1-2. (a) Jiihóvah haitʼéego nihokááʼ dineʼé yichʼįʼ yáłtiʼ ńtʼééʼ? (b) Haʼátʼíí baa nídadíitʼįįł?

JIIHÓVAH haneʼ nihichʼįʼ ííłʼı̨́įgo bił ayóó átʼé. Bintsíkees nihił bééhodoozįįł biniyé níléédę́ę́ʼ, bá dahalneʼé, diyingo ndaalʼaʼí áádóó biYeʼ Christ Jesus choyoosʼįįd. (Amos 3:7; Gal. 3:19; Rev. 1:1) Dííshjı̨́įdi éí Diyin Bizaad biiʼdę́ę́ʼ nihichʼįʼ yáłtiʼ. Bintsíkees nihił bééhodoozįįł áádóó ááníiłgi bikʼiʼdiyiitįįh biniyé bizaad nihá niiníʼą́.

² Jesus nahasdzáán bikááʼ naagháhą́ądą́ą́ʼ, Jiihóvah éí táadi yáʼąąshdę́ę́ʼ haadzííʼ. Haaʼíshąʼ saad yee hahasdzííʼ yę́ę haʼátʼíí bitsʼą́ą́dóó bídahwiidiilʼááł, áádóó haitʼéego nihíká adoolwoł.

3. Mark 1:​9-11 bikʼehgo, Jesus baptize ábiʼdiilyaago Jiihóvah haʼátʼíí ní, áádóó haʼátʼíí táaʼgo tʼáá aaníigo átʼé ní?

³ Mark 1:​9-11 éí tsʼídá áłtsé Jiihóvah yáʼąąshdę́ę́ʼ haadzíiʼgo yaa halneʼ. (Yíníłtaʼ.) Jiihóvah kóní: “ShiYeʼ ayóóʼóóshʼníinii nílı̨́; tʼáá íiyisí naa shił hózhǫ́.” Jesus éí bizhéʼé kóbidííniidgo tʼáá shı̨́ı̨́ íiyisíí hajéí yidiisnááʼ! Jiihóvah éí Jesus yaa haadzíʼígíí táaʼgo tʼáá aaníigo átʼé. Áłtséhígi éí Jesus tʼáá aaníí biYeʼ nilı̨́. Naaki góneʼ éí Jiihóvah biYeʼ ayóóʼáyóʼní. Tááʼ góneʼ éí Jiihóvah biYeʼ yaa bił hózhǫ́. Tʼááłáʼí níʼánígo hazhóʼó dadíníilʼįįł.

4. Jesus baptize ábiʼdiilyaago, God biYeʼ jílı̨́įgi haitʼéego łahgo ádzaa?

⁴ “ShiYeʼ . . . nílı̨́.” Jiihóvah díí saad yee haadzíiʼgo bee, kʼad éí haYeʼ ayóóʼájóʼníinii éí kʼé bił ahizhdiʼníigi łah  átʼéego háátʼiʼ. Jesus éí níłchʼi jílı̨́įgo yáʼąąshdi Jiihóvah biYeʼ jílı̨́ı̨́ ńtʼééʼ. Baptize áhoʼdiilyaago éí níłchʼi diyinii bee anoint áhoʼdilyaa. Díí éí náasdi yáʼąąshgóó nízhdoodááł áádóó Naatʼáanii índa Aláahdi Nááʼiiłniihii jidooleełgi Hazhéʼé haididooʼááł. (Luke 1:​31-33; Heb. 1:​8, 9; 2:17) Baptize áhoʼdiilyaago, Hazhéʼé éí “shiYeʼ . . . nílı̨́” hodííniidgo éí bahatʼaadí ályaa.—Luke 3:22.

5. Haitʼéego Jiihóvah bedaʼiilʼı̨́į doo?

⁵ “Ayóóʼóóshʼníinii nílı̨́.” Jiihóvah biYeʼ ayóóʼáyóʼní áádóó yaa bił hózhǫ́ǫgo haadzííʼ. Bedaʼiilʼı̨́įgo, nihí ałdóʼ łaʼda haʼahóní bee bichʼįʼ hadíídzih. (John 5:20) Łaʼda yáʼátʼéehgo íinidzaa nihiłníigo éí nihitah yáʼáhootʼéehgo ánihiiłʼįįh áádóó nihił hózhǫ́ǫ łeh. Nihibrothers dóó nihisisters índa nihighan nahazʼą́ągi kótʼéhígíí saad yídin danilı̨́įgo átʼé. Łaʼda yáʼátʼéehgo íinidzaa bidiníigo éí beʼoodląʼ bidziil yileeh áádóó Jiihóvah yikééʼ sizı̨́įgi bíká iilwoʼ. Azhéʼé dóó amá éí haʼáłchíní ayóóʼádajóʼníigo kótʼéego bichʼįʼ yádajiłtiʼ doo. Tʼáá aaníí ájíníigo haʼáłchíní yáʼátʼééh ááníiłgi índa ayóóʼájóʼníigi bee bichʼįʼ yájíłtiʼgo éí nizhónígo dínísééh.

6. Jesus haʼátʼíí biniyé baa dzííníidlíi doo?

⁶ “Naa shił hózhǫ́.” Jiihóvah díí saad biYeʼ yichʼįʼ yee haadzííʼ, háálá Jiihóvah íinízinii tʼáá ałtso bizhdoolíiłgi yee haa dzólí. Nihí ałdóʼ tʼáá ákótʼéego Jesus baa dadzííníidlíigo Jiihóvah yee nihwiizʼáanii Jesus tʼáá ałtso yiʼdoolííł. (2 Cor. 1:20) Jesus ááníłígíí níilʼı̨́įgo éí bitsʼą́ą́dóó ídahwiidiilʼááł áádóó bikʼehgóó yiidáał doo. Jiihóvah éí biYeʼ yaa dzólí. Éí tʼáá ákótʼéego bá ndaalʼaʼí tʼáá dah yikah  ńtʼééʼ Jesus bitsʼą́ą́dóó ídahoołʼaah doo.—1 Pet. 2:21.

7. Matthew 17:​1-5 bikʼehgo, haa hoodzaago Jiihóvah yáʼąąshdę́ę́ʼ haadzííʼ áádóó haʼátʼíí ní?

⁷ Matthew 17:​1-5 yíníłtaʼ. Jesus bitsʼádiʼnílíidgo “łahgo ázhnoolningo áhoʼdiilyaa” yę́ęgi éí naaki góneʼ Jiihóvah yáʼąąshdę́ę́ʼ haadzííʼ. Jesus éí Peter, James, dóó John dziłghą́ą́ʼgóó diikah bizhdííniid. Áadi Jesus biniiʼjįʼ bitsʼádiʼnílíidgo biʼééʼ łigaigo bee adinídíingo dajiiłtsą́. Nizhdiltʼéego éí Mózes dóó Iiláíjah bił ahijíłtʼée léiʼ ákweʼé Jesus bichʼįʼ yájíłtiʼ. Díí éí Jesus bidiʼyoolyéełgi áádóó náábidiʼdoolzáałgi bee bichʼįʼ yájíłtiʼ. Yilʼaadii tʼáá táltʼéego “tʼáá íiyisí bił” dazhnízin ndi, chʼéédadzísdzidgo díí ayóó átʼéego áhoodzaaígíí dajiiłtsą́. (Luke 9:​29-32) Nááʼákóneʼ kʼos bitsʼádiʼnílíidgo bikʼiildoh áádóó kʼos biyiʼdę́ę́ʼ iinééʼ diistsʼą́ą́ʼ, éí Jiihóvah biinééʼ! Jesus baptize ábiʼdiilyaago haadzííʼ yę́ęgi átʼéego ání: “Díí shiYeʼ ayóóʼóóshʼníinii jílı̨́, tʼáá íiyisí hąą shił hózhǫ́.” Ndi kʼad éí Jiihóvah díí yiyííʼą́, “Dahwíísółtsʼą́ą́ʼ,” ní.

8. Ił áhoodzaa yę́ę Jesus dóó bídahoołʼaahii haitʼéego bíká eelwod?

⁸ Díí áhoodzaaígíí ííshjání áyiilaago Jesus éí God biNahatʼaʼ biNaatʼáanii jidooleeł. Éí neezgaigo tiʼhojooníihgo dazhdootsaał, díí bee hadziil índa haʼjólníigo áhoolaa. Hódahoołʼaahii ałdóʼ bedaʼoodląʼ bidziilgo áyiilaa. Háálá náás hodeeshzhiizhgóó akééʼ asdzı̨́įgi bee nabídahoʼdínóotah áádóó naanish nitsaago haa dadeestʼą́. Tádiin nááhaigo yilʼaadii Peter díí ániid áhóótʼįįd nahalingo bééjílniihgo baa hojoolneʼ.—2 Pet. 1:​16-18.

9. Jesus éí haʼátʼíí yáʼátʼéehgo chooʼı̨́į dooleełii yee hahaasdzííʼ?

⁹ “Dahwíísółtsʼą́ą́ʼ.” Jiihóvah éí shiYeʼ dahwíísółtsʼą́ą́ʼ áádóó bikʼeh dahonołʼı̨́ níigo doo naaki nilı̨́ı̨́góó haadzííʼ. Jesus éí ląʼí saad yee hahasdzíʼígíí ílı̨́įgo ádaatʼé. Bikééʼ deíkáhígíí ayóóʼáyóʼníigo haneʼ yáʼátʼéehii baa dahojilneʼ doo biniyé nahoneeztą́ą́ʼ, áádóó hadaʼísídółʼı̨́ı̨́ʼ hałníigo tʼáá ahą́ą́ yééhoyííłnii. (Matt. 24:42; 28:​19, 20) Yéigo ádaahtʼı̨́įgo bidadoołkaal hodííniid. (Luke 13:24) Ayóóʼádaʼahíínóhʼní, łáʼí danohłı̨́, áádóó bee hoséłʼáanii bikʼeh dahonołʼı̨́, ałdóʼ hodííniid. (John 15:​10, 12, 13) Bídahoołʼaahii yee yichʼįʼ hahasdzíiʼii éí yáʼátʼéehgo chooʼíinii átʼé! Áko yee hahasdzíiʼii yę́ę dííshjı̨́įdi tʼahdii ílı̨́įgo átʼé.

10-11. Jesus yísíníiltsʼą́ąʼgi haitʼéego ííshjání íilʼı̨́į doo?

¹⁰ Jesus ání: “Tʼáá ádzíłtso tʼáá aanííjí dajílíinii éí dashizdiitsʼaʼ.” (John 18:37) ‘Ałchʼįʼ hadaʼíínółní, kʼé nídaʼahidohʼnih,’ nihiʼdooʼniid yę́ęgi bikʼeh honiilʼı̨́įgo éí Jesus yísíníiltsʼą́ąʼgo átʼé. (Col. 3:13; Luke 17:​3, 4) “Ashjaʼósingo índa doo ashjaʼósin da nidi,” haneʼ yáʼátʼéehii bíniidlı̨́įgo baa nahwiilneʼgo éí ałdóʼ Jesus yísíníiltsʼą́ąʼgo átʼé.—2 Tim. 4:2.

¹¹ Jesus ání: “Shidibé shiinééʼ deidiitsʼaʼ.” (John 10:27) Jesus bikééʼ deíkáhígíí doo tʼóó dabíistsʼą́ąʼ da, ndi bikʼehgóó ałdóʼ ádaanííł. ‘Iiná [bee] idaʼdiiłʼáhígíí’ doo nidabiníłtłʼa da. (Luke 21:34) Jesus bikʼeh holʼı̨́įgi azhą́ bá ndanitłʼah ndi, alą́ąjįʼ ádayósin. Ląʼí nihibrothers éí akʼijįʼ ídlı̨́, hojoobaʼígo iiná, índa ayóó ádahooníiłii bee nabídahonitaah. Ákótʼée ndi bedaʼoodląʼ yee Jiihóvah yikééʼ naazı̨́. Kódaatʼínígíí éí Jesus  ábíłní: “Bee nahoséłʼáanii hoł bééhózingo bikʼeh hojíłʼíinii éí ayóóʼáshijóʼní, áko ayóóʼáshijóʼnínígíí éí shiTaaʼ ayóóʼáhóʼníi doo.”—John 14:21.

12. Náánáłahgo Jesus yísíníiltsʼą́ąʼgi haitʼéego ííshjání íilʼı̨́?

¹² Náánáłahgo Jesus yísíníiltsʼą́ąʼgo ííshjání íilʼı̨́į doo. Éí alą́ąjįʼ naazíinii níínínilígíí bikʼeh dahoniilʼı̨́į doo. (Heb. 13:​7, 17) God bidineʼé dah yikahígíí éí ániidídóó ádaʼałʼı̨́įgi łahgo ádaalyaa. Éí nahaneʼgóó chooʼíinii, mid-week áłah néidleehgi naʼnitin ałkééʼ sinilígi, Kingdom Hall ádaalneʼgi, hashtʼéédaalneʼgi, índa baa áháyą́ągi ádaatʼéii. Ayóóʼóʼóʼní índa hazhóʼó baa tsíhodeeskéezgo díí nihíká análwoʼgo baa ahééh hwiindzin. Tʼáá ákǫ́ǫ́ akʼehgóó ádeiʼníiłgo éí Jiihóvah nihikʼihojídlíi doo.

13. Jesus jíistsʼą́ągo haitʼéego háká adoolwoł?

¹³ Jesus t’áá ałtso yee naʼneeztą́ąʼii yísíníiltsʼą́ąʼgo nihíká adoolwoł. Bídahoołʼaahii ííłní: “Háádaałyı̨́įhgo ánihideeshłííł. . . . Shiʼazéédéetání doo nantłʼagóó bee naʼanish, áádóó shiyéél éí ászólí.” (Matt. 11:​28-30) God Bizaad biiʼ dı̨́įʼgo Gospelígíí Jesus beʼiiná índa nahasneʼgi yaa halneʼígíí éí niheʼoodląʼ bidziil ánáyoodlííł, áádóó hódząʼ nihaidiyiiʼaah. (Ps. 19:7; 23:3) Jesus ání: “Diyin God bizaad deidiitsʼaʼgo yikʼeh dahółʼínígíí éí aláahgo bikʼidahojidlí [bił dahózhǫ́]!”—Luke 11:28.

14. John 12:28 bikʼehgo Jesus haʼátʼíí yaa naagháago éí tááʼ góneʼ Jiihóvah yáʼąąshdę́ę́ʼ hanáánáádzííʼ?

¹⁴ John 12:28 yíníłtaʼ. John éí tááʼ góneʼ Jiihóvah yáʼąąshdę́ę́ʼ haadzíiʼgi yaa hoolneʼ. Dazhdootsaałjįʼ yoołkáałgo Jesus éí Atisʼadeesdzá ázhʼdoolíiłgo Jerúsalemdi nijighá. Ájíní: “Nitsinishtłah.” (John 12:​27, NW) Sozdilzingo ájíní: “ShiTaaʼ, nízhiʼ ayóó átʼéego ánílééh.” Yáʼąąshdę́ę́ʼ Hazhéʼé ání: “Ayóó átʼéii lá áshłaa ni, áádóó ayóó átʼéii ánáádeeshdlííł.”

15. Jiihóvah bizaad haʼátʼíí biniyé Jesus éí haʼólní áádóó bidziilgo ábiilaa?

¹⁵ Jesus éí Jiihóvah íinízinii bizhdoolíiłgi nitsaago hąh silá, áko díí biniinaa nitsééjíltłiʼ. Náhodiʼniltsxis áádóó yéigo tiʼhojooníihgo dazhdootsaałgo hoł bééhózin. (Matt. 26:38) Tʼóó baaʼihgo  God bá hajoodzííʼ hodiʼníigo bee hakʼi hodiitʼą́, éí biniinaa ádin jizlı̨́įʼgo God doo yáʼátʼééhgóó bá yátiʼ dooleełgi yéigo hoʼdiiłʼá. Áko Hazhéʼé bízhiʼ ayóóʼátʼéego ázhdoolíiłgi aláahdi baa nitsíjíkees. Jiihóvah haadzíiʼgo shízhiʼ ayóó átʼéii ádeeshlííł nínę́ęgi ádooníiłgo joodlą́. Hazhéʼé bizaad bee haʼjólní áádóó hadziilgo áhósin. Íídą́ą́ʼ shı̨́ı̨́ Jesus tʼáá hó tʼéiyá Hazhéʼé bizaad bikʼizhʼdiitą́. Ákondi nihí éí Jiihóvah bizaadígíí bee bikʼeʼashchı̨́įgo nihá áyiilaa.—John 12:​29, 30.

16. God bízhiʼ bikʼijįʼ yátiʼ haʼátʼíí biniinaa nihidaʼdiiłʼáa łeh?

¹⁶ Jiihóvah doo yáʼátʼééhgóó bá haʼdoodzihgi Jesus átʼéhígi átʼéego nihí ałdóʼ nihidaʼdiiłʼá. Jesus nahalingo doo yáʼátʼééhgóó ánihiʼdilʼı̨́. Nihikʼijįʼ danilíinii tʼáá ádzaagóó nihaa ndahalneʼgo bikʼeh doo ákónítʼée da łeh. Jiihóvah bízhiʼ índa bidineʼé dah yikahígíí doo yáʼátʼééhgóó bá yátiʼgi nihidaʼdiiłʼáago baa nitsídeiikees. Jiihóvah bizaad éí kótʼéego yátiʼ bichʼįʼ haʼííníilníigo ánihósin, áko doo nitsinéiiltłiʼ da doo. “Diyin God bitsʼą́ą́dę́ę́ʼ bee achʼįʼ hózhǫ́ náhásdlı̨́įʼii, akʼidiʼyiitįįh tʼáá ałtso yiláahdi átʼéii, éí Christ Jesus bee nihijéí índa nihintsékees yaa áhályą́ą doo.” (Phil. 4:​6, 7) Jiihóvah éí bízhiʼ ayóó átʼéego íidoolíiłgo yíneelʼą́. Séítan dóó bikééʼ naazíinii éí  Jiihóvah bá ndaalʼaʼí bee atídajiłʼínę́ę ałtso hakʼijįʼ nídadoodleeł, díí éí God biNahatʼaʼ bee akóhodiʼdoolnííł.—Ps. 94:​22, 23; Isa. 65:17.

17. Isaiah 30:21 bikʼehgo dííshjı̨́įdi Jiihóvah haitʼéego nihichʼįʼ yáłtiʼ?

¹⁷ Dííshjı̨́įdi Jiihóvah tʼahdii nihichʼįʼ yáłtiʼgo átʼé. (Isaiah 30:21 yíníłtaʼ.) Ndi doo yáʼąąshdę́ę́ʼ nihichʼįʼ yáłtiʼgo biinééʼ dadiitsʼaʼ da. Diyin Bizaad éí Jiihóvah bizaad bikʼi sinilgo éí naʼnitinii bee hadítʼéego nihá niiníʼą́. Áádóó “baʼahódlíigo índa hóyą́ągo aa áhályáanii” níłchʼi diyinii nabiiłnáago Jiihóvah bá ndaalʼaʼí yanáʼáłtsoʼ. (Luke 12:42) Diyin kʼehgo nihanáʼáltsoʼgi doo áłchʼı̨́dí da. Díí éí naaltsoos bee naaznil, onlinegi wóltaʼ, ndaalkid áádóó jíistsʼą́ąʼ doo biniyé ádaalyaa.

18. Jiihóvah bizaad haitʼéego neʼoodląʼ bidziilgo áyósin áádóó haitʼéego bee haʼíínílní?

¹⁸ Jiihóvah éí biYeʼ saad yee yichʼįʼ haadzííʼ yę́ę béédeilniih doo! Diyin Bizaad biyiʼ God tʼáá bí bizaad bee akʼeʼashchı̨́įgo Jiihóvah éí Séítan dóó bikééʼ naazíinii tʼáá ałtso ndayiishchxǫʼígíí ałtso hashtʼéidoodlíiłgo deiniidlą́. Jiihóvah yáłtiʼgi ahánígo deísíníiltsʼą́ąʼgo badaʼííníidlíi doo. Íísíníiltsʼą́ąʼgo éí kʼad bee nihichʼįʼ anídahaztʼiʼii áádóó náasdi nihá nantłʼa dooleełii bikʼeh diidlı̨́į doo. Diyin Bizaad yéénihiyiiłnííh: “Diyin God íinízinii bikʼehgo ádaahdzaago nízaadgóó hadaʼíínółní, áko yee nihá haadzíiʼii nihííʼ dadooleeł.”—Heb. 10:36.