Lote ankho ukala na Ambalayau, he yomukulu, mo Kanaa. Mokweenda kwomuvo, Ambalayau na Lote avakala novipako ovinyingi, apa vakala kavafu-po vali. Ambalayau apopila Lote ati: ‘Hahe vali tuliyapuke. Koya oku uhanda okwenda, ame ndyende no kokukwavo.’ Ambalayau kali nelungavi, hatyo?

Lote akoyo otyilongo tyikahi nawa popepi nepunda-umbo litiwa o Sondoma. Akoyo otyilongo tyina omaande, tyayova nawa. Aende nombunga yae kotyilongo akoya.

Ovanthu vomo Sondoma novo mepunda-umbo likala popepi litiwa o Ngomola, ankho valinga unene ovivi. Mokonda valinga unene ovivi, Siovaa apopi okuti mahanye-ko omapunda-umbo oo evali. Mahi Huku ankho uhanda okuyovola Lote nombunga yae, atumu onoandyu onombali opo mbuvepopile okuti: ‘Kuluminyei! Tundei mepunda-umbo lino! Siovaa melihanye-po.’

Lote ahalingi ngeetyi apopilwa. Nkhele asete. Pahe onoandyu ambukwate mokuvoko kwa Lote nokuvoko komukai wae nomomavoko ovana vae vevali ambuvekokela kondye yepunda-umbo, ambuti: ‘Hatekei! Hupisei omienyo vienyi, mwahaleukei. Inkha muleuka, mamunkhi!’

Etyi vehika mepunda-umbo litiwa o Sowale, Siovaa alokesa otupia atuyoko-po epunda-umbo lyo Sondoma no Ngomola. Omapunda-umbo oo evali ahanywa-po aeho. Omukai wa Lote  ehetavela ku Siovaa, aleuka atyituka otyimbumba tyomongwa! Mahi Lote novana vae ovahikwena avahupu mokonda vetavelele ku Siovaa. Tyipondola Lote wanumanene mokonda yomukai wae wehetavelele, tupu novana vanumanene mokonda ya ina wehetavelele. Mahi avahambukwa mokonda vetavelele ku Siovaa.