Zechariah 5:1-11
5 Hazhóʼó dééʼı̨́ı̨́ʼ nítʼééʼ, naaltsoos ałchʼįʼ yisdisii wódahgo yitʼahgo yiiłtsą́, jóʼakon.
2 Áko áshíłní, Haʼátʼíishąʼ yíníʼı̨́? Áko ádííniid, Naaltsoos ałchʼįʼ yisdisii yitʼahgo yishʼı̨́. Tádiin ké silá áníłnééz áádóó ashdlaʼáadah ké silá áníłtéél.
3 Ákohgo áshidííniid, Díí nahasdzáán tʼáá siʼą́ą́ nítʼééʼ bikʼijįʼ tsʼídá hóyéeʼgo bá haʼoodzíiʼii átʼé; łahjí bee akʼeʼashchíinii bikʼehgo éí dazhniʼįįhii tsʼídá tʼáá ádzíłtso ázhdoodįįł índa łahjí bee akʼenááʼáshchíinii bikʼehgo éí dahayoochʼíidgo ádee hadahizdidziihii tsʼídá tʼáá ádzíłtso ádazhdoodįįł.
4 Tʼáá ałtsoní bee Bóhólníihii ání, Díí hakʼijįʼ kódeeshłíiłgo daʼniʼįįhii áádóó dabiyoochʼíidgo shízhiʼ yee ádee hadahididziihii bił yah ahodooleełgo tʼáá ákwii hólǫ́ǫ doo índa bikin bikʼijįʼ hóyéeʼgo bá hadeesdzihgo tsin áádóó tsé bee ádaalyaii tʼáá bił ałtso íidoołdįįł.
Bee naʼakáhí yistłʼónígíí biyiʼ asdzání sidáago ił ádzaa
5 Ákohgo diyingo naalʼaʼí shichʼįʼ yáłtiʼii neeʼnijįʼ shaa níyáago áshidííniid, Dego díníʼı̨́ı̨́ʼ; wódahgo haʼátʼíí hooleełgo yíníʼı̨́.
6 Áko ádíshní, Haʼátʼíishąʼ átʼé? Nítʼééʼ áshidííniid, Díí bee naʼakáhí yistłʼónígíí bee náás ookáłígíí átʼé. Kónááshidooʼniid, Díí kéyah tʼáá níłtéél nítʼééʼ bikááʼgóó ákódajítʼé.
7 Bee naʼakáhí béésh diłhı̨́hí bidáádítʼáhí de ályaa áádóó nítʼééʼ bee naʼakáhí biyiʼ góneʼ asdzání léiʼ sidáá lá, jóʼakon.
8 Áko diyingo naalʼaʼí ání, Díí tsʼídá doo yáʼáshóonii átʼé, áko asdzání éí bee naʼakáhí biyiʼ góneʼ anáyíyoogil áádóó béésh diłhı̨́hí adáádítʼáhí yidánéidiníłhan.
9 Nítʼééʼ dééʼı̨́įʼgo asdzání nidiltʼéego chʼítʼaʼ, jóʼakon, áko bitʼaʼígíí éí hoz bitʼaʼígi átʼéego níyol yee yitʼah áádóó bee naʼakáhí néidiiʼą́ągo nahasdzáán bikááʼdóó yótʼááhgóó yił eetʼaʼ.
10 Ákohgo diyingo naalʼaʼí shichʼįʼ yáłtiʼii ábidishní, Háágóoshąʼ bee naʼakáhí ayííʼą́?
11 Ákohgo áshidííniid, Sháínar kéyahgóó áadi kin yá íidoolííł, áko yá hashtʼehoolaago áadi bee naʼakáhí niidooʼááł.
