1-2. Psalm 34:8 bikʼehgo Jiihóvah éí yáʼátʼéehii nilı̨́įgi haitʼéego baa ídahwiidiilʼááł?

CHʼIYÁÁN tʼah doo yiilnihígíí łaʼda díí niyą́ niłníigo nichʼįʼ kóyiilaa lágo. Áłtsé éí hazhóʼó dínííłʼįįł, dííłchįįł, haʼátʼíí lá bił ályaa, doodaiiʼ łaʼda haalá halniih bididííniił. Ndi, tʼáá ni sinílnihgo tʼéiyá nił bééhodoozįįł.

² Diyin Bizaad, nihipublications, áádóó Jiihóvah yá yáʼátʼéehgo bá ádáátʼįįdii ádaa dahalneʼígíí baa ííníłtaʼgo Jiihóvah éí yáʼátʼéehii nilı̨́įgi baa ídahwiidiilʼááł. Ndi Jiihóvah tsʼídá yáʼátʼéehii nilı̨́įgi éí tʼáá ni ‘sinílnihgo’ tʼéiyá nihił bééhodoozįįł. (Psalm 34:8 yíníłtaʼ.) Éí kódaatʼéégóoda baa nitsíikees doo. Pioneer deeshłeeł shı̨́ı̨́ nínízin, ndi díí beʼdíílíiłgo éí niheʼiinaʼ tʼóó bikiinígo ádiilnííł. Jesus éí Diyin biNahatʼaʼ alą́ąjįʼ hádaahtʼı̨́įgo Jiihóvah éí nihaa áhályą́ą doo níigo yee haadzííʼ yę́ęgi shı̨́ı̨́ tʼáá ahą́ą́h néíníłtah. Ndi Jiihóvah éí tʼah doo ákótʼéego nihaa áhályą́ą dago shı̨́ı̨́ átʼé. (Matt. 6:33) Ákondi Jesus yee haadzíiʼii deiniidlą́ągo nihibéeso baa hąąh niidzin doo, neiilnishgi tʼą́ą́ʼ ádiilnííł, índa nahaneʼgi yéigo bidiilnish. Kwíitʼı̨́įgo Jiihóvah ayóó nihaa áhályą́ągo átʼéegi baa ákoniidzin. Éí Jiihóvah yáʼádaatʼéehii yee nihaa joobaʼgi tʼáá nihí ‘néiilnihgo’ átʼé.

3. Psalm 16:1 ,2 bikʼehgo Jiihóvah éí háí yichʼįʼ yáʼátʼéehgo áánííł?

³ Jiihóvah éí “tʼáá ałtso yichʼįʼ yáʼátʼéehgo áánííł,” éí doo béédahósinii ndi yichʼįʼ tʼáá ákótʼé. (Ps. 145:9; Matt.  5:45) Ayóóʼádabóʼníigo wołí bee bá ádaatʼíinii éí ląʼígóó yá áánííł. (Psalm 16:1, 2 yíníłtaʼ.) Éí yáʼádaatʼéehii Jiihóvah nihá áátʼįįdgi łaʼ baa nídadíitʼįįł.

4. Jiihóvah ahánígo yił ádaʼdólzinii haʼátʼíí yee yaa joobaʼ?

⁴ Jiihóvah yee nanihinitinígíí tʼáá akǫ́ǫ́ bikʼehgóó íʼiilʼı̨́įgo tʼáá bééhózinígo niheʼiinaʼ yáʼátʼéehgo áyiiłʼįįh. Jiihóvah baa íhwiilʼaahgo áádóó ayóóʼííníʼní yiidleehgo éí doo yáʼátʼéehii baa nitsáhákeesii índa aʼooníiłii yijoołáhígíí doo íitʼı̨́į da dooleełgi yee nihíká análwoʼ. (Col. 1:21) Jiihóvah baa ádiniitʼą́ągo baptize ánihiʼdiilyaago éí ląʼí yáʼádaatʼéehii yee nihaa joobaʼ, éí ádaa ákohwiinidzin áádóó ahánígo kʼé nihiłní.—1 Pet. 3:21.

5. Nahwiilneʼgóó Jiihóvah haitʼéego nihíká análwoʼ?

⁵ Nahwiilneʼgóó atah neidáahgo Jiihóvah nihaa joobaʼ. Ayóoísh yánínízin? Jiihóvah bidineʼé ląʼí ákódaatʼé. Jiihóvah Yá Halneʼé tʼah doo nilééhgóó éí tʼáadoo bééhósinii baa díínáałgo Diyin Bizaad bee bił nahodiilnihgi doo shı̨́ı̨́ ákótʼéego ádaa nitsíníkees da ńtʼééʼ. Ndi, kʼad éí díí tʼáá ahą́ą́h baa naniná. Áádóó Jiihóvah éí díí bínindlı̨́į doogo ná áyósin! Éí ląʼígóó yee níká análwoʼgo átʼéegi baa ákonínízin. Nahólneʼgo łaʼda doo yitsʼíidii nódziihgo Jiihóvah éí tʼóó áhodíínílzéeʼ doogo yee níká análwoʼ. Áádóó łaʼda hazhóʼó níídéestsʼįįł nízingo Jiihóvah éí Bizaad biiʼdóó saad łaʼ yéénidiyoołnih. Azhą́ diné doo danihíistsʼą́ąʼ da ndi, nahwiilneʼgi tʼáá bidiilkaal doogo Jiihóvah éí adziil yee nihaa joobaʼ.—Jer. 20:7-9.

6. Jiihóvah nanihinitingi yee nihaa joobaʼgi haitʼéego bee bééhózin?

⁶ Jiihóvah éí nahwiilneʼgi yee nanihinitingo yee nihaa joobaʼ. (John 6:45) Midweek áłah néidleehgi éí nahwiilneʼgóó yáʼátʼéehgo éʼélʼı̨́į dooleełgi nihinááł ánídaʼalʼįįh áádóó éí bikʼehgo ádaʼółʼı̨́ danihidiʼní. Átsé éí díí bídíníitahgi bichʼįʼ nihił yéeʼ łeh. Ndi bikʼeh áʼiilʼįįhgo tʼáá aaníí yáʼátʼéehgo chooʼı̨́įgo átʼéé lá díníidzįįł. Áádóó áłah néidleehgi ałʼąą ádaatʼéégóó chodaołʼı̨́įgo bee nidahołneʼ danihidiʼní. Díí átʼéego íʼiilʼı̨́įgo éí Jiihóvah nihikʼijidlíi doo. Jiihóvah baʼííníidlíigo índa wołí bee bá íitʼı̨́įgo nahaneʼgi ałʼąą ádaatʼéégóó nabídaniitaahgo yee nihaa joobaʼ dooígíí łaʼ baa nídadíitʼįįł. Áádóó éí baa nídasíitʼįįdgo haitʼéego bikʼehgóó ádaʼdiilnííł.

7. Nahaneʼgi ląʼígóó bee anáádiilwołgo haʼátʼíí bee nihikʼihojidlíi doo?

⁷ Jiihóvah áhą́dí bił niidlı̨́. Elder nilı̨́įgo Samuel * éí bichʼooní yił Colombiadi Jiihóvah yá naalʼaʼ. Éí tʼáá ájíłah kééhojitʼı̨́įgi pioneer áʼjíłʼı̨́, ndi congregation łaʼ bíká ahidiʼníilchééł jinízin. Ákótʼéego ázhʼdoolíiłgo éí ląʼí nináhizhdidooʼááł. Samuel ájíní: “Matthew 6:33 áníigi bikʼehgóó áʼiilyaa áádóó choidooʼįįłii tʼéí nahiilniihgo íilyaa. Ndi tsʼídá aláahdi ninádidootʼáałii éí biiʼ nihighanígíí. Éí tsʼídá nizhónígo tʼáá nihí nihá ályaa índa doo bikʼeh ásiilyáa da.” Congregation bíká ahidiʼníilchééł jinízin yę́ęgi éí ákweʼé tʼóó bikiinígo iiná. Samuel ání: “Jiihóvah nihiníʼeezh índa nihisodizin yidiiztsʼą́ą́ʼ áádóó nihaa bił hózhǫ́ǫgo  ayóóʼánihóʼníigi tʼah doo baa ákoniidzįįh ńtʼééʼ yę́ęgi baa ákoniidzı̨́ı̨́ʼ.” Niísh nahaneʼgóó haadayitʼéego ląʼígóó bee anáádiilwołgo ná bohónéedzą́? Ná bíighah ládą́ą́ʼ Jiihóvah áhą́dí bił dííleeł áádóó naa áhodoolyąął.—Ps. 18:25.

8. Ivan dóó Viktoria haʼátʼíí bitsʼą́ą́dóó bíhwiiniłʼą́ą́ʼ?

⁸ Bineilnishígíí baa nihił dahózhǫ́. Ivan dóó Viktoria éí Kyrgyzstandi pioneer jílı̨́. Éí tʼóó bikiinígo hweʼiinaʼ joołtʼih, áko ląʼí naʼanishgóó bee áká anáhizhnilchééh, éí kin ádaalʼı̨́ı̨́góó ałdóʼ. Ivan ájíní: “Tʼáá ałtso bineilnishígíí yéigo atah ninéilnish. Éí eʼeʼáahjįʼ chʼééh nídiitʼash ndi, nihił hózhǫ́ háálá éí Jiihóvah bá íitʼı̨́ niidzin. Áádóó nihikʼis ląʼí náádahasdlı̨́ı̨́ʼ índa bee ééhániihii ląʼí dahazlı̨́ı̨́ʼ.”—Mark 10:29, 30.

9. Sister łaʼ bichʼįʼ anáhóótʼiʼ ndi, nahalneʼgi haitʼéego tʼáadoo neʼ áyiilaa da, áádóó éí haitʼéego bíká aalwod?

⁹ Azhą́ ndaʼnółtłʼaii dahólǫ́ǫ ndi, Jiihóvah bá naʼaʼaʼgi ayóó baa hózhǫ́. Mirreh, sister náás silı̨́įʼii nilı̨́įgo West Africadi bighan, éí ákwii azeeʼííłʼíní jílı̨́ı̨́ ńtʼéeʼgo retire ájiilaa. Áádóó éí pioneer áʼjiłʼı̨́įgo baa nízhdiidzá. Agizee ayóó átʼéego neezgaigo hainítʼı̨́, áko biniinaa dahooghangóó tázhdígháahgo nahojilneʼ yę́ęgi ayóó há nantłʼa silı̨́ı̨́ʼ. Ndi literature display bee nahaneʼígíí áʼjiłʼı̨́įgo baa nízhdiidzá. Ląʼí return visits índa Bible studies hwee hazlı̨́ı̨́ʼ, łaʼ éí béésh bee haneʼí bee bichʼįʼ náhojilnih. Haʼátʼíí biniyé ląʼígóó Jiihóvah bá ánáánáshtʼı̨́į doo jinízin? Éí ájíní: “Jiihóvah dóó Jesus tsʼídá yéigo ayóóʼííníshʼní. Ląʼígóó ná naashʼaʼ doo bidishníigo tʼáá ahą́ą́h Jiihóvah bichʼįʼ sodiszin.”—Matt. 22:36, 37.

10. Jiihóvah ląʼígóó bá ánáánáshtʼı̨́į doo danízinii John 6:45 haʼátʼíí yee áká análwoʼ ní?

¹⁰ Jiihóvah éí ląʼígóó nihínootı̨́ı̨́ł. Kenny éí pioneer jílı̨́įgo díí tʼáá aaníigo hoł bééhoozin. Jiihóvah baa íhojiiłʼą́ąʼgo universitydi ajółtaʼ yę́ę bitsʼázhníyáago baptize áhoʼdiilyaa, áádóó regular pioneer jizlı̨́ı̨́ʼ. Éí ájíní: “Prophet Azáíyah éí ‘kǫ́ǫ́ sézı̨́; shidíłʼá,’ níigo haadzííʼ yę́ę bikʼehgóó áníshtʼée doo nisin.” (Isa. 6:8) Kin ádaalneʼgóó atah nijishnish, áádóó tʼáá hó hazaad bee translate áńdaalneʼgóó áká ajoolwod. Éí ájíní: “Shinaanish hazhóʼó áshʼı̨́į doogo éí bínashidiʼneestą́ą́ʼ.” Ndi éí naʼanishgi doo tʼóó bee nahodiʼneestą́ąʼ da, éí ląʼígóó ałdóʼ íhojiiłʼą́ą́ʼ. Ájíní: “Shá nidantłʼaii índa Jiihóvah bá naalʼaʼí ídlı̨́įgi yáʼátʼéehgo bee áníshtʼéii dooleełii ałdóʼ bóhoołʼą́ą́ʼ.” (John 6:45 yíníłtaʼ.) Haaʼíshąʼ Jiihóvah ląʼígóó nináánihidínóotı̨́ı̨́ł biniyé neʼiinaʼ siláagi bee baa tsídíkees.

11. Sister South Koreadi nidahalneʼgi haitʼéego ádaʼiilyaa, áádóó éí haitʼéego bíká aalwod? (Naaltsoos bikááʼdę́ʼígíí níníłʼı̨́.)

¹¹ Azhą́ tʼáá ałkʼidą́ą́ʼ Jiihóvah yá ndaalʼaʼí danilı̨́į ndi, łah átʼééjí bee ninááhaneʼ dooleełígíí yináádahoołʼaah. COVID-19 naałniihgo South Koreadi elders kódaaníigo ádaʼiilaa. “Łaʼ nidahalneʼé bitsʼíís bąąh nidahazʼą́ągo biniinaa doo ayóó atah nidahalneʼ ńtʼééʼ, ndi kʼad éí videoconferencing beego tʼáá ahąąh nidahalneʼ daazlı̨́ı̨́ʼ. Sisters táltʼéego 80dóó biʼáán béédááhai, éí computer chooʼı̨́įgi yídahoołʼaahgo kʼasdą́ą́ʼ tʼáá ákwíí jı̨́ diné yił nidahalneʼgo yaa naakai.” (Ps. 92:14, 15) Tʼáá ląʼígóó ninááhashneʼ doo áádóó Jiihóvah yáʼátʼéehii nilı̨́įgi díílnihísh  nínízin? Kódaatʼéégóó łaʼ áʼdoolníiłgi baa nídadíitʼįįł.

12. Jiihóvah badaʼólíhígíí haʼátʼíí yiłní?

¹² Jiihóvah baʼíínílí. Éí baʼííníidlíigo yéigo bá íitʼı̨́įgo ayóó átʼéego bee akʼihojidlíii nihikʼi yeideeshnił nihiłní. (Mal. 3:10) Colombiadę́ę nihisister Fabiola wolyéego Jiihóvah kótʼéego hakʼihasdliʼ. Éí baptize áhoʼdilyaadóó bikʼijįʼ tʼáá íídą́ą́ʼ pioneer áʼjiłʼı̨́įgo baa nízhdiidzá. Ndi, hahastiin dóó haʼáłchíní táltʼéego bikʼijooldził. Áko retire ázhʼdoolíiłgi há bohónéedzą́ silı̨́įʼgo Jiihóvah shíká anílyeed bijiníigo bichʼįʼ sozdoolzin. Ájíní: “Retirement biniyé hazhdiléehgo ayóó doo hąh da łeh, ndi haʼdiishłaadóó bikʼijįʼ tʼááłáʼí nídeezidgo shá bee lą́ azlı̨́ı̨́ʼ. Díí doo yinishdlą́ą da!” Áádóó naaki nídeezidgo pioneer jizlı̨́ı̨́ʼ. Kʼad éí 70dóó biʼáán honááhai, pioneer áʼjiłʼı̨́įgo 20dóó biʼáán nááhai. Áko 8go diné bíká ajoolwodgo baptize ádaalyaa. Ájíní: “Azhą́ łahda doo shidziil da ndi, Jiihóvah shíká análwoʼgo tʼáá pioneer áʼáshʼı̨́įgo hoolzhiizh.”

13-14. Jiihóvah baʼííníidlíigo bichʼįʼ díníitʼı̨́įʼgo háí bitsʼą́ą́dóó ídahwiidiilʼááł?

¹³ Jiihóvah badaʼólíí ńtʼééʼ yę́ę bitsʼą́ą́dóó íhoołʼaah. Yéigo Jiihóvah bá nidaashnish yę́ę Diyin Bizaad biiʼ baa dahaneʼ. Éí dajiląʼígo Jiihóvah badaʼjólíigo tʼáadoo leʼé áłtsé bá ádaʼjiilaago índa bikʼijįʼ Jiihóvah hakʼihasdliʼ. Éíbraham éí haghan bitsʼą́ąjįʼ “jideeyáágóó  doo hoł bééhózingóó dashdiiná,” éí kójiidzaago índa Jiihóvah hakʼihasdliʼ. (Heb. 11:8) Jéíkab éí diyingo naalʼaʼí bił ahijoogą́ąʼgo índa hakʼihasdliʼ. (Gen. 32:24-30) Ízrel dineʼé éí kéyah hóóʼ dooleeł haʼnínę́ę kʼadę́ę biiʼ jíkáahgo éí Jórdan tooh nilínígíí náádaʼiiłniihii yiih dadoolʼeezgo índa diné éí haʼnaa niikai.—Josh. 3:14-16.

¹⁴ Dííshjı̨́įdi Jiihóvah Yá Dahalneʼé Jiihóvah yadaʼólíigo yichʼįʼ dadéezʼı̨́ı̨́ʼígíí éí ałdóʼ bitsʼą́ą́dóó íhooʼaah. Brother Payton dóó beʼasdzą́ą́ Diana éí brothers dóó sisters Jiihóvah bá naʼaʼaʼgi yéigo yá ádaatʼįįdígíí “They Offered Themselves Willingly,” * series bee ályaago biiʼ baa dahaneʼígíí baa ajółtaʼgo ayóó bízhneedlı̨́. Payton ájíní: “Éí ádaa dahalneʼgo ádayiilaaígíí yíníiltaʼgo éí łaʼda bił ayóó áhálniihgo ayą́ągo jinéłʼı̨́ nahalin. Ląʼí nihinááł naalkidgo éí ‘Jiihóvah yáʼátʼéehii nilı̨́įgi,’ díílnih niidzin.” Ńtʼééʼ Payton dóó Diana éí nahalneʼé bídin hóyéeʼgi nizhníná. Díí series ádaalyaaígíísh yíníłtaʼ? Ndaalkidgo ádaalyaaígíí Witnessing in Isolated Territory—Australia dóó Witnessing in Isolated Territory—Ireland éí jw.org biiʼ dahólónígíísh ninááł naaskid? Díí éí Jiihóvah bá naʼaʼaʼgi yéigo níká adoolwoł.

15. Yáʼádaatʼéehii bił ahéézhdiikahgo haitʼéego áká adoolwoł?

¹⁵ Jiihóvah yéigo yá ádaatʼínígíí bił ahéédiikah. Chʼiyáán łaʼ tʼah doo yiilnihígíí éí bił daalkanígíí bił dajiyą́ągo ayóó alkaan łeh. Tʼáá ákótʼé, Jiihóvah yéigo yá ádaatʼínígíí bił ahéézhdiikahgo éí nihí ałdóʼ tʼáá ákóniitʼée doo. Kent dóó Veronica ákódzaa. Kent ání: “Nihikʼis éí nahaneʼgi łah átʼéhígíí nabínóhtaah danihiłní. Diyin biNahatʼaʼ áłtsé hádaatʼíinii bił ahínéiikahgo éí nahaneʼgi łah ádaatʼéégóó nabíniitaahgo íilyaa.” Kent dóó Veronica éí Serbiadi kʼad special pioneer jílı̨́.

16. Jesus éí Luke 12:16-21 góneʼ chʼíiníʼánę́ę haʼátʼíí biniyé tʼáadoo leʼé nináhiditʼaah doo?

¹⁶ Jiihóvah bá tʼáadoo leʼé nináhidiʼaah. Jiihóvah bił honiilzhǫ́ǫ doogo éí tʼáá ałtsoní bíniidlíinii éí doo nináhidiitʼaah da. (Eccl. 5:19, 20) Ndi, Jiihóvah doo bá ląʼígóó áshtʼı̨́į da doo niidzingo áádóó bíniidlíinii doo nahjįʼ nidideeshʼáał da niidzingo Diyin tʼóó nahjįʼ kwííníilzin doo. Éí Jesus hastiin léiʼ yaa chʼíhoníʼánę́ęgi ániitʼée doo. Díí hastiin éí tsʼídá yáʼátʼéehgo beʼiiná áyiilaago Diyin éí tʼóó yaa yooznah. (Luke 12:16-21 yíníłtaʼ.) Brother Christian wolyéego Francedi bighan, éí ání: “Jiihóvah dóó shighan hazʼą́ągi doo ayóó bíká anáshwoʼ da.” Hachʼooní bił pioneer áʼíilʼı̨́į doo jiniizı̨́ı̨́ʼ. Ndi éí honaanish bitsʼazhniʼáazhgo tʼéiyá há ákódoonííł. Akʼi nijildzil doogo éí nidaʼiiniihgóó bá hashtʼe hojíłʼı̨́įgo honaanish dooleełgo łaʼ hajííłtʼiʼ. Áádóó éí tʼóó bikiinígo hweʼiinaʼ ájiilaago baa hoł hózhǫ́. Tʼáásh ákónéehee tʼáadoo leʼé nináhizhdeezʼą́? Christian ájíní: “Nahwiilneʼgo ayóó bíniidlı̨́ áádóó Diyin Bizaad yídahoołʼaahii dóó return visits éí Jiihóvah yéédahoosįįhgo jinéłʼı̨́įgo ayóó baa hózhǫ́.”

17. Nahaneʼgi łah átʼéhígíí bídíníitahgi haʼátʼíí biniinaa nantłʼa łeh?

¹⁷ Nahaneʼgi ałʼąą ádaatʼéégóó nabíní taah. (Acts 17:​16, 17; 20:​20, 21) Shirley United Statesgi pioneer jílı̨́, éí COVID-19 naałniihgo nahojilneʼgi łah ájiilaa. Béésh bee haneʼé chooʼı̨́įgo diné bił nahaneʼgi bikʼee hoł yééʼ. Circuit overseer congregation yaa níyáago yee naʼneeztą́ąʼgo béésh bee haneʼé chojoołʼı̨́įgo baa nízhdiidzá. Éí ání: “Áłtsé éí binásdzid, ndi kʼad éí ayóó bíneeshdlı̨́. Dahooghangóó tádiikáahgo nidahwiilneʼjí bilááh átʼéego diné tʼóó ahayóí bił nidahwiilneʼ.”

18. Achʼįʼ hodiiʼnáahgo haʼátʼíí áká adoolwoł?

¹⁸ Nahóʼá áádóó beʼíłʼı̨́. Nihichʼįʼ hodiiʼnáahgo sodiilzįįh áádóó haitʼéego áʼdoolníiłgi hazhóʼó baa nitsídíikos. (Prov. 3:21) Sonia, Romany-language group Europedi regular pioneer jílı̨́. Éí ájíní: “Shí éí binahashʼáii naaltsoos bikááʼ ánéishʼįįh áádóó tʼáá bééhózinígi ninástoos. Atiin bee ałtsʼádaʼastiingo ééʼ biih náʼniłí bikáaʼgi naashchʼąąʼgo áshłaa. Ádá hodishʼáahgo éí díí néshʼı̨́įgo díí daatsʼí shá bohodoolnííł nisin łeh.” Sonia éí bichʼįʼ hodiiʼnáah ndi, hazhóʼó yaa nitsékos. Ájíní: “Tʼáá achʼįʼ anáhóótʼiʼ haleehí hazhóʼó néshʼı̨́. Éí wall daatsʼí shichʼą́ą́h nikidiiʼá doodaiiʼ bridge shá haʼnaa naniʼáago shá íidoolííł.”

19. Jiihóvah yáʼádaatʼéehii nihá átʼı̨́įgi haitʼéego baa ahééh niidzin doo?

¹⁹ Jiihóvah éí ląʼígóó nihikʼijidlí. Díí tʼáá átʼé baa ahééh niidzingo éí wołí bee baa hwiiʼniih doo. (Heb. 13:15) Ląʼí ałʼąą ádaatʼéégóó nahaneʼgi nabíniitʼaah doo, áko ląʼígóó Jiihóvah nihikʼijidlíi doo. Tʼáá ákwíí jı̨́, ‘Jiihóvah éí yáʼátʼéehii nilı̨́įgi nideiilnihgo nihił béédahodoozįįł.’ Áádóó Jesus ádííniid yę́ęgi ádadiiʼníi doo: “Shiníłʼaʼii yee íinízinii binaashnishgo łaʼyishłéhígíí, éí shichʼiyąʼ átʼé.”—John 4:34.