Jiihóvah ání: ‘Cha, adiniih, ąąh dahazʼą́ dóó anoonééł ádin doo. Nákʼeeshtoʼ tʼáá ałtso nihá deeshtʼoł. Tʼáá ałtso doo yáʼádaatʼéehii baa dahoyoosʼnah doo.’

Ádam dóó Íiv hoł hodéesyéél dóó hoł hózhǫ́ǫgo kééhojitʼı̨́į doogo dáʼákʼeh Íídengi Jiihóvah nihonínil. Jiihóvah tʼéiyá jidósingo haʼáłchíní hooleeł doo hodóʼní. Jiihóvah doo bikʼeh hojííłʼįįd da, ndi Jiihóvah yee nihoníʼánę́ę doo łahgo ádzaa da. Jiihóvah yee hahaasdzíʼígíí tʼáá ałtso bidahoolyaago baa ídahwiilʼą́ą́ʼ. Éíbraham yá haadzííʼ yę́ęgi átʼéego, Jiihóvah biNahatʼaʼ binahjįʼ nahasdzáán bikáaʼgi nizhónígo hwiidooʼaał.

Tʼáadoo hodíínaʼí Séítan dóó níłchʼi bidaʼiiníziinii índa diné doo yáʼádaashóonii ałtso ádin doo. Jiihóvah tʼéiyá dólzin doo. Ąąh dahazʼą́ dóó anoonééł ádin doo. Tʼáá ákwíí jı̨́ doo nihąąh  tééhgóó nihił hózhǫ́ǫ doo. Nahasdzáán ayóó áhonóolnin doo. Chʼiyáán yáʼátʼéehii deidą́ą doo índa doo náhádzidgóó kééhwiitʼı̨́į doo. Ajoobaʼ hólǫ́ǫ doo, áháchįʼ índa atéʼélʼı̨́ ádin doo. Naaldlooshii yáʼátʼéehgo bił kééhwiitʼı̨́į doo.

Jiihóvah éí diné daneeznáádę́ę́ʼ néididoołjah, áko dooládóʼ baa hózhǫ́ǫ da doo. Ałkʼidą́ą́ʼ ádaadin yę́ę béédahodiilzįįł. Díí éí Éíbel, Nóah, Éíbraham, Sárah, Mózes, Ruth, Esther, dóó David. Éí bił nideilnishgo nahasdzáán nizhónígo áńdadiilnííł. Naanish bóhoneedlíinii tʼóó ahayói doo.

Jiihóvah éí áadi honílǫ́ǫ doo, nóʼní. Jiihóvah tʼáá bí nizhónígo bééhodíísįįł. Tʼáá ákwíí jı̨́ Jiihóvah áhánígo bił honiidlǫ́ǫ doo, éí ahóyéelʼáágóó ákótʼée doo!