Jesus dadootsaał bichʼįʼ hoolzhishgo, dı̨́ı̨́ʼ yiltʼéego bídahoołʼaahii yę́ę tʼáá sahdii yił nahasneʼ​—Peter, James, John, dóó Andrew. Éí haʼátʼíí nihoolzhíishdi bee bééhózin dooígíí yee yił halneʼgo nahodííłkid: “Ákoshąʼ háí baʼahódlíigo índa hóyą́ągo naalʼaʼí nilı̨́, éí binantʼaʼí bighan hazʼą́ągi nidaakaígíí tʼáá ałtso tʼáá áajįʼ anáhwiilzhíishgo yanáʼáłtsoʼ doo biniyé nibiníłtı̨́?” (Matthew 24:3, 45; Mark 13:3, 4) Jesus “hanantʼaʼí” jílı̨́įgo bídahoołʼaahii yę́ę tʼááʼaaníí ííłníigo “naalʼaʼí” łaʼ bikʼidideeshnih, éí nihoogháahdi Jesus bikééʼ deiyíkááh dadooleełígíí tʼáá ahą́ą́h diyin kʼehgo yanídaʼałtsoʼ doo. Díí “naalʼaʼí” éí doo tʼáá łashdiltʼée da ndi díkójíltʼéego áhyiłní. Áko díí “naalʼaʼí” haʼátʼíísh bee béédahodiilzįįł?

Díí “naalʼaʼí” éí áłchʼı̨́dígo dah yikahgo bikʼidahodiiniiʼ, éí Jesus yikééʼ deiyíkááhígíí ádaatʼı̨́. Díí “naalʼaʼí” éí Jiihóvah Yá Dahalneʼé biHastóí Alą́ąjįʼ Daʼéeʼéshígíí átʼı̨́įgo bee bééhoʼdílzin. Éí Jiihóvah yił dayoodlánígíí tʼáá áajįʼ anáhwiilzhíishgo diyin kʼehgo yanídaʼałtsoʼ. Díí baʼahódlíigo naalʼaʼí badaʼííníidlı̨́įgo tʼáá ákoh ánéelą́ąʼgo ‘tʼáá áajįʼ anáhwiilzhíishgo nihanídaʼałtsoʼ doo’.​—Luke 12:42.

Hananitʼaʼí bee bóhólnííhígíí hazhóʼó yiyoołwoł. (Luke 12:44) Jesus éí naalʼaʼí naanish ndaazgo yee diníʼą́, éí nahasdzáán bikáaʼgi Jiihóvah łáʼí ídlı̨́įgo bił hazʼą́ągo biʼoonishígíí yiyoołwoł. Éí naalyeʼ dóó nahaneʼ bídadéétʼiʼígíí yikʼidéezʼı̨́ı̨́ʼ, áádóó áłah nídeidleehgi nanihinitin. Áko bídin daniidlínígíí tʼáá íídą́ą́ʼ ákǫ́ǫ́ nihá yisłá. “Baʼahódlíigo índa hóyą́ągo naalʼaʼí” diyin kʼehgo íhooʼaahgo naaltsoos chodeiniilʼı̨́įgo bee nidahwiilneʼígíí, dóó tʼááʼałtso áłah nídeidleehgóó diyin kʼehgo baa yánídaatihígíí nihichʼįʼ kwííłʼı̨́.

Naalʼaʼí tʼááʼaaníigo Diyin God Bizaad baa haneʼígíí yaʼólí, áko baʼahódlíigo haneʼ yáʼátʼéehii baa nahaneʼígíí íidoolííł. Áádóó ałdóʼ hóyą́ągo nahasdzáán bikáaʼgi tʼááʼałtsoní Christ bídadéétʼiʼígíí hóyą́ągo yaa áhályą́. (Acts 10:42) Áko díí baʼahódlíigo dóó hóyą́ągo naalʼaʼí binaanishígíí Jiihóvah yikʼihadlí, éí ndahalneʼii kʼeeʼąą yilzhish dóó diyin kʼehgo íhooʼaah ląʼígo nihá yisłá.​—Isaiah 60:22; 65:13.

• Háísh éí Jesus yikʼidiilniiʼgo bídahoolʼaahii diyin kʼehgo yanáʼáłtsoʼ?

• Naalʼaʼí haitʼéegoshąʼ baʼahódlí dóó hóyą́?