe vali mamumono, alo mupopia okuti: ‘Una uya menyina lya Siovaa, akanenwe na Huku.’” (Mateusi 23:39) Ankho ukahi nokupopia eulo livasiwa mo Salmo 118:26 yati: “Apandwe una uya menyina lya Siovaa. Onthue tumukanena nawa onwe vo mondyuo ya Siovaa.” Mokonda ondyuo ya Huku ankho maihanyuako, tyimoneka nawa okuti nawike ankho meya mondyuo oyo menyina lya Huku.

Sesusi pahe aende pomphangu ankho pakala ovikasa viokupakwa oviawa. Ovanthu ankho vapondola okupaka oviawa viavo movikasa ovio. Sesusi atale ova Sundeu, “ovahona ovanyingi ankho vekahi nokupaka-mo onombongo ononyingi.” Konyima amono omuhepe umwe wahepa wapaka-mo vala “onombongo onombali mbovivela mbuna esilivilo liehehi.” (Maluku 12:41, 42) Tyotyili Sesusi ankho wetyimona okuti omuhepe oo, otyiawa tyae tyahambukiswa Huku.

Sesusi aihana ovalongwa vae, evepopila okuti: “Tyotyili ame ndyimupopila okuti omuhepe ou omuhepi wapaka vali unene movikasa vionombongo tyipona vakuavo aveho.” Ñgeni ngotyo? Sesusi ahangununa ati: “Aveho vapaka-mo etyi vahupisa, mahi ngwe mouhepi wae, wapaka-mo onombongo ambuho ankho ena, atyiho ankho ena opo elitekule.” (Maluku 12:43, 44) Ankho welikalela nononkhalamutwe mbonongeleya, tyilinge mokusoka tyilinge muevi alinga!

Onthiki 11 ya Nisan ankho ikahi nokulamba iya otyo otyikando tyahulilila Sesusi akala mondyuo ya Huku. Umwe povalongwa vae emupopila okuti: “Mulongesi, tala vala omamanya aa omawa, no nondyuo ombu!” (Maluku 13:1) Ankho omamanya oo ovimato viondyuo ya Huku omanene, okuetala uti hamwe ondyuo oyo nalumwe maihanyua-po. Mahi etyi Sesusi apopia tyihuvisa, wati: “Onondyuo ombu umbueete? Kamapesala emanya nalike liatenthama kekuavo alihahanyua-po.” — Maluku 13:2.

Etyi amana okupopia ovipuka ovio, Sesusi novalongwa vae avaende nthele ina Evota lyo Kidron, avalondo Komphunda Yomindyambi. Tyina ekahi oko, ankho vena ono apositolu mbae vekuana — Petulu, na Andelee, na Tiaku, na Suau. Komphunda oko ankho vapondola okumona nawa ondyuo ya Huku aiho ikahi mombuelo.