Diyin God Bizaad áníigo éí hastóí daʼoodlánígíí naaki ałʼąą átʼéego áłah nídeidleehgóó aa ádahalyą́​—“daʼoodlání yá naazíinii” áádóó łaʼígíí éí “daʼoodlání yaa ádahalyáanii” ndaalʼaʼí ádabiʼdiilyaaígíí dabidiiʼní. (Philippians 1:1) Áłah nídaʼadleehgóó díí hastóí díkóltʼéegoda aa ádahalyą́ągo dahólǫ́. Áko díí ndaalʼaʼí ádabiʼdiilyaaígíí haʼátʼíí naanishígíí ádeełʼı̨́įgo yee nihíká anídaalwoʼ?

Éí hastóí daʼoodlání yá naazínígíí yíká anídaajah. Díí ndaalʼaʼí ádabiʼdiilyaaígíí éí níłchʼi diyinii yikʼeh ádaatʼé, baa daʼáhódlı̨́, dóó hazhóʼó ntsáháskéezgo ádaʼałʼı̨́. Łaʼ tsíłkéí danilı̨́, áádóó łaʼ éí náásdaazlı̨́ı̨́ʼ. Áłah nídaʼadleehgi hazhóʼó yilwoł dooígi dóó yílá bee niʼdoonishígi ałdóʼ yee áká inídaajah. Áko hastóí daʼoodlání yá naazínígíí hazhóʼó ndaʼnitin dóó Diyin God bidibé baa áháyánígi íiyisíí bindaanish doo.

Éí áłah náʼádleehgi naanish yee áká inídaajah. Łaʼ naalʼaʼí ádabiʼdiilyaaígíí baa ádahwiinítʼı̨́įgo Kingdom Hallgi nídaakahígíí yíká anídaalwoʼgo binaanish ádaalneʼ. Łaʼ éí áłah náʼádleehgi biiʼ yátiʼgo chooʼínígi yaa ádahalyą́, dóó Diyin God Bizaad bikʼehgo naaltsoos ádaalyaaígíí nideeniih. Béeso nanideehgi yaa ádahalyą́, dóó Jiihóvah Yá Dahalneʼé nidahodoolnihgi yichʼįʼ chʼíyiizóóh. Kingdom Hallgi ałdóʼ tʼáadoo leʼé yichxǫhgo hashtʼénídeedleʼ. Áádóó sáanii dóó hastóí náás daazlı̨́ı̨́ʼígíí bíká anídaałwoʼ dabidiʼníigo hastóí oodlání yá naazíinii łahda bichʼįʼ dabiłʼaah. Díí naanish bichʼįʼ dabiʼdilʼáhígíí doo bídabiʼdinilchéehgo ádeiłʼı̨́į da. Áko yił áłah nídaadleehígíí hoł danilı̨́įgo haa ntsídaakees.​—1 Timothy 3:13.

Díí ndaalʼaʼí ádabiʼdiilyaaígíí yáʼátʼéehgo nihá naazı̨́. Éí oodlání kʼehgo ádaatʼéhígíí binahjįʼ nídabiʼdiisdlááʼ. Áłah nídeidleehgi nidaʼnitingo binahjįʼ niheʼoodląʼ bidziilgo ádeileʼ. Diyin God baa nahaneʼ biʼoonishígíí alą́ąjįʼ naazı̨́įgo bóhoneidlı̨́įgo nihá ádayósin. Díí hastóí daʼoodlání yá naazínígíí hazhóʼó yił ndaalnishígíí binahjįʼ ił hózhǫ́ dóó łááʼ ídlı̨́įgo áyósin. (Ephesians 4:16) Áádóó bá bikʼíhoolzhiizhgo oodlání yá naazíinii dooleełgo da átʼé.

• Ndaalʼaʼí ádabiʼdiilyaaígíí haitʼéego ntsídaakees dóó ádaatʼįįł?

• Haash yitʼéego díí ndaalʼaʼí áłah náʼádleehgi áká anídaajahgo nizhónígo yilwoł?