NAHASDZÁÁN bikáaʼgi bílaʼashdlaʼii kʼeeʼąą nootʼı̨́įłgo, bąąhági ádaatʼéii dóó tsiʼ ooldahgo tʼáadoo hodíínaʼí kʼeeʼąą deeshzhiizh. Íínak tʼáá sáhí God yá halneʼii nilı̨́įgo; God éí náasdi doo yáʼádaashóonii ádeeshdįįł ní, jiníigo baa nahojisneʼ. Ákótʼée ndi, tʼóó tséʼádin tsiʼadeesdeeʼ. Níłchʼigo ndaalʼaʼí łaʼ, God yitsʼą́ą́jí daazlı̨́įʼgo yáʼąąshdi nidajilʼaʼ yę́ę doo deiniizı̨́ı̨́ʼgóó yitsʼą́ąjįʼ dah diikai. Áádóó nahasdzáán bikáaʼgi bílaʼashdlaʼii bitsʼíís kʼehgo ádazhʼdiilyaa. Éí tʼáá bizááká chʼikę́ę́h tʼáá bí deinízinígíí bedaʼasdzą́ągo ádayiilaa. Díí éí tsʼídá doo éʼélʼínę́ę ádajiidzaago bitsʼą́ą́dóó níłchʼi yádaashchíingo há ndahaazhchı̨́. Éí yéʼiitsoh ádéédahooldzíiʼgo Nephilim dabidiʼníigo éí atéʼélʼı̨́, dóó naʼatseed tʼóó tséʼádin ádayiilaa. Áko God nahasdzáán bikááʼ ádayiilaa yę́ę ałtso yíchxǫʼgo yiyiiłtsą́, éí bąą bijéí yiniiłgai.

Íínak daaztsą́ą́dóó bikʼijįʼ, doo yáʼáshǫ́ǫ́góó adeesdeeʼ, ndi diné léiʼ tʼáá bééhózínígo yáʼátʼéehgo yigááł. Díí éí Nóah wolyé. Éí baʼáłchíní yił God yikʼehgo yikah. God éí díí diné doo yáʼáshxǫ́ǫ́góó yikahígíí ádeeshdįįł niizı̨́ı̨́ʼ. Ákondi, God éí Nóah dóó naaldlooshii doo atídoolníił da niizı̨́ı̨́ʼ. Éí biniinaa tsinaaʼeeł ayóóʼíníłtsxogo, dikʼą́ągo nineezígíí ádíílííł bizhdííniid. Áko Tó biʼniiląądgo tsinaaʼeeł biyiʼ góneʼ, naʼáłchíní dóó naaldlooshii bił yisdádííkah. Nóah éí God bikʼeh hojííłʼįįd. Tsinaaʼeeł ájíléehgo “tʼáá ákogi éʼétʼé” baa nahojilneʼgo dízdiin doodaiiʼ ashdlaadiin daatsʼí nááhai. (2 Peter 2:5) Aadę́ę́ʼ tó dooląął chʼééh jiníigo diné doo dahwíistsʼą́ąʼ da. Naaldlooshii bił, tsinaaʼeeł biih jidookahjįʼ ahoolzhiizh. Biih jookaigo hakéédę́ę́ʼ God tsinaaʼeeł bidáádílkał déidiʼnítą́. Áádóó ahoʼniiłtą́.

Dízdiin jı̨́ dóó dízdiin tłééʼ tsʼídá yéigo nahóółtą́, áko nahasdzáán ałtso tó bił yiiyeʼ. Doo yáʼádaashóonii yę́ę ałtso ásdįįd. Díkwíí shı̨́ı̨́ nídeezidgo, tó yaa náʼnoolʼąąd áádóó tsinaaʼeeł yę́ę dził bikááʼ dah názʼéél. Tʼááłáʼí nááhaigo índa tsinaaʼeeł biiʼdę́ę́ʼ chʼééjíkai. Ahééh jiniizı̨́įʼgo Nóah éí Jiihóvah bichʼįʼ nááʼjiisʼniiʼ. Áko God éí áháłní, doo éí kótʼéego nahasdzáán bikáaʼgi naaldeehii tó bee ánáádeeshdįįł da. Áádóó bee bééhániih doo biniyé náátsʼíílid niiníłdéél.

Tó yíląąd bikéédóó, God éí łaʼ bee hazʼą́ąnii ániidígíí bílaʼashdlaʼii yaa náánéédlá. Naaldlooshii bitsįʼ nihichʼiyąʼ doo níigo há yee hoołʼaʼ. Ákótʼée ndi, bidił éí tsʼídá doo dadoohsı̨́įł da yidííniid. Áádóó ałdóʼ Nóah baʼáłchíní daʼahéelchíłígíí, nahasdzáán bikááʼ kʼeeʼąą dínóohtʼı̨́ı̨́ł yidííniid. Ákondi łaʼ éí doo yikʼeh dahóółʼįįd da. Éí diné ádíhólníihii léiʼ, Nímrad wolyéego yiyaa eekai. Áádóó éí Béíbel hoolyéegi kin wótʼááh yíʼáago ádayiilaa, éí tʼahádóó Bábilan wosyeʼ. God nahasdzáán bikááʼ kʼeeʼąą dínóohtʼı̨́ı̨́ł nínę́ę doo bikʼeh ádadiiʼníił da danízingo íiyisí yiniyé ádáátʼįįd. Ákótʼée ndi God éí díí nidajílteeʼígíí saad tʼááłáʼí bee yádajiłtiʼ yę́ę, doo ałkʼidazhʼdiitįįhgóó áhoolaa. Áádóó hazaad ałʼąą átʼéego áyiilaa. Doo ałkʼidazhʼdiitįįhgóó biniinaa bidajílníísh yę́ę tʼóó bitsʼá jíkaigo ałtsʼą́ąjįʼ dah dazhdiiná.

​—Genesis wóltaʼii 6dóó 11jįʼ; Jude wóltaʼii 14 dóó 15gi biiʼ baa haneʼ.