Jesus daaztsą́ą́dóó bikʼijįʼ, hastóí “daalʼaadii áádóó daʼoodlání yá alą́ąjįʼ naazíinii Jerúsalemdi,” áłchʼı̨́ı̨́dígo dah yikahgo alą́ąjįʼ daʼéeʼéésh. Díí hastóí éí tʼáá ałtso God yikʼidadiilniiʼgo yáʼąąshgóó bá chodahooʼı̨́įgo yah anájahígíí yá hashtʼeʼ nidahwiiʼaah ńtʼééʼ. (Acts 15:2) Diyin God Bizaad ánínígíí yaa nínádaatʼįįhgo dóó God biníłchʼi diyinii yikʼeh ádaatʼı̨́įgo binahjįʼ aheełtʼéego hashtʼeʼ nidahwiiʼaah ńtʼééʼ. (Acts 15:25) Dííshjı̨́įdi tʼáá ákótʼéego ádaʼoolííł.

God choboołʼı̨́įgo íinízinii yikʼehgo ádaʼoolííł. Hastóí bikʼidahodiiniiʼgo yáʼąąshgóó bá chodahooʼı̨́įgo Alą́ąjįʼ Daʼéeʼéshígíí éí yéigo Diyin God Bizaad bił danilı̨́įgo yaa ntsídaakees. Éí iináagi dóó diyin kʼehgo éʼélʼı̨́įgi yee dadíítsʼiin. Tʼáá damóo náʼoodleeł bikʼeh dabikʼisóó yídį danilínígíí yaa nínádaatʼįįh biniyé ahínéiikah. Tʼáá níléídę́ę́ʼ éʼélʼínę́ęgi átʼéego Diyin God Bizaad binahjįʼ kótʼéego áʼdoolnííł daaníigo naaltsoos yee ádaʼaleʼ, doodaiiʼ hastóí atah nídadikahgo akʼidadéezʼı̨́ı̨́ʼígíí dóó náádaa łahdę́ę́ʼ chodaoʼı̨́. Áko díí God bidineʼé nitsídajikeesgi dóó ádajooníiłgi bee łááʼ ádlı̨́įgo áyósin. (Acts 16:4, 5) Hastóí Alą́ąjįʼ Daʼéeʼéshígíí éí diyin kʼehgo anáʼáltsoʼ hashtʼeilʼínígi yikʼidadéezʼı̨́ı̨́ʼ. Áádóó God biNahatʼaʼ baa nahaneʼ biʼoonishígíí alą́ąjįʼ ádayósin, dóó hastóí naanish baa dahodidootʼáałgo bikʼidahodidoonihígi yikʼidadéezʼı̨́ı̨́ʼ.

God biníłchʼi diyinii ánínígíí yikʼeh ádaatʼı̨́. Hastóí Alą́ąjįʼ Daʼéeʼéshígíí éí Jiihóvah Tʼááʼałtsoní Yinantʼaʼí nilíinii dóó Jesus áłah nídaadleehígíí Yitsiitsʼiin nilíinii yichʼįʼ dadéezʼı̨́ı̨́ʼ. (1 Corinthians 11:3; Ephesians 5:23) Díí hastóí dah yikahígíí bił dahózhǫ́ǫgo daʼéeʼéésh, ndi God bidineʼé doo yinantʼaʼí ádaʼdilʼı̨́į da. Áko bí dóó tʼááʼałtso bikʼidahodiiniiʼgo yáʼąąshgóó bá chodahooʼínígíí yił, “[Jesus] Dibé Yázhí nilíinii tʼáá naagháágóó yikééʼ ndaakai.” (Revelation 14:4) Hastóí Alą́ąjįʼ Daʼéeʼéshígíí éí bá sodadiilzingo yaa ahééh danízin.

• Jesus daaztsą́ą́dóó bikʼijįʼ háísh éí hastóí alą́ąjįʼ daʼéeʼéshígíí atah dah naháaztą́ą́ ńtʼééʼ?

• Dííshjı̨́įdi Hastóí Alą́ąjįʼ Daʼéeʼéshígíí haitʼéegoshąʼ God yikʼeh ádaʼdoolíiłgi hádaatʼı̨́?