Etyi Tyahonekwa na Luka 18:1-43
18 Pahe evepopila omuhe umwe, ankho wahanda vanoñgonoke okuti tyahanda okulikwambela apeho ohaponwa,+
2 ati: “Mepunda-umbo limwe ankho muna omulume umwe ukoya onomphela, omunthu umwe ankho wehena-le owoma na Huku, wahalingi-ale onthilo omunthu nawike.
3 Mepunda-umbo liatyo omo ankho mwati nomuhepe umwe ukala-mo. Omuhepe oo ankho oko vala atyotyela komulume oo otyo ati: ‘Omphela yetu nondyale yange iviuke-vo.’
4 Mahi ngwe ankho kahandele-ale okulipaka-po, pahe konyima ekelisoka vali ati: ‘Namphila nehesukile-ale na Huku, anehena-le onthilo na munthu,
5 mahi omuhepe ou etyi eli vala nokunthyatiyala, ndyimuviukisila vala omphela yae ahankhondaukile vali, uli vala nokunthokotesa omutwe nomphela yae.’”+
6 Tatekulu ati: “Tehelei vala etyi tyapopia omukoyi oo wonomphela, ngwe handingaviwa!
7 Okuti pahe Huku una wapwa-elundo, oe mahaviukisa onomphela mbovanthu vae aholovona,+ vati vala komutenya valila kounthiki valila?+
8 Ndyimutolele umwe, meveviukisila onomphela mbavo kamasete-ale. Mahi okuti tyina Omona womulume ameya pano pohi mavasi-po umwe eyumba-nthumbi olio?”*
9 Apopila vali vamwe ankho velipaka kokuviukisa, vamwe ankho vatomba vakwavo, evetolela omuhe umwe ati:
10 “Kwali ovalume vamwe vevali, ankho tyati ou omu Faliseu, ou omutanthi welilimu, hono avai kondywo ya Huku vekelikwambele.
11 Ou omu Faliseu watyo, atalama elikwambelela momutima ati: ‘Huku yange, ame ndyikupandula ame hikahi nga vakwetu — vavaka, vahaviukisa, velipaka momaumbalehi — nii vala hafwile-ale omutanthi ou welilimu.
12 Ame ndyikala tyahali tuvali mosimanu; kovipuka viange aviho, kekwii ndyipola-ko tyike andyityipakula.’+
13 Mahi omutanthi welilimu, atalamena vala ngooko, nokuyelula vala omaiho atale peulu ehetyivili-ale, ahimbika vala okuliveta monthulo, otyo ati: ‘Huku yange, ndinge-vo onkhenda,* ame ndyimukwankhali.’+
14 Ame ndyimutolela umwe, omulume oo, wati umwe tyina aya no keumbo liae, watiwa umwe oe ondingaviwa, wapona omu Faliseu.+ Ava velipaka-ko vakapakwa koututu, ava velipaka koututu vakapakwa kounene.”+
15 Pahe ovanthu ankho veli nokumwetela ovana vavo eveyambeke omavoko, mahi ovalongwa avevetyaululula-ko.+
16 Ngwe Sesusi aihana ovana veye kwe ati: “Vakwe ovana veya no kwaame veyekei. Mwehevekondolei, tyeetyi Ouhamba wa Huku o wo ovo yatyo.+
17 Ame ndyimupopila umwe, ou wahatambula Ouhamba wa Huku ngomona, Mouhamba oo kamakanyingila-mo.”+
18 Pali omutumini umwe, oo apulu ati: “Mulongesi Omuwa, oityi ndyina okulinga tyikampha omwenyo wahapu?”+
19 Sesusi emuti: “Oityi unthila ndyimuwa? Kutupu omuwa, omuwa o Huku vala.+
20 Ove tyipopia ovitumino utyii: ‘Wahalinge oumbalehi,+ wahaipae,+ wahavake,+ wahahunge mukwenyi,+ humba ho na nyoko.’”+
21 Pahe omulume ati: “Ovio aviho ame ndyivilinga-le nkhele tya pouna.”
22 Sesusi etyi etyiiva, emuti: “Una vala tyike wakambesa. Landesa atyiho una-tyo, oavaila ovahepi, ove ukakale nolumono keulu; pahe haa oya ulinge omulongwa wange.”+
23 Omulume oo okutyiiva otyo, anumana unene, mokonda ankho omuhona, una-tyo.+
24 Sesusi emutale, ati: “Matyikepwiya unene ovanthu vokuna onombongo vavase ondyila yokunyingila Mouhamba wa Huku!+
25 Nkhele nekamelu meyulu lionguya lipondola okukwata-mo, mahi omuhona tyipwiya okunyingila Mouhamba wa Huku.”+
26 Ovanthu vokwetyiiva, avati: “Opo naina, olie mayovoka?”+
27 Ngwe ati: “Ovipuka ovanthu vehevili, Huku uvivila.”+
28 Petulu ati: “Tala! Onthwe twasa-po atyiho tyetu, atukulandula.”+
29 Ngwe eveti: “Ame ndyimutolela umwe, nawike wasa-po eumbo liae, omukai wae, onondenge mbae novakulu vae, hamwe wasa-po ovohe novo ina, uvesa-po tupu okombanda Youhamba wa Huku,+
30 wahamapewa vali ovipuka ovinyingi momuvo uno, omu mouye* ukeya, akamona omwenyo wahapu.”+
31 Pahe aende no ngo opo Novatumwa* 12, evepopila eveti: “Tala! Oku pahe tulondeka nako, oko Selusalei, atyiho tyahonekelwe novauli tyipopia Omona womulume matyikalingwa.*+
32 Apa ehika oko, mapakulwa peke liovalume vomihoko omikwavo,+ mavemukwele,+ mavemulingi onya, mavemunthili umwe omate.+
33 Mavemuti vete-vete, avemwipaa,+ mahi mapakala vala ononthiki ononthatu apindulwa-po.”+
34 Mahi ngwe avehetyinoñgonoka etyi apopia, mokonda etyi onondaka ombo mbupopia ankho vetyiholekwa, tyapopiwa avehetyinoñgonoka-le.
35 Tyina pahe Sesusi ehungi umwe mo Selikoo, uvasa pena omulume umwe omumphoki upumphi petapalo.+
36 Etyi omulume eiva onthumbo yovanthu valamba, apulu ati vakwe ya otyo ndyiivite otyityi?
37 Avemuti: “O Sesusi omu Nasalee ulamba!”
38 Alaveleya ati: “Sesusi mona wa Ndaviti ndinge-vo onkhenda!”
39 Ava ankho veli komutwe, avemukandukila, avemuti wahavielele apa, ngwe pahe avilipo umwe, alaveleyila umwe peulu ati: “Mona wa Ndaviti ndinge-vo onkhenda!”
40 Sesusi atalama, ati mweetei kuno. Etyi ehika emupulu ati:
41 “Oityi wahanda ame ndyikulingile-tyo?” Ati: “Tatekulu mphatule-vo vala omaiho.”
42 Sesusi emuti: “Omaiho ove amone-po; Eyumba-nthumbi liove liekuhakula.”+
43 Popilwee vala ngootyo, kuna omaiho ae amona-po umwe ahimbika okulandula+ Sesusi, otyo ankhimaneka Huku. Ovanthu aveho ankho veli-po etyi navo vetyimona, navo avahilivika Huku.+
Outoi
^ Ine, “eyumba-nthumbi ngolio.” Melaka Liokonthuko: “Onthumbi.”
^ Ine, “kala-vo nolwembia naame.”
^ Ine, “momuvo.” Tala Onondaka Mbahangununwa.
^ Ine, “Ono Apositolu.”
^ Ine, “matyimanuhuka.”
