Kin biiʼ sohodizin bichʼéédą́ąʼgi hastiin doo naagháágóó tʼóó adókeedgo sidá. Peter dóó John kin biiʼ sohodizin góneʼ yiʼashgo jiiłtsą́, áko bíʼjííkeed. Peter áháłní: ‘Béeso biláahdi ílíinii naa deeshłééł. Jesus bízhiʼ binahjįʼ, nídiiʼnéehgo dah diinááh! Peter hálaʼ yótąʼgo nízhdiiʼnaʼ áádóó dashdiiyá! Áłah danilínę́ę ayóó átʼéego áhoodzaaígíí dayiiłtsą́ągo bił dahóózhǫǫd áádóó ląʼí daʼoosdląąd.

Náádaʼiiłniihii dóó Sádjusiiz bádahóóchįįd. Daalʼaadii dayiiłtsoodgo aa hwiinítʼı̨́ı̨́ góneʼ nidahódééłkid. Ádaaní: ‘Háísh adziil nihaidiníʼą́ągo díí diné náádzííʼ?ʼ Peter ájíní: ‘Jesus Christ adziil nihaidiníʼą́, éí dasoołhı̨́.ʼ Oodląʼ yá naazínígíí hachʼįʼ nidahidilgháashgo ádaaní: ‘Jesus tʼáadoo baa yádaałtiʼí.ʼ Ndi daalʼaadii ádaaní: ‘Jesus baa yádeiltiʼígíí doo neʼ ádadiilníił da, áko tʼáá baa yádeiltiʼ doo.ʼ

Peter dóó John hwééʼílniiʼgo, ídahoołʼaahii díí áhóótʼįįd yę́ę bee bił hojoolneʼ. Ahíjiikaigo Jiihóvah bichʼįʼ sodazdilzingo ádajiní: ‘Ná nideilnishígíí bichʼįʼ danihidziilgo ánihíínísin.ʼ Jiihóvah biníłchʼi diyinii hainíláago tʼáá náás dahojilneʼ dóó diné bąąh dah nahazʼánígíí hadaałtʼé áńdajidleʼ. Ląʼí diné daʼoosdląąd. Sádjusiiz éí hakʼee dadiniihgo awáalya góneʼ adahwiistłʼííd. Tłʼéeʼgo Jiihóvah bidiyingo naalʼaʼí hachʼįʼ ayííłʼaʼ, éí awáalya bidáádílkał ąą áyiilaago áháłní: ‘Kin biiʼ sohodizin siʼą́ądi nidaʼnohtin.ʼ

Biiskání abínígo, oodląʼ yá naazíinii Sanhedrin bee dabiʼdójíhígíí, bił dahóóneʼ. ‘Awáalya tʼahdii dádaʼdeeskaal, ákondi hastóí ákóneʼ naháaztánę́ę doo ákóneʼ da. Kin biiʼ sohodizindi nidaʼnitin.ʼ Áko daalʼaadii náádahoʼdiiltsood áádóó  Sanhedrin bidáahgi ninááh hoʼdeetʼeezh. Aláahgo nááʼiiłniihii áháłní: ‘Shą́ą́ʼ Jesus tʼáadoo baa yádaałtiʼí danihidiiʼniid neʼ.ʼ Peter hachʼįʼ hanáádzíiʼgo ání: “Diné biláahgo Diyin God tsʼídá bikʼeh dahoniilʼı̨́į dooleeł.”

Oodląʼ yá naazíinii bádahóóchįįdgo daalʼaadii nidadiiltsił daniizı̨́ı̨́ʼ. Ndi Férisii łaʼ Gaméíliyel wolyéego nídiiʼnaʼgo ání: ‘Ádaa ádahołyą́! Díí hastóí God bił hólǫ́ǫgoda átʼé. Daʼ ákoósh God bikʼijįʼ danidlı̨́į doo danohsin?ʼ Éí ánínígíí baa ákodazhniizı̨́ı̨́ʼ. Áko daalʼaadii nídeineesxaal áádóó tʼáadoo nidahołneʼé náádeidooʼniid. Áko daalʼaadii hwééʼílniiʼ, ndi nidahojilneʼ yę́ę doo neʼ kódajiilaa da. Doo bił daayééʼgóó kin biiʼ sohodizingi dóó hootahgóó haneʼ yáʼátʼéehii yaa nidahalneʼ.