Ízrelgi 10 tribesígíí binaatʼáanii doo yáʼádaashǫ́ǫ da ńtʼééʼ. Éíhab wolyéhígíí aláahdi doo yáʼátʼéeh da. Asdzání Jézebel wolyéii, doo yáʼáshóonii hweʼasdzą́ą́ ájiilaa. Díí asdzą́ą́ Béíyal yichʼįʼ nahałá. Honiinaa diné Béíyal yichʼįʼ nahadlá daazlı̨́ı̨́ʼ. Jiihóvah yá dahalneʼii ałdóʼ nijistseed. Jiihóvah haidzaa? Halneʼii Iiláíjah choyoosʼįįdgo Éíhab yichʼįʼ haneʼ áyiilaa.

Iiláíjah éí Naatʼáanii Éíhab ííłní, Doo yáʼátʼééh ánítʼı̨́ı̨́góó biniinaa, Ízrelgi doo nahałtin da doo. Chʼiyáán adaadingo tááʼdóó baʼaan nááhai. Tʼahádóó Jiihóvah éí Iiláíjah Éíhab bichʼįʼ anáájiiłʼaʼ. Ńtʼééʼ naatʼáanii áháłní: ‘Ni niniinaa dah honoochał!’ Iiláíjah ání: ‘Doo shí shiniinaa da. Béíyal bichʼįʼ nahółáhígíí biniinaa doo nahałtin da. Tʼáá aaníigo Diyin nilínígíí bééhodoozįįł. Dził Kármel bikáaʼgi Ízrel dóó Béíyal yá dahalneʼii áłah ánílééh.’

Dziłghą́ąʼdi diné áłah silı̨́įʼgo Iiláíjah ábiłní: ‘Jiihóvah, tʼáá aaníí Diyin nilíinii doodaiiʼ Béíyal daatsʼí, háidii bikééʼ ninohkááh. Béíyal yá dahalneʼii 450 yiltʼéego nááhániih hashtʼedeidoolíiłgo bidiyin yíká ádaaníi doo. Shí éí Jiihóvah bichʼįʼ nááhániih hashtʼedeeshłííł áádóó bíká ádideeshniił. Nááhániih iidííłkʼą́ʼígíí éí tʼáá aaníí Diyin nilı̨́.’ Áko lą́ daʼazlı̨́ı̨́ʼ.

Béíyal yá dahalneʼii nááhániihii hashtʼedayiilaa. Abínídóó iʼííʼą́ąjįʼ, ‘Béíyal, nihichʼįʼ ééhonísįįh!’ daaníigo dadilwosh. Béíyal tʼáadoo hodiiztsʼą́ąʼ da, áko Iiláíjah yá nahałtʼiʼgo ání: ‘Yéego dadołwosh. Iiłhaazh daatsʼí, chʼéédanóhsííd.’ Kʼadę́ę eʼeʼaahgo, tʼahdii Béíyal bíká dazhdilwosh. Ndi tʼáadoo hachʼįʼ ééhoosįįd da.

Iiláíjah nááhizhdołnihígíí altar bikááʼ nizhnínil, áádóó tó bikʼi yajiiziid. Sozdilzingo ájíní: ‘Jiihóvah, tʼáá aaníí Diyin nilı̨́įgi diné bichʼįʼ adééhonilzįįh, tʼáá shǫǫdí.’ Tʼáadoo hodinaʼí, Jiihóvah nááhániih ałtso iidííłkʼą́ą́ʼ.  Dazhdilwoshgo ádajiní: ‘Jiihóvah tʼáá aaníí Diyin nilı̨́ı̨́ lá!’ Áádóó Iiláíjah áháłní: ‘Béíyal yá dahalneʼii yóóʼooljeeh lágo!’ Éí bijı̨́, 450 Béíyal yá dahalneʼii nideistseed.

Kʼos áłtsʼíísígo tónteel bikááʼ dah yistsʼid. Iiláíjah éí Éíhab ábijiní: ‘Aadę́ę́ʼ yéigo hoołtı̨́ı̨́ł. Chariot nighangóó nił náálwoł.’ Ńtʼééʼ kʼos bee chahałheeł hazlı̨́ı̨́ʼ, áádóó deeyolgo ayóó atʼéego ahoʼniiłtą́. Doo nahałtin yę́ę ííłtso. Éíhab wołí bee chariot hoł yilwoł. Jiihóvah éí Iiláíjah yíká eelwodgo, chariot yaa diilwod! Daʼ ákoósh Iiláíjah tʼahdii bichʼįʼ anáhóótʼiʼ? Ííshją́ą́ shı̨́ı̨́.