Zephaniah 3:1-20
3 Kin haalʼáagi tsʼídá tʼóó baaʼihii áádóó niʼiiłchǫǫhii índa ade áhósinii doo hojoobaʼ ájíníi da!
2 Doo łaʼ yikʼeh hółʼíní da; tsʼídá doo kʼéhézdon nináodzaʼ átʼée da; Bóhólníihii doo yaa dzólíi da; biDiyin God doo yitʼáahjįʼ dóyaʼ átʼée da.
3 Binanitʼaʼí danilíinii éí náshdóítsoh bitsiijįʼ daditłʼooígíí biiʼ nidahodiʼniʼii nidahalin; eʼeʼáahgo mąʼiitsoh nidaajeehígi átʼéego biʼádahwéeʼaahii nidaajeeh; éí abíníjįʼ tsʼin yídeigháashgo doo łaʼ ninádeítįįh da.
4 Áhodooníiłii yaa dahalneʼii tʼáá ádzaagóó dahalneʼ áádóó doo badaʼahódlíi da; bináádaʼiiłniihii éí hodiyingo hazʼáanii dayííłchxǫʼ; bee hazʼáanii nideigizgo chodayoosʼįįd.
5 Biníiʼgi Bóhólníihii tʼáá ákogi átʼéii hólǫ́; doo yáʼádaatʼéehii doo íidoolíił da. Tʼáá ákwíí abíní doo haada yitʼéii yee nihwiiʼaahii yitʼíní áyósin; tʼáadoo chʼééh ííłʼíní da, nidi doo tʼáá ákwii ájítʼéii éí yáhásin doo hoł bééhózin da.
6 Ałʼąą dineʼé yíghą́ą́ʼ, yadaʼniiltłʼónígíí tʼáá ádzaaí silı̨́ı̨́ʼ; bikintaa daʼaztiinígíí tʼáá ádzaaí áshłaago doo łaʼ ákǫ́ǫ́ naagháhí da; dabikin hadaasʼáii ałtso áséłdįįd; diné doo łaʼ ákwii naagháhí da; doo łaʼ ákwii kééhatʼíní da.
7 Áko ádíshní, Tʼáá aaníí, shidíínísin doo, naʼnitin nił nilı̨́į doo, áko tʼáá haʼátʼéegoda atíishłaago kéédahatʼı̨́įgi doo nahjįʼ kódeeshłíił da, nidi tʼáadoo hodinaahí nídahidiikaigo tʼáá bí yaa nidaakaii ałtso dayííłchǫʼ.
8 Bóhólníihii ání, Éí bąą naalzheehii bichʼįʼ nídiisdzá bijı̨́įjįʼ shibaʼ ánítʼé, háálá ałʼąą dineʼé áłah ádeeshłíiłgo nidiníʼą́, áko bee óhólníihgo bił nahazʼáanii áłah íishłaago tsʼídá tʼóó báhádzidgo sháháchįʼii bee bikʼi hwiideeshłeeł; tsʼídá doo chohooʼı̨́ı̨́góó sháhodoochįįł. Jó, bee łeʼnisinii bee nahasdzáán tsʼídá ałtso adideeshkʼą́ą́ł.
9 Áko índa shidineʼé saad niłtsʼíilgo bá ádeeshłíiłgo Bóhólníihii bízhiʼ dayózhíigo tʼáá łaʼ bizhiʼee yá nidaalʼaʼ dooleeł.
10 Iithiyópiya kéyahdóó tooh danílínígíí bilááhdę́ę́ʼ nídashookąąhii shitsʼą́ą́ʼ tadaoskaii baʼáłchíní éí nááhidoonihii shaa dayiijáah doo.
11 Éí bijı̨́įdi baa nidasoohkaii shichʼįʼ ádił nidaałteehgo ádił nidaʼiyoołzíʼígíí tʼáá ałtso doo nihił baa yádahasin da doo, háálá nihinííʼdóó bee ádaa dadzíínóhdlíii nahjįʼ kódeeshłííł, áádóó shidził diyinii* biniinaa tʼáadoo łaʼ ádaa hodzódlíigo agháʼádoołʼáhí da dooleeł.
12 Nihiníiʼjįʼ diné aʼohgo ádaa nitsídaakeesii áádóó hojoobaʼ ádaatʼéii biʼdeeshnihgo Bóhólníihii bízhiʼ yaa dadzólíi dooleeł,
13 Ízrel dineʼé daadzíʼígíí doo ádił nidaʼiilzíih da doo, doodaiiʼ doo dabiyoochʼíid da doo; doo nidi bindaʼadloʼgo yádaałtiʼ da doo, háálá bidaʼiilzą́ą doo áádóó nídanjah dooleeł, áko doo łaʼda bił yééʼ áhodoolíił da.
14 Záíyan bitsiʼ nílíinii, ayóó íitsʼaʼgo hótaał! Ízrel dineʼé nohłíinii, hadadołgháásh! Jerúsalem bitsiʼ nílíinii, nijéí tʼáá átʼé bee nił nihoozhǫǫhgo nił hózhǫ́ǫ leʼ.
15 Bóhólníihii éí nánihootʼáanii nahjįʼ kóyiilaa; nidaʼanaʼí baa chʼíheezhjééʼ. Ízrel dineʼé aláahgo binanitʼaʼí éí Bóhólníihii nilíinii nihinííʼgóó hólǫ́. Doo yáʼádaatʼéehii doo nikʼi nááhwiidoodleeł da.
16 Éí bijı̨́įdi Jerúsalem kóbidiʼdooʼniił, Tʼáadoo nił yéʼí, Záíyan nílíinii, nigaan tʼáadoo tʼóó nąąh nahíínilí.
17 Bóhólníihii nihiDiyin God éí nihitahgi ayóó ábóodziilii nilı̨́; bí yisdáʼiiníił doo, tʼáá íiyisí naa bił hózhǫ́ǫgo naa bił nihoozhǫǫh doo; bibee ayóóʼóʼóʼníinii bee bił hodéezyéel dooleeł; naa bił hózhǫ́ǫgo hataał doo.
18 Záíyan bitsʼą́ą́dóó danilíinii hodílzingo áłah náʼádleeh nídeitʼaahii yídin danilı̨́įgo bá nidahatʼiʼ yikʼee yínííł danilíinii áłah ádeeshłííł; éí ánahatʼiʼ bił yáádayiitsih.
19 Éí hoolzhishdi nichʼįʼ nidahwiiłnáanii tʼáá ałtso baa nídéeshtʼįįł, jóʼakon. Áádóó dadíʼnéesxodígíí yisdádeeshʼnił, áko chʼídabidiʼniiskaadii áłah áńdeeshdlííł; kédaayahgóó tʼóó baa yáhásingo ádabiʼdilʼíinii baa dahaʼniihgo áádóó chʼídabiditʼáahgo ádeeshłííł.
20 Éí hoolzhishdi nánihideeshʼishgo áłah ánánihideeshdlííł. Tʼáá aaníí, nihokááʼ dineʼé tʼáá ałtso bitahgóó nééhoʼdílzingo áádóó naa haʼniihgo yisnááh danohłíinii nihinááł nahjįʼ kódeeshłíiłgo danihííʼ nítʼééʼ yę́ę nihííʼ nídadoodleełgo ádeeshłííł, ní Bóhólníihii.
Footnotes
^ Jerúsalem kin haalʼáagi. Joel 2:1.
