Jesus tʼah doo daatsaahgóó Psalm 22:1gi David yee haadzííʼ yę́ęgi haʼátʼíí biniyé bee hajoodzííʼ?

Jesus tʼah doo daatsaahgóó saad tsʼídá ákéeʼdi yee haadzíiʼii éí Matthew 27:46 góneʼ bikáʼígíí, éí ání: “ShiDiyin God, shiDiyin God, haʼátʼéegoshąʼ yóóʼashidííníʼą́?” Jesus kózhdííniidgo Psalm 22:1gi David saad yee haadzííʼ yę́ęgi bohojiilaa. (Mark 15:34) Jesus kótʼéego haadzíiʼgo éí Jiihóvah doo yaa bił hózhǫ́ǫ da doodaiiʼ yoodlą́ągi doo bidziil da silı̨́ı̨́ʼ, doo hwiindzin da. Jesus éí biniyéii dazhdootsaałgo hoł bééhózin, áko sheʼiinaʼ ninádideeshʼááł jiniizı̨́ı̨́ʼ. (Matt. 16:21; 20:28) Áádóó hoʼdiniilyı̨́įjįʼ ahoolzhiizhgo éí ‘bineʼ nijidziʼ dooleełii’ Jiihóvah doo há niiníláa da. (Job 1:10) Áko Jiihóvah éí tʼóó kóníshgháníjįʼ Jesus yitsʼą́ąjįʼ kódzaa. Éí azhą́ Jesus yéigo hachʼįʼ nahwiiʼnáago dazhdootsaałgo átʼée ndi, Hazhéʼé doo bitsʼą́ąjįʼ kózhdooníiłgi bee ííshjání ázhdoolííł biniyé.—Mark 14:35, 36.

Jesus éí haʼátʼíí biniyé kótʼéego psalm biiʼdóó yee haadzííʼ? Azhą́ díí doo ayóó nihił bééhózin da ndi, biniinaanii łaʼ baa nídadíitʼįįł. *

Jesus kótʼéego haadzíiʼgo éí dazhdootsaałgi éísh Jiihóvah doo hachʼą́ą́h nidoogáał da jiníigo ájíní? Jesus éí ákʼé ninázhdoodléełgi Jiihóvah tʼáadoo háká análwoʼígo tʼáá sáhí ázhdoolííł. Háálá ‘diné tʼáá ałtso bá dazhdootsaał.’—Heb. 2:9.

 Jesus éí psalm biiʼdóó tʼáá díkwíhígo yee haadzíiʼgo, éísh psalm tʼáá siʼą́ą́ ńtʼééʼ baa nitsáhákees doo nízingo átʼı̨́? Íídą́ą́ʼ nahalzhiish yę́ędą́ą́ʼ Jew dineʼé éí psalm bééhániih dooleełgi ayóó béédahojísin. Áko psalm biiʼdóó tʼááłáʼígo bééhodiʼyoolnihgo éí psalm tʼáá síʼą́ą́ ńtʼééʼ baa tsíhodookos. Áko Jesus kótʼéego nitsékeesgo éí dazhdootsaałígi átʼéego psalm biiʼ prophecies ádaalyaa yę́ę Jew dineʼé éí béédajilniih dooleełgo yee háká aalwod doo ńtʼééʼ. (Ps. 22:7, 8, 15, 16, 18, 24) Áádóó ałdóʼ, psalm bee nihoolzhíishjįʼ éí nahasdzáán nidahoneesʼą́ąjįʼ Jiihóvah éí dineʼé yinantʼáa doo níigo yaa halneʼ.—Ps. 22:27-31.

Jesus éí kótʼéego David bizaad yee haadzíiʼgo éísh tʼáadoo bąąhági ádzaa daaígi ííshjání áyiilaa? Tʼah doo hoʼdílyéhą́ądą́ą́ʼ Jesus éí Sanhedrin ahíikaigo tʼáá ádzaagóó Jesus yikʼídahazʼahgo yá nidahazʼą́. (Matt. 26:65, 66) Sanhedrin éí tłʼéeʼgo tʼóó tsı̨́įłgo áłah silı̨́įʼgo bee hazʼáanii doo yikʼehgóó ádaʼiilaa da. (Matt. 26:59; Mark 14:56-59) Áko Jesus éí Psalm 22:1 yee haadzíiʼgo éí shı̨́ı̨́ kóníigo ání: “ShiDiyin God, shiDiyin God, tʼáadoo ásdzaaí da, áko haʼátʼíí biniyé yóóʼashidííníʼą́?” Shí tʼáadoo ásdzaaí dago, áko haʼátʼíí biniyé shidiʼniilyı̨́, níigo shı̨́ı̨́ ání.

Jesus éí psalm bee hajoodzíiʼgo, éísh Jiihóvah tʼáadoo yóóʼahodííʼą́ą da níigo ání? David éí bíniʼdii hachʼįʼ nahwiidiyooʼnaał hodóʼní, ndi Jiihóvah tʼáá haa bił hózhǫ́. David naʼídééłkidgi éí beʼoodląʼ doo bidziil da silı̨́ı̨́ʼ, doo níi da. Éí naʼídééłkidóó bikʼijįʼ Jiihóvah éí yisdáʼiiníiłgi yinishdlą́ jiní, áádóó Jiihóvah hakʼihadlíigo jiníyá. (Ps. 22:23, 24, 27) “David biYeʼ nilíinii” Jesus éí tsin bąąhjįʼ hachʼįʼ nahwiiʼnáa ndi, Jiihóvah éí hąąh bił hózhǫ́.—Matt. 21:9.

Jesus éí Jiihóvah doo hachʼą́ą́h naagháa dago binahjįʼ, éísh wołí bee Jiihóvah bikééʼ jizı̨́įgo bee ííshjání ájiilaa? Jiihóvah éí Jesus bichʼįʼ nahwiidiyooʼnaałgo dadootsaał doo yiniyé áyiilaa da. Ndi Ádam dóó Íiv doo akʼeh hóółʼįįdóó bikʼijįʼ ákózhdooníiłgo ádzaa. Jesus éí bąąhági átʼéii tʼáadoo ádzaa da. Ndi Séítan kótʼé níigo yaa saad hasłı̨́ı̨́ʼ yę́ę ííshjání ádoolnííł índa Ádam iiná yóóʼayííłdéél yę́ę éí Jesus beʼiiná yee yikʼé nináʼdoodlééł biniyé bichʼįʼ nahwiisʼnáaʼgo daaztsą́. (Mark 8:31; 1 Pet. 2:21-24) Díí tsʼídá índída tʼóó kóníshgháníjįʼ Jiihóvah éí Jesus tʼáadoo yichʼą́ą́h niníyáa da.

Jesus tsin bąąhjįʼ dajiztsą́ągo Jiihóvah tʼóó há yee hoołʼaʼgi, éísh Jesus bikééʼ ndaakaii yę́ę baa nitsídajíkees doogo yee háká aalwod? * Jesus bił bééhózingo éí bąąhági áátʼįįdii nilı̨́ hodiʼníigo tsin bąąhjįʼ hoʼdiisyı̨́įgo éí diné ląʼí bidínóołtłʼah. (1 Cor. 1:23) Bikééʼ ndaakaii yę́ę éí biniyé dajiztsą́ągi baa nitsídajíkeesgo éí Yisdáʼiiníiłii, ndi diné ádąąh dah dahoolʼaʼii doo jílı̨́į dago bee dazhnéłʼı̨́į doo.—Gal. 3:13, 14.

Tsʼídá haʼátʼíí shı̨́ı̨́ biniyé Jesus éí díí saad yee haadzíiʼ ndi, hoł bééhózingo éí tsin bąąhjįʼ dajiztsą́ągi éí Jiihóvah íinízinii beʼjiilaa. Díí saad bee hajoodzííʼdóó bikʼijįʼ ázhdííniid: “Kʼad lá ałtso bíighah azlı̨́įʼ ni.” (John 19:30; Luke 22:37) Aooʼ tʼáá aaníí, Jiihóvah éí áłtsé tʼóó kóníshgháníjįʼ hatsʼą́ąjįʼ kódzaago tʼáadoo háká aalwod da. Jiihóvah ákótʼéego áʼiilaago éí binahjįʼ Jesus nahasdzáán bikáaʼjįʼ biniyé abiʼdoolʼaʼígíí ałtso yeʼiilaa. Áádóó “éí bee hazʼáanii Mózes baa deetʼáanii áádóó Diyin God yá dahalneʼii índa sin biyiʼ” Jesus baa haneʼgo bee akʼedaʼashchíinii bidahodoolnííł biniyé bee ííshjání ályaa.—Luke 24:44.