Isaiya 29:1-24
29 “Aliyeli,* Aliyeli epunda-umbo omu Ndaviti aongele onthanda, ngongo yalio!+
Twalako nima na nima,Twalako novipito+ viove omanima aeho.
2 Mahi, o Aliyeli mandyikeyetela ononkhumbi,+Ovanthu mo Aliyeli mavakalila, tupu mavekeliyava.+Kwaame, maikakala ngeiko liomutala wovilikutila wa Huku.+
3 Mandyikaonga onthanda, andyilisete noove,Mandyikekuhondya novipandyi viahonga.Mandyikekutungila olumbo.+
4 Ove mokapakwa pombwelo,Ngapo ukapopila.Onondaka mbove kamambukeivala mokonda yombuma.+
Ondaka yove maikatunda pohi,Ngondaka ya una upopia novilulu.Ove mokatotovekela pohi.
5 Onondyale* mbove ononyingi, mambukakala ngombuma yeheke.+Ovanthu ovanyingi vokuna onya, mavakala ngeyungu lienda nomphepo.+
Otyo, matyikamoneka vala liwa-liwa, monthiki uhei.+
6 Siovaa womambamba ovita mekekuyakulila,Nomutetanena, notyinimawe, nomutitimo omunene,Notyipepe, nomphepo onene, nomutemo wotupia tuyoka atyiho.”+
7 Ovanthu ovanyingi-nyingi vovilongo aviho, vokulwisa o Aliyeli+— Aveho vokwilwisa,Vokwikatulila ongandyo yomitala viovalavi,Na vana vokwimonesa ononkhumbi —Mavakakala ngondyoi, emonekelo lyo kounthiki.
8 Tyotyili, matyikakala ngomunthu wankhia ondyala, ulota ngoti ukahi nokulia,Mahi tyina apahuka wankhia ondyala.*Ngomunthu wankhia ohunga, aloto ngoti ukahi nokunwa,Mahi tyina apahuka wepwila, tupu wankhia ohunga.*
Ongootyo matyikamonekela ovanthu ovanyingi-nyingi vovilongo aviho,Vekahi nokulwisa Omphunda Siyau.+
9 Tumphulukei, amuhuvu.+Kalei ovamphoki, amukaleswa ovamphoki.+
Vakolwa, mahi kavakolelwe novinyu.Vatanthauka, mahi kavanwine ovikunwa vikoleswa.
10 Mokonda, Siovaa weveyumba olumphoki avalala umwe nthipa.+Wapata omaiho enyi, ovauli.+Wahika omitwe vienyi, vokumona omamonekelo.+
11 Kwoonwe, omamonekelo aeho ekahi vala ngonondaka mbuli momukanda wapatwa.+ Tyina vewaavela una utyivila okutanga, avemupopila okuti: “Mbambavo utanga, tangela peulu.” Ngwe mati: “Katyitavela, mokonda wapatwa.”
12 Tyina omukanda vewaavela una uhetyivili okutanga, avemupopila okuti: “Mbambavo utanga.” Ngwe mati: “Ame hityivili okutanga.”
13 Siovaa wati: “Ovanthu ava vafwena vala kwaame nomulungu,Vankhimaneka vala nomilungu viavo,+Mahi omitima viavo vili kokule naame.Owoma vena naame, watuka vala movitumino valongeswa novanthu.+
14 Otyo ovanthu ava mandyivelingila vali ovipuka vihuvisa,+Ovipuka vihuvisa, vililandula vala.Ounongo wovanongo vavo, maukapwa,Enoñgonoko liovanthu vavo vokwalunguka, malikaholekwa.”+
15 Vana vaovola okuholeka onomphango* mbavo ku Siovaa, ngongo yavo.+
Ovipuka viavo vevilingila apa panthikovela,Otyo vati: “Olie utwete?
Olie wii etyi tukahi nokulinga?”+
16 Onwe mupililika unene ovipuka ngatyi!*
Okuti omuhongi wonombiya weelekwa nonthata?+
Okuti, etyi tyatungwa tyipondola okupopia una wetyitunga okuti:
“Hae-ko wanthunga?”+
Okuti, etyi tyahongwa tyipondola okupopia una wetyihonga okuti:
“Utupu-ale etyi ei?”+
17 Apa katutu, o Limbanu maikatyitulwa otyitaka tyovinyango,+Otyitaka otyo tyovinyango, matyikatalwa ngatyina otyiteta.+
18 Monthiki omo, onompholo mambukeiva onondaka mbomukanda.Omaiho ovamphoki maakamona-po, avayovoka kenthiki, no kepuputu.+
19 Onondalawa mavakahambukilwa unene pu Siovaa,Ovanthu vokwahepa, mavakahelela Pomukwa-ukola wa Isilayeli.+
20 Mokonda, wokuna onya kamakakala-ko vali,Wokulipaka-ko makanyimwa-ko,Aveho vatwalako tyalunguka opo vanyone, mavakahanywa-ko,+
21 Vana vapopia omatutu opo vakwavo vavelwe onombei,Vaovola okukwatesa una uyakulila* vakwavo kombundi yepunda-umbo,+Vapopia evi vihesilivila opo vapengese omphela yomuviuki.+
22 Siovaa, wokwayovola Ambalayau,+ wapopila eumbo lya Sakoo okuti:
“Sakoo kamakakunda-kunda vali,Otyipala tyae, kamatyikaetesa vali onkhenda.*+
23 Mokonda, tyina amamono ovana vae, veli pokati kae,Ovilinga viomavoko ange,+Mavakasukukisa enyina liange.Tyotyili, mavakasukukisa Omukwa-ukola wa Sakoo,Avakakala nonthilo onene na Huku ya Isilayeli.+
24 Onomphuki, mavakakala nenoñgonoko,Vokuñgoñga, maveketavela okulongeswa.”
Outoi
^ Mokutala tyihangununa okuti, “Eiko Liomutala Wovilikutila wa Huku.” Mokutala, yapopiwa o Selusalei!
^ Melaka Liokonthuko: “Ovanthu veheiwe.”
^ Ine, “ohande yae itupu natyike.”
^ Ine, “ohande yae yakukuta.”
^ Ine, “etyi velipakaila-mo.”
^ Ine, “onwe munondingavivi unene!”
^ Melaka Liokonthuko: “Uviyula.”
^ Mokonda yokwakunda, nokwasoya.
